URHOMU-ẸMRO UYONO 7
IJORO 15 Jiri Ọmukaro Osolobrugwẹ!
Oborẹ Ẹharhomu i Jehova o Mevirhọ Wẹn
“Wẹwẹ ya harhomẹ nẹ ẹhẹn sa.”—PS. 130:4.
OBORẸ ENE YONO KPAHEN
Ene yono kpahen idje i Baibol ezẹko ri dje oborẹ i Jehova ọ harhomu ọwan lele, ọrhẹ oborẹ ono ru lẹrhẹ ọdaremẹro ọwan kpahen ẹharhomu i Jehova kodorhọ.
1. Me yẹ ẹharhomu ituakpọ ọnọ sabu mevirhọ?
“MI HARHOMUO NE.” Ẹmro erana a merhoma omamọ, maido orhianẹ wu tẹmro yanghene ruẹ oborẹ ọ lẹrhẹ evwan biomu ọwọrọ! Ọrẹn, me yẹ ẹmro na, “Mi harhomuo ne” o ghini mevirhọ? Ọrana nọ ghwai mevirhọ taghene wu kwaphiẹ onyerẹnkugbe wu vwori rhẹ ohworho wu rusọ na rhọ ne? Gbinẹ ọravwọ ọ haye ta taghene ọ kpariroro vrẹn oborẹ wu rurie ne? Ohworho ọrhọ ta wẹn taghene ọ harhomuo ne, ọnọ sabu mevirhọ ekwakwa buebun.
2. Marhẹ i Baibol na o dje ẹharhomu i Jehova rhọ? (Ji se ekete ra djokarhọ.)
2 Oborẹ i Jehova ọ harhomu ọwan lele, ọ vẹnẹ oborẹ ọwan a harhomu owuowọnwan lele. Oborẹ i Jehova ọ harhomu awọrọ lele yọ mai rhomu kparobọ. Ọbo ijoro na nọ ta kpahen i Jehova: “Wẹwẹ ya harhomẹ nẹ ẹhẹn sa, neneyo a sabu zofẹn owẹwẹ.” a (Ps. 130:4) Itiọrurhomẹmro, Jehova ọ “harhomẹ nẹ ẹhẹn sa.” O fori na hẹrokele oborẹ ọ harhomẹ awọrọ lele. Uvuẹn erhirhiẹ ezẹko, eri ya i Baibol na i ha ẹmro i Hebrew owu dje ẹharhomu i Jehova, rọ vẹnẹ oborẹ ituakpọ a harhomẹ lele.
3. Marhẹ oborẹ i Jehova ọ harhomẹ lele, o ru vẹnẹ ọrẹ ituakpọ? (Isaiah 55:6, 7)
3 Jehova ọrhọ harhomu ohworho ne, nọyẹ, ọ kpariroro vrẹn edandan yen ephian ne. Habaye, nọ rharhumu kwaphiẹ onyerẹnkugbe ro vwori rhẹ ọravwọ. Jehova ọ harhomẹ nẹ ẹhẹn sa, omarana, ọ vwọ rhọ karorhọ ọdandan na ghwomara-an.—Se Isaiah 55:6, 7.
4. Marhẹ i Jehova o ru ha userhumu rẹn ọwan vwẹruọ oborẹ ẹharhomu o ghini mevirhọ?
4 Ra mẹriẹn taghene ẹharhomu i Jehova ọ vẹnẹ ọrẹn ituakpọ, ni marhẹ ituakpọ ri vwa gba ine ru vwẹruọ oborẹ ẹharhomu o ghini mevirhọ? Jehova ọ ha userhumu rẹn ọwan vwẹruọ ye, nyoma rọ ha idje i Baibol sansan dje oborẹ ẹharhomu ọnẹyen o mevirhọ. Uvuẹn urhomu-ẹmro ọnana, ene yono kpahen ezẹko usuẹn aye. Ana mẹrẹn oborẹ i Jehova o ru harhomu ọdandan ohworho, ji rharhumu kwaphiẹ onyerẹnkugbe ro vwori rhẹ ọravwọ bi. Idje enana ina ha userhumu rẹn ọwan vwo ọdaremẹro rhọ kpahen Ọsẹ ẹguọlọ ọwan, rọ harhomẹ izede sansan.
