1-2. Me yo fori ne ru ọke ra hẹrhẹ akpọ ọkpokpọ na?

 E VWO ọdaremẹro okokodo kpahen ive i Jehova ro no wene akpọ ọnana rhiẹ paradais. (2 Pet. 3:13) Dedevwo a ghwai rhe ọke akpọ ọkpokpọ na onọ rhe-e, ọrẹn e vwo imwẹro ri djerie phia taghene orho jirẹ-ẹ.​—Matt. 24:32-34, 36; Acts 1:7.

² Ọrẹn, o toro oborẹ e jiri urhomẹmro na te-e, o fori nẹ ọwan ephian i ruẹ esegburhomẹmro re vwo kpahen ive ọrana gbanhonrhọ. Mesoriẹ? Fọkime esegburhomẹmro ọ sabu seriotọre. Itiọrurhomẹmro, ọnyikọ Paul o se je vwo esegburhomẹmro, “ọdandan ro kiki rhiẹ ukọ harẹn ọwan.” (Heb. 12:1) Na sabu ruẹ esegburhomẹmro ọwan gbanhon, o fori ne roro kpahen imwẹro ri djerie phia taghene akpọ ọkpokpọ na o tikẹrẹ ne.​—Heb. 11:1.

3. Me ye ne yono kpahen uvuẹn urhomu-ẹmro ọnana?

³ Uvuẹn urhomu-ẹmro ọnana, ene yono kpahen izede esa re ne ru bọn esegburhomẹmro ọwan kpahen ive akpọ ọkpokpọ na gbanhon: (1) nyoma re roro kodo kpahen otan na, (2) nyoma re roro kpahen omẹgbanhon i Jehova, ọrhẹ (3) nyoma re ruẹ ekwakwa re ti ọwan kẹrẹ i Jehova. Orho ru, ene yono kpahen oborẹ urhomu edje ri Jehova ọ yẹ Habakkuk, ono ru bọn esegburhomẹmro ọwan gbanhon inyenana. Ọrukaro, jene roro kpahen erhirhiẹ ezẹko ra dẹrughwaroghwẹ vwana, rọ guọlọ esegburhomẹmro  ọgbogbanhon re ne vwo kpahen ive akpọ ọkpokpọ na.

ERHIRHIẸ RI GUỌLỌ ESEGBURHOMẸMRO ỌGBOGBANHON

4. Orhienbro ego yi guọlọ esegburhomẹmro ọgbogbanhon?

⁴ Kẹdẹkẹdẹ, ọwan e brorhiẹn ri guọlọ esegburhomẹmro ọgbogbanhon. Jerẹ udje, e brorhiẹn aruẹ igbehian re ne kwomakugbe, iruẹn ọrhẹ ughe re ne vwobọrhọ, isukuru ọduado ra na nya, orọnmo, emọ re ne vwiẹ ọrhẹ aruẹ iruo re ne ruo. O fori na nọ oma ọwan: ‘Odjẹ mia djẹ o djephia taghene akpọ ọkpokpọ na ono wene akpọ ọkon ọnana phẹrẹkpẹ? Gbinẹ mie nyerẹn akpọ mẹ nọ họhọ erẹ ihworho re nyerẹn kamẹriẹn o vwo odẹrọsa-a?’ (Matt. 6:19, 20; Luke 12:16-21) Ene brorhiẹn ri serhọ erhe ruẹ esegburhomẹmro ọwan gbanhonrhọ taghene akpọ ọkpokpọ na o tikẹrẹ ne.

5-6. Mesoriẹ a guọlọ esegburhomẹmro ọgbogbanhon ọke edamuni? Dje udje yi.

