ẸGBUKPE ro rieri na, a ha imizu ehworhare buebun mwu ẹrhẹ ekpako ọrhẹ idibo owian uvuẹn akpọ na ephian. Itiọrurhomẹmro, oma ọnọ ghini merhuọn orhianẹ wu ha usuẹn imizu erana.

Ọren, wu na sabu vwo ibiẹ uduebro. Ọkpako ukoko owu re se Jason nọ tare: “Ọke a tu ha mẹ mwu ẹrhẹ ọkpako ukoko, ni mie roro taghene ewian ra yẹre mẹ i bun phian.” Moses ọrhẹ i Jeremiah i ji ni oma aye taghene aye e mwuovwan aye ine rhiabọ dede ewian mie i Jehova-a. (Ex. 4:10; Jer. 1:6) Wu rhe ji vwo aruẹ iroro ọrana, marhẹ wu ne ru fie kparobọ, ne wu rhe ruẹ riaro? Roro kpahen udje Olele Kristi owu re se Timothy.—Acts 16:1-3.

Ọkezẹko, Timothy ọ joma te ẹgbukpe 20 ne yanghene ọ vrẹn riẹ ne ọke i Paul ọ ha use riẹn no mo lelie wian owian imishọnari. Ọke i Paul o tu se i Timothy, ọkezẹko i Timothy ọnọ sabu rhe roro taghene o mwuovwan rọ nọ wian owian ra yẹriẹ na-a, fọkime, ọye uphuphẹn. (1 Tim. 4:11, 12; 2 Tim. 1:1, 2, 7) Ọrẹn, ẹgbukpe ikpe a vrẹn, Paul nọ ta rẹn imizu ri ha uvuẹn i Philippi: ‘Orho rhiẹ ọhọre ọrẹ Ọrovwori Jesu, mi ne dje i Timothy vwe are phẹrẹkpẹ. Fọkime, mie vwo ohworho owuorowu jerẹ ọye-e.’—Phil. 2:19, 20.

Me yọ ha userhumu rẹn i Timothy sabu rhiẹ omamọ ọkpako ukoko? Jene yono kpahen ekwakwa erhan rẹ udje i Timothy o yonirin ọwan.

1. Ọ ghini hẹrote edamẹ ihworho. Paul ọ ta rẹn Ilele Kristi ri ha uvuẹn i Philippi: “[Timothy ọnọ] dabu hẹrote edamẹ are.” (Phil. 2:20) Itiọrurhomẹmro, Timothy o vwo ọdamẹ kpahen ihworho. O ghini vwo ọdamẹ kpahen oborẹ ihworho na ine ru sabu vwo omamọ onyerẹnkugbe rhẹ i Jehova, omarana, nọ homakpahontọre wian fọkiẹ aye.

Wu vwa họhọ ihworho ezẹko ra ghwa imoto re brokpakpa rẹ aye ine te ekete ibọsu aye e gbo rhọ, ọrẹn, aye e vwo ọdamẹ kpahen ihworho rẹ aye ina kpare-e. William ro rhiẹ ọkpako ukoko vrẹn ẹgbukpe 20 ne, nọ ha urhebro rẹn imizu ra ha mwu obọ: “Vwo ẹguọlọ kpahen imizu na. Are i tẹnrovi edamẹ aye ukperẹ ono rhiẹ owian na ọvo.”

2. Ọ ha owian aghwoghwo na karo. Paul nọ ha iruemru i Timothy vwanvwọn erẹ awọrọ, nyoma ọ ta: “Awọrọ a guọlọ erere omobọ aye, orhiẹ eri Jesu Kristi-i.” (Phil. 2:21) Ọke i Paul ọ ya ileta uvuẹn i Rome, nọ mẹrẹnvwrurhe taghene imizu ezẹko ri ha uvuẹn i Rome a tẹnroviẹ ojemẹ omobọ aye. Omarana, aye i vwa rha dabu fiomarhọ owian na-a. Ọrẹn, Timothy o ru omara-an! Ọke uphẹn na o rhiẹ firhọ ro no ru riaro uvuẹn owian aghwoghwo na, Timothy nọ hẹrokele Isaiah, rọ tare: “Mẹmẹ na! Dje mẹ!”—Isa. 6:8.

Marhẹ wu ne ru sabu wian ewian enọ ọrhẹ ewian i Jehova kugbe? Ọrukaro, sanọ ekwakwa ri mai ghanren wẹn. Paul nọ ha urhebro phia: “Are i dabu gbẹro rhẹ ekwakwa ri mai ghanren.” (Phil. 1:10) Ha edamẹ Osolobrugwẹ e ru edamẹ enọ. Ọreva, ru ekwakwa ephian lọhọ. Kẹnoma rẹn ekwakwa ri na ha ọke ọrhẹ omẹgbanhon ọnọ. Paul nọ ha urhebro rẹn i Timothy: “Kẹnoma rẹn ojemẹ iphuphẹn, ọrẹn, hatua irueruo ọvwata, esegburhomẹmro, ẹguọlọ, ufuoma.”—2 Tim. 2:22.

 3. O fiomarhẹ ogame i Jehova. Paul nọ karorhọ imizu ri ha uvuẹn i Philippi: “Are i rhe imwẹro rọ ha phia kpahen omayen, taghene jerẹ ọmọ ọrhẹ ọsẹ, [Timothy] o leliri mẹ rioja neneyo iyẹnrẹn esiri na ọ sabu riaro rhọ.” (Phil. 2:22) Timothy rhẹ ọvwiẹlẹ-ẹ. O lele i Paul wian rhẹ ọsoso omẹgbanhon ọnẹyen, ọnana nọ lẹrhẹ ẹguọlọ aye i vwo kpahen owuowọnwan kodorhọ.

