1-2. Mesoriẹ i Jehova o rhie izede firhọ rẹn ọwan ne rhiẹ usuẹn ekrun ọnẹyen, marhẹ o rurie lele?

JEHOVA ọ ha use rẹn ọwan na homaba ihworho ra ga ye. Ọrana use omamerhomẹ dẹn! Ilele Kristi ri homakpahontọre rẹn Jehova ri ji vwo esegburhomẹmro kpahen izobo otan Ọmọyen, yi ha usuẹn ekrun ọwan. Ọwan ekrun ro vwo omamerhomẹ. Ọwan a riamerhen akpenyerẹn ọwan vwana, a ji ghọghọ fọkiẹ ifiẹrorhọ akpọ ro vwo vwoba re vwori sẹ obẹ odjuwu yanghene uvuẹn otọrakpọ na.

² Fọkiẹ ẹguọlọ ri Jehova o vwo kpahen ọwan, no rhie uphẹn firhọ rẹn ọwan na sabu rhiẹ usuẹn ekrun ọnẹyen, dedevwo ọnana ọ lọhọ riẹ-ẹn. (John 3:16) A ‘dẹre ọwan ha ne.’ (1 Cor. 6:20) Nyoma izobo otan na, Jehova no ruẹ ẹkwaphiẹrhotọre na sabu vwo omamọ onyerẹnkugbe rhẹ ọye. E vwo uphẹn ra na sabu se Ohworho rọ maido uvuẹn ọsoso akpọ na Ọsẹ ọwan. Jerẹ oborẹ e yonorin uvuẹn urhomu-ẹmro uyono rọ vrẹnren, Jehova yẹ Ọsẹ rọ mai rhomu kparobọ.

3. Enọ ego ya na sabu nọ? (Se ekpeti na “ Jehova o Ghini Rhe mẹ?”)

³ Jerẹ oborẹ ọbo ijoro owu ọ tare, ana sabu nọ: “Me ọyẹ mi na ha kwosa rẹn i Jehova fọkiẹ ekwakwa irhorhomu ro ru ha mẹ?” (Ps. 116:12) Itiọrurhomẹmro, a sabu kwosa oborẹ i Jehova o ruẹ rẹn ọwa-an. Ọrẹn, e ji vwo ẹguọlọ kpahiẹn. Ọnyikọ John nọ yare: “Ọwan i vwo ẹguọlọ, fọkime ọye yo kiki vwo ẹguọlọ kpahen ọwan.” (1 John 4:19) Izede ego ene ru djẹ ẹguọlọ ọwan harẹn Jehova?

4. Sekpahen James 4:8, mesoriẹ o fo na damoma tikẹrẹ i Jehova?

⁴ Jehova ọ guọlọre ne tikẹriẹ jeghwai lelie tẹmro.  (Se James 4:8.) Ọ ta rẹn ọwan ne “fiomarhọ ẹrhomo ẹnẹ,” ọye ọnọ ji kpahenrhọ ye. (Rom. 12:12) Ọye o vwo omwemẹ rọ nọ kerhọ ọwan ọke ephian. Habaye, ọwan a kerhọ ye nyoma re se i Baibol na, kugbe ẹbe ukoko na erọrọ, ra ha userhumu rẹn ọwan vwẹruọ ye. Ọwan a ji kerhọ ye nyoma ra dabu kerhọ uvuẹn uyono ukoko. Jerẹ oborẹ ikuegbe ọke ephian ọ lẹrhẹ emọ tiẹkẹrẹ eri vwiẹre aye, erhe leli Jehova tẹmro kugbe ọke ephian, ọnọ lẹrhẹ ọwan tikẹriẹ rhọ.

