URHOMU-ẸMRO UYONO 43
IJORO 90 Arha Vwa Oma Bọn Owuowọnwan
Oborẹ Ene ru Fiẹ Ẹhẹn Eveva Kparobọ
“Vwo imwẹro kpahen ekwakwa ephian.”—1 THESS. 5:21.
OBORẸ ENE YONO KPAHEN
Ene yono kpahen oborẹ ene ru fiẹ ẹhẹn eveva kparobọ ri na sabu hobọte ogame ọwan rẹn i Jehova.
1-2. (a) Ẹhẹn eveva ego yẹ idibo i Jehova ina sabu vwo? (b) Me ye ne yono kpahen uvuẹn urhomu-ẹmro ọnana?
ỌWAN ephian e vwo ẹhẹn eveva a ọkezẹko. Jerẹ udje, roro kpahen uphuphẹn ro rhiẹ Oseri Jehova, ro roro sẹ i Jehova o ghini vwo ọdamẹ kpahiẹn. Fọkiẹ ọnana, ọnọ sabu bẹn hariẹn ro no bromarhame. Yanghene roro kpahen omizu ọhworhare rọ ha ogame i Jehova karo ọke rọ ha uphuphẹn, ukperẹ ọnọ hatua efe. Vwana fọkiẹ ebẹnbẹn akpọ na, ọnọ sabu rhe vwo ẹhẹn eveva sẹ orhienbro ro bruru ọke rọ ha uphuphẹn o serhọ. Roro kpahen omizu ọmase rọ kpako ne, rọ vwọ ghwai vwo omẹgbanhon. Ẹhẹn yen ọnọ sabu seriotọre, fọkime ọ vwọ sabu ruẹ te oborẹ o ruẹ bi-i. Wu nọ oma aruẹ enọ enana dẹ ne: ‘Jehova ọ ghini djokarhọ oborẹ mie ruẹ? Jehova o vwo ọdaremẹro kpahen izobo mi ze riẹn ne? Mi ji ghanren uvuẹn ikẹro i Jehova?’
2 Arha kpariroro vrẹn aruẹ enọ erana, aye ina sabu hobọte ogame ọwan. Uvuẹn urhomu-ẹmro ọnana, ene yono kpahen oborẹ iruemru-urhi Baibol ine ru ha userhumu rẹn ọwan orhianẹ e vwo ẹhẹn eveva sẹ (1) Jehova o vwo ọdamẹ kpahen ọwan, (2) orhienbro re bru vrẹn ne ọ sọre, yanghene (3) a ghanranren uvuẹn ikẹro i Jehova.
OBORẸ WU NE RU FIẸ ẸHẸN EVEVA KPAROBỌ
3. Izede ọgo ye ne ru fiẹ ẹhẹn eveva kparobọ?
3 Izede owu, yẹ ọrẹ ana guọlọ ẹkpahenrhọ rẹn enọ ọwan uvuẹn i Baibol na. Erhe ru omaran, esegburhomẹmro ọwan nọ nọ gbanhonrhọ, ene rhe ruẹ riaro, ne ne ji “mevigbanhon uvuẹn esegburhomẹmro na.”—1 Cor. 16:13.
4. Marhẹ ene ru “vwo imwẹro kpahen ekwakwa ephian”? (1 Thessalonians 5:21)
4 Se 1 Thessalonians 5:21. Baibol na ọ ha urhebro rẹn ọwan ne “vwo imwẹro kpahen ekwakwa ephian.” Marhẹ ene ruie lele? Ana sabu ha imwẹro ọwan vwanvwọn oborẹ e seri uvuẹn i Baibol na sẹ ọgbare. Jerẹ udje, roro kpahen uphuphẹn ra hunute na ro roro sẹ i Jehova o ghini vwo ọdamẹ kpahiẹn. O fori no rhiabọ dede iroro ọrana? Ẹjo, o fori no “vwo imwẹro kpahen ekwakwa ephian,” nyoma rọ nọ ha ukẹro ri Jehova ọ ha ni erhirhiẹ na nie.
5. Marhẹ i Jehova o ru “kpahanrhọ” enọ ọwan?
5 Ọke erhe se i Baibol na, ọwan ne “rhon” i Jehova rọ tẹmro rẹn ọwan. Ọrẹn, a guọlọ omẹdamu na sabu mẹrẹn ẹkpahenrhọ rẹn enọ ọwan. O fori na kpomavi rẹn ekete ri sekpahen ọwan ọke re se i Baibol na. Ana sabu ha ẹbe ukoko na tọn kodo kpahiẹn. (Prov. 2:3-6) Ana sabu nẹrhomo vwe i Jehova nọ ha userhumu rẹn ọwan mẹrẹn ẹkpahenrhọ rẹn enọ ọwan. Ọke ọrana, na na sabu mẹrẹn iruemru-urhi Baibol ọrhẹ irorẹdjẹ ri na ha userhumu rẹn ọwan. Ana ji mẹrẹn erere erhe se ikuegbe ihworho uvuẹn i Baibol na, ri ji dẹrughwaroghwu aruẹ erhirhiẹ ọrana.
