A ya iyẹnrẹn rọ ha uvuẹn Deuteronomy 22:25-27, neneyo e brorhiẹn sẹ ọhworhare na ọ riẹ iborhin yanghene ọ riẹ iborhi-in, fọkime ọhworhare na ọ riẹ iborhin ne. Urhi ọnana ọ tẹnrovi oborẹ ene ru djephia taghene ọmase na ọ riẹ iborhi-in. Djokarhọ erhirhiẹ na.

Deuteronomy 22:23, 24 ọ tẹmro kpahen ọhworhare rọ gba ọmase ra san rhotọre ne gbọfanrhiẹn “uvuẹn amwa na.” Nyoma ro ruẹ ọnana, ọ riẹ iborhin ọwiẹghwọ ne fọkime ọmase ra san rhotọre ne, e nie taghene ọ rọnmọ ne. Ọmase na vwo-o? “O korunu uvuẹn amwa na-a.” Orhianẹ o korunu bi, manẹ awọrọ e rhon jeghwai ha userhumu riẹn. Ọrẹn, o korunu-u. Omarana, aye awanva i riẹ iborhin fọkime ọmase na o ji vwobọrhọ ọwiẹghwọ na.

Urhi na nọ ji ta kpahen erhirhiẹ ọrọrọ: “Ọrẹn, orhianẹ ọhworhare na nọ mẹrẹn ọgbọtọ ra san rhotọre ne uvuẹn egbo jeghwai gba ye gbọfanrhiẹn, ọhworhare rọ gba ọgbọtọ na gbọfanrhiẹn ọvo yo no hwuo, are i vwe ruẹ ọgbọtọ na emru owuorowu-u. Ọgbọtọ na o ji ruẹ ọdandan ro no lele fiẹ uhwu riẹ-ẹn. Erhirhiẹ ọnana o ji sekpahen ọhworhare ro kpare owọnren bru ọwọrọ jeghwai kpe yi hwu. Fọkime, ọ vwariẹ uvuẹn egbo, ọgbọtọ ra san rhotọre na o korunu, ọrẹn o vwo ohworho rọ ha userhumu riẹ-ẹn.”—Deuteronomy 22:25-27.

Uvuẹn erhirhiẹ ọrana, iguẹnzọn na ina sabu rorie taghene oborẹ ọmase na ọ tare yẹ urhomẹmro. Izede ọgo? Fọkime ọmase na o “korunu, ọrẹn o vwo ohworho rọ ha userhumu riẹ-ẹn.” Omarana, ọ ghwọwe-e. Ọrẹn, ọhworhare na ọ riẹ iborhin ọwiẹghwọ ọrhẹ uruemru ra gba ohworho gbọfanrhiẹn, fọkime ‘ọ gba ọgbọtọ ra san rhotọre na gbọfanrhiẹn.’

Omarana, dedevwo urhi na ọ tẹnrovi oborẹ ọmase na ono ru riase, ọrẹn iyẹnrẹn na o djephia taghene ọhworhare na ọ riẹ iborhin ọwiẹghwọ ọrhẹ uruemru ra gba ohworho gbọfanrhiẹn. O mwurun ọwan ẹro taghene iguẹnzọn na ina dabu “ni ẹmro na so” jeghwai brorhiẹn ro serhọ ovwan ọgbagba rẹ Osolobrugwẹ o fi rhotọre ne.—Deut. 13:14; 17:4; Ex. 20:14.