URHOMU-ẸMRO UYONO 35
IJORO 123 Dje Atamwu Phia Kpahen Irhi Jehova
Oborẹ Ekpako Ukoko Ine ru ha Userhumu Rẹn Ihworho re ti nẹ Ukoko
“Aghọghọ rode ono ji rhirhiẹ ye obẹ odjuwu fọkiẹ oruọdandan owu rọ ghwẹriẹre, ghwẹ evwata awan 99 ri vwa guọlọ ẹghwẹriẹ.”—LUKE 15:7.
OBORẸ ENE YONO KPAHEN
Ene yono kpahen oborẹ ọsoriẹ o fo ne ti ihworho ezẹko nẹ ukoko, ọrhẹ oborẹ ekpako ukoko ine ru ha userhumu rẹn aruẹ ihworho erana ghwẹriẹ ji rharhumu bru Jehova.
1-2. (a) Ukẹro ọgo yi Jehova ọ ha ni ihworho ra ha arudo ruẹ ọdandan? (b) Me yi Jehova ọ guọlọre nẹ iruedandan i ru?
JEHOVA o vwo nẹro rẹn orusọ-ọ; o vwo utuoma kpahen ọdandan. (Ps. 5:4-6) Ọ guọlọre na nyalele irhi egbagba enẹyen ri ha uvuẹn i Baibol. Itiọrurhomẹmro, Jehova o rheri taghene ọwan a gba-a, omarana o rhe oborẹ ana sabu ru. (Ps. 130:3, 4) Jehova o ji vwo utuoma kpahen ‘evwọkon ra ha ẹghẹlẹ ọphẹ Osolobrugwẹ ọwan kpahen obọ ruẹ ọdandan.’ (Jude 4) Baibol na ọ ji ta kpahen “oghwọghọ ihworho ri vwa ga Osolobrugwẹ” uvuẹn uvweri Armageddon.—2 Pet. 3:7; Rev. 16:16.
2 Ọrẹn, Jehova ọ guọlọ nẹ ohworho owuorowu ọ ghwọghọ-ọ. Jerẹ oborẹ e yono ne uvuẹn irhomu-ẹmro erọrọ uvuẹn oghwa odẹrẹ ọnana, Baibol na ọ tare taghene Jehova “ọ guọlọre nẹ ihworho ephian i ghwẹriẹ.” (2 Pet. 3:9) Ekpako ukoko a damoma hẹrokele i Jehova, nyoma aye e vwo erhionrin ha userhumu rẹn ihworho ri ruẹ ọdandan nẹ aye i ghwẹriẹ, ji rharhumu bru i Jehova. Ọrẹn, orhiẹ iruedandan ephian ye kwe ghwẹriẹ-ẹ. (Isa. 6:9) Ezẹko e gbromarhọ ọdandan eruo, udabọ userhumu ekpako ukoko e tiobọnẹ rẹn aye. Me yẹ ekpako ukoko ine ruo uvuẹn aruẹ erhirhiẹ ọrana?
“ARE I TIẸ ỌVWỌKON NA NẸ UVWRE ARE”
3. (a) Me yi Baibol na ọ tare taghene e ruẹ iruedandan ri vwe kwe ghwẹriẹ? (b) Mesoriẹ ana ta taghene oruọdandan na ọvo yo brorhiẹn ro no tiẹ omayen nẹ ukoko na?
3 Orhianẹ oruọdandan o kwe ghwẹriẹ-ẹ, ọke ọrana ekpako ukoko ina ha ẹmro rọ ha 1 Corinthians 5:13 ruiruo: “Are i tiẹ ọvwọkon na nẹ uvwre are.” Ana sabu ta taghene oruọdandan na ọvo yo brorhiẹn ro no tiẹ omayen nẹ ukoko na; nọ họhọre taghene o a vuẹn oborẹ ọ wọre. (Gal. 6:7) Mesoriẹ a ta omaran? Fọkime oruọdandan na o kwe nyalele urhebro rẹ ekpako na i tiobọnu riẹ-ẹn. (2 Ki. 17:12-15) Idjaghwẹ ye i djephia taghene ọ guọlọ nyalele irhi Jehova-a.—Deut. 30:19, 20.