6. Marhẹ uyono ukoko o ru ha userhumu rẹn ọwan fiẹ ẹhẹn eveva kparobọ?
6 Jehova ọ ji “tẹmro” rẹn ọwan nyoma uyono ukoko. Erhe rie uyono ukoko ọke ephian, ana sabu rhon ẹkpahenrhọ, yanghene ẹmro rẹ omizu ọ haphia, rọ nọ ha userhumu rẹn ọwan fiẹ ẹhẹn eveva kparobọ. (Prov. 27:17) Vwana, jene yono kpahen oborẹ ene ru fiẹ ẹhẹn eveva kparobọ.
WU RHE VWE ẸHẸN EVEVA SẸ I JEHOVA O VWO ỌDAMẸ KPAHUỌN
7. Onọ ọgo yẹ ihworho ezẹko ina sabu nọ?
7 Wu roro kpahen onọ ọnana dẹ ne, ‘Jehova ọ ghini djokarhọ oborẹ mie ruẹ?’ We rhe ni oma sakamu, ọnọ sabu bẹn wu ne vwo imwẹro taghene, wu na sabu rhiẹ ugbehian Ọmemama rọ mai rierun kparobọ uvuẹn ọsoso akpọ na. Ọkezẹko, Orodje David o ji vwo aruẹ iroro ọnana dẹ ne. Oma ọ merhenriẹn ro rhe taghene i Jehova ọ djokarhọ ituakpọ, omarana nọ nọren: “O Jehova, ọrọmo yẹ onyakpọ ru wa djokarhọ, ọrọmo yẹ ọmọ onyakpọ ru wa kerhọ ye?” (Ps. 144:3) Bọgo ya na mẹrẹn ẹkpahenrhọ rẹn onọ ọrana?
8. Lele oborẹ ọ ha uvuẹn 1 Samuel 16:6, 7, 10-12, me yi Jehova ọ djokarhọ uvuẹn oma ihworho?
8 Ọwan i yonorin uvuẹn i Baibol na, taghene i Jehova ọ djokarhọ ihworho rẹ awọrọ e nẹ sakamu. Jerẹ udje, Jehova o dje Samuel riẹ oghwa i Jesse, nọ djẹ owuọwan usuẹn emọyen ehworhare no rhiẹ orodje Israel obaro na. Jesse no se emọyen ehworhare awan irhiruẹ vwe i Samuel, ọrẹn o se i David ro rhiẹ ubrevwiẹ ye-e. b Udabọ ọrana, David yi Jehova ọ djẹre. (Se 1 Samuel 16:6, 7, 10-12.) Jehova ọ mẹrẹn aruẹ ohworho ri David ọ havwọ—nọyẹ uphuphẹn ro vwo ẹguọlọ kpahen i Jehova.
9. Mesoriẹ wu ne vwo imwẹro taghene i Jehova o vwo ọdamẹ kpahuọn? (Ni ifoto na.)
9 Roro kpahen oborẹ i Jehova o ru djephia ne taghene o vwo ọdamẹ kpahuọn. O veri taghene ọnọ yọ urhebro rọ nọ ha userhumu wẹn. (Ps. 32:8) Urhebro ọrana o serhọ fọkime ọ dabu rho. (Ps. 139:1) Wu rha ha urhebro i Jehova ruiruo, ji djokarhọ oborẹ o ru ha userhumu wẹn, no no mwuo ẹro taghene i Jehova o vwo ọdamẹ kpahuọn. (1 Chron. 28:9; Acts 17:26, 27) Jehova ọ djokarhọ omẹdamu ọnọ. Ọ mẹrẹn emamọ iruemru wu vwori, ro mwurien guọlọ rhiẹ ugbehian. (Jer. 17:10) Ọ ji guọlọ ne wu rhiẹ Ugbehian yen.—1 John 4:19.
