1-2. Mesoriẹ ẹhẹn i Jesu ọ tagha?

UVUẸN ason rọ kẹta i Jesu o ki hwu, ẹhẹn yen nọ taghare. Phẹrẹkpẹ ọnọ rioja uhwu omiamiamo nẹ abọ ihworho ri vwa nyalele urhi. Ọrẹn, orhiẹ uhwu ọnẹyen yọ mai rhiẹ ọdamẹ riẹ-ẹn. Ọye o vwo ẹguọlọ okokodo kpahen Ọsẹ ye, jeghwai guọlọ ru oborẹ ọnọ merhiẹn oma. Jesu o rheri taghene ọrhọ fuevwan udabọ ebẹnbẹn ọgbogbanhon rọ sa na, ọye ono toroba erufon odẹ i Jehova. Jesu o ji vwo ẹguọlọ kpahen ihworho, jeghwai rhe taghene ifiẹrorhọ re ne vwo arhọ i bẹmẹdẹ, o surhobọmwu ọrẹ ọye ọnọ fuevwan kpahen i Jehova ye toba akpenyerẹn yen.

² Dedevwo ẹhẹn i Jesu ọ taghare, ọye o vwo ufuoma. Nọ ta rẹn inyikọ ye: “Mi tiobọnu ufuoma rẹn are.” (John 14:27) Jesu o vwo “ufuoma ọrẹ Osolobrugwẹ,” ẹhẹn ro totọre ọrhẹ ufuoma rẹ ohworho ọ mẹrẹn orho vwo obọdẹn onyerẹnkugbe rhẹ i Jehova. Ọrana yọ ha userhumu rẹn i Jesu je brudu.—Phil. 4:6, 7. 

3. Me ye ne yono kpahen uvuẹn urhomu-ẹmro ọnana?

³ O vwo owuorọwan usuẹn ọwan rọ nọ dẹrughwaroghwu aruẹ ọhiẹn ri Jesu o diri-in, ọrẹn ọsoso ihworho re leli Jesu ina mẹrẹn ebẹnbẹn. (Matt. 16:24, 25; John 15:20) Jerẹ i Jesu, ẹhẹn ọwan ọnọ tagha ọkezẹko. Me ye ne ruo neneyo e je rhe vwo ọfiamu jeghwai kpare ufuoma ọwan fughwẹ? Jene yono kpahen ekwakwa esa ri Jesu o ruru uvuẹn owian aghwoghwo yi ọke rọ ha otọrakpọ na, jeghwai mẹrẹn oborẹ ene ru hẹrokelie ọke arha dẹrughwaroghwu ebẹnbẹn.

4. Lele oborẹ ọ ha 1 Thessalonians 5:17, idje ego yi djephia taghene i Jesu ọ nẹrhomo omamọ uvuẹn ẹdẹ ye rọ kẹta uvuẹn otọrakpọ na?

⁴ Se 1 Thessalonians 5:17. Jesu ọ nẹrhomo omamọ uvuẹn ẹdẹ rọ kẹta uvuẹn akpenyerẹn yen. Ọke rọ ha Ọkarorhọ Uhwu ọnẹyen mwu, nọ nẹrhomo rhẹ ibrẹdi ọrhẹ enyo na. (1 Cor. 11:23-25) Bọmọke aye i ki nẹ ekete aye e ruẹ Orẹ Ọnyavrẹn na, Jesu ọrhẹ idibo yi e nẹrhomo kugbe. (John 17:1-26) Ọke ọye ọrhẹ idibo na e te Ugbenu Olives ason ọrana, nọ nẹrhomo ọgbọ buebun. (Matt. 26:36-39, 42, 44) Habaye, ẹmro ri Jesu ọ ta kẹta o ki hwu, ọ tariẹ ọrẹ ẹrhomo. (Luke 23:46) Jesu ọ nẹrhomo vwe i Jehova kpahen i kemru kemru rọ phia riẹn uvuẹn ẹdẹ rọ kẹta uvuẹn akpenyerẹn yen.

