Uvuẹn urhomu-ẹmro ọrana, e yonorin taghene o vwo ẹmro ọghoghanren owu ro sekpahen ihworho ephian, nọyẹ erufon odẹ ọduado i Jehova. Ẹmro ro sekpahen ọdo-usun​—nọyẹ izede ri Jehova o suẹn lele yọ mai gba​—oghọn owu usuẹn ẹmro ọghoghanren na. Ọrẹ ohọhọme, ẹmro ro sekpahen emevigbanhon ituakpọ, oghọn ọrọrọ usuẹn ẹmro ọghoghanren na.

Mesoriẹ ọwan a karunumwuie vwana taghene ẹmro rọ mai ghanren kparobọ o sekpahen odẹ i Jehova ọrhẹ erufon yin? Jene yono kpahen iroro esa.

Ọrukaro, Echu ọ kparehaso odẹ i Jehova, yanghene aruẹ Ohworho rọ havwọ uvuẹn ogba Eden. Onọ ọphiẹrhọ rẹ Echu ọ nọ Eve nọ họhọre taghene Jehova, Osolobrugwẹ ro vwo tiobọnẹ, rọ ji ha ọkpọvi ri vwe serhọ rẹn ihworho Enẹyen. Echu nọ ji kparehaso ẹmro i Jehova nyoma rọ ta taghene Osolobrugwẹ ọ mọrenfian. Omarana, nọ rhaphiẹ odẹ i Jehova. No rhiẹ “Dẹbolo,” ro mevirhọ “ọrọ rhaphiawan.” (John 8:44) Fọkime Eve o vwo imwẹro kpahen efian Echu, nọ tiẹn uvwele Osolobrugwẹ, ọrhẹ ọdo-usun Ọnẹyen. (Gen. 3:1-6) Me te inyenana, Echu ọ ji rhaphiẹ odẹ Osolobrugwẹ, ji kerabọ efian sansan kpahen aruẹ Ohworho ri Jehova ọ havwọ. Ihworho ri vwo imwẹro kpahen efian erana ina tiẹn uvwele i Jehova. Omarana, harẹn ihworho i Jehova, e nirien taghene na rhaphiẹ odẹ ọfuanfon Osolobrugwẹ yẹ osehiẹn obẹta. Ọnana yẹ esiri ojẹriọ ọrhẹ ọkon rọ vuọn akpọ na.

Ọreva, nẹ ọsoso emama enẹyen i mẹrẹn erere, Jehova no brorhiẹn ro no ruẹ odẹ ye fon, ji tiẹ ọsoso ephien ri sekpahen odẹ ye nie. Ọrana oborẹ ọ ghanranren omamọ rẹn Jehova. Omarana, nọ tare: ‘Mi ne vi ruẹ odẹ ọduado mẹ fon.’ (Ezek. 36:23) Jesu ọ dabu dje fiotọre oborẹ ono rhiẹ emru ukaro uvuẹn ẹrhomo idibo i Jehova ephian ọke rọ ta: “Jene ru odẹ ọnọ fon.” (Matt. 6:9) Ọgbọ buebun, Baibol na o dje ọghanronmẹ oborẹ ọsoriẹ ene jiri odẹ i Jehova. Jene roro kpahen idje ezẹko: “Ha ujiri ro fo rẹn odẹ i Jehova riẹn.” (1 Chron. 16:29; Ps. 96:8) “So ijoro ujiri rẹn odẹ odidi ọnẹyen.” (Ps. 66:2) “Mi ne jiri odọ bẹmẹdẹ.” (Ps. 86:12) Ọke owu ri Jehova ọ tẹmro nẹ odjuwu rhe, ọ phiare uvuẹn oghwa ẹga rọ ha Jerusalem, ekete i Jesu ọ ta: “Ọsẹ, ha odidi rẹn odẹ ọnọ.” Jehova nọ kpahenrhọ ye: ‘Mi ha odidi rhọye ne, mi na ji rharhumu ha odidi rhọye.”​—John 12:28. a

