1. Me yẹ idibo Osolobrugwẹ ephian i guọlọ ru, mesoriẹ? (Ni ifoto obaro ọbe na.)

KRISTI JESU o jurhi rẹn idibo yi nẹ aye i “nyarhẹn, . . . ye ruẹ idibo ihworho uvuẹn egbamwa na ephian.” (Matt. 28:19) Idibo Osolobrugwẹ ephian i guọlọ yono oborẹ aye ine ru “wian owian aghwoghwo” ọnana ra yẹrẹ aye na vuọnvuọn. (2 Tim. 4:5) Ọrẹ imwẹro, owian ọnana ọ ghanranren omamọ, o fo oborẹ ene ruo, ọ jeghwai kpata ghwẹ owian ọrọrọ uvuẹn akpenyerẹn ọwan. Ọrẹn, ọnọ sabu bẹn ra na ghwọghọ ọke buebun uvuẹn owian aghwoghwo na jerẹ oborẹ ọwan i guọlọre.

2. Ebẹnbẹn ego ya dẹrughwaroghwẹ ọke re fiomarhọ ogame Uvie na vuọnvuọn?

² O ji vwo ewian eghoghanren erọrọ ri guọlọ ọke ọrhẹ omẹgbanhon ọwan. Ana sabu rha wian inọke buebun ẹdukwẹdẹ, na mẹrẹn igho hẹrote oma ọwan ọrhẹ ekrun ọwan. Ọnọ sabu bẹn ra na hẹrote ekrun ọwan, ana sabu kpomu, ẹhẹn ọwan ọnọ sabu seriotọre yanghene ana ji sabu dẹrughwaroghwu emiamiamo ọrhẹ erhirhiẹ ọho. Marhẹ ene ru sabu fiomarhọ owian Uvie na vuọnvuọn uvuẹn erhirhiẹ enana?

3. Me ya na sabu ta kpahen ẹmro i Jesu rọ ha uvuẹn Matthew 13:23?

³ O fo nẹ ẹhẹn ọwan o seriotọre orhianẹ erhirhiẹ ọwan ọ vwọ lẹrhẹ ọwan sabu wian owian i Jehova vuọnvuọ-ọn. Jesu o rheri taghene omẹgbanhon ọwan ephian i vẹnẹren. (Se Matthew 13:23.) Jehova ọ ha ukẹro ọghoghanren ni kemru kemru re ruẹ riẹn uvuẹn ogame ra haphia nẹ ẹhẹn sa, arha ha ọsoso omẹgbanhon ọwan wian yen. (Heb. 6:10-12) Obọreva ye, ana sabu roro taghene erhirhiẹ ọwan ọnọ ha uphẹn rẹn ọwan ru rhọ. Uvuẹn urhomu-ẹmro ọnana, ene yono kpahen oborẹ ene ru ha owian Uvie na karo uvuẹn akpenyerẹn ọwan, nyerẹn akpọ rọ lọhọre, jeghwai dabu ru ona aghwoghwo ọrhẹ uyono ọwan rhomurhọ. Omarana, me yo mevirhọ  re ne fiomarhọ owian Uvie na vuọnvuọn?

4. Me yo mevirhọ re ne fiomarhọ owian Uvie na vuọnvuọn?

⁴ Na sabu wian owian Uvie na vuọnvuọn, ene vi rhe vwobọrhọ owian aghwoghwo ọrhẹ uyono ọke ephian. Ọrẹn, orhiẹ ọke ra ghwọghọ rhẹ owian Uvie na yọ mai ghanre-en. Oborẹ o mwu ọwan ghwoghwo ọ ghanranren rẹn i Jehova. Fọkime ọwan i vwo ẹguọlọ kpahen i Jehova ọrhẹ ereva ọwan, na ha ọsoso ẹhẹn ọwan wian owian Uvie na. * (Mark 12:30, 31; Col. 3:23) Ra na ga Osolobrugwẹ vuọnvuọn o mevirhọ ọrẹ ana ha ọsoso ẹhẹn ọwan, omẹgbanhon ọrhẹ ọke ọwan ruiruo vuọnvuọn. Erhe vwo ọdaremẹro kpahen uphẹn re vwori re ne ghwoghwo, ọwan na damoma ghwoghwo iyẹnrẹn esiri na rẹn ọsoso ihworho ra mẹrẹnren.