⁵ Ọwan a ji dẹrughwaroghwu edamuni ri guọlọ esegburhomẹmro ọgbogbanhon. Ana sabu dẹrughwaroghwu ẹkparehaso, emiamo ọgbogbanhon yanghene ekwakwa erọrọ ri na sabu lẹrhẹ ẹhẹn ọwan seriotọre. Ọke ukaro, ana sabu vwo omwemẹ re ne diẹn edamuni na. Ọrẹn, orhianẹ o vwo rho nie-e, jerẹ oborẹ ọ phia ọgbọ buebun, o fori ne vwo esegburhomẹmro na sabu vwo edirien, na ji rha ga i Jehova rhẹ aghọghọ.​—Rom. 12:12; 1 Pet. 1:6, 7.

⁶ Arha dẹrughwaroghwu edamuni, ana sabu roro taghene paradais ọ sa-a. Ọnana no mevirhọ taghene esegburhomẹmrọ o seriotọre? Ẹjo. Roro kpahen udje ọnana. Uvuẹn ọke erinrin ọgbogbanhon, ana sabu roro taghene a mẹrẹn ọke uvo dẹ-ẹ. Udabọ ọrana, ọke uvo ọnọ rhiọ. Ọrẹ ohọhọme, ẹhẹn ọwan orho seriotọre, ana sabu roro taghene akpọ ọkpokpọ na ọ sa dẹ-ẹ. Erhe vwo esegburhomẹmro ọgbogbanhon, e rheri taghene ive Osolobrugwẹ ephian ine rugba. (Ps. 94:3, 14, 15; Heb. 6:17-19) Fọkiẹ imwẹro ọrana, ana rha ha ogame i Jehova karo uvuẹn akpenyerẹn ọwan.

7. Uruemru ọgo ya na vi kẹnoma riẹn?

⁷ Roro kpahen erhirhiẹ ọrọrọ ra guọlọ esegburhomẹmro ọgbogbanhon​—uvuẹn owian aghwoghwo na. Ihworho re ghwoghwo riẹn e roro taghene “iyẹnrẹn esiri” re ghwoghwo kpahen akpọ ọkpokpọ na, ọ sabu rhiẹ urhomẹmro-o. (Matt. 24:14; Ezek. 33:32) O fo na ha uphẹn rẹn aruẹ ẹhẹn eveva ọrana nọ hobọte ọwa-an. Na kẹnoma rẹn ọrana, o fori na rha bọn esegburhomẹmro ọwan gbanhan. Jene yono kpahen izede esa ene ru ruẹ ọnana.

RORO KODO KPAHEN OTAN NA

8-9. Marhẹ eroro kodo kpahen otan na ono ru hobọte esegburhomẹmro ọwan?

⁸ Izede owu ene ru ruẹ esegburhomẹmro ọwan gbanhonrhọ yẹ, ọrẹ ene roro kodo kpahen otan na. Otan na yẹ imwẹro taghene ive Osolobrugwẹ ephian ine rugba. Arha dabu roro kpahen oborẹ ọsoriẹ e tiobọnu otan na ọrhẹ oborẹ o surhobọmwu, ana sabu ruẹ esegburhomẹmro ọwan kpahen ive Osolobrugwẹ sekpahen akpọ ọkpokpọ na gbanhonrhọ. Mesoriẹ ana sabu ta omaran?

⁹ Me yẹ otan na o surhobọmwu? Jehova o dje ọmọyen ọkpako ro vwo ẹguọlọ kpahen ro rhiẹ ugbehian yen rhiẹ otọrakpọ na no rhiẹ onyakpọ rọ gbare. Ọke i Jesu ọ ha otọrakpọ na, o vwo edirin  aruẹ ebẹnbẹn ephian. Ọke oru, nọ rioja ji hwu. Osa ri Jehova ọ kware ọ doro omamọ! Orhianẹ akpọ ọkpokpọ na ọrẹ ibiọke, manẹ i Jehova ọ vwọ ha uphẹn rẹn Jesu nọ rioja ji hwu fọkiẹ ọwa-an. (John 3:16; 1 Pet. 1:18, 19) Fọkime Jehova o tiobọnu otan na, e rheri taghene ana sabu vwo arhọ i bẹmẹdẹ uvuẹn akpọ ọkpokpọ na.

