DIANA ọ vrẹn ẹgbukpe 80 ne. Esa ye o kpomu emiamo rọ hobọte aphẹrhiẹn yen re se Alzheimer, omarana na hẹrote yi uvuẹn oghwa re simi ihworho bọmọke o ki hwu. Emọyen ehworhare awanva i ji hwu ne, emiamo ikansa no ji mwu i Diana uvuẹn enye yi. Ọrẹn, imizu ri ha uvuẹn ukoko i Diana ra mẹriẹn uvuẹn uyono ọrhẹ aghwoghwo, a djokarhọ ye taghene oma ọ merhiẹn ọke ephian.

John, omizu ro kin ikoko sansan vrẹn ẹgbukpe 43. O vwo ẹguọlọ kpahen owian na, ọ tobọ haye ruẹ akpenyerẹn yen! Ọrẹn, nọ dobọ owian na ji ọke omizie owu o kpomẹ, vwana ọ ga uvuẹn ukoko owu. Ọke ihworho ri rhe i John bi a mẹriẹn uvuẹn omẹvwa ọduado yanghene ọkokamu, nọ họhọre taghene o ji wene-e. Ọ ji ghọghọ ọke ephian.

Marhẹ i Diana ọrhẹ John i ru sẹrorẹ aghọghọ aye? Marhẹ oma o ru merhen ohworho rọ rioja ọrẹ iroro yanghene ugboma? Marhẹ oma o ru merhen ohworho rẹ uphẹn ẹga ro vwo ẹguọlọ kpahen ọ variẹ obọ? Baibol na nọ kpahenrhọ ye: “Evwata na ina ghọghọ fọkiẹ i Jehova.” (Ps. 64:10) Ana sabu vwẹruọ urhomẹmro ọnana, orho rhianẹ e rhe oborẹ ọ lẹrhẹ ohworho ghọghọ ọrhẹ oborẹ ọ vwọ lẹrhiẹ ghọghọ.

Itiọrurhomẹmro, ọkezẹko o vwo ekwakwa ezẹko ra yẹ ihworho aghọghọ. Jerẹ udje, roro kpahen ihworho awanva ri vwo ẹguọlọ kpahen omomaye ra ji guọlọ rọnmọ. Yanghene ohworho ro vwiẹ ọmọ, yanghene ọrẹ a yẹre uphẹn ẹga uvuẹn ogame i Jehova. Aruẹ ekwakwa enana a yẹ ọwan aghọghọ, o fori no rhiẹ omaran nime i Jehova yo tiobọnẹ ekwakwa enana rẹn ọwan. Ọye yọ ha orọnmo mwu, ọye yo ji ruie nẹ ituakpọ i vwiẹ, nọ jeghwai tiobọnẹ ewian rẹn ọwan uvuẹn ukoko na.—Gen. 2:18, 22; Ps. 127:3; 1 Tim. 3:1.

Ọrẹn, aghọghọ ezẹko a sabu rhiẹ ọrẹ ibiọke. Ọrẹ omemwurhọ, esa yanghene ane ọnọ sabu ghwọwe yanghene hwu. (Ezek. 24:18; Hos. 3:1) Emọ ezẹko a sabu tiẹn uvwele i Jehova ọrhẹ eri vwiẹrẹ aye, yanghene a tobọ le aye nẹ ukoko. Emọ i Samuel a ga i Jehova izede  rọ guọlọre-e, habaye, orusọ i David nọ lẹrhẹ ukpokpogho ruẹ oghwa ọnẹyen. (1 Sam. 8:1-3; 2 Sam. 12:11) Aruẹ ekwakwa enana a suẹ omemwurhọ ọrhẹ ukpokpogho. Aye i vwa yẹ ọwan aghọghọ-ọ.

Omaran ọ ji havwọ, uphẹn ẹga ina sabu va ọwan obọ fọkiẹ emiamo, ehwan ekrun ọwan yanghene ewene uvuẹn ukoko na. Buebun imizu re rhiẹromẹrẹn ewene enana a ta taghene ọ da aye taghene aye i vwa rha mẹrẹn evwẹnvuọn rẹ aye a mẹrẹn bi-i.