JEHOVA Ọ HARHOMẸ ỌDANDAN ỌWAN
5. Me yọ phia ọke i Jehova ọrhọ harhomu edandan ọwan ne?
5 Uvuẹn i Baibol na, ọgbọ buebun, a ha ọdandan dje ohwan ọghwaghwa. Orodje David o dje edandan yen omana: “Orusọ mẹ a hiẹn mẹ botọre; Aye i họhọ ohwan ọghwaghwa ri ghwa phan ha mẹ.” (Ps. 38:4) Ọrẹn, Jehova ọ harhomu edandan ihworho ri ghwẹriẹ nẹ ẹhẹn rhe. (Ps. 25:18; 32:5) Ẹmro i Hebrew ra rhian rhẹ “harhomu” o mevirhọ ọrẹ a “kpare emru rierun” yanghene “kpariẹ nẹ ekete rọ havwọ.” Omarana, Jehova ọrhọ harhomu ọdandan ọwan, nọyẹ ọ kpare ohwan ọghwaghwa rọ hiẹnren ọwan botọre ne.
“Harhomu” (Ps. 32:5)
6. Jehova ọrhọ harhomu ọwan, marhẹ o ruie lele?
6 Baibol na ọ ha udje ọrọrọ dje rẹn ọwan oborẹ i Jehova o ruẹ edandan ọwan lele. Psalm 103:12 nọ tare: “Jerẹ oborẹ ekete ọren na ọ va nẹ sa o sereri nẹ ekete ọren na orho se, omaran ọye o fiẹ orusọ ọwan seseri nẹ ọwan.” Ekete ọren ọ va nẹ sa, o sereri omamọ nẹ ekete ọren o se gbe. Ekete eva na i vwa vwoma dẹ-ẹ. Ọrana no mevirhọ taghene Jehova ọrhọ harhomu ọwan ne, ọ vwọ rhọ karorhọ ye ghwomara-an. Itiọrurhomẹmro, Jehova ọ vi harhomẹ nẹ ẹhẹn sa!
“Jerẹ oborẹ ekete ọren na ọ va nẹ sa o sereri nẹ ekete ọren na orho se” (Ps. 103:12)
7. Jehova ọrhọ harhomu edandan ọwan ne, ọ ji mọren aye ba ọwan obọ? (Micah 7:18, 19)
7 Jehova ọrhọ harhomu edandan ọwan ne, ọ ji mọren aye ba ọwan obọ? Ẹjo. Orodje Hezekiah nọ ta kpahen i Jehova: “Wu donron ọsoso edandan mẹ rhẹ oberhumuo ne.” Ekete ra djokarhọ nọ tare, “wu tiẹ edandan mẹ ephian nẹ obaruọ ne.” (Isa. 38:9, 17; ekete ra djokarhọ) Udje ọnana o djephia taghene ohworho ọrhọ ghwẹriẹ nẹ ẹhẹn, Jehova ọ vwọ rhọ karorhọ ọdandan ọravwọ-ọ. Ana ji sabu se oghwẹmro na omana: “Wu ruẹ [edandan mẹ] nọ họhọ kamẹriẹn aye a phia-a.” Baibol na ọ dabu dje ọnana phia uvuẹn udje ọrọrọ rọ ha uvuẹn Micah 7:18, 19. (Seyi.) Uvuẹn ekete i Baibol ọrana, Jehova ọ tare taghene ono donron edandan ọwan rhẹ urhie okokodo. Uvuẹn ọke ahwanren, erhe donron emru rhẹ uvuẹn urhie ọduado, ọ bẹn omamọ bọmọke a ki rharhumu mẹriẹn.