4. Mesoriẹ e ruẹ aghwoghwo ọke erhe ti oruọdandan ro vwo kwe ghwẹriẹ nẹ ukoko na?
4 Erhe tiẹ oruọdandan nẹ ukoko, ne ruẹ aghwoghwo taghene ọravwọ orhiẹ Oseri Jehova ghwomara-an. b E vwe ruẹ aghwoghwo na, nẹ ofa ọ sabu ruẹ ọravwọ-ọ. Ukpomaran, e ruie neneyo imizu uvuẹn ukoko na i sabu nyalele irhi ri ha uvuẹn i Baibol na taghene e “vwe kwomakugbe” aruẹ ohworho ọrana-a, yanghene lelie “riẹ emaren” dede-e. (1 Cor. 5:9-11) O vwo omamọ iroro rọ soriẹ i Jehova o tiobọnẹ ọkpọvi ọrana. Ọnyikọ Paul nọ yare: “Ibiẹ oborẹ ọ lẹrhẹ emru phie, yo ruẹ ọsoso iflawa re gbe kugbe na phie.” (1 Cor. 5:6) Iruedandan ri vwe kwe ghwẹriẹ, ina sabu lẹrhẹ oruru imizu erọrọ uvuẹn ukoko na seriotọre.—Prov. 13:20; 1 Cor. 15:33.
5. Ukẹro ọgo yo fori na ha ni ohworho re ti nẹ ukoko, mesoriẹ?
5 Ukẹro ọgo yo fori na ha ni ohworho re ti nẹ ukoko? Dedevwo e vwe kwomakugbe aye-e, ọrẹn o fori ne ni aye jerẹ igegede ri vruru, orhiẹ eri vwe vwo ifiẹrorhọ-ọ. Ogegede orho beghe, ọnọ ji sabu ghwẹrioma rhe. Karorhọ taghene ọravwọ ọ homakpahontọre rẹn i Jehova. Ọrẹ omemwurhọ, ọ vwọ nyamwu ive ọrana vwana-a, erhirhiẹ ọrana o mwuofẹn omamọ. (Ezek. 18:31) Ọrẹn, fọkiẹ arodọmẹ i Jehova, ọravwọ o ji vwo ifiẹrorhọ rọ nọ rharhumu bru i Jehova. Omarana, marhẹ ekpako ukoko ine ru ha userhumu rẹn oruọdandan re ti nẹ ukoko?
OBORẸ EKPAKO UKOKO INE RU HA USERHUMU RẸN IHWORHO RE TI NẸ UKOKO
6. Userhumu ego yẹ ekpako na ine tiobọnu rẹn ohworho re ti nẹ ukoko?
6 Ekpako ukoko a sẹrerhumuji ihworho re ti nẹ ukoko, nẹ aye ọvo i rharhumu bru i Jehova rhe? Ẹjo! Umẹ ekpako na i rha ta rẹn oruọdandan ro vwo kwe ghwẹriẹ taghene ene tie nẹ ukoko, aye ni ne dje idjaghwẹ sansan rọ nọ kpare riẹn, nọ sabu rharhumu bru i Jehova. Ọrẹn, ekpako na e ruẹ vruẹ omaran. Uvuẹn erhirhiẹ ezẹko, aye ina ta rẹn oruọdandan na taghene aye ina rharhumu mẹriẹn ibiamo ezẹko i rha vrẹn, sẹ o wene uruemruien ne. Oruọdandan na orho vwo omwemẹ rọ nọ rharhumu mẹrẹn ekpako na, aye ni na ha userhumu riẹn nọ sabu ghwẹriẹ ji rharhumu bru i Jehova. Orhianẹ o ji wene uruemruien ọke ọrana-a, ekpako na ina ji kọn bruie ọke ọrọrọ.
7. Marhẹ ekpako ukoko e ru hẹrokele aruẹdọn i Jehova ọke aye arha ha userhumu rẹn ohworho re ti nẹ ukoko? (Jeremiah 3:12)
7 Ekpako ukoko a damoma hẹrokele aruẹdọn i Jehova, kpahen ihworho re ti nẹ ukoko. Jerẹ udje, Jehova ọ hẹrhẹ emọ Israel ọke ahwanren nẹ aye i ghwẹriẹ vwẹre, bọmọke ọ ki ha userhumu rẹn aye-e. Ukpomaran, nọ kpare udjoghwẹ na nyoma ro dje emẹraro enẹyen bru aye bọmọke aye i ki dje oka ẹghwẹriẹ phia. Jerẹ oborẹ e yonorin uvuẹn urhomu-ẹmro ọreva uvuẹn oghwa odẹrẹ ọnana, Jehova no dje aruẹdọn ye phia nyoma rọ ta rẹn ọmẹraro Hosea nọ harhomu aniẹ udabọ ọdandan ro ruẹ. (Hos. 3:1; Mal. 3:7) Jerẹ i Jehova, ekpako ukoko i ji guọlọ nẹ oruọdandan ọ ghwẹriẹ ji rharhumu bru i Jehova, aye i vwa lẹrhẹ erhirhiẹ na bẹn riẹ-ẹn.—Se Jeremiah 3:12.