5-6. Dje udje oborẹ ohworho rọ vwọ ghwai vwo ọke phan ono ru ha owian Uvie na karo.

⁵ Roro kpahen idama ro vwo ẹguọlọ kpahen isorogu ekporo. Oma ọmerhiẹn ọke ro kporiẹ. Omarana, na yẹriẹ owian ro no kporo isorogu rẹn ihworho uvuẹn ekete ra riakpọ uvuẹn ehion ọkprughwre owuowu. Ọrẹn, igho rọ mẹrẹn nẹ owian ọnana o vwo te yi hẹrote edamẹ ye-en. Omarana, no yono uvuẹn isukuru nẹ imọnde ye te ifraide. Dedevwo isukuru na yọ mai rhirhiẹ, ọrẹn ikpekporo yọ mai vwo ẹguọlọ kpahen. Ọ guọlọ ruẹ ona yen rhomurhọ jeghwai rhe kporo isorogu na ọke ephian. Udabọ ọrana, oma ọmerhiẹn ọke rọ ha uphẹn ro vwori ephian kporo isorogu na, ọrhọ tobọ rhiẹ ibiẹ ọke dede.  

⁶ Omaran ọ ji havwọ, ọkezẹko erhirhiẹ wu havwọ ọ vwọ lẹrhuọ sabu ghwọghọ uchunu ọke wu guọlọre rhẹ aghwoghwo-o. Ọrẹn, owian ọrana oborẹ wu vwo ẹguọlọ kpahen. Wa damoma ruẹ ena enọ rhomẹrhọ neneyo wu sabu ghwoghwo iyẹnrẹn esiri na izede ro mwidjẹn. Ra mẹriẹn taghene wu vwo ewian buebun na, wu na sabu rhe roro kpahen oborẹ wu ne ru ha owian aghwoghwo na karo.

7-8. Marhẹ ene ru hẹrokele uruemru i Jesu o vwo kpahen owian aghwoghwo na?

⁷ Jesu o dje udje ro serhọ sekpahen uruemru ro vwo kpahen owian aghwoghwo na. Ọ ha owian aghwoghwo na rhẹ emru ukaro uvuẹn akpenyerẹn yen. (John 4:34, 35) Ọ nya iroko buebun neneyo ọ sabu ghwoghwo rẹn ihworho buebun. Ọ ha uphẹn ro vwori ephian ghwoghwo rẹn ihworho uvuẹn afiede ọrhẹ eghwa aye. Owian aghwoghwo na yi Jesu ọ wianren uvuẹn ọsoso akpenyerẹn yen.

⁸ Ana sabu hẹrokele i Kristi nyoma ra ha uphẹn re vwori ephian ghwoghwo iyẹnrẹn esiri na rẹn ihworho uvuẹn ekete ra vwa aye. E vwo omwemẹ ra na sẹrerhumuji edamẹ omobọ ọwan neneyo a sabu wian owian aghwoghwo na. (Mark 6:31-34; 1 Pet. 2:21) Ihworho ezẹko uvuẹn ukoko na a sabu ga ẹrhẹ ọkobaro oghẹnrensan, ọkobaro ọke ephian, yanghene ọkobaro ibiọke. Awọrọ i yono edjadjẹ erọrọ yanghene kwa riẹ ekete ra mai guọlọ ighwoghwẹmro Uvie na. Ọrẹn, ighwoghwẹmro ri ha ukoko owuowu ra ha ọsoso omẹgbanhon aye ghwoghwo, ya mai wian owian aghwoghwo na. Kerhirhiẹ kerhirhiẹ, Jehova o vwo fiẹrorhọ taghene ana wian vrẹn ekete omẹgbanhon ọwan o teri-i. Ọ guọlọre nẹ ọwan ephian i riamerhen ogame ra ha riẹn “sekpahen iyẹnrẹn esiri ọrẹ Osolobrugwẹ oma ọ merhan na.”—1 Tim. 1:11; Deut. 30:11.