Ana sabu mẹrẹnvwrurhe taghene aghọghọ aye ọrẹ ibiọke. Ọrẹn, o vwo aruẹ aghọghọ rọ nọ sabu rhirhiẹ ye ọrhọ tobọ rhianẹ erhirhiẹ i wẹnẹren? O vwori, fọkime Samuel, David ọrhẹ awọrọ i sẹrorẹ aghọghọ aye udabọ ebẹnbẹn.

Jesu o ghini rhe oborẹ aghọghọ o mevirhọ. Ọke rọ ha obẹ odjuwu rẹ ekwakwa ephian a dabu serhọ, nọ “ghọghọ obaro [i Jehova] ọke ephian.” (Prov. 8:30) Ọrẹn, ọke i Jesu ọ ha otọrakpọ na, nọ dẹrughwaroghwẹ ebẹnbẹn egbogbanhon uvuẹn erhirhiẹ sansan. Udabọ ọrana, oma ọ merhen i Jesu ro no ruẹ ọhọre Ọsẹ ye. (John 4:34) Nẹ ason re kpe yi vwo? Baibol na ọrhọ ta: “Fọkiẹ aghọghọ rọ ha obaruiẹ, no vwo edirin uvuẹn orhan oja.” (Heb. 12:2) Omarana, no fori ne roro kpahen ẹmro eva ri Jesu ọ ta kpahen obọdẹn aghọghọ.

Ọke owu, idibo i Jesu awan 70 ni ghwẹrioma bruie ọke aye e ghwoghwo hin. Aye a ghọghọ fọkime aye i ruẹ igbevwunu buebun, tobọ le ikpodje nẹ ihworho oma. Ọke ọrana, Jesu nọ ta rẹn aye: “Are i vwa ghọghọ fọkime are i sabu le ikpodje na-a, ọrẹn are i ghọghọ fọkime a ya odẹ are rhẹ obẹ idjuwu ne.” (Luke 10:1-9, 17, 20) Itiọrurhomẹmro, ekwerhọ i Jehova ọ ghanren ghwẹ ọrẹ ana riamerhen uphẹn ẹga ezẹko. Jesu ọnọ karorhọ idibo yi ri fuevwan, ọnana yọ soriẹ aye ina ghọghọ.

Uvuẹn erhirhiẹ ọrọrọ, Jesu nọ tẹmro rẹn otu owu. Ọmase onyẹ i Jew owu nọ tare taghene oma ọnọ merhen izu i Jesu, nime Jesu omamọ oyono. Ọrẹn, Jesu nọ kpọ iroro ọmase na vi, ọke rọ ta: “Ẹjo, ukpomaran, omamerhomẹ ọ havwiẹ rẹn ihworho re rhon ẹmro Osolobrugwẹ, ra jeghwai nyalelie!” (Luke 11:27, 28)  Itiọrurhomẹmro, oma ọ merhen eri vwiẹ omamọ ọmọ; ọrẹn, re vwo omamọ onyerẹnkugbe rhẹ i Jehova yọ mai lẹrhẹ ohworho ghọghọ.

Omarana, erhe vwo ekwerhọ i Jehova, na sabu vwo obọdẹn aghọghọ. Dedevwo ebẹnbẹn i vwa merhoma-a, ọrẹn a sabu wene erhirhiẹ na-a. Ọrẹ ovẹnẹ, arha sabu vwo edirin jeghwai sẹrorẹ emevigbanhon ọwan, ne vwo ẹhẹn ro totọre. (Rom. 5:3-5) Habaye, Jehova ọ yẹ ọwan ẹhẹn ọfuanfon ọnẹyen arha hẹrosuiẹ, aghọghọ ọ ha usuẹn uruemru rẹ ẹhẹn ọfuanfon na ọ haphia. (Gal. 5:22) Ọnana nọ lẹrhẹ ọwan vwẹruọ oborẹ ọsoriẹ i Psalm 64:10 ọ tẹmro ọnana: “Evwata na ina ghọghọ fọkiẹ i Jehova.”

