Ẹjo. Dẹbolo ọ vwọ ta rẹn Eve taghene ọrhọ re omamọ ra zẹ na, nọ nọ họhọ taghene o hwuru, ọrẹn ẹhẹn rọ ha omayen (rẹ ihworho ezẹko e se arhọ i jehwuo) o ji nyerẹn ekete ọrọrọ-ọ. Nyoma rọ ha obodirin tẹmro, Echu nọ ta rẹn Eve taghene ọrhọ riẹ omamọ orhan ọrana, ‘o vi hwuẹ’ kakaka-a. Nọ haye ta taghene ono rho nyerẹn jeghwai riamerhen obọdẹn akpọ, vabọ userhumu i Jehova.—Gen. 2:17; 3:3-5.

Ra mẹriẹn taghene orhiẹ uvuẹn Eden yẹ uyono efian arhọ i jehwuo o nurhe-e, nẹ bọgo yẹ uyono ọrana o nurhe? Ọwan e rhe-e. Ọrẹn, e rheri taghene a ghwọghọ ẹga efian ephian nie uvuẹn ọke Ukude i Noah. Ra mẹriẹn taghene Noah ọrhẹ ekrun ọnẹyen ọvo ri rhiẹ ihworho ra ga ogame urhomẹmro yi vrẹn Ukude na, ọnana no mevirhọ taghene iyono efian owuorowu ọ havwiẹ ọke ọrana-a.

Omarana, ana sabu ta taghene imwẹro kpahen arhọ i jehwuo, ọ homaphia ọke Ukude na ọ phia hin. O vwo ẹfro-o, ọke Osolobrugwẹ o fi ohra rhẹ edjadjẹ ituakpọ uvuẹn Babel ọrhẹ ọke ihworho na a rhabọ “lele ọsoso otọrakpọ na,” ihworho na ni kpare iroro na lele oma taghene ituakpọ i vwo arhọ i jehwuo. (Gen. 11:8, 9) O toro ekete uyono efian ọnana o nurhe-e, o mwurun ọwan ẹro taghene Echu ro rhiẹ “ọsẹ efian” ọrhẹ Dẹbolo, yo jiri uyono ọnana, oma ọ ji merhiẹn taghene o kerabọ omamọ ne.—John 8:44.