5. Mesoriẹ uduefigbere inyikọ na o seriotọre?

⁵ Iroro owu rọ soriẹ i Jesu ọ sabu din ebẹnbẹn, ọrẹ ọye ọ hẹroso Ọsẹ ye ji nẹrhomo vwe yi. Ọrẹn, inyikọ na e fioma rhọ ẹrhomo ẹnẹ uvuẹn ason ọrana-a. Omarana, uduefigbere aye no seriotọre ọke ọdamuni ọ rhe. (Matt. 26:40, 41, 43, 45, 56) Ọwan i rha dẹrughwaroghwu ebẹnbẹn, ana sabu fikparobọ arha nyalele udje i Jesu jeghwai rha “nẹrhomo ọke ephian.” Me ya na sabu nẹrhomo kpahen?

6. Marhẹ esegburhomẹmro ono ru ha userhumu rẹn ọwan vwo ufuoma?

⁶ Ọwan ina sabu nẹrhomo rẹn i Jehova nọ ‘yẹ ọwan esegburhomẹmro rhọ.’ (Luke 17:5; John 14:1) Ọwan i guọlọ esegburhomẹmro fọkime Echu ọnọ damu idibo i Jesu ephian. (Luke 22:31) Marhẹ esegburhomẹmro ono ru ha userhumu rẹn  ọwan sẹrorẹ ufuoma ọke arha tobọ vwo ebẹnbẹn owu yanghene ọrọrọ? Erhe ru oborẹ ana sabu ru ne din ebẹnbẹn na hin, esegburhomẹmro ono mwu ọwan nyaji ekwakwa vwo rẹn i Jehova. Fọkime e rheri taghene ọnọ sabu ruẹ ekwakwa serhọ vrẹn oborẹ e fiẹrorhọ, ọwan ne vwo ẹhẹn ro totọre ọrhẹ omefuon.—1 Pet. 5:6, 7. 

7. Me wu yono nẹ oborẹ Robert ọ tare?

⁷ Ẹrhomo ọ ha userhumu rẹn ọwan sẹrorẹ obọdẹn ufuoma, o toro ebẹnbẹn ra dẹrughwaroghwẹ-ẹ. Roro kpahen udje i Robert ro rhiẹ ọkpako ukoko rọ ha ẹgbukpe 80 ne. Nọ tare: “Urhebro rọ ha Philippians 4:6, 7 ọ ha userhumu mẹ nyerẹn ghele ebẹnbẹn buebun uvuẹn akpenyerẹn mẹ. Mi vwo ebẹnbẹn igho. Uvwre ọkezẹko, ne tiri mẹ nẹ ẹrhẹ ọkpako ukoko.” Me yọ ha userhumu rẹn Robert sẹrorẹ ufuoma? Nọ tare: “Mia nẹrhomo ogege ẹhẹn mẹ orho kpokpi mẹ, mi mẹrẹnvwrurhe taghene ọke mia rha nẹrhomo rhọ, ẹhẹn mẹ nọ dabu totọre.”

8. Jerẹ oborẹ ọ ha uvuẹn John 8:29, me yẹ iroro ọrọrọ rọ lẹrhẹ i Jesu vwo obọdẹn ufuoma?

⁸ Se John 8:29. Jesu o vwo obọdẹn ufuoma ọke ra tobọ kparahasuiẹ, fọkime o rheri taghene o ruẹ oborẹ ọmerhen Ọsẹ ye oma. Ọ huvwele ọke ephian tobọ te ọke rọ bẹn riẹn. Jesu o vwo ẹguọlọ kpahen i Jehova ji ha ogame Ọsẹ ye rhiẹ emru ukaro uvuẹn akpenyerẹn yen. Ọ ki rhiẹ otọrakpọ na, Jesu “ọwena owian” ro leli Osolobrugwẹ wian. (Prov. 8:30) Ọke rọ ji ha otọrakpọ na, o yono awọrọ kpahen Ọsẹ ye rhẹ oruru. (Matt. 6:9; John 5: 17) Owian ọrana ọ yẹ Jesu aghọghọ rode.—John 4:34-36.

