UVUẸN ọke i Baibol na, idama rọ guọlọ rọnmo yanghene ekruien a kwosa enyo emwughwotọre rẹn ekrun ọmase na, ọke aye e ruẹ ẹkwaphiẹrhotọre irueruo orọnmo na. Aye ina sabu ha ekwakwa eghoghanren, eranmo yanghene igho kwosa na. Ọkezẹko, a kwosa na nyoma ra wian rẹn ekrun na, jerẹ oborẹ i Jacob o ruru, ro kweri taghene ọnọ wian rẹn ọsẹ Rachel emrẹ ẹgbukpe irhiruẹ nọ sabu rọnmọ Rachel. (Gen. 29:17, 18, 20) Mesoriẹ aye e ruẹ irueruo enyo emwughwotọre?

Ọgba irherhe owu re se Carol Meyers, ọrhọ ta: “Irueruo enyo emwughwotọre, ọ sabu kwosa owian rẹ ọgbọtọ na ọ wian rẹn ekruien bi, ro rhiẹ oborẹ ọ ghanranren uvuẹn ekrun ra wian owian ikebi.” Enyo emwughwotọre na ọ ji lẹrhẹ onyerẹnkugbe ekrun eva na gbanhanrhọ, ri rhiẹ owu ne nyoma orọnmo na. Ekrun enana ina sabu ha userhumu rẹn owuowọnwan uvuẹn ọke ebẹnbẹn. Habaye, enyo emwughwotọre na o ji djephia taghene a san ọmase na rhotọre ne, taghene orhiẹ ọsẹ ye yọ nọ hẹrote yi ghwomara-an, ukpomaran nẹ esa ye.

Arha kwosa enyo emwughwotọre na, o mevirhọ taghene ọmase na oborẹ a dẹ yanghene a rhẹ-ẹ. Ọbe na Ancient Israel—Its Life and Institutions ọrhọ ta: “Uchunu igho ra kwa rẹn ekrun ọgbọtọ na yanghene eri họheriẹ ra ha ruẹ enyo emwughwotọre na, nọ lẹrhiẹ họhọ taghene a dẹ ọmase na. Ọrẹn, e ni [enyo emwughwotọre na] rhiẹ osa ra kwa rẹn ekrun ọmase na, orhiẹ ukperhumu ọmase na-a.”

Inyenana, uvuẹn ẹkwotọre ezẹko, ihworho e ji ruẹ enyo emwughwotọre ọmase. Ọke emiemọ Ilele Kristi i rha guọlọ ne ruẹ enyo emwughwotọre ọmọ aye, aye i dje ‘uruemru re roro rẹn awan dabu fiotọre,’ nyoma aye ina ja nekpẹn osa obuebun vrẹn oborẹ oserhọ. (Phil. 4:5; 1 Cor. 10:32, 33) Nyoma izede ọnana, aye ne djephia taghene aye e “vwo ẹguọlọ igho,” yanghene ufiuvwele-e. (2 Tim. 3:2) Habaye, orhianẹ emiemọ Ilele Kristi a guọlọ igho obuebu-un, ọhworhare rọ guọlọ rọnmọ na ọrhọ kpare orọnmo na te ọke ro no vwo igho buebun rọ nọ sabu ruẹ enyo emwughwotọre na-a. Yanghene ọhworhare na o roro taghene ọnọ dobọ owian ọkobaruiẹ ji vwẹre, nọ sabu vwo ọke wian mẹrẹn igho rọ nọ kwosa enyo emwughwotọre ọduado-o.

Ekete ezẹko uvuẹn akpọ na, urhi yo sun irueruo enyo emwughwotọre. Orhianẹ omaran ọ havwọ uvuẹn ekete we rhirhiẹ, o fori nẹ emiemọ Ilele Kristi, i nyalele irhi erana. Mesoriẹ? Baibol na ọ guọlọre nẹ Ilele Kristi “homariotọre harẹn ihworho ri vwo omẹgbanhon usun,” ji huvwele irhi ri vwa haso irhi Jehova.—Rom. 13:1; Acts 5:29.