“Wu rha guọlọ i [Jehova], ne wu na mẹriẹn.”—1 Chron. 28:9 (Ni udjoghwẹ 9) c
WU RHE VWO ẸHẸN EVEVA KPAHEN ORHIENBRO WU BRU VRẸN NE
10. Enọ ego ya na sabu nọ oma ọwan ọke erhe roro kpahen orhienbro re bru vrẹn ne?
10 Ihworho ezẹko ina sabu rhe roro sẹ aye i brorhiẹn rọ sọre ọke rọ vrẹnren na. Ọkezẹko, aye i brorhiẹn aye ine tiobọnu iruo rọ nọ yẹ aye omamọ igho, neneyo aye i sabu fiomarhọ ogame i Jehova vuọnvuọn. Vwana ẹgbukpe buebun i vrẹn ne. Ọkezẹko aye ina sabu rha mẹrẹn igbehian aye ri hatua iruo ọduado ri feri, re ji nyerẹn omamọ akpọ. Ọnana ọnọ sabu lẹrhẹ aye rhe roro: ‘Jehova o vwo ọdaremẹro kpahen izobo mẹ? Gbinẹ orhienbro mẹ ọ lẹrhẹ emru va mẹ obọ?’
11. Me yẹ ọrọ ya Psalm 73 o roro kpahen?
11 Orhianẹ aruẹ enọ erana e kpokpuo ẹhẹn, djokarhọ oborẹ oma o ruẹ ọrọ ya Psalm 73. Ọ mẹrẹn awọrọ re nyerẹn obọdẹn akpọ, kamẹriẹn aye i vwa rioja-a. (Ps. 73:3-5, 12) Ọke rọ mẹrẹn ihworho enana re fiẹkparobọ, no roro taghene ogame rọ ha rẹn i Jehova o fiemru-u. Ẹhẹn yen “no kpokpie ọke ephian” fọkiẹ aruẹ iroro erana. (Ps. 73:13, 14) Me yo ru kpahen iroro ọnana?
12. Lele oborẹ ọ ha uvuẹn Psalm 73:16-18, marhẹ ọbo ijoro na o ru kpọ iroro yi vi?
12 Se Psalm 73:16-18. Ọbo ijoro na, no rie oghwa ẹga i Jehova. Ẹhẹn yen nọ sabu totọre avwaye. Nọ mẹrẹnvwrurhe taghene ihworho ezẹko re nyerẹn omamọ akpọ vwana, e vwo ifiẹrorhọ rẹ aye ine nyerẹn bẹmẹdẹ obaro na-a. Fọkiẹ ọnana, ẹhẹn yen nọ sabu totọre ji ha ogame i Jehova karo uvuẹn akpenyerẹn yen. Habaye, nọ sabu rharhumu vwo oruru uvuẹn ogame i Jehova.—Ps. 73:23-28.
13. Me wu na sabu ru orhianẹ we vwo ẹhẹn eveva kpahen orhienbro wu bru vrẹn ne? (Ni ifoto na.)
13 We rhe se i Baibol na, wu ne vwo ẹhẹn ro totọre. Izede ọgo? Damoma roro kpahen ebrurhọ wu vwori vwana ọrhẹ erẹ wu na mẹrẹn obaro na, ne wu haye vwanvwọn oborẹ ọnọ phia rẹn ihworho ra vwa ga i Jehova. Aye i hẹroso efe aye, fọkime aye e vwo ifiẹrorhọ kpahen obaro na-a. Ọrẹn, Jehova o veri taghene ọnọ yọ ebrurhọ vrẹn oborẹ wu fiẹrorhọ. (Ps. 145:16) Roro kpahen onọ ọnana: Marhẹ yẹ akpọ ọwan o rhirhiẹ bi, orhianẹ a vwa ga i Jehova-a? Ọrẹn emru owu o fiotọre: Ihworho ri brorhiẹn aye ina ga i Jehova fọkiẹ ẹguọlọ aye i vwo kpahiẹn ọrhẹ awọrọ, ine vwo omamerhomẹ uvuẹn akpenyerẹn aye.
Tẹnrovi ebrurhọ ri Jehova o ve kpahen obaro na (Ni udjoghwẹ 13) d
WU RHE VWO ẸHẸN EVEVA TAGHENE WA GHANREN UVUẸN IKẸRO I JEHOVA-A
14. Erhirhiẹ ego yẹ ihworho ezẹko a dẹrughwaroghwẹ, onọ ọgo yẹ aye ina sabu roro kpahen?
14 Idibo i Jehova ezẹko, a rioja fọkiẹ ọho, emiamo, ọrhẹ emiamiamo erọrọ. Ọrana ọnọ sabu lẹrhẹ aye roro taghene aye a ghanren uvuẹn ikẹro i Jehova-a. Aye ina sabu nọ, ‘Mi ji ghanren uvuẹn ikẹro i Jehova?’
15. Imwẹro ọgo yẹ ọrọ ya Psalm 71 o vwori?
15 Ọrọ ya Psalm 71, o ji vwo aruẹ iroro ọrana. Nọ nẹrhomo: “Wu vwa nyaji mẹ vwo ọke omẹgbanhon mẹ orho riotọre ne-e.” (Ps. 71:9, 18) Ọbo ijoro na o vwo imwẹro taghene ọrhọ fuevwan ga i Jehova, ono simie, ji hobọtua ye. Ọbo ijoro na ọ mẹrẹnvwrurhe taghene Jehova o vwo omamerhomẹ kpahen ihworho re ruẹ ekete omẹgbanhon aye o teri, udabọ erhirhiẹ aye.—Ps. 37:23-25.
