Iyẹnrẹn i Matthew kpahen uvwiẹ i Jesu ọrhẹ ọke ọ ghwanran, ọ vẹnẹ iyẹnrẹn i Luke ibiesuọn, fọkime aye i nẹ iyẹnrẹn kpahen iroro ọrhẹ irueruo ihworho sansan.

Iyẹnrẹn i Matthew ọ tẹnrovi oborẹ i Joseph o rhiẹromẹrẹn. Ọ ta kpahen oborẹ i Joseph o ruru ọke o rhe taghene i Mary ọ mẹrevwan, ọ ta kpahen emena i Joseph rẹ ọmakashe o dje erhirhiẹ na fiotọre riẹn, ọrhẹ oborẹ o rhiabọ dede erhirhiẹ na lele. (Matt. 1:19-25) Iyẹnrẹn i Matthew nọ ji ta kpahen emena i Joseph ọke ọmakashe ọ ta riẹn taghene ọ zẹ riẹ Egypt, ọrhẹ oborẹ i Joseph kugbe ekrun ọnẹyen i zẹ lele, ọ ji ta kpahen emena i Joseph ọrọrọ rẹ ọmakashe ọ ta riẹn taghene ọ ghwẹrioma riẹ Israel, oborẹ ọ ghwẹrioma lele ọrhẹ orhienbro ọnẹyen ro no rhirhiẹ Nazareth. (Matt. 2:13, 14, 19-23) Uvuẹn irhomu-ẹmro eva erukaro ọrẹ ọbe Matthew, a hunute odẹ i Joseph ọgbọ ẹrẹnren, ọrẹn, a hunute i Mary ọgbọ ẹne ọvo.

Ọrẹn, iyẹnrẹn i Luke nọ tẹnrovi Mary. Iyẹnrẹn i Luke ọ ta kpahen ọke ọmakashe o bru i Mary nya, ọke i Mary o rhiẹ ọpha ruẹ Elizabeth ro rhiẹ omizie, ọrhẹ ẹmro ri Mary ọ ha jiri Jehova. (Luke 1:26-56) Iyẹnrẹn i Luke ọ ji ta kpahen ẹmro i Simeon ọ ta rẹn Mary kpahen oja ri Jesu ono re. Ọke i Jesu ọ ha ẹgbukpe 12, rẹ ekrun i Joseph e riẹ oghwa ẹga na, ẹmro i Mary ọ tare yi Luke ọ ya rhotọre. Iyẹnrẹn i Luke nọ tare taghene ekwakwa enana i hobọte i Mary omamọ. (Luke 2:19, 34, 35, 48, 51) Uvuẹn irhomu-ẹmro eva erukaro ọrẹ ọbe Luke, a hunute odẹ i Mary te ọgbọ 12, ọrẹn, ọgbọ 3 ọvo ya hunute i Joseph. Omarana, iyẹnrẹn i Matthew ọ ta kpahen edamẹ ọrhẹ irueruo i Joseph, ọrẹn, iyẹnrẹn Luke nọ ta kpahen ewian i Mary ọrhẹ oborẹ o rhiẹromẹrẹn.

Oborẹ aye i ya kpahen ekete i Jesu o nurhe, ọ ji vẹnẹ. Iyẹnrẹn i Matthew ọ hunute esẹ ride i Joseph, ọ jeghwai djephia taghene i Jesu yẹ ohworho ro mwuovwan lele urhi rọ nọ ha ẹrhẹ usun i David riuku. Mesoriẹ? Nime i Joseph o nẹ uvwiẹ Orodje David rhe nyoma Solomon ro rhiẹ ọmọ i David. (Matt. 1:6, 16) Ọrẹn, iyẹnrẹn i Luke nọ ta kpahen esẹ ride i Mary, no djephia taghene i Jesu yo mwuovwan ọrẹ uvwiẹ, nọyẹ “ọrẹ ugboma,” rọ nọ ha ẹrhẹ usun i David riuku. (Rom. 1:3) Mesoriẹ? Nime Mary o nẹ uvwiẹ i David rhe nyoma Nathan ro rhiẹ ọmọ i David. (Luke 3:31) Ọrẹn, mesoriẹ iyẹnrẹn Luke ọ vwọ hunute Mary taghene ọye ọmọ Heli ọke ro kele uvwiẹghwa aye? O ru omaran nime nyoma ehworhare ya sabu vwrurhe uvwieghwa ohworho o nurhe. Omarana, ọke iyẹnrẹn i Luke ọ hunute i Joseph, nọ tare taghene ọye ọmọ i Heli, ọnana no mevirhọ taghene i Joseph ọgọ i Heli.—Luke 3:23.

Iyẹnrẹn i Matthew ọrhẹ Luke kpahen ekete i Jesu o nurhe na, o djerie phia taghene i Jesu yi ghini Messiah na. Ekete i Jesu o nurhe o ghini fiotọre omamọ, te erhirhiẹ otu Pharisee ọrhẹ Sadducee i vwa frẹfro kpahiẹn. Inyenana, iyẹnrẹn i Matthew ọrhẹ Luke kpahen ekete i Jesu o nurhe, a lẹrhẹ ọwan vwo esegburhomẹmro ọrhẹ imwẹro taghene ive Osolobrugwẹ ine ghini te orugba.