RORO KPAHEN OMẸGBANHON I JEHOVA

10. Lele oborẹ ọ ha Ephesians 3:20, me yi Jehova ọ sabu ruẹ?

¹⁰ Izede ọreva ene ru ruẹ esegburhomẹmro ọwan gbanhon yẹ, ọrẹ ene roro kpahen omẹgbanhon i Jehova. O vwo omẹgbanhon rọ nọ ha ọsoso ive yi te orugba. Itiọrurhomẹmro, ọnọ sabu bẹn rẹ ituakpọ ine vwo ekwerhọ kpahen ive re ne nyerẹn akpọ ro vwo vwoba uvuẹn akpọ ọkpokpọ na. Ọrẹn, Jehova o vive buebun rẹ ituakpọ ina ja sabu ha te orugba. Ọnọ sabu ruẹ aye gba, fọkime ọye yẹ Osolobrugwẹ Ọrọmaigbanhon. (Job 42:2; Mark 10:27) Omarana, o vwo gbe ọwan unu orho vive igbevwunu-u.​—Se Ephesians 3:20.

11. Dje udje owu kpahen ive kirighwo ri Jehova o veri. (Se ekpeti na “ Ive Ezẹko Kirighwo ri te Orugba.”)

¹¹ Jene roro kpahen ekwakwa ezẹko re rorori taghene i sabu phia-a, ri Jehova o ve rẹn ihworho ọke ahwanren. Ọ ta rẹn Abraham ọrhẹ Sarah taghene aye ine vwiẹ ọmọ ọhworhare uvuẹn erhirhiẹ ọho aye. (Gen. 17:15-17) Jehova nọ ji ta rẹn Abraham taghene emọyen ine rhirhiẹ otọre i Canaan. Uvwre ẹgbukpe buebun rẹ emọ Abraham ri rhiẹ emọ Israel e rhiẹ evrẹn uvuẹn Egypt, ọnọ sabu họhọ taghene ive ọrana ọ ruẹgba dẹ-ẹ. Ọrẹn, o rugba. Ọke oru, Jehova nọ ta rẹn Elizabeth rọ ho ne taghene ono vwiẹ ọmọ. Nọ ji ta rẹn Mary, ro vwo ji chiọghọ taghene ono vwiẹ Ọmọyen, ọnana nọ ha ive ri Jehova o veri ẹgbukpe buebun ne uvuẹn ogba Eden te orugba!​—Gen. 3:15.

12. Imwẹro ọgo yi Joshua 23:14 ọrhẹ Isaiah 55:10, 11 i yẹre ọwan kpahen omẹgbanhon i Jehova?

¹² Erhe roro kpahen oborẹ i Jehova ọ ha ive sansan te orugba ne, ne ruẹ esegburhomẹmro ọwan gbanhan kpahen omẹgbanhon rọ nọ ha ive akpọ ọkpokpọ na te orugba. (Se Joshua 23:14; Isaiah 55:10, 11.) Ọrana nọ ji lẹrhẹ ọwan sabu ha userhumu rẹn awọrọ rhe taghene ive akpọ ọkpokpọ na rhẹ emena-a. Jehova ọvo yọ tare sekpahen idjuwu ọrhẹ akpọ ọkpokpọ na rhẹ ẹmro na: “Enana ẹmro ra hẹrosua jeghwai urhomẹmro.”​—Rev. 21:1, 5.