9. (a) Dedevwo Paul ọ wian owian omobọ ye, marhẹ o ru ha owian aghwoghwo na karo? (b) Me yi Acts 28:16, 30, 31 o dje kpahen uruemru i Paul o vwo kpahen owian aghwoghwo na?

⁹ Ọnyikọ Paul o dje udje rọ gbare phia sekpahen oborẹ ene ru ha owian aghwoghwo na karo. Ọke rọ rhiẹ i Corinth ọgbọreva fọkiẹ owian imishọnari ọnẹyen, nọ wian owian re ruẹ oghwọgbọ fọkime o vwo igho bu-un. Ọrẹn, Paul ọ ha owian ọnana karo uvuẹn akpenyerẹn ye-en. Ọ wian owian ọnana neneyo ọ sabu hẹrote omayen uvuẹn owian aghwoghwo na, nọ sabu ghwoghwo iyẹnrẹn esiri na rẹn itu i Corinth ọphẹ. (2 Cor. 11:7) Dedevwo Paul ọ wian ewian omobọ ye ezẹko, ọ ha owian aghwoghwo na karo, no ji ghwoghwo uvuẹn Ẹdẹ Omeronmo ephian. Ọke erhirhiẹ i Paul o rhomu ibiesuọn, no sabu fiomarhọ owian aghwoghwo na. Nọ “dabu fiomarhọ ẹmro na, ro se oseri rẹn itu i Jew na, no djephia taghene Jesu yi Kristi na.” (Acts 18:3-5; 2 Cor. 11:9) Ọke re jurhi rẹn i Paul uvuẹn i Rome taghene o vwo nẹ oghwa ye ẹgbukpe eva-a, no ji ghwoghwo rẹn ihworho ri rhiẹ ọpha ruiẹ, jeghwai ya ileta buebun. (Se Acts 28:16, 30, 31.) Paul o vwo omwemẹ rọ nọ sẹrerhumuji kemru kemru rọ nọ sabu jaghwẹrhọ owian aghwoghwo yi. Nọ yare: “Ra mẹriẹn taghene ọwan i vwo owian aghwoghwo ọnana . . . , ọwan i vwe fiobọrhotọre-e.” (2 Cor. 4:1) Jerẹ i Paul, ọrhọ tobọ rhianẹ ana wian ewian omobọ ọwan, ana ji sabu ha owian Uvie na karo uvuẹn akpenyerẹn ọwan.

10-11. Marhẹ wu ne ru fiomarhọ owian Uvie na vuọnvuọn orhianẹ we kpomẹ?

¹⁰ Orhianẹ a vwa sabu riẹ aghwoghwo nẹ oghwa riẹ oghwa fọkiẹ ọho yanghene emiamo-o, ana ji sabu ghwoghwo nyoma izede erọrọ. Ilele Kristi erukaro na i ghwoghwori uvuẹn ekete ephian aye a mẹrẹn ihworho. Aye i ha kuphẹn kuphẹn aye i vwori ghwoghwo kpahen urhomẹmro na nẹ oghwa riẹ oghwa, uvuẹn afiede, ọrhẹ aghwoghwo kpregede, nọyẹ ‘ekete ra vwa ihworho.’ (Acts 17:17; 20:20) Orhianẹ ọwan i vwa sabu nya ugbo oseseri-i, ana sabu guọlọ ekete afiede re ne siyẹ na sabu ghwoghwo rẹn ihworho ra nyavrẹn. Ana ji sabu ruẹ aghwoghwo kpregede, ya ileta,  yanghene ghwoghwo nyoma ifonu. Ighwoghwẹmro buebun re vwa sabu ghwoghwo nẹ oghwa riẹ oghwa fọkiẹ erhirhiẹ aye, a mẹrẹn aghọghọ nẹ izede enana aye a ha ghwoghwo na.