9. Mesoriẹ ọwan e vwo ufuoma ọke ra ha uvuẹn owian aghwoghwo na?

⁹ Ana sabu hẹrokele i Jesu nyoma ra huvwele i Jehova jeghwai “wian ewian buebun uvuẹn owian Ọrovwori na ọke ephian.” (1 Cor. 15:58) Arha “dabu fiomarhọ” owian aghwoghwo na, ana sabu ha ukẹro ro serhọ ni ebẹnbẹn re vwori. (Acts 18:5) Jerẹ udje, ihworho ra mẹrẹn uvuẹn owian aghwoghwo na i vwo ebẹnbẹn ghwẹ ọwan. Ọrẹn, aye i rhe yono oborẹ aye ine ru vwo ẹguọlọ kpahen i Jehova jeghwai nyalele urhebro yi, akpenyerẹn aye no rhomẹrhọ, oma nọ ji merhen aye rhọ. Ọke arha mẹrẹn ewene ọrana, ne vwo imwẹro rhọ taghene i Jehova ọnọ hẹrote ọwan. Imwẹro ọrana nọ ha userhumu rẹn ọwan sẹrorẹ obọdẹn ufuoma. Omizu ọmase owu ro ni omayen sakamu, ro ji vwo ẹhẹn ro seriotọre, ọ mẹrẹn ọnana rhiẹ urhomẹmro. Nọ tare: “Ọke mia ha uvuẹn owian aghwoghwo na, mia sabu sun iroro mẹ jeghwai mẹrẹn omamerhomẹ. Mie roro taghene owian aghwoghwo mie vwobọrhọ na, yọ lẹrhe mẹ tiẹ kẹrẹ i Jehova.”

10. Me wu yono nẹ oborẹ Brenda ọ tare?

¹⁰ Roro kpahen udje omizu ọmase re se Brenda. Ọye ọrhẹ ọmọyen ọgbọtọ i vwo emiamọ ọgbogbanhon owu. Aga ukpolo yẹ Brenda o siyẹ ọke ephian, ọ jeghwai vwo omẹgbanhon pha-an. Ọrẹn ọkezẹko, o ghwoghwo nẹ oghwa riẹ oghwa, aruẹ aghwoghwo rọ mai fiomarhọ ọrẹ ileta ẹya. Nọ tare: “Ọke mia mẹrẹnvwrurhe taghene a sabu simi emiamo mẹ uvuẹn akpọ ọnana-a, ni mi dabu tẹnrovi owian aghwoghwo na. Itiọrurhomẹmro, aghwoghwo o ti ẹhẹn mẹ nẹ ebẹnbẹn mẹ. Ọ lẹrhe mẹ roro kpahen oborẹ mi ne ru ha userhumu rẹn ihworho mi vware. Habaye ọ lẹrhe mẹ roro kpahen ifiẹrorhọ mi vwo kpahen obaro na.”

11-13. (a) Marhẹ inyikọ na ọrhẹ awọrọ i ru rhiẹ obọdẹn igbehian rẹn i Jesu? (b) Marhẹ ọnana ọ hobọte i Jesu lele?

¹¹ Uvwre ọsoso ọke i Jesu o ghwoghwo, inyikọ na ri fuevwan i ghini rhiẹ obọdẹn igbehian rẹn i Jesu. Aye aruẹ igbehian ri Baibol na ọ ta kpahen: “O vwo ugbehian rọ kpẹnkpẹn ghwẹ omizu.” (Prov. 18:24) Jesu ọ ha ukẹro ọghoghanren ni igbehian yen na. Uvwrẹ ọke ro ghwoghwo, imizie owuorowu e vwo esegburhomẹmro kpahiẹ-ẹn. (John 7:3-5) Uvwre ọke owu, imizie ne roro taghene o kpomorhuẹ. (Mark 3:21) Ọrẹ ovẹnẹ, uvuẹn ason i Jesu o ki hwu nọ sabu ta rẹn inyikọ ye ri fuevwan: “Are yẹ ihworho ri tigban mẹ uvuẹn ọke edamuni mẹ.”—Luke 22:28.

