Wu na sabu kpahenrhọ enọ enana lele oborẹ aye i havwọ uvuẹn Oghwa Odẹrẹ ọrẹ 2019?

Me yi Jehova ọ haye ta ọke ro vive taghene: “O vwo ekwakwa owọnren re ruru ra na ha kparehaso are ro no vwo efikparobọ owuorowu-u”? (Isa. 54:17)

Ọwan ina sabu hẹrosuẹ i Jehova taghene ọnọ sẹrorẹ ọwan nẹ “edon evwọkon na.” (Isa. 25:4, 5) Evwreghrẹn ọwan i sabu ha ẹkuọn i bẹmẹdẹ vwe ọwa-an.—w19.01, pp. 6-7.

Marhẹ oborẹ i Jehova o lele itu i Canaan ọrhẹ emọ Israel ri sẹrerhumuje yi ru lele, o ru dje orhienbro ọsoso yi phia?

Jehova ọ ha ihworho re sehiẹn emẹse ọrhẹ emọ ri vwe vwo userhumu guẹnzọn. Nọ ha ebrurhọ rẹn ihworho ri fuevwan kpahiẹn, re ji brorhiẹn ọsoso.—w19.02, pp. 22-23.

Me ye ne ru orhianẹ ohworho ro vwo rhiẹ Oseri Jehova ọ nẹrhomo udaro ọwan?

Ana sabu fọdu jeghwai dje ọghọ phia, ọrẹn e ruẹ “isẹ-ẹ,” yanghene mọrọn abọ rhẹ awọrọ ọke ra nẹrhomo na-a. Ana sabu brorhiẹn ra na nẹrhomo uvuẹn ẹhẹn ọwan.—w19.03, p. 31.

Marhẹ uruemru ra gba emọvwerhe gbọfanrhiẹn ọ ghwa te?

Uruemru ra gba emọvwerhe gbọfanrhiẹn, ọdandan haso ọmọ na, ukoko na, igọmẹti, ọrhẹ Osolobrugwẹ. Ekpako ukoko a họghọ rẹn irhi igọmẹti, fọkime aye i vwe rhurhu ihworho ri vwobọrhọ irueruo aghwa ọnana-a.—w19.05, pp. 9-10.

Marhẹ wu ne ru wene yanghene ruẹ ẹhẹn ro sun iroro ọnọ rhomurhọ?

Idjaghwẹ kirighwo yẹ: Nẹrhomo vwe i Jehova. Roro kodo rhẹ ẹhẹn wu ne ni oma so. Vwo oniso kpahen okugbe ọnọ.—w19.06, p. 11.

Marhẹ ene ru ha ọke ọnana mwuegbe hẹrhẹ ẹkparehaso?

Ruẹ onyerẹnkugbe ọnọ rhẹ i Jehova gbanhonrhọ. Vwo imwẹro taghene Jehova o vwo ẹguọlọ kpahuọn, ọ ji sẹrerhumuji owẹwẹ-ẹ. Se i Baibol na kẹdẹkẹdẹ, ji nẹrhomo ọke ephian. Jenẹ o mwuo ẹro taghene ebrurhọ ọrẹ Uvie Osolobrugwẹ ine rugba. Yono ekete i Baibol ọrhẹ ijoro ukoko na ri mai jo rhẹ urhomu.—w19.07, pp. 2-4.

Me ya na sabu ru na ha userhumu rẹn ihworho ekrun ọwan vwo esimirhọ?

Ọ ghanranren ne djephia taghene e vwẹruọ aye, damoma dje omamọ udje ro no soseri phia, vwo erhionrin, ne wu ji ha ona ruiruo.—w19.08, pp. 15-17.

Marhẹ ene ru mẹrẹn omẹrhuọnrhuọn jerẹ oborẹ i Jesu o ve rhẹ Matthew 11:28?

Ọwan i vwo iniruo ri mai rhomu kparobọ, e vwo igbehian ri mai rhomu kparobọ, e ji vwo owian rọ mai rhomu kparobọ.—w19.09, p. 23.

Marhẹ i Jehova ono ru yẹ ọwan omwemẹ kugbe omẹgbanhon ra na ha ruiruo? (Phil. 2:13)

Erhe se i Baibol na jeghwai roro kodo kpahiẹn, Jehova ọnọ yẹ ọwan omẹgbanhon, ọnọ ji yẹ ọwan omwemẹ re ne ruẹ ọhọriẹ kugbe omẹgbanhon ra na ha ruiruo. Ẹhẹn ọfuanfon ọnẹyen ọnọ sabu lẹrhẹ ọwan tẹn ona rhọ.—w19.10, p. 21.

Idjaghwẹ ẹghwanren ego yo fori na kpare bọmọke ene ki brorhiẹn?

Idjaghwẹ isionrin yẹ: Dabu guọlọ riarorhọ. Nẹrhomo na yọ ẹghwanren. Roro kpahen oborẹ ọsoriẹ we brorhiẹn na. Bru ẹkẹ te oma. Rhe ekete omẹgbanhuọn o teri.—w19.11, pp. 27-29.

Uyono ọrẹ arhọ i jehwuo o surhobọmwu oborẹ Echu ọ ta rẹn Eve uvuẹn ogba Eden?

Ẹjo. Echu ọ ta rẹn Eve taghene o hwuẹ kakaka-a, orhiẹ ọnọ họhọ taghene o hwuru-u. Iyono efian owuorowu a havwiẹ ọke Ukude na ọ phia hi-in. Ọke Osolobrugwẹ o fi ohra rhẹ edjadjẹ ituakpọ uvuẹn Babel, ihworho na ni kpare iroro na lele oma taghene ituakpọ i vwo arhọ i jehwuo.—w19.12, p. 15.