Ọrẹ omemwurhọ, ọke mia ha ẹgbukpe 13, onyerẹnkugbe mẹ rhẹ Jehova no seriotọre. Nọ họhọre taghene ihworho mie lele riẹ isukuru i vwo ugbomọphẹ aye guọlọre ephian, mi ji guọlọ aruẹ ugbomọphẹ ọrana. Ni mie roro taghene irhi eri vwiẹre mẹ ọrhẹ eri Ilele Kristi na i gbanhon phan, mia jeghwai nie taghene owian ogame i Jehova ọ gbanhon phan. Dedevwo, mi vwo imwẹro taghene Jehova o nyerẹn, ọrẹn mie vwo onyerẹnkugbe rọ kpẹnkpẹnrẹn rhẹ Jehova-a.

Udabọ ọrana, mie ji riẹ aghwoghwo bibiesuọn. Ọrẹn, mi vwe mwuegbe mie ki riẹ aghwoghwo-o, nọ bẹn mẹ ọke mie ghwoghwo. Omarana, mie rhe vwo erharhumu bru ọrhẹ ihworho mia ha i Baibol yono-o, ọnana nọ lẹrhe re mẹ vwo utuoma kpahen owian aghwoghwo na. Ni mia nọ omamẹ, ‘Marhẹ mi ne ru rhe ru ọnana ọke ephian?’

Ọke mi te ẹgbukpe 17, ni mi vwo omwemẹ mẹmẹ ọvo ine sun omamẹ. Omarana, ni mi kwa nẹ oghwa riẹ ẹkwotọre re se Australia. Eri vwiẹre mẹ i mwomarhọ ọke mie nẹ oghwa. Aye i brudu, ọrẹn aye ne roro taghene mi na rha ji ga i Jehova.

 Ọke mia ha Australia, ogame mia ha vwẹ Jehova no seriotọre. Mi vwe rhe riẹ uyono ukoko na ephia-an. Ni mi mwu igbehian ri ha uphuphẹn re vwe riẹ uyono ọke ephian, ọrẹn aye riẹ akpẹriọ ya da inyo jeghwai gbe igbegbe uvuẹn ason. Mi rhe roro kpahen ọke ọrana, mi mẹrẹnvwrurhe taghene mie nyẹrẹn aruẹ akpọ eva, ẹhẹn mẹ o ji te otọre-e.

Emrẹ ẹgbukpe eva ọke oru, ni mi mẹrẹn omizu ọmase owu rọ lẹrhe mẹ roro kpahen oborẹ mie nyerẹn akpọ mẹ lele. Mie rhirhiẹ oghwa imizu emẹse awan sionrin e havwọ, ame ni ha use rẹn oniruo okinhariẹ na ọrhẹ aniẹ re se Tamara, no mo lele ame rhirhiẹ ọkprughwre owu. Ọke esa ye ọ hẹrote ekwakwa ri sekpahen edamẹ ukoko na, Tamara nọ ghwọghọ ọke kugbe rhẹ ame, ji lele ame chẹẹ kugbe. Mi vwo ẹguọlọ kpahen ọrana. Tamara o vwo iroro rọ gbare, jeghwai ohworho ra sabu tẹmro riẹn. O gbere mẹ unu taghene ohworho rọ ga Jehova ọke ephian, ọnọ sabu rhiẹ ohworho re lele ru iruẹn kugbe omana.

Tamara o vwo oruru omamọ. Ẹguọlọ ro vwo kpahen urhomẹmro na ọrhẹ aghwoghwo na ọ hobọte ihworho. O vwo omamerhomẹmro rọ nọ ru ekete omẹgbanhuẹn o teri rẹn Jehova, ọrẹn oma ọ vwo merhen mẹ rhẹ ibiẹ ogame mia ha rẹn Jehova-a. Omamọ uruemru ọrhẹ obọdẹn omamerhomẹ ro vwori ọ hobọte akpenyerẹn mẹ. Udje Tamara ọ lẹrhe re mẹ roro kpahen urhomẹmro ọghoghanren owu uvuẹn i Baibol na: Jehova ọ guọlọre taghene ọwan ephian i ga ye “rhẹ aghọghọ” ọrhẹ “ukpere aghọghọ.”—Ps. 100:2.