RHE RUẸ EKWAKWA RI NA LẸRHUỌ TIKẸRẸ I JEHOVA

13. Marhẹ uyono ukoko ono ru bọn esegburhomẹmro ọwan gbanhon? Djeyi fiotọre.

¹³ Izede ọresa ene ru bọn esegburhomẹmro ọwan gbanhon, yẹ ọrẹ ene ruẹ ekwakwa ri na lẹrhẹ ọwan tikẹrẹ i Jehova. Roro kpahen oborẹ e ru mẹrẹn erere nẹ uyono ukoko. Jerẹ udje, Anna, ro vwobọrhọ eghọn sansan uvuẹn owian Uvie na, nọ tare: “Iyono ukoko ẹnya ọ lẹrhẹ esegburhomẹmro mẹ gbanhan. Ọrhọ tobọ rhianẹ ọtẹmro na ọ tẹn ona ẹmro ẹta, yanghene ọ ha uyono ọkpokpọ phia-a, ọgbọ buebun mie rhon ẹmro ra sabu lẹrhẹ mẹ vwẹruọ urhomẹmro i Baibol na rhọ, ọnana nọ ji bọn esegburhomẹmro mẹ gbanhanrhọ.” b O vwo ẹfro-o, ọwan ephian e vwo ọdaremẹro kpahen  ẹkpahenrhọ rẹ imizu sansan a haphia.​—Rom. 1:11, 12; 10:17.

14. Marhẹ owian aghwoghwo na o ru ruẹ esegburhomẹmro ọwan gbanhanrhọ?

¹⁴ Ọwan e ji ruẹ esegburhomẹmro ọwan gbanhan ọke erhe vwobọrhọ owian aghwoghwo na. (Heb. 10:23) Barbara, rọ ga i Jehova ẹgbukpe rọ vrẹn 70 ne, nọ tare: “Owian aghwoghwo na ọ bọn esegburhomẹmro mẹ gbanhan ọke ephian. Ọke mia rha ta rẹn awọrọ kpahen ive igbevwunu i Jehova, esegburhomẹmro mẹ nọ kpokpọ ji gbanhanrhọ.”

15. Marhẹ uyono omobọ o ru bọn esegburhomẹmro ọwan gbanhan? (Ni ifoto na.)

¹⁵ Roro kpahen emru ọrọrọ uvuẹn ogame i Jehova rọ bọn esegburhomẹmro ọwan gbanhan: uyono omobọ. Susan ọ dabu kwaphiẹ ọke rhotọre ro no ruẹ uyono omobọ. Nọ tare: “Ki Sọnde ki Sọnde, ni mie mwuegbe rhẹ Uyono Oghwa Odẹrẹ re ne ruo ọkprughwre rọ ha kpahiẹn. Mọnde ọrhẹ Tiusde, ni mie mwuegbe rhẹ uyono re ruẹ erhẹrhẹ ọkprughwre na. Uvuẹn ẹdẹ ri hẹrhẹre, ni mie ruẹ uyono omobọ owu kirighwo.” Fọkime ọ dabu nyalele ẹkwaphiẹrhotọre uyono omobọ ye, Susan nọ dabu ruẹ esegburhomẹmriẹn gbanhan ọke ephian. Irene, rọ ga ẹgbukpe buebun ne uvuẹn esiri ukoko, o ji vwo uyono omobọ kpahen aruẹmẹrẹn i Baibol rọ bọn esegburhomẹmriẹn gbanhan. Nọ tare: “Ọ merhenren mẹ oma taghene aruẹmẹrẹn i Jehova ephian, e ruẹgba.” c

“Ọ VWỌ SAMỌ SEFUGHWẸ-Ẹ”

