Ọnyikọ Paul nọ ya ileta vwe i Timothy ro ji rhiẹ ọkpako ukoko: “Mi jurhi ọnana wẹn obaro Osolobrugwẹ ọrhẹ Kristi kugbe emakashe ra sanọren na, ne wu nyalele ọkpọvi enana vabọ omeru yanghene uruemru re ni awan ruẹ.”—1 Tim. 5:21.

Ọrukaro, o fori ne rhe emakashe ri vwa ha usuẹn era sanọren na. O fiotọre taghene aye a ha usuẹn awan 144,000 na-a. Ọke i Paul ọ ya ileta ọnana vwe i Timothy, owuorọnwan usuẹn Ilele Kristi ra djẹha na o ji riẹ odjuwu-u. Habaye, inyikọ na ọrhẹ awọrọ ra djẹha a ji dẹrẹrhiẹ emakashe ọke ọrana-a, omarana orhiẹ aye yẹ “emakashe ra sanọren” na-a.—1 Cor. 15:​50-54; 1 Thess. 4:​13-17; 1 John 3:2.

Habaye, “emakashe ra sanọren” na i sabu rhiẹ emakashe ri kparehaso Osolobrugwẹ ọke Ukude na ọ phia-a. Emakashe erana i hobọtua Echu ji dẹrẹrhiẹ ikpodje ọrhẹ evwreghrẹn i Jesu. (Gen. 6:2; Luke 8:​30, 31; 2 Pet. 2:4) Obaro na, ana kanren aye rhẹ ukpotọ ro vwo vwoba na ẹgbukpe 1,000, orho ru, na na ghwọghọ aye ọrhẹ Dẹbolo.—Jude 6; Rev. 20:​1-3, 10.

Jerẹ oborẹ oghwẹmro na o djephia, ọkezẹko “emakashe ra sanọren” ri Paul ọ hunute, yẹ emakashe ri ha obẹ odjuwu ri hobọtua “Osolobrugwẹ ọrhẹ Kristi Jesu.”

O vwo uriusionrin manẹ uriusionrin emakashe ri fuevwan obẹ odjuwu. (Heb. 12:​22, 23) O fo ne roro taghene aye ephian a wian aruẹ owian owu uvuẹn ọke owu-u. (Rev. 14:​17, 18) Karorhọ taghene uvuẹn erhirhiẹ owu, Jehova o dje ọmakashe owu ọvo ya ghwọghọ isodja Assyria awan 185,000. (2 Ki. 19:35) Ọrẹn, emakashe sansan ye djeri nẹ aye i “tiẹ ọsoso ekwakwa ra suẹ ukọ ọrhẹ ihworho ri vwa mọrẹn irhi nẹ uvuẹn Uvie [i Jesu].” (Matt. 13:​39-41) Ọkezẹko, erọrọ yi ne “koko ihworho rọ djẹha” riẹ odjuwu. (Matt. 24:31) E ji jurhi rẹn emakashe erọrọ nẹ aye i ‘sẹrorẹ ọwan uvuẹn izede ọwan ephian.’—Ps. 91:11; Matt. 18:10; haye vwanvwọn Matthew 4:11; Luke 22:43.

O fiotọre taghene “emakashe ra sanọren” ra hunute uvuẹn 1 Timothy 5:​21, yẹ emakashe ri vwo owian aye ina hẹrote ukoko Osolobrugwẹ. Uvuẹn oghwẹmro ọnana, Paul o tiobọnẹ urhebro ẹghwanren rẹn ekpako ukoko kpahen oborẹ aye ine ruo neneyo imizu ukoko na i sabu họghọ rẹn aye. O fori nẹ ekpako ukoko i wian owian aye vabọ “omeru yanghene uruemru re ni awan ruẹ,” habaye aye i vwa kpare orhiẹn bru-u. O fori nẹ aye i nyalele ọkpọvi Paul ọnana fọkime aye i mevi “obaro Osolobrugwẹ ọrhẹ Kristi kugbe emakashe ra sanọren na.” Omarana, o fiotọre taghene emakashe ezẹko i vwo owian aye ina hẹrote ukoko na, sẹroriẹ, hobọtua era wian owian aghwoghwo na, ji nẹ iyẹnrẹn harẹn i Jehova.—Matt. 18:10; Rev. 14:6.