Wu dabu se irhomu-ẹmro ri ha uvuẹn Oghwa Odẹrẹ re nyavrẹn na? Nie sẹ wu na sabu kpahenrhọ enọ enana:

Ekete ego uvuẹn i Baibol na yo djerie phia taghene i Jehova o gbe arodọmẹ rẹn ọwan?

Ọke emọ Israel a rioja uvuẹn Egypt, Jehova ọ djokarhọ emiamiamo ọrhẹ ojẹriọ aye. (Ex. 3:7; Isa. 63:9) A maren ọwan uvuẹn ohọhọme Osolobrugwẹ, omarana ọwan ne ji vwo aruẹdọn. Jehova ọ ji tobọ vwo aruẹdọn kpahen ọwan, ọwan erhe roro taghene e mwuovwan ẹguọlọ ye-e.—wp18.3, pp. 8-9.

Marhẹ uyono i Jesu i ru ha userhumu rẹn ihworho fi utuoma kparobọ?

Itu i Jew buebun uvuẹn ọke i Jesu i vwo uruemru utuoma. Kristi nọ karunumwu ọghanronmẹ omeriotọre, nọ jeghwai tiẹn uruemru re vwo utuoma kpahen ihworho ri nẹ ekete erọrọ rhe. Ọ ha urhebro rẹn idibo yi nẹ aye i ha ereva aye rhiẹ imizu aye.—w18.06, pp. 9-10.

Me ye yono nẹ oborẹ ọsoriẹ i Jehova o vwo kwe nẹ i Moses ọ ruẹ Otọre Ive na?

Moses o vwo obọdẹn onyerẹnkugbe rhẹ i Jehova. (Deut. 34:10) Ọke ugbo onya rọ ha ẹgbukpe 40 uvuẹn ato na ọ joma hin, ihworho na ni brenu ọgbọ ọreva ye taghene aye e vwo ame rẹ aye ina da-a. Osolobrugwẹ nọ ta rẹn i Moses nọ tẹmro rẹn atita na. Ọrẹn, Moses nọ ghwiẹ atita na. Ọnọ sabu rhirhiẹ taghene i Jehova ọ tuekwẹre nime i Moses ọ nyalele ọkpọvi ọnẹye-en, yanghene i Moses ọ ha ujiri vwe yi fọkiẹ igbevwunu na-a. (Num. 20:6-12) Ọnana o yonirin ọwan taghene ọghanranren omamọ na huvwele i Jehova jeghwai ha ujiri vwe yi.—w18.07, pp. 13-14.

Marhẹ e ru sabu ruẹ sọ orhianẹ e ni oborẹ ohworho ọ havwọ guien ẹzọn?

Ihworho a bọn ezẹnguọn aye kpahen ekwakwa esa: ekete ohworho o nurhe, ekwakwa ro vwori, ọrhẹ ẹgbukpe rọ havwọ. O rhiẹ obọre ọ ghanranren na ha ukẹro ri Jehova ọ ha ni ihworho ha ni aye! (Acts 10:34, 35)—w18.08, pp. 8-12.

Izede ego yẹ Ilele Kristi ri kpako ne ine ru sabu ha userhumu rẹn awọrọ?

Osolobrugwẹ o vwo ẹguọlọ kpahen Olele Kristi rọ kpako ne re wene owian ye, ọye ọnọ sabu ji ha userhumu rẹn awọro. Ọye ọnọ sabu ha userhumu rẹn ihworho rẹ ereva aye e vwe riẹ uyono, imizu ri vwe riẹ uyono yanghene aghwoghwo, ọnọ sabu ha uyono i Baibol mwu rẹn awọrọ, jeghwai kerabọ owian aghwoghwo na.—w18.09, pp. 8-11.

Me yẹ ezẹko usuẹn Ekwakwa ra ha Yono Ihworho na?

O vwo ikadi jw.org ọrhẹ ọbe use. O ji vwo itrati ẹrẹnren ra dabu kwaphiẹrhọ kugbe Oghwa Odẹrẹ ọrhẹ Awake! O ji vwo ibroshọ, ẹbe eduado eva ra ha yono ihworho, kugbe ividio ẹne, usuẹn aye yẹ Mesoriẹ Ene Yono I Baibol Na?—w18.10, p. 16.

Marhẹ Olele Kristi ono ru dẹ urhomẹmro na jerẹ oborẹ a ha urhebro rẹn ọwan ne ru uvuẹn Proverbs 23:23?

A vwa ha igho dẹ urhomẹmro na-a. Ọrẹn, ọwan a ghwọghọ ọke ọrhẹ omẹdamu na sabu vwo urhomẹmro na.—w18.11, p. 4.

Me ya na sabu yono nẹ oborẹ Hosea o lele aniẹ ro rhiẹ i Gomer nyerẹn lele?

Gomer ọ ghwọwe ọgbọ buebun, ọrẹn Hosea nọ harhomie jeghwai kwaphiẹ orọnmo aye rhọ. Orhianẹ ohworho rẹ Olele Kristi ọ rọnmọ ọ ghwọwe, omizu ra ghwọwe rhurhu na ọnọ sabu brorhiẹn taghene ọnọ harhomie. Orhianẹ ọ rharhumu lele ohworho rọ ghwọwe rhurhie na mẹronma ne, o rho vwo oborẹ ọsoriẹ ọnọ forọnmo na ghwomara-an.—w18.12, p. 13.