1. Me yi Jehova ọ guọlọre nẹ ọwan ephian i ru?

 JEHOVA ọ ma ituakpọ rhẹ ugbomọphẹ. Orhienbro we bruẹ kẹdẹkẹdẹ, o djephia taghene wa ha ẹghẹlẹ ọrana ruiruo. Orhienbro rọ mai ghanran rẹ onyakpọ ọnọ sabu bru, yẹ ọrẹ ọnọ homakpahontọre rẹn i Jehova ji rhiẹ usuẹn ekrun Ọnẹyen ra ga ye uvuẹn ọsoso akpọ na. Jehova ọ guọlọre nẹ ọwan ephian i ru te omaran. Mesoriẹ? Fọkime o vwo ẹguọlọ kpahen ihworho, ọ ji guọlọ nẹ ekwakwa i rhomu rẹn aye. Ọ guọlọre nẹ aye i rhiẹ igbehian yen ji nyerẹn bẹmẹdẹ.—Deut. 30:​19, 20; Gal. 6:​7, 8.

2. Me yi Jehova o fiẹrorhọ mie iruedandan ri vwa ji ghwẹriẹ? (1 John 2:1)

² Ọrẹn, Jehova ọ vwọ gba ohworho ga ye-e. Ọ ha uphẹn rẹn owuowọnwan nẹ aye i brorhiẹn oborẹ aye ine ruo. Ọrẹn, me yọ nọ phia orhianẹ Olele Kristi ro bromarhame ne, o gbe urhi Osolobrugwẹ ghwu ji ruẹ ọdandan ọghwaghwa? Ọrhọ ghwẹriẹ-ẹ, ene vi tie nẹ ukoko na. (1 Cor. 5:13) Arha tobọ tie nie ne, Jehova o ji fiẹrorhọ taghene oruọdandan na ọnọ rharhumu bruie rhe. Itiọrurhomẹmro, ọnana yọ soriẹ i Jehova o tiobọnẹ izobo otan na rẹn ọwan—na sabu harhomu edandan ihworho ri ghwẹriẹre. (Se 1 John 2:1.) Osolobrugwẹ ẹguọlọ ọwan, ọ ha use rẹn  iruedandan ephian nẹ aye i ghwẹriẹ.—Zech. 1:3; Rom. 2:4; Jas. 4:8.

3. Me ye ne yono kpahen uvuẹn urhomu-ẹmro ọnana?

³ Jehova ọ guọlọre na ha ukẹro rọ ha ni ọdandan nie, omaran ji te iruedandan. Urhomu-ẹmro ọnana ọnọ ta kpahen oborẹ ene ruie lele. We rhe se urhomu-ẹmro ọnana, djokarhọ (1) oborẹ imizu ri ha uvuẹn ukoko i Corinth i ruru ọke omizu owu o ruẹ ọdandan ọghwaghwa, (2) ọkpọvi rẹ ọnyikọ Paul o tiobọnu ọke oruọdandan owu ọ ghwẹriẹ, ọrhẹ (3) oborẹ ekete i Baibol ọnana o dje kpahen uruemru i Jehova kpahen Ilele Kristi ri ruẹ ọdandan ọghwaghwa.

OBORẸ IMIZU RI HA UVUẸN UKOKO I CORINTH I RURU ỌKE OMIZU OWU O RUẸ ỌDANDAN ỌGHWAGHWA

4. Erhirhiẹ ọgo yọ homaphia uvuẹn ukoko i Corinth ọke ahwanren? (1 Corinthians 5:​1, 2)

⁴ Se 1 Corinthians 5:​1, 2. Uvuẹn ugbo onya imishọnari Paul ọresa, no rhon iyẹnrẹn omemwurhọ owu kpahen ukoko ra ha mwu obọ uvuẹn i Corinth. Omizu ọhworhare owu uvuẹn ukoko na, o lele ane ọsẹ ye gbọfanrhiẹn. Aruẹ uruemru ọnana oserhọ kakaka-a, habaye, “ihworho egbamwa na i vwa tobọ ruẹ aruẹ emru ọnana-a”! Ọrẹn, ukoko na ni nẹro rẹn orusọ ye, ji nyajevwo nọ daji ukoko na. Ọkezẹko, aye e roro taghene nyoma izede ọnana, aye na hẹrokele i Jehova dje arodọmẹ phia. Ọrẹn, Jehova o vwo utuoma kpahen idibo yi ra ha arudo ruẹ oborẹ ọsọre. Fọkiẹ orharhere uruemru ọhworhare na, ihworho na ta erharhere ẹmro kpahen ukoko na. Ọnọ ji sabu rhe biomu omamọ uruemru Ilele Kristi erọrọ re kwomakugbe yi. Omarana, ọkpọvi ọgo yi Paul o tiobọnu rẹn ukoko na?

