1. Marhẹ oma o ruẹ imizu ezẹko aye ine ghwoghwo rẹn ihworho aye i vwe rhe? (Ni ifoto na.)

 FỌKIME ọwan idibo i Jehova, ọwan ne ghwoghwo rẹn awọrọ nime e vwo ẹguọlọ kpahen Ọsẹ ọwan rọ ha obẹ odjuwu, ji guọlọ ha userhumu rẹn awọrọ nẹ aye i rhe yi. Ighwoghwẹmro buebun a riamerhen owian aghwoghwo na. Ọrẹn, ọ bẹn rẹn ezẹko aye ine vwo aghọghọ. Mesoriẹ? Ofa ọ ruẹ ezẹko rẹ aye ine lele ihworho tẹmro. Awọrọ e vwo uruemru re riẹ eghwa ihworho-o, jokpanẹ e serẹ aye. Ofẹn o ji mwu ezẹko taghene ene le aye. E ji yono ezẹko ne taghene aye i kẹnoma rẹn uruemru re lele awọrọ frẹfro. Dedevwo imizu enana i vwo ẹguọlọ kpahen i Jehova omamọ, ọrẹn, ọ ji bẹn aye ine ghwoghwo iyẹnrẹn esiri na rẹn ihworho rẹ aye i vwe rhe. Udabọ ọrana, aye i rhe ọghanronmẹ rọ ha owian ọnana, aye ne vwobọrhọ ye ọke ephian. Oma ọ dabu merhen i Jehova kpahen aye!

2. Orhianẹ wu vwe vwo aghọghọ uvuẹn owian aghwoghwo na-a, mesoriẹ o vwo fo nẹ ẹhọn o seriotọre?

² Ọ bẹn wẹn ọkezẹko wu ne vwo aghọghọ uvuẹn owian aghwoghwo na fọkiẹ aruẹ iroro erana? Orho rhiẹ omaran, wu vwe jẹ ẹhọn seriotọre-e. Ọnana o djephia taghene wu vwo omeriotọre, habaye wu guọlọ kẹnoma rẹn ẹfro. Itiọrurhomẹmro, erhe nuo sakamu fọkiẹ orhorhomu we ruẹ, oma ọ merhuọ-ọn. Ọrẹn, Jehova o rhe oborẹ  wa dẹrughwaroghwẹ, ọ ji guọlọ ha userhumu wẹn. (Isa. 41:13) Uvuẹn urhomu-ẹmro ọnana, ana ta kpahen irorẹdjẹ isionrin ri na sa ọwan erhumu fiẹ iroro enana kparobọ, ji vwo aghọghọ uvuẹn owian aghwoghwo na.

JENẸ ẸMRO OSOLOBRUGWẸ RUO GBANHON

3. Me yọ ha userhumu rẹn ọmẹraro Jeremiah sabu ghwoghwo rẹn awọrọ?

³ Uvwre ẹgbukpe ri vrẹnren na, ẹmro Osolobrugwẹ o ji ruẹ ihworho yi gbanhon ọke aye e vwo owian ọgbogbanhon. Jerẹ udje, roro kpahen ọmẹraro Jeremiah. Ofẹn o mwurien ọke i Jehova ọ yẹ ye owian ro no ghwoghwo. Jeremiah nọ tare: “Mie rhe oborẹ a tẹmro-o, fọkime mẹmẹ ibiẹ ọmọvwerhe.” (Jer. 1:6) Me yọ ha userhumu riẹn fiẹ ofẹn na kparobọ? O vwo omẹgbanhon nyoma oborẹ Osolobrugwẹ ọ ta riẹn. Nọ tare: “Nọ họhọ erhanren rọ bara ra kanren ze isuaso mẹ, mia rha sabu mọnriẹn ghwomara-an.” (Jer. 20:​8, 9) Dedevwo ihworho i vwe kwe kerhọ uvuẹn okogho ri Jeremiah o ghwoghwo-o, ọrẹn no vwo omẹgbanhon nyoma owian aghwoghwo na.

4. Me yọ phia erhe se i Baibol na ji roro kodo kpahiẹn? (Colossians 1:​9, 10)

⁴ Ilele Kristi e vwo omẹgbanhon nyoma i Baibol na. Ọnyikọ Paul nọ tare ọke rọ ya vwe ukoko rọ ha Colossae taghene, re ne vwo irherhe ọgbagba ono mwu imizie “mwuovwan obaro i Jehova,” ji lẹrhẹ aye ru “riaro uvuẹn omamọ owian.” (Se Colossians 1:​9, 10.) Owian aghwoghwo na ọ ha usuẹn omamọ owian ra ta kpahan na. Erhe se ji roro kodo kpahen i Baibol na, esegburhomẹmro ọwan kpahen i Jehova nọ gbanhanrhọ, nọ ji lẹrhẹ ọwan rhe ọghanronmẹ re ne ghwoghwo iyẹnrẹn esiri Uvie na.