Ọnana yọ soriẹ i Diana ọrhẹ i John ra hunute bi na, a sabu sẹrorẹ aghọghọ ọke aye a dẹrughwaroghwẹ erhirhiẹ egbogbanhon. Diana ọrhọ ta: “Mi ha i Jehova ruẹ ekete ra zẹrua jerẹ oborẹ ọmọ o ruẹ eri vwiẹriẹ.” Marhẹ o ru mẹrẹn ekwerhọ Osolobrugwẹ? Diana nọ habaye: “Mi mẹrẹnvwrurhe taghene i Jehova ọ ha userhumu mẹ sabu rhe ghwoghwo ọke ephian rhẹ ughwaro sasasa.” John ro ji fiomarhọ iruo Uvie na ọke ọ dobọ owian ro kin ikoko sansan ji, nọ ta kpahen oborẹ ọ ha userhumu riẹn, nọ tare: “Avwẹ ẹgbukpe 1998 ra yẹ mẹ owian mi na ha uyono phia uvuẹn Ministerial Training School, mi ruẹ uyono omobọ ghwẹ oborẹ mie ruie bi.” Nọ ji ta kpahen omayen ọrhẹ aniẹ: “Ame i vwo ẹhẹn rẹ ame ina ga i Jehova uvuẹn kerhirhiẹ kerhirhiẹ, ọnana nọ lẹrhẹ ewene na lọhọ rẹn ame. Ame a vioja fọkiẹ erhirhiẹ na-a.”

Imizu erọrọ i ji mẹrẹn ẹmro i Psalm 64:10 rhiẹ urhomẹmro ne. Jerẹ udje, roro kpahen esa ọrhẹ ane ri gare uvuẹn oghọn ukoko i United States te ẹgbukpe 30. Ọke oru, ne djerẹ aye ya ga ẹrhẹ ọkobaro oghẹrensan. Aye ni tare: “Itiọrurhomẹmro, ọ miama orhianẹ oborẹ wu vwo ẹguọlọ kpahen ọ varuọ obọ, ọrẹn wu sabu mwuomarhọ bẹmẹdẹ-ẹ.” Aye ni kwomakugbe ẹkwaphiẹrhotọre owian aghwoghwo ukoko na. Aye ni ji habaye: “Ame i nẹrhomo vwe i Jehova kpahen ekwakwa kirighwo ezẹko. Omarana, ọke ame a mẹrẹn ẹkpahenrhọ ẹrhomo ame, oma nọ merhenren ame. Ọke ame e te ekete re djerẹ ame nya, o jiri-i, imizu erọrọ uvuẹn ukoko na ni ji tuẹn owian ọkobaro rhọ, ame ni ji vwo emọ uyono i Baibol eva re ruẹ riaro.”

Itiọrurhomẹmro, ọ lọhọ ra na ghọghọ ọke ephia-an, nime ana rha dẹrughwaroghwẹ ebẹnbẹn. Ọrẹn, Jehova yo mwu ọbo ijoro na ya ẹmro ri ha uvuẹn Psalm 64:10. Ẹhẹn ọwan ọrhọ tobọ seriotọre ọkezẹko, ana sabu vwo imwẹro taghene evwata na ina “ghọghọ fọkiẹ i Jehova” orhianẹ aye i fuevwan udabọ erhirhiẹ ro wene. Habaye, ana sabu tẹnrovi orugba ive i Jehova rọ nọ ha “idjuwu ekpokpọ ọrhẹ akpọ ọkpokpọ” rhe. Ọke ọrana, Jehova ono ti ijẹgba ọwan nie. Ihworho i Jehova ephian ina “mẹrẹn omamerhomẹ jeghwai rha ghọghọ bẹmẹdẹ” fọkiẹ oborẹ i Jehova ono tiobọnu rẹn ọwan.—Isa. 65:17, 18.

Roro kpahen oborẹ ono mevirhọ: ọwan ine vwo omọkpokpọ kẹdẹkẹdẹ. O toro oborẹ ekwakwa ra dẹrughwaroghwu ọke rọ vrẹnren na i gbanhon te-e, a karorhọ aye ghwomara-an. Jehova ọ yẹrẹ ọwan imwẹro taghene “a vwa samọ karorhọ ekwakwa ahwanren na ghwomara-an, aye i rha tobọ kọn ruẹ ọmudu na-a.” Ana rhọmọ ihworho ọwan re vwo ẹguọlọ kpahen nẹ uhwu. Iduduru ihworho ina họhọ eri vwiẹ ọgbọtọ rọ ha ẹgbukpe 12 ri Jesu ọ rhọmọnuhwu na, Baibol na ọrhọ ta: “Oma nọ merhenren aye omamọ.” (Mark 5:42) Ọke ọrana, ihworho ephian ni ne rhiẹ evwata, aye ni na “ghọghọ fọkiẹ i Jehova” bẹmẹdẹ.