¹¹ Udabọ emiamo, wu na sabu wian owian Uvie na vuọnvuọn. Rharhumu roro kpahen udje ọnyikọ Paul. Nọ tare: “Mi vwo omẹgbanhon mie ru ekwakwa ephian nyoma ohworho rọ yẹre mẹ omẹgbanhon.” (Phil. 4:13) Paul ọ guọlọ omẹgbanhon ọrana ọke ro kpomẹ uvuẹn owian imishọnari ọnẹyen. Nọ ta rẹn itu i Galatia: “Ọrẹn, are i rheri taghene fọkiẹ emiamo yi mie vwo uphẹn ukukaro ghwoghwo iyẹnrẹn esiri na rẹn are.” (Gal. 4:13) Omaran ọ ji havwọ, emiamo ọnọ ji sabu yẹ ọwan uphẹn re ne ghwoghwo iyẹnrẹn esiri na rẹn awọrọ jerẹ idọkitọ, inọsu, ọrhẹ era hẹrote ihworho re kpomẹ. Ihworho enana buebun i ha owian ọke erhe ghwoghwo te eghwa aye.

12. Me yo mevirhọ re ne ru ukẹro ọwan “lọhọ”?

¹² Jesu ọ tare: “Ukpẹ ugboma na yẹ ukẹro na. Orhianẹ ukẹro ọnọ ọ lọhọre, ọsoso ugboma ọnọ nẹ ono lo.” (Matt. 6:22) Me yo mevirhọ? O mevirhọ taghene o fori na tẹnrovi ẹkẹ yanghene ọhọre owu ọvo uvuẹn akpenyerẹn ọwan, jeghwai kẹnoma rẹn kemru kemru ri na sabu lẹrhẹ ọwan ja nyamwu ẹkẹ na. Jesu o dje udje na nyoma rọ tẹnrovi owian Uvie na, jeghwai yono idibo yi oborẹ aye ine ru tẹnrovi ogame i Jehova ọrhẹ Uvie yi. Ọwan a hẹrokele i Jesu nyoma ra ha owian aghwoghwo na karo uvuẹn akpenyerẹn ọwan, jeghwai “guọlọ Uvie na vwẹre ọrhẹ irueruo ọvwata [Osolobrugwẹ].”—Matt. 6:33.

13. Me yọ nọ ha userhumu rẹn ọwan tẹnrovi owian Uvie na?

 ¹³ Izede owu ra na tẹnrovi owian Uvie na, yẹ ọrẹ ene ruẹ akpenyerẹn ọwan lọhọ neneyo na sabu ghwọghọ ọke ha userhumu rẹn ihworho yono kpahen i Jehova jeghwai vwo ẹguọlọ kpahiẹn. * Jerẹ udje, ana sabu kwaphiẹ ọke ra ghwọghọ rhẹ owian omobọ ọwan neneyo a sabu fiomarhọ owian Uvie na uvuẹn ọkprughwre na? Ana sabu ti nẹ ọke ra ghwọghọ rhẹ iruẹn ọrhẹ ekwakwa erọrọ ra ha ọke ọwan?

14. Ẹkwaphiẹrhotọre ego yẹ esa ọrhẹ ane owu i ruru neneyo aye i sabu wian owian aghwoghwo na rhọ?

¹⁴ Ọnana yẹ oborẹ ọkpako ukoko owu re se Elias ọrhẹ aniẹ i ruru. Nọ tare: “Ame a sabu vwobọrhọ owian ọkobaro ọke ọrana-a, ọrẹn o vwo ekwakwa ezẹko ame i sabu ru nẹ ame i sabu vwobọrhọ owian aghwoghwo na rhọ. Omarana, ame ni ruẹ akpenyerẹn ame lọhọ neneyo ame i sabu ghwoghwo rhọ. Jerẹ udje, ame i vwa rha ghwọghọ igho buẹ-ẹn, ame ni ti nẹ ọke ame a ghwọghọ rhẹ iruẹn ọrhẹ omeronmo, jeghwai ta rẹn ọrẹ ame a wian riẹn sẹ ọnọ sabu ti nẹ ọke owian ame. Fọkiẹ ọnana, ame na sabu riẹ aghwoghwọ uvuẹn owuọwọn, ha i Baibol na yono ihworho buebun, jeghwai riẹ aghwoghwo re ruẹ uvuẹn ọkprughwre na ọgbeva ubiamo. Ame i ghini riamerhiẹn!”