Mi guọlọ aruẹ omamerhomẹ rẹ Tamara o vwori na, ọrẹn, ne mi sabu vwo yi, o fori ne mi ruẹ ewene eduado. Ọ ha ọke, ọrẹn ni mi kpare idjaghwẹ bibiesuọn. Ni mi tuẹn egbemwuo rẹn aghwoghwo na rhọ, ọke ezeko, ni mie ji vwobọrhọ owian ọkobaro ibiọke. Ọnana nọ lẹrhe re mẹ vwo uduefigbere, ofẹn mẹ no riotọre. Ọke mia ha i Baibol na ghwoghwo ọke ephian, ni mi mẹrẹn evwẹnvuọn. O jiri, ni mi ruẹ owian ọkobaro ibiọke kibiamo kibiamo.

 Ni mi mwu igbehian rhẹ imizu ri ha ẹgbukpe sansan, ra dabu ga i Jehova ri ji vwo omamerhomẹ kpahen owian aye uvuẹn ukoko na. Omamọ udje aye ọ ha userhumu mẹ rharhumu ni oborẹ mia ha karo uvuẹn akpenyerẹn mẹ jeghwai tuẹn isese i Baibol kẹdẹkẹdẹ rhọ. Ni mi rharhumu vwo omamerhomẹ kpahen owian aghwoghwo na, ji tuẹn owian ọkobaro ọke ephian rhọ. Ọnana ọke ukaro uvwre ẹgbukpe buebun uvuẹn akpenyerẹn mẹ, mie vwo omamerhomẹ ọrhẹ ẹhẹn ro totọre uvuẹn ukoko na.

Ẹgbukpe owu ọke oru, ni mi mẹrẹn Alex, omizu ro vwo uruemru esiri, ro ghini vwo ẹguọlọ kpahen Jehova ọrhẹ ukoko na. Alex ọ ga ẹrhẹ odibo owian, ọ ji ha owian ọkobaro ọke ephian ẹgbukpe erhan ne. Ọye ọ ji ga uvuẹn ekete ra mai guọlọ ighwoghwẹmro Uvie na ibiọke uvuẹn Malawi. Alex o lele imishọnari wian, ri ha urhebro riẹn nọ ha ogame i Jehova karo uvuẹn akpenyerẹn yen.

Uvuẹn 2003, Alex ọrhẹ omẹmẹ ni rọnmọren, ame i ha uvuẹn owian aghwoghwo na vuọnvuọn nẹ ọke ọrana rhe. Ame yono kpahen ekwakwa irhorhomu buebun ne, habaye Jehova ọ ji ha ebrurhọ rẹn ame izede buebun ne.

Uvuẹn 2009, na ha use rẹn ame ne ame ya ga ẹrhẹ imishọnari uvuẹn Timor-Leste, ẹkwotọre ọkokamo rọ ha otọre ame okinhariẹ ọrẹ Indonesia. Ọrẹn, o gbere ame unu, oma ọ ji merhen ame, ọrẹn ibie ofẹn o ji mwu ame. Ibiamo isionrin ọke oru, ame ni te esiri ẹkwotọre na re se Dili.

Onya ọnana o surhobọmwu ewene buebun uvuẹn akpenyerẹn ame. Ame ine yono kpahen uruemru amwa ọkpokpọ na, edjadjẹ, emaren, ọrhẹ aruọke ọkpokpọ. Uvuẹn owian aghwoghwo na, ame a mẹrẹn ihworho ri ha erhirhiẹ ogbere, ri vwe riẹ isukuru ra jeghwai sehiẹn. Habaye, ame i mẹrẹn ihworho buebun  ri mẹrẹn ebẹnbẹn rẹ uvweri ọrhẹ ozighe i soro. *

Mi mẹrẹn omamerhomẹ uvuẹn owian aghwoghwo na! Jerẹ udje, ẹdẹ owu ni mi vwa ọgbọtọ rọ ha ẹgbukpe 13 re se Maria. * Izie o hwuru ẹgbukpe ezẹko ri vrẹnren na, ọ bẹn riẹn rọ nọ mẹrẹn ọsẹ ye. Jerẹ emọ buebun ri ha ẹgbukpe rọ havwọ na, Maria o rhe oborẹ ọnọ ha akpenyerẹn ru-u. Mi karorhọ ọke owu rọ viẹ, ọke rọ ta mẹ kpahen ebẹnbẹn yen. Ọrẹn, mie rhe oborẹ ọ ta-a, fọkime mia ji dabu rhe edjadjẹ ye fiotọre-e. Ne mi nẹrhomo vwe Jehova, nọ ha userhumu mẹ sabu ha urhebro riẹn, ni mi se ekete i Baibol sansan ra bọn ọwan gbanhan riẹn. Uvwre ẹgbukpe ri ha kpahiẹn, ni mi mẹrẹnvwrurhe taghene urhomẹmro na o wene uruemru, omẹhaphia ọrhẹ ọsoso akpenyerẹn i Maria ne. Maria o bromarhame ne, ọ jeghwai ha i Baibol yono ihworho. Vwana, Maria o vwo ekrun ọduado uvuẹn ukoko i Jehova, ri vwo ẹguọlọ kpahiẹn.

