Ọnyikọ Paul nọ tare uvuẹn ileta rọ ya vwe Ilele Kristi ri ha uvuẹn Thessalonica: “Orhianẹ ohworho ọ vwọ huvwele urhebro ame nyoma ileta ọnana-a, are i djokarhọ ohworho ọrana.” (2 Thess. 3:14) Vẹrhẹ bi, a tare taghene ọkpọvi ọnana o sekpahen ekpako ukoko. Omizu ukoko na orho vwo uruemru rọ ha arudo tiẹn iruemru-urhi Baibol udabọ urhebro re tiobọnu riẹn, ekpako ukoko i gba haye ruẹ edamẹ ukoko. Orho ru, imizu erọrọ uvuẹn ukoko na i vwe kwomakugbe omizu na-a.

Ọrẹn, o fori ne ruẹ ibiẹ ewene. Urhebro i Paul ọ rionbọrhọ idjaghwẹ rẹ Olele Kristi owuowu ọnọ kpare uvuẹn erhirhiẹ ezẹko. Omarana, ekpako ukoko i vwa haye ruẹ edamẹ ukoko ghwomara-an. Mesoriẹ e ruẹ ewene ọnana? Djokarhọ oborẹ i Paul ọ ta kpahan ọke rọ ya ileta na.

Paul ọ djokarhọ ye taghene ihworho ezẹko uvuẹn ukoko na i vwo uruemru ro vwo “serhọ.” Aye i vwe kwe huvwele urhebro i Baibol ro tiobọnu rẹn aye-e. Ọke owu ro rhiẹ ọpha ruẹ aye, no jurhi ọnana: “Are i vwa ha emaren rẹn kohworho kohworho rọ vwọ guọlọ wia-an.” Udabọ ọrana, ezẹko ri na sabu wian, i vwe kwe wian hobọtua oma aye-e. Habaye, aye e dumu unu rhẹ ẹmro ro vwo te aye. Marhẹ Ilele Kristi ine ruẹ aruẹ ihworho enana lele?—2 Thess. 3:​6, 10-12.

Paul nọ tare, “are i djokarhọ ohworho ọrana.” Ẹmro i Greek na o mevirhọ taghene o fori ne lele ohworho na nyerẹn rhẹ ẹghwanren. Paul o tiobọnu ọkpọvi na rẹn ọsoso ukoko na, orhiẹ ekpako ukoko ọvo-o. (2 Thess. 1:1; 3:6) Omarana, Olele Kristi owuowu ọrhọ djokarhọ ye taghene Olele Kristi ọrọrọ ọ vwọ nyalele urhebro i Baibo-ol, ọnọ sabu brorhiẹn taghene orho “kwomakugbe” ọravwọ-ọ.

Ọnana no mevirhọ taghene e gbe ruẹ ọravwọ jerẹ ohworho re ti nẹ ukoko? Ẹjo, Paul nọ habaye: “Are i gbe ji rhe nie taghene omizu are.” Omarana, ene ji rhe lele ọravwọ ruẹ uyono ọrhẹ aghwoghwo kugbe, ọrẹn, Olele Kristi owuowu yo no brorhiẹn sẹ ono lelie riakpọ yanghene ruiruẹn kugbe. Mesoriẹ? Paul nọ tare, “neneyo ofa ọ ruiẹ.” Arha djokarhọ aruẹ ohworho ọrana, ofa ọnọ sabu ruiẹ ro no lele fiẹ ọrẹ ono wene uruemruien.—2 Thess. 3:​14, 15.

Marhẹ Ilele Kristi inyenana ine ru ha urhebro ọnana ruiruo? Ọrukaro, jerẹ oborẹ i Paul ọ tare, ono vi mwu ọwan ẹro taghene uruemru na ‘o serhọ-ọ.’ Paul ọ vwọ ta kpahen ihworho re ruẹ ekwakwa rẹ ẹhẹn obrorhiẹn ọwan o vwo kwerhọ-ọ, yanghene ihworho re ruẹ ekwakwa ri vwe je ọwan. Habaye, ọ vwọ ta kpahen ihworho ri ruru ọwan sọ-ọ. Ukpomaran, Paul ọ rionbọrhọ ihworho ra ha arudo tiẹn irhi Osolobrugwẹ.

Inyenana, arha djokarhọ ye taghene Olele Kristi ọ ha arudo tiẹn irhi Osolobrugwẹ, a owuowọnwan ogbo brorhiẹn sẹ ono kwomakugbe ọravwọ riakpọ yanghene ruiruẹn. Ra mẹriẹn taghene ọnana orhienbro omobọ na, o fo na ta rẹn awọrọ ri vwe rhiẹ ihworho ekrun ọwan kpahiẹ-ẹn. Habaye, ene ji kwomakugbe ọravwọ uvuẹn uyono ukoko ọrhẹ aghwoghwo. Ọravwọ orho ruẹ ewene ne, ana sabu rharhumu kwomakugbe yi ruẹ ekwakwa re lelie ruẹ bi.