8. Marhẹ udje i Jesu kpahen ọmọ ro vruru na o ru dje aruẹdọn i Jehova phia? (Luke 15:7)
8 Roro kpahen udje i Jesu kpahen ọmọ ro vruru na, re yono kpahen uvuẹn urhomu-ẹmro ọreva uvuẹn oghwa odẹrẹ ọnana. Ogege ọsẹ na ọ kpararo mẹrẹn ọmọyen rọ sa, “nọ zẹ bruie jeghwai gbaliẹ ji fiọnfiẹn rhẹ ẹguọlọ.” (Luke 15:20) Djokarhọ taghene ọsẹ na ọ hẹrhẹ ọmọ na nọ rẹ ye vwẹre bọmọke ọ ki harhomie-e. Ukpomaran, ọsẹ na yọ zẹ bru ọmọ na, fọkime o vwo ẹguọlọ kpahiẹn. Ekpako ukoko a ji damoma dje uruemru ọrana phia rẹn ihworho ri nẹ ukoko na. Aye i guọlọre nẹ igegede enana ri vruru na, “i ghwẹrioma rhe.” (Luke 15:22-24, 32) Aghọghọ rode ọ ha obẹ odjuwu ọrhẹ otọrakpọ na oruọdandan owu ọrhọ ghwẹriẹ!—Se Luke 15:7.
9. Me yi Jehova ọ guọlọre nẹ ere ti nẹ ukoko i ru?
9 Jerẹ oborẹ e yono ne, o fiotọre taghene Jehova o vwo nẹro rẹn oruọdandan ro vwo kwe ghwẹriẹ-ẹ. Habaye, ọ vwọ ji sẹrerhumuji iruedanda-an. Ọ guọlọre nẹ aye i rharhumu ghwẹrioma rhe. Hosea 14:4, ọ ta kpahen oborẹ oma o ruẹ i Jehova kpahen iruedandan ri ghwẹriẹre: “Mi ne simi aye nẹ erhirhiẹ ijẹfuọn aye. Mi ne vwo ẹguọlọ kpahen aye nẹ otọre ẹhẹn mẹ rhe, fọkime mi vwa rha tuekwẹre kpahen aye-e.” Ekpako ukoko a damoma djokarhọ sẹ oruọdandan o mwuegbe rọ nọ ghwẹriẹ ne. Ọnana o djephia taghene Jehova o vwo ẹguọlọ kpahen ere ti nẹ ukoko, ọ ji guọlọ nẹ aye i kiki ghwẹrioma bruie rhe.
10-11. Marhẹ ekpako ukoko ine ru ha userhumu rẹn ere ti nẹ ukoko ẹgbukpe buebun ne?
10 Marhẹ ekpako ukoko ine ru ha userhumu rẹn ihworho re ti nẹ ukoko ẹgbukpe buebun ne? Ọkezẹko, aye i vwe rhe ruẹ ọdandan rọ soriẹ e ti aye nẹ ukoko-o. Uvuẹn erhirhiẹ ezẹko, aye a tobọ karorhọ oborẹ ọsoriẹ e ti aye nẹ ukoko-o. O toro oborẹ erhirhiẹ na ọ havwọ-ọ, ekpako ukoko ina vi damoma guọlọ aruẹ ihworho erana ji kọn bru aye. Aye i rha kọn bru aye, ekpako na ina sabu lele aye nẹrhomo kugbe, ji ha urhebro rẹn aye nẹ aye i ghwẹrioma rhiẹ ukoko na. Orhianẹ o te ẹgbukpe buebun re ti ọravwọ nẹ ukoko na ne, nọyẹ onyerẹnkugbe yi rhẹ i Jehova o seriotọre omamọ ne. Omarana, orho djephia taghene ọ guọlọ ghwẹrioma rhiẹ ukoko na, ekpako na ina sabu ruẹ ẹkwaphiẹrhotọre ra na ha uyono i Baibol mwu riẹn, bọmọke ana ki rharhumu haye. Uvuẹn erhirhiẹ ephian, ekpako ukoko yi ne ruẹ ẹkwaphiẹrhotọre uyono i Baibol na.
