Jehova ọ ta rẹn emọ Israel taghene aye i rhiẹ ihworho ri fonron. Nẹ aye i sabu ruie, nọ ta rẹn aye: “Are i vwa rhaphiẹ ereva are ri ha uvwre ihworho are-e. Are i vwe vi mevi haso arhọ ọreva are-e. Mẹmẹ yi Jehova.”—Lev. 19:2, 16.

Ẹmro na “mevi haso,” ọ dabu dje oborẹ a rhian riẹn rhọ uvuẹn edjadjẹ i Hebrew fiotọre, ọrẹn me yo mevirhọ? Ọbe itu i Jew rọ ta kpahen ọbe i Leviticus, ọrhọ ta: “O bẹn ra na rhian ekete ọnana uvuẹn oghwẹmro na . . . fọkime e vwe kiki vwẹruọ ẹmro i Hebrew ra ha ruiruo [uvuẹn arana], rọ mevirhọ ‘wu vwe mevi oberun, okokọ, yanghene kẹrẹ-ẹ.’”

Egba irherhe ezẹko i surhẹ ẹmro ọrana mwu oghwẹmro 15, rọ tare: “Are i vwe ruẹ ọghware uvuẹn ẹzenguon are-e. Are i vwe sehiẹn ivwiegbere yanghene fiomarhọ obẹ edafe na-a. Ukpomaran, are i guẹnzọn ereva are izede ọsoso.” (Lev. 19:15) Uvuẹn erhirhiẹ ọrana, akama rọ ha oghwẹmro 16, rọ tare taghene e vwe “mevi haso” ọwọrọ-ọ, ọnọ sabu mevirhọ taghene idibo Osolobrugwẹ i vwa ha ẹkuọn rẹn ereva aye rẹ aye e lele wian kugbe uvuẹn oghwa ẹghware, uvuẹn eyẹsuọ, irueruo ekru-un, aye i vwe ji kporo ona fọkiẹ erere omobọ-ọ. Itiọrurhomẹmro, o fo ne ruẹ ekwakwa erana-a, ọrẹn o vwo izede ọrọrọ re ne vwẹruọ oborẹ ọ ha oghwẹmriẹn 16 na.

Roro kpahen ẹmro ọtonrhọ rọ ha oghwẹmro ọrana. Jehova o jurhi rẹn ihworho yi taghene aye i vwa rhaphiẹ awa-an. Karorhọ taghene uruemru ra rhaphiẹ awan, o ghwẹ iguegun ghemeghe, ọrana iguegun rọ ji sabu suẹ ebẹnbẹn. (Prov. 10:19; Eccl. 10:12-14; 1 Tim. 5:11-15; Jas. 3:6) Nyoma ẹmro ọyẹ a ha rhaphiẹ ohworho, ji ha arudo mọrenfian ne biomu omamọ odẹ ro vwori. Ọrọ rhaphiẹ awan na, ọnọ sabu se oseri efian kpahen awọrọ ọrhọ tobọ rhianẹ ọnọ sabu suẹ uhwu rẹn aye. Karorhọ taghene ehworhare ra rhaphiẹ awan yi se oseri ofian kpahen Naboth, rọ soriẹ e kpe yi hwu. (1 Ki. 21:8-13) Itiọrurhomẹmro, ọrọ rhaphiẹ awan ọnọ sabu mevi haso arhọ ọreva ye, jerẹ oborẹ a hunute uvuẹn obọreva i Leviticus 19:16.

Habaye, ohworho ọnọ sabu rhaphiẹ ọreva ye fọkime o vwo utuoma ọgbogbanhon kpahiẹn. 1 John 3:15, ọrhọ ta: “Kohworho kohworho ro vwo utuoma kpahen omizie, ọye ozighẹ, are i rheri taghene o vwo ozighẹ owuorowu ro no vwo arhọ i bẹmẹdẹ-ẹ.” Orhiẹ oborẹ o fori na djokarhọ taghene Jehova ọ tẹmro enana rọ ha kpahen oghwẹmriẹn 16 na, “Are i vwe vi vwo utuoma kpahen omizu are uvuẹn ọmudu are-e.”—Lev. 19:17.

Omarana, ẹmro ra ya rhẹ Leviticus 19:16, ọ ha urhebro ọgbogbanhon rẹn Ilele Kristi. Ana vi kẹnoma rẹn iroro esọsọ ọrhẹ uruemru ra rhaphiẹ awan. Nọyẹ, erhe “mevi haso” ọwọrọ fọkime a rioma kpahiẹn, ọnana ọnọ sabu djephia taghene e vwo utuoma kpahiẹn. O fori nẹ Ilele Kristi i vi kẹnoma rẹn uruemru ọrana.—Matt. 12:36, 37.