UVUẸN Wẹnẹsde, January 18, 2023, aghwoghwo oghẹnrensan owu nọ homaphia uvuẹn jw.org, rọ tare taghene Omizu Gage Fleegle ọrhẹ Jeffrey Winder a ga usuẹn imizu ri ha Ugboma Usuon ọrẹ Iseri Jehova ne. O jiri ne imizu awanva enana a fuevwan ga i Jehova.

Omizu Fleegle ọ ghwanranren uvuẹn obọrẹ ọren ọ va nẹ sa obẹ Pennsylvania, U.S.A., eri vwiẹriẹ ri rhiẹ Iseri Jehova, yi yonirien urhomẹmro na. Ọke rọ ha uphuphẹn, ekruien ni kwa riẹ ibiẹ amwa owu ya ga ekete ra mai guọlọ userhumu. O jiri-i, no bromarhame uvuẹn November 20, 1988.

Ọke ephian yẹ eri vwiẹ Omizu Fleegle, a ha urhebro riẹn no vwobọrhọ owian Uvie na vuọnvuọn. Ọgbọ buebun yẹ aye dede iniruo okinhariẹ ọrhẹ imizu ra ga uvuẹn Oghọn Ukoko nẹ aye i rhirhiẹ oghwa aye, Omizu Fleegle nọ djokarhọ omamerhomẹ imizu enana i vwori. O jiri-i, ọke ro bromarhame, nọ tuẹn owian ọkobaro rhọ—uvuẹn September 1, 1989. Ẹgbukpe eva a vrẹn hin, nọ nyamwu ẹkẹ rọ bruru ọke rọ ha ẹgbukpe 12—ẹkẹ ro no riẹ Oghọn Ukoko ya ga. Nọ tuẹn owian rhọ uvuẹn Oghọn Ukoko rọ ha Brooklyn uvuẹn October 1991.

Ọke Omizu Fleegle ọ ha Oghọn Ukoko na, ọ wianren uvuẹn ekete re ruẹ ẹbe uvwre ẹgbukpe ẹrẹnren, ọke oru na yẹriẹ owian uvuẹn Awuiruo Ẹga. Uvwrọke ọrana, ọ gare uvuẹn ukoko rọ djẹ edjadjẹ i Russia uvwre ẹgbukpe ezẹko. Uvuẹn ẹgbukpe 2006 nọ rọnmọ aniẹ re se Nadia, nọ homaba ye uvuẹn Oghọn Ukoko. Aye awanva i ga kugbe uvuẹn okogho rọ djẹ edjadjẹ i Portuguese, ji ga kugbe uvuẹn okogho rọ djẹ edjadjẹ i Spanish ẹgbukpe rọ vrẹn ikpe. Ọke rọ ga ẹgbukpe buebun uvuẹn Awuiruo Ẹga ne, ne wene owian Omizu Fleegle riẹ Ọfisi Umẹ Uyono, ọke oru na kpareriẹ riẹ Ọfisi Umẹ Ẹga. Uvuẹn March 2022 na hariẹ mwu no rhiẹ Ọrọ ha Userhumu rẹn Umẹ Ẹga ọrẹ Ugboma Usuon na.

 Omizu Winder ọ ghwanranren uvuẹn Murrieta, California, U.S.A. Eri vwiẹriẹ ri rhiẹ Iseri Jehova, yi yonirien urhomẹmro na, no bromarhame March 29, 1986. Ubiamo rọ ha kpahiẹn, no brorhiẹn ro no rhiẹ ọkobaro ibiọke. Nọ dabu riamerhiẹn omamọ te erhirhiẹ rọ guọlọ rhe ruie riarorhọ. Ọke ro vwobọrhọ ọkobaro ibiọke ibiamo ezẹko hin, nọ tuẹn ọkobaro ọke ephian rhọ uvuẹn October 1, 1986.

Ọke rọ ha uphuphẹn, Omizu Winder ọ kọn bru imizie ekpako ehworhare awanva ra ga uvuẹn Oghọn Ukoko uvwrọke ọrana. Onya erana nọ lẹrheriẹ vwo oruru ro no riẹ Oghọn Ukoko ya ga ọrhọ ghwanren ne. Uvuẹn May 1990, na ha use riẹn ya ga uvuẹn Oghọn Ukoko rọ ha i Wallkill.

Ọke rọ ha Oghọn Ukoko, Omizu Winder ọ wianren uvuẹn awuiruo sansan, Awuiruo Erufon, Awuiruo Ikebi ọrhẹ Bethel Office. Nọ rọnmọ aniẹ re se Angela uvuẹn ẹgbukpe 1997, nẹ ọke ọrana yẹ aye awanva a ga kugbe uvuẹn Oghọn Ukoko. Uvuẹn ẹgbukpe 2014 na kparerẹ aye riẹ Warwick, uvuẹn avwaye Omizu Winder nọ ha userhumu phia rhẹ ebanbọn eghwa ri ha Esiri Ukoko. Uvuẹn ẹgbukpe 2016 aye ni riẹ Watchtower Educational Center rọ ha Patterson, ekete Omizu Winder ọ wian uvuẹn Awuiruo Ividio ọrhẹ Ikpekporo. Ọke ẹgbukpe ẹne ọ vrẹn, aye ni rharhumu riẹ Warwick, na ji yẹ Omizu Winder owian uvuẹn Ọfisi Umẹ Rọ Hẹrote Edamẹ Eghọn Ukoko Sansan. Uvuẹn March 2022 na hariẹ mwu no rhiẹ Ọrọ ha Userhumu Rẹn Umẹ Rọ Hẹrote Edamẹ Eghọn Ukoko Sansan ọrẹ Ugboma Usuon na.

Ọwan a nẹrhomo vwe i Jehova nọ ha ebrurhọ rẹn imizu enana ri rhiẹ “ẹghẹlẹ rẹn ituakpọ,” ọke aye a wian gbanhan hobọtua edamẹ Uvie na.—Eph. 4:8.