16. Izede ego yẹ imizu ri ho ne i ru ghanren rẹn i Jehova? (Psalm 92:12-15)
16 Orhianẹ wu ho ne, damoma ha ukẹro ri Jehova ọ nuo ha ni oma. Ọnọ ha userhumu wẹn fuevwan ga ye, udabọ erhirhiẹ ọnọ. (Se Psalm 92:12-15.) Ukperẹ wu na tẹnrovi oborẹ wu na ja sabu ru, roro kpahen oborẹ wu na sabu ru. Jerẹ udje, wu na sabu nyoma udje ọnọ ha userhumu rẹn awọrọ, ji dje ọdamẹ rẹn aye. Wu na sabu ta kpahen oborẹ i Jehova o ru ha userhumu wẹn uvwre ẹgbukpe buebun ne, ji ta rẹn awọrọ kpahen ifiẹrorhọ ọnọ kpahen ive yi. Wu vwa ha ukẹro sakamu ni omẹgbanhon ẹrhomo wa nẹ-ẹ. (1 Pet. 3:12) O toro erhirhiẹ ra havwọ-ọ, ọwan ephian i vwo oborẹ ana sabu tiobọnu rẹn i Jehova ọrhẹ awọrọ.
17. Mesoriẹ o fo na kẹnoma rẹn uruemru ra ha oma ọwan vwanvwọn awọrọ?
17 Ẹhọn orho seriotọre fọkime wu vwa sabu wian buẹn uvuẹn ogame i Jehova-a, jenẹ o mwu ẹro taghene oma ọ merhen i Jehova kpahen omẹdamuọ. Ọkezẹko, wu na sabu vwo ẹhẹn wu na ha oborẹ we ruẹ vwanvwọn erẹ awọrọ. Tiẹn aruẹ ẹhẹn ọrana! Mesoriẹ? Fọkime Jehova ọ vwọ ha ọwan vwanvwọn awọrọ-ọ. (Gal. 6:4) Jerẹ udje, Mary ọ yẹ i Jesu amivi rọ ghanranren omamọ. (John 12:3-5) Ọmase uku na o toro isele eva uvuẹn oghwa ẹga na, re nirin taghene ọ ghanre-en. (Luke 21:1-4) Udabọ ọrana, Jesu ọ mẹrenrẹn aye rhiẹ ihworho ri vwo esegburhomẹmro. Jehova o vwo ọdaremẹro kpahen ewian enọ ọrhẹ ẹguọlọ wu vwo kpahiẹn, o toro oborẹ ọ kamu te-e.
18. Me yọ nọ ha userhumu rẹn ọwan fiẹ ẹhẹn eveva kparobọ? (Se ekpeti na “ Ẹmro i Jehova Ọnọ ha Userhumu Wẹn Fiẹ Ẹhẹn Eveva Kparobọ.”)
18 Ọwan ephian e vwo ẹhẹn eveva ọkezẹko. Jerẹ oborẹ e yono ne, Baibol na ọnọ sabu ha userhumu rẹn ọwan wọnrọn hasuẹ aye. Omarana, wian gbanhon ne wu fiẹ ẹhẹn eveva kparobọ, ọke ọrana ẹhọn no no totọre. Itiọrurhomẹmro, Jehova ọ djokarhọ owian ọnọ. O vwo ọdaremẹro kpahen izobo enọ, ọnọ ji ha ebrurhọ wẹn. Vwo imwẹro taghene Jehova o vwo ọdamẹ ọrhẹ ẹguọlọ kpahen ọsoso idibo yi ra fuevwan ga ye.
IJORO 111 Oborẹ ọ Lẹrhẹ Ọwan Ghọghọ
a ẸMRO RE DJE FIOTỌRE: Uvuẹn urhomu-ẹmro ọnana, ẹhẹn eveva re yono kpahan na, yẹ ọrọ lẹrhẹ ọwan roro sẹ a ghanren rẹn i Jehova, yanghene orhienbro re bru vrẹn ne i serhọ. Enana rhẹ ẹhẹn eveva ra hunute uvuẹn i Baibol na, rọ rionbọrhọ ohworho ro vwo vwo esegburhomẹmro kpahen i Jehova ọrhẹ ive yi-i.
b Baibol na ọ hunute ẹgbukpe ri David ọ havwọ ọke ra djẹ ye-e, ọrẹn ọye uphuphẹn.—Se Oghwa Odẹrẹ ọrẹ September 1, 2011, aruọbe 29, udjoghwẹ 2.