Ukoko i Jehova inyenana o ji vwo ewian buebun. Itiọrurhomẹmro, ewian ri ha uvuẹn ukoko i Jehova ọ yẹ ọwan evwẹnvuọn, ọ jeghwai lẹrhẹ ọwan tiẹ kẹrẹ imizu ri ha uvuẹn ukoko na. Omarana, bru ẹkẹ te oma wu na “wian ewian buebun uvuẹn owian Ọrovwori na.”—1 Cor. 15:58.

4. Ọ ha oborẹ o yonorin ruiruo. Paul nọ ya ileta vwe i Timothy: “Wu dabu nyalele iyono mẹ, udje mẹ, ẹkẹ mẹ, esegburhomẹmro mẹ, erhionrin mẹ, ẹguọlọ mẹ ọrhẹ edirin mẹ.” (2 Tim. 3:10) Fọkime i Timothy ọ ha oborẹ o yonorin ruiruo, nọ sabu mwuovwan ewian erọrọ.—1 Cor. 4:17.

Wu vwo omizu rọ do te edje uvuẹn ogame i Jehova ri wa hẹrokele? We rhe vwo-o, wu na sabu guọlọ owu uvuẹn ukoko na. Tom ro rhiẹ ọkpako ukoko te ẹgbukpe buebun ne nọ tare: “Ọkpako ukoko owu rọ tẹn ona no dje ọdamẹ kpahen mẹ, nọ jeghwai dabu yoni mẹ. Ni mie bruie nya nọ yẹ mẹ urhebro, ni mia ji haye ruiruo. Ọnana nọ lẹrhẹre mẹ vwo uduefigbere.”

5. O yono omayen ọke ephian. Paul ọrhọ ta rẹn i Timothy: “Yono oma neneyo wu sabu vwo uruemru ọ ga Osolobrugwẹ.” (1 Tim. 4:7) Ohworho rọ zorhẹ yanghene ruiruẹn erọrọ, o vwo ohworho ro yonie, ọrẹn, o ji fo no rho yono omayen ọke ephian. Paul nọ ha urhebro rẹn i Timothy: “Rhe fioma rhẹ isese afiede, rha ha urhebro phia, jeghwai rhe yono. . . . Roro kodo kpahen ekwakwa enana; fiomarhọ aye, neneyo ihworho ephian i sabu mẹrẹn eruriaro ọnọ vwrurhe.”—1 Tim. 4:13-15.

O fori ne wu rhe yono oma ọke ephian ne wu sabu tẹn ona. Dabu fiomarhọ uyono neneyo wu sabu rhe ekwakwa ekpokpọ ra phia uvuẹn ukoko na. Habaye, kẹnoma rẹn uruemru ra hẹroso oma ọwan phan, ọkezẹko, we roro taghene wu na sabu kwaphiẹ erhirhiẹ ephian rhọ, ọrẹn, wa guọlọ yono riaro rhọ kpahen erhirhiẹ na vwẹre-e. Hẹrokele i Timothy nyoma wu na “dabu tẹnrovi oma ọrhẹ uyono ọnọ.”—1 Tim. 4:16.

6. Ọ hẹroso ẹhẹn ọfuanfon i Jehova. Ọke i Paul ọ tẹmro kpahen owian aghwoghwo i Timothy, nọ ta riẹn: “Ha ẹhẹn ọfuanfon Osolobrugwẹ sẹrorẹ ẹghẹlẹ ọghoghanren ọnana rọ ha uvwre ọwan na.” (2 Tim. 1:14) Timothy ọ hẹroso ẹhẹn ọfuanfon i Jehova, omarana, nọ sabu wian owian aghwoghwo na mwidjẹn.

Donald ro rhiẹ ọkpako ukoko uvwre ẹgbukpe buebun ne, nọ tare: “O fori nẹ ehworhare ra ha mwu, i ha onyerẹnkugbe aye rhẹ Osolobrugwẹ ghanghanren. Ihworho ri ruẹ omaran, yi ne vwo omẹgbanhon rhọ. Aye i rha nẹrhomo vwe i Jehova nọ yẹ aye ẹhẹn ọfuanfon na, jeghwai dje iruemru ẹhẹn ọfuanfon na phia, aye ni ne rhiẹ ebrurhọ rẹn imizu ukoko na.”—Ps. 84:7; 1 Pet. 4:11.

O rhiẹ emru omamerhomẹ ra mẹrẹn imizu ehworhare buebun ji te owẹwẹ re ruẹ riaro uvuẹn ogame i Jehova. Jason ra hunute bi ne, nọ tare: “Uvwre ọke mie rhiẹ ọkpako na, mi yono ekwakwa buebun ne, uduefigbere mẹ ọ ji gbanhonrhọ ne. Vwana, mia riamerhen owian mẹ, mie ji nie taghene ghini uphẹn ọduado!”

Wu ne rhe ruẹ riaro uvuẹn ogame i Jehova? Orho rhiẹ omaran, brorhiẹn wu na hẹrokele i Timothy. Wu rhe ru omaran, wu ne rhiẹ ebrurhọ rẹn ihworho i Jehova.