“Wu donron ọsoso edandan mẹ rhẹ oberhumuo ne” (Isa. 38:17)
“Wu ne donron edandan aye rhẹ uvuẹn urhie okokodo na” (Mic. 7:19)
8. Me ye yono ne?
8 Idje enana i yonirin ọwan ne taghene Jehova ọrhọ harhomu ọwan, orho fo nẹ ẹhẹn iborhin o kpokpo ọwa-an. Itiọrurhomẹmro jerẹ oborẹ i David ọ tare, “omamerhomẹ ọ havwiẹ rẹn ihworho ra harhomu dedevwo aye i gbe urhi na ghwu bi, ọrhẹ ihworho ra harhomu edandan aye; omamerhomẹ ọ havwiẹ rẹn ohworho ri Jehova ọ kpariroro vrẹn edandan enẹyen ne.” (Rom. 4:7, 8) Ọrana ye se ẹharhomu ro nẹ ẹhẹn rhe!
JEHOVA O PHORO ỌDANDAN ỌWAN
9. Idje ego yi Jehova ọ ha dje oborẹ ẹharhomu ọnẹyen o mevirhọ?
9 Jehova ọ ha idje erọrọ sa ọwan erhumu vwo ọdaremẹro kpahen izobo otan na, rọ ha phoro edandan ihworho ri ghwẹriẹre. Nọ ghwai họhọ taghene Jehova o ghwe edandan na nẹ oma ọwan ne, ji ghworiẹ ye. Fọkiẹ ọnana, oruọdandan na nọ sabu fuan. (Ps. 51:7; Isa. 4:4; Jer. 33:8) Jehova no djerie omana: “Dedevwo edandan are i havwọ babare, ene ruẹ aye fon jerẹ imito; aye i rha tobọ họhọ ewun ọbobare, aye ina fon jerẹ oruru.” (Isa. 1:18) Emru ọbobare orho gbulu ewun ọfuanfon, ọ bẹn omamọ bọmọke e ki tie nie. Ọrẹn, udje ọnana ọ lẹrherẹ ọwan vwo imwẹro ne taghene, Jehova ọnọ sabu harhomu edandan ọwan phẹlẹphẹlẹ ji ruẹ ọwan fon.
“Dedevwo edandan are i havwọ babare, ene ruẹ aye fon jerẹ imito” (Isa. 1:18)
10. Udje ọrọrọ ọgo yi Jehova ọ ha dje oborẹ ẹharhomu ọnẹyen o mevirhọ?
10 Jerẹ oborẹ a hunute uvuẹn urhomu-ẹmro rọ vrẹnren, “edandan” ọwan i họhọ esa ra rere. (Matt. 6:12; Luke 11:4) Omarana, erhe ruẹ ọdandan hasuẹ i Jehova, osa na no buẹnrhọ buẹnrhọ. Vwana, osa na o bunrun omamọ ne! Ọrẹn, Jehova ọrhọ harhomu ọwan, nọ họhọ ọke rọ kpariroro vrẹn osa ra rere na. Ọrhọ harhomu edandan ọwan, ọ vwọ rhọ mọrọn aye ba ọwan obọ-ọ. Omarana, nyoma udje ọnana, oma nọ merhen ọwan ọke i Jehova ọrhọ harhomu edandan ọwan!