15-16. Lele oborẹ ọ ha uvuẹn 1 Timothy 4:13, 15, marhẹ ene ru sabu rhe ruẹ riaro uvuẹn owian Uvie na? (Se ekpeti na “ Ẹkẹ Ri Na Ha Userhumu Mẹ Wian Owian Aghwoghwo Na Vuọnvuọn.”)

¹⁵ Izede ọrọrọ ra na sabu wian owian Uvie na vuọnvuọn, yẹ nyoma re ruẹ  ena ọwan uvuẹn owian aghwoghwo na rhomẹrhọ. Ihworho ezẹko re vwobọrhọ aruẹ ewian ezẹko i guọlọ uyono ọke ephian, neneyo aye i sabu ruẹ irherhe ọrhẹ ena aye rhomurhọ. Ọnana o ji sekpahen ighwoghwẹmro Uvie na. O fori ne rhe yono oborẹ ene ru ruẹ ena ọwan uvuẹn owian aghwoghwo na rhomurhọ.—Prov. 1:5; se 1 Timothy 4:13, 15.

¹⁶ Marhẹ ene ru sabu rhe ruẹ riaro uvuẹn owian Uvie na? Nyoma ra na nyalele ọkpọvi ra mẹrẹn nẹ uyono Akpenyerẹn Ọwan Ilele Kristi Ọrhẹ Iruo Uvie na. Uyono ọnana o yono ọwan ena eghoghanren sansan ri na ha userhumu rẹn ọwan rhe ruẹ riaro uvuẹn owian aghwoghwo na. Jerẹ udje, ọke rẹ osiyaga uyono na ọ ha ọkpọvi rẹn eri ha ẹmro phia, ana sabu djokarhọ eghwẹmro ri na ha userhumu rẹn ọwan ru riarorhọ uvuẹn aghwoghwo na. Ana sabu ha eghwẹmro erana ruiruo ọke ọrọrọ erhe riẹ aghwoghwo. Ana sabu nekpẹn userhumu mie oniruo rọ hẹrote ẹko aghwoghwo ra havwọ, yanghene lele oniruo na, oghwoghwẹmro ọrọrọ rọ tẹn ona, ọkobaro yanghene oniruo okinhariẹ wian. Arha dabu rhe oborẹ a ha Ekwakwa ra ha yono Ihworho na ruiruo vuọnvuọn, na na dabu tẹn ona, ana ji riamerhen owian aghwoghwo ọrhẹ uyono ọwan rhọ.

17. Me wu ne rhiẹromẹrẹn wu rhe fiomarhọ ogame i Jehova vuọnvuọn?

¹⁷ Uphẹn ọduado ye vwori re ne rhiẹ ere “lele Osolobrugwẹ wian kugbe”! Wu rha “dabu gbẹro rhẹ ekwakwa ri mai ghanren” jeghwai tẹnrovi owian Uvie na, wu na “ga i Jehova rhẹ aghọghọ.” (Phil. 1:10; Ps. 100:2) We rhiẹ owuọwan usuẹn ighwoghwẹmro Osolobrugwẹ na, ọnọ sabu mwuo ẹro taghene Jehova ọnọ yọ omẹgbanhon wu guọlọre ne wu wian owian Uvie na vuọnvuọn, o toro ebẹnbẹn wu na dẹrughwaroghwu-u. (2 Cor. 4:1, 7; 6:4) Sẹ erhirhiẹ wu havwọ ọ ha uphẹn wẹn kerabọ aghwoghwo ọnọ yanghene ọ ha uphẹn wẹ-ẹn, ‘oma ọnọ merhuọn’ ọke wu rha ha ọsoso ẹhọn wian owian Uvie na. (Gal. 6:4) Wu rhe fiomarhọ ogame i Jehova vuọnvuọn, nu vwe djephia taghene wu ghini vwo ẹguọlọ kpahen i Jehova ọrhẹ ọreva. “Nyoma we ru ọnana, wu ne simi oma ọrhẹ ihworho ri kerhọ.”—1 Tim. 4:16.