¹² Inyikọ na i ru Jesu sọ ọkezẹko, ọrẹn ọ tẹnrovi orusọ na-a, ukpomaran ọ tẹnrovi esegburhomẹmro aye. (Matt. 26:40; Mark 10:13, 14; John 6:66-69) Uvuẹn ason rọ kẹta e ki kpe i Jesu, nọ ta rẹn inyikọ ye ri fuevwan: “Mi se rẹ are igbehian mẹ, fọkime mi ta rẹn are kpahen ọsoso ekwakwa mi rhon mie Ọsẹ mẹ.” (John 15:15) O vwo ẹfrọ-ọ, igbehian i Jesu i ghini ha udu rhọ ye aghwẹ omamọ. Userhumu rẹ aye i harẹn Jesu uvuẹn owian aghwoghwo na, ọ lẹrhẹ oma merhiẹn omamọ.—Luke 10:17, 21.

¹³ Haba inyikọ na, Jesu o ji vwo igbehian erọrọ, ehworhare ọrhẹ emẹse ri ha userhumu riẹn uvuẹn owian aghwoghwo na ọrhẹ nyoma izede erọrọ. Ezẹko i ha use  riẹn nọ rhiẹ oghwa aye, neneyo o lele aye riẹ emaren. (Luke 10:38-42; John 12:1, 2) Awọrọ i lelirie nya onya jeghwai ghalẹ ekwakwa aye i vwori rhẹ ọye. (Luke 8:3) Jesu o vwo obọdẹn igbehian fọkime ọye omamọ ugbehian rẹn aye. O ruẹ ekwakwa irhorhomu rẹn aye, o fiẹrorhọ oborẹ aye ina ja sabu ru-u. Jesu ohworho rọ gbare, ọrẹn o vwo ọdaremẹro kpahen userhumu igbehian yẹn ri vwa gba. Jesu o vwo omamọ igbehian ri ha userhumu riẹn sẹrorẹ ufuoma yen.

14-15. Marhẹ ene ru sabu vwo emamọ igbehian, marhẹ aye ine ru ha userhumu rẹn ọwan?

¹⁴ Emamọ igbehian ina ha userhumu rẹn ọwan sẹrorẹ atamwu ọwan kpahen i Jehova. Izede rọ mai serhọ re ne mwu emamọ igbehian, yẹ ọrẹ ene rhiẹ omamọ ugbehian. (Matt. 7:12) Jerẹ udje, Baibol na ọ ha udu rhẹ ọwan aghwẹ na ha ọke ọrhẹ omẹgbanhon ọwan sa awọrọ erhumu, maido ihworho ri ha “erhirhiẹ ọkanronmẹ.” (Eph. 4:28) Wu na sabu roro kpahen owuọwan uvuẹn ukoko ọnọ wu na sabu ha userhumu riẹn? Wu na sabu dẹ ekwakwa rẹn omizu rọ vwọ sabu nẹ oghwa fọkiẹ emiamo yanghene ọho? Wu na sabu sere emaren rẹn ekrun ri vwo ebẹnbẹn igho? Orhianẹ wu rhe oborẹ a ha iwẹbsaiti jw.org^® yanghene app i JW Library^® na ruiruo, wu na sabu ha userhumu rẹn awọrọ uvuẹn ukoko ọnọ nẹ aye i rhe oborẹ a haye ruiruo? Arha tẹnrovi oborẹ ene ru ha userhumu rẹn awọrọ, oma nọ nọ merhen ọwan rhọ.—Acts 20:35.