“Harhomu edandan ame” (Matt. 6:12)
11. Me yi Baibol na o mevirhọ ọke rọ ta taghene o “phoro edandan ọwan ne”? (Acts 3:19)
11 Jehova ọ vwọ ghwai kpariroro vrẹn edandan ọwan ọvo-o; o phoro aye phẹlẹphẹlẹ. (Se Acts 3:19.) Arha kpariroro vrẹn osa ohworho ọ rere, ọgbọ buebun ne fiẹ oka na X rhẹ ekete uchunu igho na ọ havwọ bi. Ọrẹn, arha dabu ni obotọre oka na so, ana ji rha mẹrẹn uchunu igho na. Omarana, na kpariroro vrẹn emru, ọ vẹnẹ ọrẹ ene phorie. Jerẹ udje, ekwakwa jerẹ carbon, igọmu ọrhẹ ame ye gbe kugbe, rọ dẹrẹrhiẹ oborẹ e fiẹ rhẹ ugbẹn ra ha ya ekwakwa ọke ahwanren. Omarana, ohworho ọnọ sabu ha akworhẹ rọ kpọtọre hionron oborẹ a yare. Omaran ọ ji havwọ, erhe “phoro” ọdandan ọwan, a vwa rha mẹriẹn ghwomara-an. Ukẹro kpekpa ọrhọ sabu mẹrẹn oborẹ a yare bi-i. Nọ nọ họhọ taghene emru na ọ ji phia bi-i. Omarana, emru omamerhomẹ taghene Jehova ọrhọ kpariroro vrẹn edandan ọwan, no ji phoro aye phẹlẹphẹlẹ!—Ps. 51:9.
“Neneyo a sabu phoro edandan are nie” (Acts 3:19)
12. Me yẹ udje ro sekpahen ukolo avwre na o mevirhọ rẹn ọwan?
12 Jehova ọ ji ha aruẹ udje ọnana ruiruo ọke ro dje kpahen oborẹ o ru phoro edandan ọwan. Nọ tare: “Mi ne phoro orusọ enọ nie jerẹ oborẹ avwre o rhurhu emru, Mi ne phoro edandan enọ jerẹ oborẹ ukolo avwre o rhurhu emru.” (Isa. 44:22) Jehova ọrhọ harhomu ọwan ne, nọ họhọre taghene ọ ha ukolo avwre rhurhu edandan ọwan ne, na ja rha mẹrẹn aye.
“Mi ne phoro orusọ enọ nie jerẹ oborẹ avwre o rhurhu emru” (Isa. 44:22)
13. Marhẹ oma o ruẹ ọwan, Jehova ọrhọ harhomu edandan ọwan?
13 Me yẹ ọnana o mevirhọ rẹn ọwan? Jehova ọrhọ harhomu edandan ọwan ne, o fo na rha lẹrhẹ ẹhẹn iborhin kpokpo ọwan uvuẹn ọsoso akpenyerẹn ọwa-an. Nyoma ọbara i Jesu Kristi, o phoro edandan ọwan nie phẹlẹphẹlẹ ne. Nọ nọ họhọ taghene e ruẹ edandan erana bi-i. Ọnana yẹ oborẹ ẹharhomu i Jehova o mevirhọ rẹn ọwan, arha ghwẹriẹ nẹ edandan ọwan.
JEHOVA Ọ RHARHUMU HA ỌWAN RUẸ OBỌDẸN IGBEHIAN YEN
Ẹharhomu i Jehova yọ yẹrẹ ọwan uphẹn re ne vwo obọdẹn onyerẹnkugbe rhẹ ọye (Ni udjoghwẹ 14)
14. Mesoriẹ ana hẹroso ẹharhomu i Jehova? (Ji ni ifoto na.)
14 Ẹharhomu i Jehova yọ yẹrẹ ọwan uphẹn re ne vwo obọdẹn onyerẹnkugbe rhẹ ọye. Fọkiẹ ọnana, ẹhẹn iborhin o vwo rho kpokpo ọwan pha-an. O fo ne roro taghene ẹharhomu i Jehova o nẹ ẹhẹn yen rhe-e, yanghene ọ guọlọ izede ono ru ha oja riẹ ọwa-an. Aruẹ emru ọrana ọ sabu phia-a. Jehova ọrhọ ta taghene ọ harhomu ọwan ne, mesoriẹ o fo na hẹrosuiẹ? Jehova nọ ta rẹn ọmẹraro Jeremiah: “Mi na harhomu orusọ aye, mi rha karorhọ ọdandan aye ghwomara-an.” (Jer. 31:34) Ọnyikọ Paul ọ ha aruẹ ẹmro erana ruiruo ọke rọ ta: “Mi rha karorhọ edandan aye ghwomara-an.” (Heb. 8:12) Ọrẹn, me yẹ ọrana o ghini mevirhọ?