11 Ekpako ukoko a hẹrokele aruẹdọn i Jehova, nyoma aye a damoma ha userhumu rẹn ihworho ephian re ti nẹ ukoko, nẹ aye i ghwẹrioma rhe. Ogege oruọdandan ọrhọ ghwẹriẹ ji sẹrerhumuji orusọ ye, ana sabu rharhumu haye.—2 Cor. 2:6-8.
12. (a) Erhirhiẹ ego yẹ ekpako ukoko ina dabu gbẹro rhotọre niso? (b) Mesoriẹ o vwo fo ne brorhiẹn taghene Jehova ọ sabu dje arodọmẹ rẹn aruẹ ihworho ezẹko-o? (Ji se ekete ra djokarhọ.)
12 Uvuẹn erhirhiẹ ezẹko, o fori nẹ ekpako ukoko i dabu ni erhirhiẹ na so vwẹre, bọmọke aye ina ki rharhumu ha ohworho. Jerẹ udje, orhianẹ ọravwọ ọ gba emọvwerhe gbọfanrhiẹn bi, ọravwọ ọnyikọ efian, yanghene ọ djiroro vrẹn ne rọ nọ fan orọnmiẹ, o fori nẹ ekpako na i dabu nieso sẹ ọ ghini ghwẹriẹ ne. (Mal. 2:14; 2 Tim. 3:6) Aye ina vi sẹrorẹ imizu ukoko na. O ji fo na karorhọ taghene, Jehova o mwuegbe ro no rhiabọ dede iruedandan ephian, takpu ọ ghwẹriẹ ne ji dobọ irueruo esọsọ ye ji ne. Dedevwo ekpako ukoko ine vi nẹ aruẹ ihworho enana so, ọrẹn aye i vwe brorhiẹn taghene Jehova ọ sabu dje arodọmẹ rẹn aye-e. c—1 Pet. 2:10.
OBORẸ UKOKO NA ỌNỌ SABU RU
13. Marhẹ oborẹ e lele ohworho ra ghwọghwu ruẹ kugbe lele, o ru vẹnẹ ọrẹ e ti nẹ ukoko?
13 Jerẹ oborẹ e yono ne uvuẹn urhomu-ẹmro rọ vrẹnren, ana sabu ruẹ aghwoghwo taghene a ghwọghwu omizu uvuẹn ukoko na. Uvuẹn aruẹ erhirhiẹ ọrana, ana sabu lele ọravwọ ru kugbe, fọkime ọ ghwẹriẹ ne. (1 Tim. 5:20) Ọravwọ ọ ha usuẹn ukoko na, ọ ji guọlọ urhebro imizu ukoko na nọ sabu rhe ruẹ riaro. (Heb. 10:24, 25) Ọrẹn, rhẹ omaran ọ havwọ rẹn ohworho re ti nẹ ukoko-o. E “vwe kwomakugbe” aruẹ ohworho ọrana-a, yanghene lelie “riẹ emaren kugbe-e.”—1 Cor. 5:11.
14. Orhienbro ọgo yẹ Olele Kristi owuowu ono bruo sekpahen ohworho re ti nẹ ukoko? (Ni ifoto na.)
14 Lele oborẹ e yono ne, ọnana no mevirhọ taghene ana ghwai kẹnoma rẹn ohworho re ti nẹ ukoko? Ẹjo. Itiọrurhomẹmro, e vwe kwomakugbe ọravwọ-ọ. Ọrẹn, Olele Kristi owuowu yo no brorhiẹn sẹ ọnọ ha use rẹn ohworho re ti nẹ ukoko ro rhiẹ ohworho ekruien yanghene ugbehian yen bi, rhiẹ uyono ukoko. Me ye ne ruo ọrhọ rhiẹ uyono ukoko? Vẹrhẹ bi, a vwa mroma ọravwọ-ọ. Ọrẹn vwana, Olele Kristi owuowu yọ nọ ha ẹhẹn obrorhiẹn yen ruiruo sẹ ọnọ mroma ọravwọ. Ihworho ezẹko ina sabu brorhiẹn aye ina mroma ọravwọ yanghene dedie. Ọrẹn, o fo ne lelie ghwọghọ ọke kugbe yanghene ruẹ ekwakwa erọrọ-ọ.