 ¹⁵ Igbehian re vwori ina ha userhumu rẹn ọwan arha dẹrughwaroghwu ebẹnbẹn, jeghwai ha userhumu rẹn ọwan vwo ufuoma. Jerẹ oborẹ Elihu ọ kerhọ i Job ọke rọ ta ebẹnbẹn yen riẹn, igbehian ọwan ina ha userhumu rẹn ọwan nyoma aye ina dabu kerhọ ọwan ọke arha ta ebẹnbẹn ọwan rẹn aye. (Job 32:4) O fo ne fiẹrorhọ taghene igbehian ọwan yi ne brorhiẹn rẹn ọwa-an, ọrẹn ono rhiẹ emru ẹghwanren arha kerhọ urhebro i Baibol rẹ aye i harẹn ọwan. (Prov. 15:22) Jerẹ oborẹ Orodje David ọ homariotọre rhiabọ dede userhumu mie igbehian yen, o fori na ji homariotọre rhiabọ dede userhumu rẹ igbehian ọwan i harẹn ọwan ọke arha ha ebẹnbẹn. (2 Sam. 17:27-29) Itiọrurhomẹmro, aruẹ obọdẹn igbehian enana ẹghẹlẹ ro nẹ obẹ i Jehova rhe.—Jas. 1:17.

16. Sekpahen oborẹ ọ ha uvuẹn Philippians 4:6, 7, me yẹ izede owu ene ru vwo ufuoma? Djeyi fiotọre.

¹⁶ Se Philippians 4:6, 7. Mesoriẹ i Jehova ọ ta rẹn ọwan taghene ana sabu vwo ufuoma ro tiobọnẹ rẹn ọwan “nyoma Kristi Jesu”? Fọkime ana sabu vwo ufuoma rọ tọ, ọrhẹ ẹhẹn ro totọre arha dabu vwẹruọ jeghwai vwo esegburhomẹmro kpahen ẹrhẹ i Jesu. Jerẹ udje, nyoma izobo otan i Jesu, ana sabu harhomu ọsoso orusọ ọwan. (1 John 2:12) Itiọrurhomẹmro, ọnana ghini emru urhebro rẹn ọwan! Ri Jesu o rhiẹ Orodje Uvie Osolobrugwẹ na, ono tiẹ ẹkuọn ephian rẹ Echu ọrhẹ akpọ ye i ha vwe ọwan nie. (Isa. 65:17; 1 John 3:8; Rev. 21:3, 4) Ọnana ọ yẹrẹ ọwan imwẹro ọgbogbanhon! Dedevwo Jesu ọ yẹrẹ ọwan owian ọgbogbanhon, ọye ọrhẹ ọwan i gba havwiẹ, ọnọ hobọtua ọwan bọmọke enyerakpọ ọnana ono toba. (Matt. 28:19, 20) Ọrana ọ ghini yẹ ọwan uduefigbere ọgbogbanhon! Omefuon, ifiẹrorhọ ọrhẹ uduefigbere i ha usuẹn ekwakwa ri na ha userhumu rẹn ọwan vwo ufuoma.

17. (a) Marhẹ Olele Kristi ono ru sabu sẹrorẹ ufuoma ọnẹyen? (b) Jerẹ oborẹ e ve rhẹ John 16:33, me ya na sabu ru?

¹⁷ Marhẹ wu ne ru sẹrorẹ ufuoma ọke wu rha dẹrughwaroghwu ebẹnbẹn egbogbanhon? Wu na sabu ruẹ ọnana nyoma wu na hẹrokele udje i Jesu. Ọrukaro, fiomarhọ ẹrhomo ẹnẹ ọke ephian. Ọreva, huvwele i Jehova jeghwai ghwoghwo rhẹ oruru, ọrhọ tobọ rhianẹ ọ lọhọ wu na huvwele-e. Ọresa, nekpẹn userhumu mie igbehian enọ wu rha ha ebẹnbẹn. Ọke ọrana, ufuoma Osolobrugwẹ nọ nọ sẹrorẹ ọmudu ọrhẹ oghwa iroro ọnọ. Ne wu na ji sabu fi ebẹnbẹn ephian kparobọ jerẹ i Jesu.—Se John 16:33.