5. Me ye ne ruo ni Jehova ọ kpahenrhọ ẹrhomo ọwan?

⁵ Gbe roro kpahen oborẹ ẹrhomo wa nẹ vwe i Jehova ọ havwọ. Jehova ọ guọlọre na ta ẹhẹn ọwan riẹn uvuẹn ẹrhomo. (Ps. 62:8) O fori na nọ oma ọwan enọ enana: ‘Mia vwanriẹn ẹrhomo mẹ yanghene seyi nẹ ọbe, gbinẹ mia nẹrhomo nẹ ẹhẹn sa jerẹ ọke ra ya ileta?’ Ọrẹ imwẹro, wu vwo ẹguọlọ okokodo kpahen Jehova, wu ji guọlọ taghene onyerẹnkugbe ọnọ rhẹ ọnẹyen ọ gbanhonrhọ. Ne wu sabu ruẹ ọrana, wu na vi rha tẹmro riẹn ọke ephian. Ta ekwakwa odjahen enọ riẹn. Ta riẹn kpahen aghọghọ ọrhẹ emiamiamo enọ. Jenẹ o mwuo ẹro taghene wu na sabu nekpẹn userhumu mie yi ọke ephian.

6. Me ye ne vi ru na sabu daji kẹrẹ Jehova kpẹnkpẹnkpẹn?

⁶ Na sabu daji kẹrẹ i Jehova, ene vi rhe dje ọdaremẹro phia. Ọwan i kwerhọ oborẹ ọbo ijoro na ọ tare: “Ekwakwa buebun ye wu ru ne, O Jehova Osolobrugwẹ mẹ, tobọ te ewian igbevwunu ọrhẹ iroro enọ kpahen ame. O vwo oborẹ ana ha dje owẹwẹ-ẹ; ọke rẹ mia guọlọ ta kpahen aye, aye ne buẹnrhọ vrẹn oborẹ mi na sabu karorhọ!” (Ps. 40:5) Ene ru vrẹn ọrẹ ene vwo ẹhẹn ọdaremẹro; ene dje ọdaremẹro ọwan phia rẹn Jehova nyoma ẹmro ọrhẹ irueruo ọwan. Ọnana o djephia taghene ọwan i vẹnẹ ihworho buebun inyenana. Ọwan e nyerẹn uvuẹn akpọ rẹ ihworho i vwe dje ọdaremẹro kpahen ọsoso oborẹ Osolobrugwẹ o ruẹ harẹn aye. Itiọrurhomẹmro, emru owu ro djephia taghene ọwan e nyerẹn uvuẹn oba “ẹdẹ ri koba na” yẹ, ituakpọ i dje ekpẹmẹ phia-a. (2 Tim. 3:1, 2) O fori na kẹnoma rẹn uruemru ọrana!

7. Me yi Jehova ọ guọlọre taghene ọwan i ru, mesoriẹ?

⁷ Emiemọ a guọlọ nẹ emọ aye i wọnrọn omomaye-e, ọrẹn aye i guọlọre nẹ aye i rhiẹ igbehian. Omaran ọ ji havwọ, Jehova ọ guọlọre nẹ ọsoso idibo enẹyen i rhiẹ igbehian. Itiọrurhomẹmro, ẹguọlọ re vwo kpahen owuowọnwan yo djephia taghene ọwan Ilele Kristi urhomẹmro na. (John 13:35) Ọwan i kwerhọ oborẹ ọbo ijoro na ọ yare: “Orhomurun ọ jeghwai merhoma omamọ, rẹ imizu ine rhirhiẹ ye ọrẹ okugbe!” (Ps. 133:1) Erhe vwo ẹguọlọ kpahen imizu ọwan, ne djephia rẹn Jehova taghene e vwo ẹguọlọ kpahiẹn. (1 John 4:20) Ọ merhoma re rhiẹ usuẹn ekrun imizu re ‘dje uruemru esiri ọrhẹ arodọmẹ phia rẹn owuowọnwan’!​—Eph. 4:32.

