Wu sabu se Oghwa Odẹrẹ ẹgbukpe ọnana ne? Orhiomaran, nie sẹ wu na sabu kpahenrhọ enọ enana:

Udje ọgo yi Jehova o dje rhotọre kpahen ukẹro ra na ha ni emẹse?

O vwo ni aye ruẹ-ẹ, ukẹro rọ ha ni ehworhare yọ ji ha ni emẹse. Osolobrugwẹ ọ kerhọ emẹse, o ji vwo ọdamẹ kpahen aye. Ọ hẹroso aye taghene aye ina wian owian rọ yẹrẹ aye.—w24.01, aruọbe 15-16.

Marhẹ ene ru ha oborẹ ọ ha Ephesians 5:7 ruiruo, rọ tare: “Are i vwa homaba aye-e”?

Ọnyikọ Paul ọ ha orhetio rẹn ọwan na kẹnoma rẹn ihworho ri na lẹrhiẹ bẹn rẹn ọwan na mọren irhi Osolobrugwẹ. Aruẹ okugbe ọnana o surhobọmwu ihworho re lele tẹmro ji lele ghwọghọ ọke kugbe uvuẹn itanẹti.—w24.03, aruọbe 22-23.

Aruẹ iyẹnrẹn ego yo fori na kẹnoma riẹn?

O fori na kẹnoma rẹn iyẹnrẹn re vwe rhe ekete aye i nurhe rẹ igbehian ọwan i dje vwe ọwan, omaran ji te urhomu re dje vwe ọwan nyoma itanẹti ọrhẹ inyikọ efian ra gemai ruẹ taghene aye i vwo omamerhomẹ kpahen urhomẹmro na.—w24.04, aruọbe 12.

Me yẹ ọwan i rhe kpahen oborẹ i Jehova ono guẹnzọn Orodje Solomon lele ọrhẹ eri hwuru uvuẹn Sodom ọrhẹ Gomorrah kugbe Ukude na, me yẹ ọwan i vwe rhe?

Ọwan e rhe sẹ Jehova o brorhiẹn oghwọghọ bẹmẹdẹ kpe aye ne-e. Ọrẹn, ọwan i rheri taghene o rhe iyẹnrẹn ephian kpahen aye, o ji vwo arodọmẹ.—w24.05, aruọbe 3-4.

Imwẹro ọgo ye vwori fọkime Osolobrugwẹ yẹ “Atita na”? (Deut. 32:4)

Ana sabu ha i Jehova ruẹ ekete ra zẹrua. Ana sabu hẹrosuiẹ taghene ọnọ nyamwu ive yi ọke ephian. O vwo kpogho yanghene wene-e, habaye ọnọ ji ha ọhọriẹ te orugba.—w24.06, aruọbe 26-28.

Me yọ nọ ha userhumu wẹn riẹnrioma rhẹ ukoko ọkpokpọ?

Hẹroso i Jehova, ọnọ ha userhumu wẹn jerẹ oborẹ ọ ha userhumu rẹn idibo yi ọke rọ vrẹnren. Wu vwa ha ukoko wu havwọ bi vwanvwọn ọkpokpọ na-a. Hobọtua ukoko ọkpokpọ na ji damoma mwu igbehian ekpokpọ.—w24.07, aruọbe 26-28.

Iyono ego yi ha uvuẹn idje esa ri ha uvuẹn Matthew urhomu-ẹmriẹn 25?

Udje igegede ọrhẹ ẹvwe na ọ kanrunumwu ọghanronmẹ re ne vwo esegburhomẹmro ọrhẹ atamwu kpahen i Jehova. Udje egbọtọ ri vwe ji chọghọ ri vwo ẹghwanren ọrhẹ eri rhiẹ evwidjigbo, o yonirin ọwan ne mwuegbe ji rha dẹrẹ. Udje italẹnti na ọ kanrunumwu ọghanronmẹ re ne gbromarhọ owian ji jomarhotọre wian owian ra yẹrẹ ọwan.—w24.09, aruọbe 20-24.

Marhẹ anurẹsẹ oghwa ẹga i Solomon o rhi te?

Uvuẹn 2 Chronicles 3:​4, imanuskripti ahwanren ezẹko i hunute ikiubiti “120,” nọyẹ isinhaghwẹ 175 (imita 53). Ọrẹn, ẹbe erọrọ i tare taghene o rhi te “ikiubiti 20,” nọyẹ isinhaghwẹ 30 (imita irhinrin). Omarana, sekpahen oborẹ ugbomoghwa na ọ havwọ, ọ họhọre taghene “ikiubiti 20” yọ gbare.—w24.10, aruọbe 31.

Me yo mevirhọ nẹ odibo owian o ‘rhiẹ esa rẹn ane owu’? (1 Tim. 3:12)

O mevirhọ taghene ọnọ rọnmọ ọmase owu ọvo ji kẹnoma rẹn ọfanrhiẹn. Habaye, ọnọ kẹnoma rẹn uruemru re lele emẹse erọrọ ghwọghọ ọke phan.—w24.11, aruọbe 19.

Marhẹ ọwan i ru rhe taghene John 6:53 ọ vwọ rionbọrhọ Emaren Owuọwọn Ọrovwori na-a?

John 6:53 ọ ta kpahen ọghanronmẹ ra na riẹ uhwen i Jesu ji da ọbara ye. Jesu ọ tẹmro eva enana rẹn itu i Jew ri vwe vwo esegburhomẹmro kpahiẹn uvuẹn Galilee, ẹgbukpe 32 C.E. Ọrẹn ẹgbukpe owu ọ vrẹn, nọ ha orẹ Emaren Owuọwọn Ọrovwori na mwu uvuẹn Jerusalem. Uvuẹn erhirhiẹ ọnana, Jesu ọ tẹmro rẹn ihworho ri ne lelie sun obẹ odjuwu.—w24.12, aruọbe 10-11.