Anurẹsẹ ọnana ya nya ruẹ ekete Ọfuanfon uvuẹn oghwa ẹga na. New World Translation of the Holy Scriptures re tiobọnu e ki te ẹgbukpe 2023 ọ tare taghene, “anurẹsẹ na o seri te ikiubiti 20, ro serhọ rhẹ oborẹ oghwa na o keri te, habaye o rhi te ikiubiti 120.” (2 Chron. 3:4) Erhianrhian i Baibol erọrọ i ji ta taghene anurẹsẹ na o rhi te “ikiubiti 120,” ro mevirhọ taghene o rierun te isinhaghwẹ 175 (nọyẹ imita 53)!

Ọrẹn, New World Translation re tiobọnu ẹgbukpe 2023, nọ ta ẹmro ọnana kpahen oghwa ẹga i Solomon: “O rhi te ikiubiti 20,” yanghene isinhaghwẹ 30 (nọyẹ emrẹ imita 9). a Djokarhọ iroro ezẹko rọ soriẹ e ruẹ ewene ọnana.

1 Kings 6:3 ọ hunute oborẹ anurẹsẹ na o rhi te-e. Jeremiah rọ ya oghwẹmro ọrana, ọ hunute oborẹ anurẹsẹ na o seri te, ọrhẹ oborẹ o kodo te, ọrẹn, ọ hunute oborẹ o rhi te-e. Uvuẹn oghwẹmro rọ ha kpahiẹn, nọ dabu dje kpahen ekwakwa sansan ri ha uvuẹn oghwa ẹga na, tobọ te utaso re se Urhie Ọduado, okalokpọ owọnren ikpe na, ọrhẹ isimo eva ri ha anurẹsẹ na, ra ha erẹnmo ru. (1 Ki. 7:​15-37) Orhianẹ anurẹsẹ na o ghini rhi te imita 50, ji rierun ghwẹ ekete erọrọ uvuẹn oghwa ẹga na, mesoriẹ i Jeremiah ọ vwọ hunute oborẹ o rhi te? Ẹgbukpe buebun a vrẹn, egba eyaya i Jew ezẹko ni nẹ iyẹnrẹn taghene anurẹsẹ na o rierun ghwẹ ekete erọrọ uvuẹn oghwa ẹga i Solomonu-u.

Egba irherhe ezẹko i nọren sẹ ugbomoghwa oghwa ẹga na, ọnọ ghini sabu mọrọn anurẹsẹ ro rhi te ikiubiti 120. Ekete jerẹ anurẹsẹ ra nya ruẹ oghwa ẹga rọ ha uvuẹn Egypt ra ha atita ru ọke ahwanren, e rierun omamọ, obotọre aye e ji kerẹ omamọ. Ọrẹn, oghwa ẹga i Solomon ọ vẹnẹren. Egba irherhe ezẹko i tare taghene ugbomoghwa na o kputu ghwẹ ikiubiti erha-an, nọyẹ isinhaghwẹ 9 (yanghene imita 2.7). Fọkiẹ ọnana, ọwena owu ro sin oghwa re se Theodor Busink nọ tare: “Sekpahen oborẹ [anurẹsẹ oghwa ẹga na] o kputu te, o fiotọre taghene anurẹsẹ na o [rierun] te ikiubiti 120 na-a.”

Ọkezẹko, eri rharhumu ya 2 Chronicles 3:4 i ruẹ ibiẹ orusọ. Dedevwo imanuskripti ahwanren ezẹko i hunute ikiubiti “120” uvuẹn oghwẹmro ọnana, ọrẹn, ẹbe erọrọ jerẹ fifth-century Codex Alexandrinus ọrhẹ sixth-century Codex Ambrosianus, i hunute “ikiubiti 20.” Me yọ nọ sabu lẹrhẹ ọyẹbe ya “120,” ukperẹ ono rhiẹ 20? Oborẹ a ya “uzusionrin” ọrhẹ “ikiubiti” lele uvuẹn edjadjẹ i Hebrew i họhoma. Omarana, ọyẹbe ọnọ sabu ya “uzusionrin” ukperẹ ono rhiẹ “ikiubiti.”

Dedevwo ọ ghanranren na dabu rhe ekwakwa sansan ri ha uvuẹn oghwa ẹga i Solomon, ọrẹn, oborẹ ọ mai ghanren yẹ ọrẹ ene rhe oborẹ oghwa ẹga na o mevirhọ—nọyẹ oghwa ẹga ọduado ọrẹ ẹhẹn na. Ọ merhoma taghene Jehova ọ ha use rẹn idibo yi ephian, ni ha ẹga riẹn uvuẹn oghwa ẹga ọrana!—Heb. 9:​11-14; Rev. 3:12; 7:​9-17.