Jehova ọ ha ebrurhọ rẹn owian ame uvuẹn Timor-Leste. Dedevwo o ji te ẹgbukpe ikpe ri buebun imizu na i bromarhame-e, ọrẹn buebun a ga ẹrhẹ ikobaro, idibo owian, ọrhẹ ekpako ukoko. Awọrọ a ga uvuẹn ẹko ra rhian erhianrhian, jeghwai ha userhumu phia mwegbe emaren ọrẹ ẹhẹn uvuẹn edjadjẹ sansan. Oma ọ merhen mẹ ọke mie rhon aye a so ijoro uvuẹn uyono ukoko, ọke mia mẹrẹn echẹẹ miẹmiẹmiẹ uvuẹn ughwaro aye, ọrhẹ ọke mia mẹrẹn oborẹ aye ru riaro lele.

Owian ame uvuẹn Timor-Leste ọvẹnẹre omamọ rhẹ akpenyerẹn ame uvuẹn Australia, ọrẹn ọnana yẹ owian rọ mai yẹ mẹ omamerhomẹ. Ọkezẹko, ame a ruẹ imoto rọ vuọn rhẹ ihworho, rhẹ irhenrin ọrhẹ ẹbe ra ha sere emaren ame dẹre uvuẹn eyi. Uvuẹn ẹdẹ ezẹko, ame e lele ohworho ruẹ uyono i Baibol uvuẹn oghwa zegede rọ djẹrẹ, ro gberi, erilele a tobọ zẹ sa zẹ rie. Udabọ ọrana, rhẹ ebẹnbẹn buebun, uvuẹn ẹhẹn mẹ mie roro taghene, ‘Erhirhiẹ na ọ merhen oma omamọ!’

Mie rhe roro kpahen oborẹ ọ vrẹn ne, oma ọ merhen mẹ taghene eri vwiẹre mẹ i damoma yoni mẹ kpahen izede Jehova jeghwai hobọtua mẹ, uvuẹn ọke mia tobọ ha uphuphẹn. Oborẹ Proverbs 22:6 ọ tare o te orugba uvuẹn erhirhiẹ mẹ. Oma ọmerhen Ọsẹ mẹ ọrhẹ Izu mẹ kpahen Alex ọrhẹ omẹmẹ; oma ọ merhen aye ọke aye a mẹrẹn ame ra ga i Jehova. Nẹ ẹgbukpe 2016 rhe, ame a ga uvuẹn owian re kiẹn ikoko ri ha okogho rẹ Oghọn Ukoko Australasia ọ havwọ.

Ọ bẹn re ne kwerhọ ye taghene uvwre ọke owu mie vwo omamerhomẹ kpahen owian aghwoghwo na-a. Vwana, mi vwo ẹguọlọ kpahen aghwoghwo na ne! Mi mẹrẹnvwrurhe ne taghene udabọ ebẹnbẹn sansan ra mẹrẹn uvuẹn akpenyerẹn, ana sabu vwo obọdẹn omamerhomẹ arha ha ọsoso ẹhẹn ọwan ga i Jehova. Itiọrurhomẹmro, uvwre ẹgbukpe 18 rẹ omẹmẹ ọrhẹ Alex a ga Jehova na, yẹ ikpe mia mai mẹrẹn omamerhomẹ uvuẹn akpenyerẹn mẹ. Mi vwẹruọ ẹmro urhomẹmro rẹ ọbo ijoro na ọ ta rẹn Jehova ne: “Ọsoso ihworho ra ha ruẹ ekete ra zẹrua, ina aghọghọ; aye ine kperi ukperi aghọghọ. . . . Ihworho ri vwo ẹguọlọ kpahen odọ ina ghọghọ fọkiẹ owẹwẹ.”—Ps. 5:11.