5. Me yi Paul ọ ta rẹn ukoko na nẹ aye i ru, me yọ haye ta? (1 Corinthians 5:13) (Ni ifoto na.)

⁵ Se 1 Corinthians 5:13. Ẹhẹn ọfuanfon na no mwu i Paul ya ileta vwe ukoko na, ji yẹ aye ọkpọvi nẹ aye i ti oruọdandan na ro vwo kwe ghwẹriẹ nẹ ukoko. Me yẹ imizu ukoko na ine ru kpahiẹn? Paul nọ ta rẹn aye taghene “aye i vwe kwomakugbe” ọravwọ-ọ. Me yẹ ọrana o mevirhọ? Paul o djerie fiotọre taghene a “vwa tobọ lele aruẹ ohworho ọrana riẹ emaren kugbe-e.” (1 Cor. 5:11) Erhe lele ohworho riẹ emaren kugbe, ọnọ sabu lẹrhẹ ọwan lelie ghwọghọ ọke kugbe. Nọyẹ, Paul nọ haye ta taghene imizu ukoko na i vwe lelie ru kugbe-e. Ọnana ọnọ sẹrorẹ ukoko na nẹ orharhere uruemru ọravwọ. (1 Cor.  5:​5-7) Habaye, aye i rha kẹnoma riẹn, ọnọ sabu lẹrhiẹ mẹrẹnvwrurhe taghene o beghe nẹ obọrẹ i Jehova ne, ofa ọnana no no mwuie ghwẹriẹ.

6. Marhẹ ileta i Paul o ru hobọte ukoko na ọrhẹ oruọdandan na?

⁶ Ọke i Paul ọ ya ileta vwe Ilele Kristi ri ha uvuẹn Corinth hin, no roro kpahen oborẹ aye ina kpahenrhọ ye lele. Ọke oru, Titus nọ rhua omamọ iyẹnrẹn vwe yi. Ukoko na ọ dabu kpahenrhọ ileta ri Paul ọ ya vwe aye. (2 Cor. 7:​6, 7) Aye i nyalele ọkpọvi na. Habaye, ọke i Paul ọ ya ileta na vwe aye hin, ibiamo ezẹko a vrẹn, oruọdandan na nọ ghwẹriẹre! O wene uruemruien ne, vwana, ọ nyalele irhi egbagba i Jehova ne. (2 Cor. 7:​8-11) Me yi Paul ọ ta rẹn ukoko na nẹ aye i ru?

 OBORẸ UKOKO NA ONO RUẸ ORUỌDANDAN RỌ GHWẸRIẸRE NA LELE

7. Me yẹ ọhworhare na o ruru ọke re tie nẹ ukoko? (2 Corinthians 2:​5-8)

⁷ Se 2 Corinthians 2:​5-8. Paul nọ tare taghene “ọghwọghwu rẹ otu buebun i yẹriẹ na, o te rẹn aruẹ ọhworhare ọrana.” Nọyẹ, ọghwọghwu na ọ wian owian yen ne. Owian ọgo? Ọ lẹrheriẹ ghwẹriẹ.—Heb. 12:11.

8. Me yi Paul ọ ji ta rẹn ukoko na nẹ aye i ru?

⁸ Paul nọ ta rẹn ukoko na: “Are i harhomie ji yẹ ye urhebro” ji “djephia riẹn taghene are i vwo ẹguọlọ kpahiẹn.” Djokarhọ ye taghene Paul ọ guọlọre nẹ ukoko na o ru vrẹn ọrẹ aye ine rhiabọ dede ohworho na ruẹ uvwre aye. Paul ọ guọlọre nẹ aye i djephia riẹn nyoma ẹmro, uruemru, ọrhẹ irueruo aye taghene aye i vwo ẹguọlọ kpahiẹn, aye i ji harhomie ne. Nyoma izede ọnana, no no mwu ọhworhare na ẹro taghene aye i ghini rhiabọ dedie ne.