5. Marhẹ ene ru mẹrẹn erere ọke erhe se ji yono i Baibol na?

⁵ Na sabu mẹrẹn erere ni Baibol na, o fori ne tuẹdọn seyi, yonie, ji roro kodo kpahiẹn. Wu vwe brokpakpa-a. Orhianẹ we vwẹruọ ekete ezẹko uvuẹn i Baibol na-a, wu vwe pho yi vrẹ-ẹn. Ukpomaran, ha Watch Tower Publications Index yanghene Research Guide for Jehovah’s Witnesses guọlọ oborẹ oghwẹmro na o mevirhọ. Wu rha dabu fi ọke rhotọre yono i Baibol na, imwẹro ọnọ kpahen i Baibol na nọ nọ gbanhonrhọ. (1 Thess.  5:21) Imwẹro na ọrhọ gbanhan, no no mwuo ghwoghwo oborẹ wu yonorin rẹn awọrọ.

DABU MWUEGBE HẸRHẸ OWIAN AGHWOGHWO NA

6. Mesoriẹ o fo na dabu mwuegbe hẹrhẹ owian aghwoghwo na?

⁶ Wu rha dabu mwuegbe hẹrhẹ owian aghwoghwo na, ẹhọn no no totọre wu ne lele awọrọ tẹmro. Jesu ọ ha userhumu rẹn idibo yi mwuegbe bọmọke o ki dje aye ye ghwoghwo. (Luke 10:​1-11) Fọkime aye i ha oborẹ i Jesu o yonorin aye ruiruo, aye ni sabu wian owian na rhẹ aghọghọ.—Luke 10:17.

7. Marhẹ ene ru mwuegbe hẹrhẹ owian aghwoghwo na? (Ni ifoto na.)

⁷ Marhẹ ene ru mwuegbe hẹrhẹ owian aghwoghwo na? O fori na dabu roro kpahen oborẹ ene ru dje urhomẹmro na fiotọre rẹn awọrọ. O ji fo ne roro kpahen oborẹ ihworho ina sabu kpahenrhọ rẹn ọwan lele ọrhẹ oborẹ ene ruo. Omarana erhe bru aye nya, ẹhẹn ọwan no no totọre, ughwaro ọwan no no rhirhiẹ ye sasasa, ne ne ji lele aye mwu igbehian.

8. Izede ọgo yẹ Ilele Kristi i ru họhọ eriẹ rẹ ọnyikọ Paul ọ hunute uvuẹn udje yi?

⁸ Ọnyikọ Paul o dje kpahen oborẹ owian aghwoghwo na ọ ghanren te ọke rọ ta: “Ọwan i vwo efe ọnana uvuẹn eriẹ.” (2 Cor. 4:7) Me yẹ efe ọnana? Ọnana yẹ owian aghwoghwo na, rọ nọ ha userhumu rẹn awọrọ vwo arhọ. (2 Cor. 4:1) Me yẹ eriẹ na? Aye yẹ idibo i Jehova re ghwoghwo iyẹnrẹn esiri na rẹn awọrọ. Uvuẹn ọke i Paul, eriẹ eduado yẹ ileyi a ha kpare ekwakwa eghoghanren jerẹ emaren, enyo ọrhẹ igho. Omaran ọ ji havwọ, Jehova ọ yẹre ọwan uphẹn ọghoghanren re ne ghwoghwo iyẹnrẹn esiri na. Nyoma userhumu i Jehova, ana sabu vwo omẹgbanhon ra na fuevwan wian owian ọnana.

NẸRHOMO NE WU VWO UDUEFIGBERE

9. Marhẹ ene ru fiẹ ofẹnzẹ ituakpọ kparobọ? (Ni ifoto na.)

⁹ Ọkezẹko ofẹnzẹ ituakpọ ọnọ sabu mwu ọwan, ana ji sabu tiẹn ọwan. Marhẹ ene ru fi obẹnbẹn ọrana kparobọ? Roro kpahen ẹrhomo inyikọ na i nẹren, ọke re jurhi rẹn aye taghene aye i vwe  ghwoghwo-o. Ukperẹ ofẹn ono mwu aye, aye ni nẹrhomo vwe i Jehova nọ ha userhumu rẹn aye “ghwoghwo ẹmro [ọnẹyen] rhẹ ohinmi.” Jehova nọ kpahenrhọ ẹrhomo aye ogege. (Acts 4:​18, 29, 31) Orhianẹ ofẹnzẹ ituakpọ o kpokpo ọwan ọkezẹko, o fori na nẹrhomo vwe i Jehova nọ sa ọwan erhumu. Rẹ ye nọ ha userhumu wẹn ha ẹguọlọ fiẹ ofẹn na kparobọ.