Ọresa, egbemwuo i Jehova nẹ ọtonrhọ rhe o sekpahen odẹ ye, yanghene aruẹ Ohworho rọ havwọ. Roro kpahiẹn: Ọke ọdamuni rọ kẹta uvuẹn obẹta Usun Ẹgbukpe Uriusionrin i Kristi orho hin, me yọ nọ phia?  Ituakpọ ọrhẹ emakashe ine ji rhe vwo ẹhẹn eveva kpahen erufon odẹ ọduado i Jehova? Na sabu kpahenrhọ onọ erana, jena karorhọ eghọn eva ri sekpahen ẹmro na, nọyẹ emevigbanhon ituakpọ ọrhẹ ọdo-usun i Jehova. Uvwre ọke ọrana, orho vwo oborẹ ọnọ lẹrhẹ ituakpọ sẹrorẹ emevigbanhon aye-e. Aye ine rhiẹ ihworho ri gbare ra damu ni ne. Arhọ i bẹmẹdẹ nọ yọ hẹrhẹ aye. Uvwre ọke ọrana, ọdo-usun i Jehova ọrhọ suẹ oghalẹ uvwre emakashe ọrhẹ ituakpọ-ọ, yanghene aye i rha ta kpahiẹ-ẹn. Fọkime ọwan ephian ine vwo okugbe ji rhiabọ ha usuon i Jehova. Ọrẹn, nẹ odẹ i Jehova vwo?

Ọke ọrana, odẹ i Jehova ọ dabu fon, ji vabọ ephien ephian ne. Ọrẹn, odẹ i Jehova yo no ji rhiẹ oborẹ ọ mai ghanren rẹn idibo yi ephian. Mesoriẹ? Fọkime aye ina rha mẹrẹn i Jehova ro ruẹ ekwakwa igbevwunu. Roro kpahiẹn: Fọkime Jesu ọnọ homariotọre tiobọnu usun na rẹn Jehova, Osolobrugwẹ ono “rhiẹ kemru kemru rẹn ihworho ephian.” (1 Cor. 15:28) Ọrana ọrhọ vrẹn, ituakpọ ina riamerhen “ugbomọphẹ ọrẹ emọ Osolobrugwẹ.” (Rom. 8:21) Jehova no no ruẹ ọhọriẹ gba, ro no ku emakashe ọrhẹ ituakpọ ephian kugbe rhiẹ ekrun ọduado owu ro vwo okugbe.​—Eph. 1:10.

Marhẹ ekwakwa erana ina hobọte idibo i Jehova ephian obẹ odjuwu ọrhẹ uvuẹn otọrakpọ na lele? Itiọrurhomẹmro, ọwan ephian ine vwo oruru ọgbogbanhon re ne jiri odẹ orhorhomu i Jehova ọke ephian. Jehova no mwu i David ya: “Jene jiri Jehova Osolobrugwẹ . . . Jene jiri odẹ ye ro vwo odidi bẹmẹdẹ.” (Ps. 72:18, 19) Ni bẹmẹdẹ ruẹ bẹmẹdẹ, ana rha guọlọ iroro ekpokpọ sansan ro no mwu ọwan jiri Jehova.

Ọrẹ imwẹro, odẹ i Jehova o mevirhọ kemru kemru ro sekpahiẹn. Ọrọ mai ghanren, odẹ ye ọ karorhọ ọwan kpahen ẹguọlọ ye. (1 John 4:8) Ana rha karorhọ taghene ẹguọlọ yo mwu i Jehova ma ọwan, ji tiobọnu otan na, habaye ẹguọlọ yo mwuie suẹn izede ọsoso. Ọrẹn, ana rha mẹrẹn oborẹ i Jehova ono rho dje ẹguọlọ rẹn idibo yi ephian. Ene rhe tiẹkẹrẹ Jehova rhọ, ji so ijoro ujiri rẹn odẹ ọfuanfon ọnẹyen bẹmẹdẹ.​—Ps. 73:28.