9. Me yọ nọ sabu lẹrhẹ ezẹko tirierhumu aye ina harhomu oruọdandan rọ ghwẹriẹre na?

⁹ Imizu ukoko na ezẹko i tirierhumu aye ina rharhumu rhiabọ dede omizu na? Ọwan e rhe-e, ọrẹn, ọkezẹko ọ phiare. Erhe rorie, oborẹ o ruru na ọ rhua ofa rhiẹ ukoko na ọrhẹ imizu ukoko na ezẹko. Udabọ ọrana, imizu ukoko na i damoma mọren irhi Jehova ji sẹrorẹ ẹfuọn, fọkiẹ ọnana aye ina sabu rhe roro taghene manẹ e vwe rhiabọ dede omizu na-a. (Haye vwanvwọn Luke 15:​28-30.) Ọrẹn, mesoriẹ ọ ghanren nẹ ukoko na o dje obọdẹn ẹguọlọ phia rẹn omizu ọnana?

10-11. Me yọ nọ sabu phia orhianẹ ekpako ukoko e kwe harhomu oruọdandan rọ ghwẹriẹre na-a?

¹⁰ Roro kpahen oborẹ ọnọ sabu phia orhianẹ ekpako ukoko na e kwe rhiabọ dede omizu rọ ghwẹriẹre na-a, yanghene orhianẹ imizu ukoko na e kwe dje ẹguọlọ phia riẹ-ẹn. Omizu na ọnọ sabu “mwuomarhọ phan” ji vwo ẹhẹn ro seriotọre. Ọnọ sabu roro taghene o vwo ifiẹrorhọ ghwomara-an. Ọkezẹko, omwemẹ ro vwori rọ nọ kwaphiẹ onyerẹnkugbe yi rhẹ i Jehova rhọ no no seriotọre.

¹¹ Ọrọ mai biomu, imizu ukoko na arha harhomu ọravwọ-ọ, ọnọ sabu hobọte onyerẹnkugbe aye rhẹ i Jehova. Mesoriẹ? Fọkime, ọke ọrana, aye ni ne rhe dje uruemru ọvwiavwia i Dẹbolo phia, ukperẹ ono rhiẹ uruemru ra harhomẹ ri Jehova o djephia harẹn eri ghwẹriẹre. Aye ni na ha uphẹn rẹn Echu nọ nyoma aye ghwọghọ onyerẹnkugbe ọravwọ rhẹ i Jehova.—2 Cor. 2:​10, 11; Eph. 4:27.

12. Marhẹ ukoko na ono ru hẹrokele i Jehova?

¹² Marhẹ ukoko i Corinth ono ru hẹrokele i Jehova ukperẹ ono rhiẹ Echu? Nyoma aye ina hẹrokele i Jehova harhomu iruedandan ri ghwẹriẹre. Djokarhọ oborẹ ihworho ezẹko ri ya i Baibol na i ta kpahen i Jehova. David nọ tare, Ọye ‘omamọ ohworho, o ji mwuegbe rọ nọ harhomu.’ (Ps. 86:5) Micah nọ yare: “Osolobrugwẹ ọgo yọ họheruọ, rọ harhomẹ edandan ji kpariroro vrẹn orusọ?” (Mic. 7:18) Isaiah nọ ji ta: “Jenẹ ọvwọkon o tiobọnu izede ọnẹyen, jenẹ oruogbongbon ọ nyajẹ iroro yi vwo; je nọ ghwẹrioma bru i Jehova, ro no dje arodọmẹ riẹn, no bru Osolobrugwẹ ame, fọkime ọye ọnọ harhomu izede ọduado.”—Isa. 55:7.

13. Mesoriẹ o rhiẹ oborẹ oserhọ na rharhumu ha oruọdandan rọ ghwẹriẹre na? (Se ekpeti na “ Ọkiọgo ya Rharhumu ha Ọhworhare rọ ha Uvuẹn Ukoko i Corinth?”)

¹³ Nẹ aye i sabu hẹrokele i Jehova, imizu ri ha uvuẹn ukoko i Corinth ine vi rhiabọ dede ọhworhare rọ ghwẹriẹre na, ji yẹ  ye imwẹro taghene aye i vwo ẹguọlọ kpahiẹn. Nyoma aye a nyalele ọkpọvi Paul ji rhiabọ dede oruọdandan rọ ghwẹriẹre na, aye ni djephia taghene aye a “huvwele ọrẹ i kemru kemru.” (2 Cor. 2:9) Dedevwo ibiamo ezẹko ọvo ye tirie nẹ ukoko na, ọrẹn, ọghwọghwu na ọ lẹrheriẹ ghwẹriẹ. Omarana, orho fo nẹ ekpako ukoko i kpọke bọmọke aye ina ki rharhumu haye-e.