16. Mesoriẹ urhebro ri Jehova ọ yi Habakkuk o sekpahen ọwan inyenana? (Hebrews 10:36, 37)

¹⁶ O jiri ne rẹ idibo i Jehova ezẹko a hẹrhẹ oba akpọ ọnana. Arha ha ukẹro onyakpọ nie, ọnọ sabu họhọ taghene orugba ive i Jehova o kpọke. Jehova ọ kpahenrhọ erhirhiẹ ọrana ọke rọ  ha urhebro rẹn ọmẹraro Habakkuk, nọ tare: “Fọkime ọke ra kwaphiẹ rhọ rẹn emena arodo na o ji te-e, ọ zẹ phẹphẹrẹ riẹ oba ye, ọ vwọ samọ sefughwẹ-ẹ. Ọrhọ tobọ jiri, rhe fiẹrorhọ ye! Fọkime ono ghini rugba. Ọ vwọ samọ kpọke-e!” (Hab. 2:3) Habakkuk ọvo yi Jehova ọ yẹrẹ urhebro ọrana? Gbinẹ ẹmro Ọnẹyen i ji sekpahen ọwan inyenana? Nyoma userhumu ẹhẹn ọfuanfon na, ọnyikọ Paul nọ tẹmro rẹn Ilele Kristi re fiẹrorhọ akpọ ọkpokpọ na. (Se Hebrews 10:36, 37.) Itiọrurhomẹmro, ana sabu vwo imwẹro taghene ive na orho jiri dede, “ono ghini rugba. Ọ vwọ samọ kpọke-e!”

17. Marhẹ omizu ọmase owu o ru ha urhebro ri Jehova ọ yẹ Habakkuk ruiruo?

¹⁷ Idibo i Jehova buebun i ha urhebro na re ne “fiẹrorhọ” akpọ ọkpokpọ na ruiruo ẹgbukpe buebun ne. Jerẹ udje, Louise, ọ tuẹn ogame i Jehova rhọ uvuẹn ẹgbukpe 1939. Nọ tare: “Uvwre ọke ọrana, mie roro taghene Armageddon ọnọ rhiọ bọmọke mi na ruotọre nẹ isukuru. Ọrana ọ phia-a. Uvwre ẹgbukpe buebun rhe na, mi mẹrẹn erere ọke mie se ikuegbe i Baibol na ri sekpahen Noah, Abraham, Joseph, ọrhẹ awọrọ ri hẹrhẹre ọke jijiri bọmọke aye i ki mẹrẹn ebrurhọ i Jehova. Uruemru ra hẹrhẹ ọ ha userhumu mẹ ọrhẹ awọrọ tẹnrovi oborẹ akpọ ọkpokpọ na ọ kẹrẹ te ne.” Ihworho buebun erọrọ ri ga i Jehova uvwre ọke jijiri ne i kwerhọ ọrana!

18. Marhẹ esegburhomẹmro ọwan kpahen akpọ ọkpokpọ na ono ru gbanhonrhọ ọke re ni emama sua?

¹⁸ Itiọrurhomẹmro, akpọ ọkpokpọ na ọ ji rhe-e. Ọrẹn, djokarhọ ekwakwa ezẹko ri havwiẹ vwana​—ikereti, erhan, eranmo, ọrhẹ ituakpọ. O vwo ọrọ nọ frẹfro taghene ekwakwa enana a havwiẹ-ẹ, dedevwo o vwo ọke ekwakwa enana i vwe rhirhiẹ ye. Aye i havwiẹ vwana fọkime Jehova yọ maren aye. (Gen. 1:1, 26, 27) Jehova o ji ve ne taghene ọnọ ha akpọ ọkpokpọ rhe. Ono ruẹ ive ọrana gba. Uvuẹn akpọ ọkpokpọ na, ihworho ina riamerhen omọkpokpọ rọ gbare bẹmẹdẹ. Uvuẹn ọke ri Jehova o verhọ, akpọ ọrana ono rhiẹ oborẹ e rhiẹromẹrẹn jerẹ emama ephian ra mẹrẹn inyenana.​—Isa. 65:17; Rev. 21:3, 4.

19. Marhẹ wu ne ru ruẹ esegburhomẹmro ọnọ gbanhonrhọ?

¹⁹ Vwana, ha uphẹn wu vwori ephian ruẹ esegburhomẹmro ọnọ gbanhonrhọ. Dje ọdaremẹro okokodo phia kpahen otan na. Roro kpahen omẹgbanhon i Jehova. Rhe vwobọrhọ ewian sansan uvuẹn ogame i Jehova. Nyoma ọrana, wu na sabu rhirhiẹ usuẹn “ihworho ri nyoma esegburhomẹmro ọrhẹ erhionrin ha ive na riuku.”​—Heb. 6:11, 12; Rom. 5:5.