8. Sekpahen 1 John 5:3, me yẹ iroro ọrukaro rọ lẹrhẹ ọwan huvwele i Jehova?

⁸ Jehova ọ guọlọre ne emọ i họghọ rẹn eri vwiẹre aye, nẹ ọwan i ji họghọ riẹn. (Eph. 6:1) O fo ohworho ra na huvwele yi fọkime ọye yẹ Ọmemama ọwan, Ọrọ Sẹrorẹ arhọ ọwan ọrhẹ ọrọ ghwanren ghwẹ emiemọ ephian. Iroro ọrukaro rọ soriẹ a huvwele i Jehova yẹ ẹguọlọ re vwo kpahiẹn. (Se 1 John 5:3.) Dedevwo o vwo iroro buebun erọrọ rọ soriẹ o fo  na huvwele i Jehova, ọrẹn ọ vwọ gba ọwan huvwele yi-i. Jehova ọ yẹrẹ ọwan ugbomọphẹ, omarana oma ọnọ merhiẹn orhianẹ a djẹ odjẹ ra na ga ye fọkime e vwo ẹguọlọ kpahiẹn.

9-10. Mesoriẹ o fo ne rhe irhi Jehova jeghwai ha aye ruiruo?

⁹ Emiemọ i guọlọre nẹ emọ aye i vwo omefuon. Omarana, aye ne jurhi ri na yẹ emọ aye erere. Emọ na i rha nyalele irhi enana, aye ne djephia taghene aye i hẹroso eri vwiẹre aye, ji họghọ rẹn aye. Omaran ọ ji havwọ, o fori ne rhe irhi Jehova, na ji nyalele aye. Erhe ruẹ omaran, ne djephia taghene e vwo ẹguọlọ kpahen Jehova, a jeghwai họghọ riẹn, ọnana nọ yẹ ọwan erere. (Isa. 48:17, 18) Ọrẹ ovẹnẹ, ihworho ri tiẹn i Jehova ọrhẹ irhi enẹyen, na ha ẹkuọn rẹn oma aye.​—Gal. 6:7, 8.

¹⁰ Erhe nyerẹn uvuẹn izede rọ merhen i Jehova oma, nọ lẹrhẹ ọwan vabọ ẹkuọn ọrẹ ugboma, iroro kugbe ọrẹ ẹhẹn. Jehova o rhe oborẹ ọ mai rhomu rẹn ọwan. Omizu ọmase owu ro rhirhiẹ United States re se Aurora, nọ tare, “Mi rheri taghene arha huvwele i Jehova ọke ephian, ọ lẹrhẹ ọwan nyerẹn akpọ rọ mai rhomu.” Ọrana o ghini sekpahen ọwan ephian. Wu mẹrẹn erere dẹ ne fọkime wu nyalele irhi Jehova?

11. Marhẹ ẹrhomo o ru ha userhumu rẹn ọwan?

¹¹ Ẹrhomo ọ ha userhumu rẹn ọwan huvwele, ọrhọ tobọ bẹn dede. Ọkezẹko, ọ bẹn ra na huvwele i Jehova, ọrẹn o fori  na rha damoma huvwele yi ọke ephian. Ọbo ijoro na nọ rẹ Osolobrugwẹ: “Yẹ mẹ omwemẹ mi na huvwele ọnọ.” (Ps. 51:12) Ọkobaro ọke ephian owu re se Denise, nọ tare: “Mi rha mẹrẹnvwrurhe taghene ọ bẹn mi na mọrọn urhi Jehova owu, ni mia nẹrhomo ni Jehova ọ yẹ mẹ omẹgbanhon ni mi sabu ruẹ oborẹ ọgbare.” E vwo imwẹro taghene Jehova ọnọ kpahenrhọ aruẹ ẹrhomo ọrana.​—Luke 11:9-13.

12. Sekpahen Ephesians 5:1, me yo fori ne ru?

¹² Se Ephesians 5:1. Jerẹ emọ ri Jehova o “vwo ẹguọlọ kpahen,” ọwan a damoma hẹrokelie ọke ephian. A damoma hẹrokelie ọke erhe dje ẹguọlọ ọrhẹ uruemru esiri phia, ọrhẹ ọke ra ji harhomu awọrọ. Ihworho ri vwe rhe Osolobrugwẹ i rha mẹrẹn omamọ uruemru re vwori, ọnana no mwu aye guọlọ yono kpahiẹn rhọ. (1 Pet. 2:12) O fori nẹ emiemọ Ilele Kristi hẹrokele i Jehova sekpahen oborẹ aye e ruẹ emọ aye lele. Aye i rhe ruẹ ọnana, ọnọ lẹrhẹ emọ aye vwo obọdẹn onyerẹnkugbe rhẹ i Jehova.