OBORẸ ENE RU HẸROKELE ẸZEGUON ỌSOSO ỌRHẸ ARODỌMẸ I JEHOVA

14-15. Me ye yono ne kpahen oborẹ imizu ri ha ukoko i Corinth i ruẹ oruọdandan na lele? (2 Peter 3:9) (Ni ifoto na.)

¹⁴ Iyẹnrẹn kpahen oborẹ imizu ri ha ukoko i Corinth i ruẹ oruọdandan na lele, a yariẹ rhotọre ji sẹroriẹ neneyo “ọwan i sabu yono nie rhe.” (Rom. 15:4) Iyẹnrẹn ọrana o yonirin ọwan taghene Jehova o vwo nẹro rẹn ohworho ro ruẹ ọdandan ọghwaghwa rọ vwọ guọlọ ghwẹriẹ, nọ daji ukoko yi-i. Dedevwo Jehova Osolobrugwẹ “arodọmẹ,” ọrẹn, ọ vwọ fọkiẹ ọnana ha uphẹn rẹn oruọdandan rọ vwọ ghwẹriẹ nọ daji uvwre ihworho yi-i. Habaye, ọ vwọ fọkiẹ arodọmẹ yen nẹro rẹn orusọ-ọ; evwan yen kpahen oborẹ ọgbare ọrhẹ oborẹ ọsọre i vwe ji wene-e. (Jude 4) Itiọrurhomẹmro, ọrhọ ha uphẹn rẹn oruọdandan nọ daji ukoko na, ọrana o dje arodọmẹ phia-a, fọkime ọnọ sabu suẹ ẹkuọn rẹn imizu ukoko na.—Prov. 13:20; 1 Cor. 15:33.

 ¹⁵ Udabọ ọrana, ọwan i yonorin taghene Jehova ọ guọlọ nẹ ohworho owuorowu ọ ghwọghọ-ọ. Ọ guọlọre nẹ ihworho ephian i simirhọ. O gbe arodọmẹ rẹn ihworho ri ghwẹriẹre, ri ji vwo omwemẹ aye ina kwaphiẹ onyerẹnkugbe aye rhẹ i Jehova rhọ. (Ezek. 33:11; se 2 Peter 3:9.) Omarana, ọke ọhworhare rọ ha uvuẹn ukoko i Corinth ọ ghwẹriẹ ji sẹrerhumuji ọdandan na, Jehova nọ nyoma i Paul tiobọnẹ ọkpọvi rẹn ukoko na, taghene aye i harhomie ji rhiabọ dedie.

16. Marhẹ oma o ruo kpahen oborẹ imizu ri ha ukoko i Corinth i ruẹ oruọdandan na lele?

¹⁶ Oborẹ imizu ri ha ukoko i Corinth i ruẹ oruọdandan na lele, ọ ha userhumu rẹn ọwan mẹrẹn ẹguọlọ i Jehova vwrurhe, omaran ji te ẹzeguon ọrhẹ irueruo ọsoso yi. (Ps. 33:5) A kpẹmẹ i Jehova fọkiẹ emamọ iruemru enẹyen. Fọkime, ọwan ephian iruedandan—omarana, a guọlọ ẹharhomu ọnẹyen. Ọwan ephian i kpẹmẹ i Jehova omamọ fọkiẹ ẹghẹlẹ otan na, rọ lẹrhiẹ sabu harhomu edandan ọwan. Ọ merhoma dẹn taghene Jehova o vwo ẹguọlọ okokodo kpahen ihworho, ọ ji guọlọ oborẹ ọ mai rhomu rẹn aye!

17. Enọ ego ya na kpahenrhọ uvuẹn urhomu-ẹmro rọ ha kpahen ọnana?

¹⁷ Ohworho orho ruẹ ọdandan ọghwaghwa uvuẹn ọke ọwan na, marhẹ ene ruie lele? Marhẹ ekpako ukoko ine ru hẹrokele i Jehova, ji ha userhumu rẹn oruọdandan na ghwẹriẹ? Uruemru ọgo yo fori nẹ imizu ukoko na i djephia, orhianẹ ekpako ukoko i ti ohworho nẹ ukoko yanghene rharhumu haye? Ana kpahenrhọ enọ erana uvuẹn urhomu-ẹmro rọ ha kpahen ọnana.