10. Marhẹ i Jehova o ru sa ọwan erhumu wian owian rọ yẹre ọwan? (Isaiah 43:​10-12)

¹⁰ Jehova ọ djẹrẹ ọwan ha ne rhiẹ Iserie, o ji ve taghene ọnọ yẹ ọwan uduefigbere. (Se Isaiah 43:​10-12.) Djokarhọ izede ẹne ro ruẹ ọnana. Ọrukaro, Jesu rhẹ ọwan i gba havwiẹ ọke re ghwoghwo iyẹnrẹn esiri na. (Matt. 28:​18-20) Ọreva, Jehova ọ ha emakashe enẹyen sa ọwan erhumu. (Rev. 14:6) Ọresa, Jehova ọ yẹrẹ ọwan ẹhẹn ọfuanfon na, nọ ha userhumu rẹn ọwan karorhọ oborẹ e yono ne. (John 14:​25, 26) Ọrẹne, Jehova ọ yẹrẹ ọwan imizu ukoko na re lele ọwan wian kugbe. Nyoma userhumu i Jehova ọrhẹ okugbe imizu na, ne vwo efikparobọ.

WENE LELE ERHIRHIẸ NA, JI HA UKẸRO RO SERHỌ NIE

11. Marhẹ wu ne ru mẹrẹn ihworho wu rha ha uvuẹn aghwoghwo? (Ni ifoto na.)

¹¹ Ẹhọn o seriotọre orhianẹ wu vwa mẹrẹn ihworho buebun uvuẹn oghwa-a? Nọ oma: ‘Bọgo yẹ ihworho na i havwọ vwana?’ (Acts 16:13) ‘Aye i ha iruo gbinẹ obẹ eyi?’ Orhiomaran, wu na sabu rhe ruẹ aghwoghwo udumu? Omizu ọhworhare owu re se Joshua nọ tare, “Mi mẹrẹn uphẹn sansan mia sabu ghwoghwo uvuẹn ekete ra rhẹ ekwakwa, ọrhẹ ekete imoto e gbo rhọ.” Ọye rhẹ aniẹ Bridget, a ji mẹrẹn ihworho uvuẹn oghwa emrẹ owuọwọn ọrhẹ erhẹrhuvo i Sọnde.—Eph. 5:​15, 16.

12. Marhẹ ene ru rhe oborẹ ihworho i vwo imwẹro ọrhẹ ọdamẹ kpahen?

¹² Orhianẹ ihworho i vwe dje omamerhomẹ phia gbọriọ-ọ, damoma djokarhọ oborẹ aye i vwo imwẹro ọrhẹ ọdamẹ kpahen. Joshua ọrhẹ Bridget a ha onọ rọ ha obaro itrati owu tuẹn ẹmro rhọ. Jerẹ udje, orhianẹ aye a guọlọ ha itrati na Ukẹro Ọgo wa ha ni Baibol na?  ruiruo, aye na nọ: “Ihworho ezẹko a ta taghene Baibol na obẹ Osolobrugwẹ, ọrẹn orhiomaran rẹn awọrọ-ọ. Me wu rorori?” Ọgbọ buebun, ọnana o lele fiẹ aghwoghwo.

13. Mesoriẹ oma ọ merhen ọwan ọrhọ tobọ rhianẹ a vwa kerhọ ọwa-an? (Proverbs 27:11)

¹³ Ihworho arha tobọ kerhọ ọwa-an, oma ọ ji merhen ọwan. Mesoriẹ? Fọkime ọwan i wian owian ri Jehova ọrhẹ Ọmọyen i guọlọre na wian—nọyẹ ọrẹ ene se oseri. (Acts 10:42) Ọrhọ tobọ rhianẹ ihworho i vwa kerhọ ọwa-an, ana ji ghọghọ fọkime e rheri taghene e ruẹ oborẹ ọ lẹrhẹ oma merhen i Jehova.—Se Proverbs 27:11.