13. Me yo fori ne ru na sabu fiudugbere?

¹³ Oma ọ merhen emọvwerhe kpahen esẹ aye, aye na jeghwai tẹmro kpahen aye rẹn awọrọ. Omaran ọ ji havwọ, oma ọ merhen ọwan taghene Jehova yẹ  Ọsẹ ọwan, na ji ta rẹn awọrọ kpahiẹn. Uvuẹn ọmudu ọwan, e vwo aruẹ ẹhẹn owu rhẹ Orodje David, rọ yare: “Mi na ha i Jehova yenyan.” (Ps. 34:2) Orhianẹ ofa ọ ruẹ ọwan vwo? Marhẹ ene ru vwo uduefigbere? Ọwan a sabu vwo uduefigbere orhianẹ a tẹnrovi oborẹ ene ru lẹrhẹ oma merhen i Jehova ọrhẹ oborẹ awọrọ ine ru sabu mẹrẹn erere ọke aye erhe yono kpahiẹn. Jehova ọnọ yẹ ọwan uduefigbere ra guọlọre. Ọ ha userhumu rẹn Ilele Kristi ọke inyikọ na vwo uduefigbere, ọnọ ji ha userhumu rẹn ọwan.​—1 Thess. 2:2.

14. Me yẹ iroro ezẹko rọ soriẹ ọ ghanren ne vwobọrhọ owian re ruẹ idibo?

¹⁴ Jehova o vwo ni ohworho ruẹ-ẹ, oma ọ merhiẹn ọke rọ mẹrẹn ọwan re dje ẹguọlọ rẹn awọrọ, o toro ekete aye i nurhe-e. (Acts 10:34, 35) Izede ọghoghanren owu re ne ru dje ẹguọlọ phia rẹn awọrọ yẹ, owian aghwoghwo na. (Matt. 28:19, 20) Me yo no nerhumie rhe? Ihworho ri kerhọ ọwan ina sabu ruẹ akpenyerẹn aye rhomurhọ vwana, jeghwai vwo ifiẹrorhọ aye ine nyerẹn bẹmẹdẹ obaro na.​—1 Tim. 4:16.

15-16. Me yẹ ekwakwa ra lẹrhẹ oma merhen ọwan?

¹⁵ Jehova Ọsẹ ro vwo ẹguọlọ, omarana ọ guọlọre nẹ oma ọ merhen ekrun ọnẹyen. (Isa. 65:14) O vwo ekwakwa buebun ri na lẹrhẹ oma merhen ọwan vwana, dedevwo e rhiẹromẹrẹn ebẹnbẹn buebun. Jerẹ udje, e vwo imwẹro taghene Ọsẹ ọwan obẹ odjuwu o vwo ẹguọlọ okokodo kpahen ọwan. E vwo irherhe rọ gbare kpahen i Baibol na. (Jer. 15:16) Habaye, ọwan i ha usuẹn ekrun oghẹnrensan ri rhiẹ ihworho ri vwo ẹguọlọ kpahen Jehova, irhi enẹyen ọrhẹ owuowọnwan.​—Ps. 106:4, 5.

¹⁶ Ana sabu ghọghọ fọkime e vwo ifiẹrorhọ taghene akpọ ọwan ono rhomurhọ obaro na. E rheri taghene Jehova ono tiẹ evwọkon nie phẹrẹkpẹ, habaye Uvie ọnẹyen ono ruẹ akpọ na rhiẹ Paradais. E ji vwo ifiẹrorhọ taghene ihworho ri hwu ne ina rhọmọ, ji kwomakugbe ihworho aye i vwo ẹguọlọ kpahen rẹ aye i hwu jovwo. (John 5:28, 29) Ọnana emru aghọghọ dẹn! Ọrọ mai ghanren, o mwurun ọwan ẹro taghene phẹrẹkpẹ ihworho ri ha obẹ odjuwu ọrhẹ uvuẹn otọrakpọ na ina ha ujiri, ọghọ ọrhẹ ẹga rẹn Jehova.