Olele Kristi owuowu yọ nọ ha ẹhẹn obrorhiẹn yen ni erhirhiẹ na so, sẹ ọnọ ha use rẹn ohworho ri ti nẹ ukoko rhiẹ uyono yanghene mroma ọravwọ kpeke (Ni udjoghwẹ 14)
15. Aruẹ iruedandan ego ya hunute uvuẹn 2 John 9-11? (Se ekpeti na “ Aruẹ Ọdandan Owu yi John Ọrhẹ Paul a ta Kpahan?”)
15 Ihworho ezẹko ina sabu rhe roro, ‘Baibol na ọ tare taghene a vwa mroma ohworho re ti nẹ ukoko-o, omarana, arha mroma yen, nọyẹ e lelie vwobọrhọ irueruo ọkon ọnẹyen ne.’ (Se 2 John 9-11.) Ekete i Baibol ọnana ọ rionbọrhọ ihworho re ti nẹ ukoko ri dẹrẹrhiẹ inyikọ efian ọrhẹ awọrọ re jiri irueruo ri sọre. (Rev. 2:20) Omarana, ohworho re ti nẹ ukoko orho jiri iyono inyikọ efian yanghene irueruo esọsọ erọrọ, ekpako ukoko i vwa kọn bruie-e. Ọrẹn, uphẹn ọ havwiẹ rẹn ọravwọ nọ ghwẹriẹ. Ọravwọ ọrhọ ghwẹriẹ-ẹ, ọwan i vwa mroma yen yanghene ha use riẹn nọ rhiẹ uyono ukoko-o.
RHA HẸROKELE ARUẸDỌN ỌRHẸ ARODỌMẸ I JEHOVA
16-17. (a) Me yi Jehova ọ guọlọre nẹ iruedandan i ru? (Ezekiel 18:32) (b) Marhẹ ekpako ukoko ine ru djephia taghene aye e lele Jehova wian kugbe ọke aye arha ha userhumu rẹn iruedandan?
16 Me ye yono ne uvuẹn oghwa odẹrẹ ọnana, ro vwo irhomu-ẹmro isionrin ri surhobọmwu ọwan? Jehova ọ guọlọ nẹ ohworho owuorowu ọ ghwọghọ-ọ! (Se Ezekiel 18:32.) Ọ guọlọre nẹ iruedandan i lelie kwaphiẹrhọ. (2 Cor. 5:20) Ọnana yọ soriẹ i Jehova ọ ha uphẹn rẹn ihworho ọke ahwanren—ọrhẹ ọke ọwan na ri ruẹ ọdandan ọghwaghwa—nẹ aye i ghwẹriẹ ji rharhumu bruie rhe. Ekpako ukoko i vwo uphẹn ọduado rẹ aye ine leli Jehova wian kugbe, ji ha userhumu rẹn iruedandan nẹ aye i ghwẹriẹ.—Rom. 2:4; 1 Cor. 3:9.
17 Aghọghọ rode ọ ha obẹ odjuwu iruedandan i rha ghwẹriẹre! Oma ọ merhen i Jehova omamọ ọke ephian oruọdandan ọrhọ rharhumu rhiẹ ukoko na. Erhe roro kpahen aruẹdọn i Jehova, kugbe arodọmẹ ọrhẹ ẹghẹlẹ esiri rode ọnẹyen, ẹguọlọ re vwo kpahiẹn no no kodorhọ.—Luke 1:78.
IJORO 111 Oborẹ ọ Lẹrhẹ Ọwan Ghọghọ
a Uvuẹn urhomu-ẹmro ọnana, a rionbọrhọ oruọdandan na taghene ọye ọhworhare. Ọrẹn, iyẹnrẹn na o ji sekpahen imizu emẹse.
b Vẹrhẹ bi, ohworho orho ruẹ ọdandan ọghwaghwa ne le yi nẹ ukoko. Ọrẹn, lele ẹmro i Paul rọ ha uvuẹn 1 Corinthians 5:13, vwana, ne tiẹ ọravwọ nẹ ukoko.
c Jerẹ oborẹ i Baibol na ọ tare, o vwo ihworho ezẹko ra na ja sabu harhomu edandan aye, enana ihworho ri brorhiẹn ne taghene aye ina rha kparehasuẹ Osolobrugwẹ. Re rhe ọnana ne na, o fori na karorhọ taghene Jehova ọrhẹ Jesu ọvo yi na sabu brorhiẹn kpe aruẹ ihworho erana.—Mark 3:29; Heb. 10:26, 27.