14. Mesoriẹ o fo na ghọghọ oghwoghwẹmro ọrọrọ ọrhọ mẹrẹn ọro vwo omamerhomẹ uvuẹn okogho na?

¹⁴ O ji fo na ghọghọ orhianẹ oghwoghwẹmro ọrọrọ ọ mẹrẹn ohworho ro vwo omamerhomẹ kpahen iyẹnrẹn esiri na. Oghwa Odẹrẹ owu, ọ ha owian aghwoghwo na dje owian ra guọlọ ọmọ ro vruru. Ihworho buebun ya guọlọ ọmọ na uvuẹn ekete sansan. Arha mẹrẹn ọmọ na ne, ihworho ephian ya ghọghọ—ukperẹ ono rhiẹ ọrọ mẹrẹn ọmọ na ọvo. Omaran owian aghwoghwo na ọ ji havwọ. Ọwan ephian ye ghwoghwo uvuẹn okogho sansan, ọnana yọ soriẹ ọwan ephian a ji ghọghọ, orhianẹ ohworho ọ tuẹn uyono ẹnya rhọ.

TẸNROVI ẸGUỌLỌ WU VWO KPAHEN I JEHOVA ỌRHẸ AWỌRỌ

15. Marhẹ Matthew 22:​37-39 ono ru lẹrhẹ ọwan vwo oruru rhọ kpahen owian aghwoghwo na? (Ni ifoto ọbe na.)

¹⁵ Ana sabu vwo oruru aghwoghwo rhọ, nyoma ra na tẹnrovi ẹguọlọ re vwo kpahen i Jehova ọrhẹ awọrọ. (Se Matthew 22:​37-39.) Itiọrurhomẹmro, oma ọ merhen i Jehova omamọ ọke rọ mẹrẹn ọwan ra wian owian ọnana, ọrhẹ oborẹ oma ọ merhen ihworho te, aye i rha tuẹn uyono i Baibol rhọ! Ji karorhọ taghene ihworho ri kerhọ iyẹnrẹn esiri na, ine vwo arhọ.—John 6:40; 1 Tim. 4:16.

16. Orhianẹ a vwa sabu nẹ oghwa-a, marhẹ ene ru vwo aghọghọ uvuẹn owian aghwoghwo na? Dje udje yi.

¹⁶ Orhianẹ wu vwa sabu nẹ oghwa vwo? Orhiomaran, tẹnrovi oborẹ wu ne ru dje ẹguọlọ phia rẹn i Jehova ọrhẹ  awọrọ. Uvwrọke emiamo i COVID-19, Samuel ọrhẹ Dania arha sabu nẹ oghwa-a. Uvwrọke ọgbogbanhon ọnana, aye ne ghwoghwo nyoma ifonu ọrhẹ ileta, ji ha i Baibol yono ihworho nyoma i Zoom. Samuel o ghwoghwo rẹn ihworho rọ vware uvuẹn ihọsipita ro simi emiamo ikansa ye. Nọ tare: “Ebẹnbẹn, a hobọte ọwan ọrẹ iroro, ugboma ọrhẹ ọrẹ ẹhẹn. O fori ne vwo aghọghọ uvuẹn ogame ra ha vwe i Jehova.” A ta ọrana obọ, Dania no kpomu te erhirhiẹ rọ daji ekpa ibiamo esa. Ọke oru, na ta riẹn nọ ha aga ukpolo ruiruo ibiamo erhan. Dania nọ tare: “Mi damoma ruẹ ekete omẹgbanhon mẹ o teri. Mi sabu ghwoghwo rẹn inọsu rọ hẹrote mẹ, ọrhẹ awọrọ ra kpare ekwakwa rhiẹ oghwa ame. Mi ji ghwoghwo nyoma ifonu rẹn ọmase owu rọ wian uvuẹn ihọsipita ọrọrọ.” Erhirhiẹ ọnana ọ lẹrhẹ omẹgbanhon i Samuel ọrhẹ Dania riotọre omamọ, ọrẹn aye i ruẹ ekete omẹgbanhon aye o teri, ji vwo aghọghọ.

17. Marhẹ wu na ha irorẹdjẹ enana ruiruo lele, ne wu ki sabu mẹrẹn erere ni aye?

¹⁷ Irorẹdjẹ ri ha uvuẹn urhomu-ẹmro uyono ọnana, ina ha userhumu wẹn orhianẹ wu hare aye ephian ruiruo. Aye ephian i họhọ ekwakwa sansan ra ha sere emaren. Ekwakwa emaren na ephian i rha gba, emaren na nọ dabu merhan. Wu rha ha irorẹdjẹ enana ephian ruiruo, wu na sabu nyerẹn ghele iroro esọsọ ji vwo aghọghọ uvuẹn owian aghwoghwo na.