“Mi rha karorhọ ọdandan aye ghwomara-an” (Jer. 31:34)
15. Me yi Jehova o mevirhọ ọke rọ ta taghene ọ vwọ rhọ karorhọ edandan ọwan ghwomara-an?
15 Uvuẹn i Baibol na, orhiẹ ọke ephian yẹ ẹmro na “karorhọ,” ọ ghwai mevirhọ taghene ẹhẹn ohworho ọ kọn riẹ oborẹ ọ phia vrẹn ne-e. Ukpomaran, ọnọ sabu mevirhọ idjaghwẹ rẹ ohworho ọ kparare. Ohi ra kanren mwu orhan kẹrẹ i Jesu nọ rẹriẹ: “Jesu, karorhọ mẹ wu rha ruẹ Uvie ọnọ ne.” (Luke 23:42, 43) Uvuẹn erhirhiẹ ọrana, ohi na ọ vwọ ghwai rẹ i Jesu no karorhọ ye obaro na-a. Ẹkpahenrhọ i Jesu o djephia taghene ọnọ rhọmọ ohi na obaro na. Omarana, Jehova ọrhọ ta taghene ọ vwọ rhọ karorhọ edandan ọwan ghwomara-an, nọ haye ta taghene ọrhọ ha oja riẹ ọwan fọkiẹ ọdandan na-a. Nọyẹ, ọrhọ ha oja riẹ ọwan obaro na fọkiẹ edandan rọ harhomu ne-e.
16. Marhẹ i Baibol na o dje ugbomọphẹ re vwo arha harhomu ọwan ne?
16 Baibol na ọ ha udje ọrọrọ sa ọwan erhumu vwẹruọ ye taghene Jehova ọrhọ harhomu ọwan, nọyẹ e vwo ugbomọphẹ ne. Fọkiẹ erhirhiẹ ijẹgba, na hare ọwan dje “evrẹn harẹn ọdandan.” Ọrẹn, Jehova ọrhọ harhomu ọwan ne, na na họhọ evrẹn re “simi nẹ abọ ọdandan.” (Rom. 6:17, 18; Rev. 1:5) Itiọrurhomẹmro, Jehova ọrhọ harhomu ọwan ne, oma nọ merhen ọwan jerẹ ọvrẹn re tiobọnu.
“E simirin are nẹ abọ ọdandan ne” (Rom. 6:18)
17. Marhẹ ẹharhomu i Jehova o ru lele fiẹ usimirhọ? (Isaiah 53:5)
17 Se Isaiah 53:5. Udje rọ kẹta ra na ta kpahen ọ hare ọwan dje ihworho ri vwo emiamo ọgbogbanhon. Fọkiẹ izobo otan ri Jehova o tiobọnu nyoma Ọmọyen, no simirin ọwan nẹ emiamo na. (1 Pet. 2:24) Fọkiẹ izobo otan na, na sabu rharhumu kwaphiẹ onyerẹnkugbe ọwan rhẹ i Jehova, rọ ghwọghọ ne. Jerẹ oborẹ oma ọ merhen ohworho ro vwo emiamo ọgbogbanhon re simirin, omaran oma ọ ji merhen ọwan, fọkime e simirin ọwan nẹ abọ ọdandan ne fọkiẹ ẹharhomu i Jehova.
“Fọkiẹ era enẹyen ye simi ame” (Isa. 53:5)
OBORẸ ẸHARHOMU I JEHOVA O MEVIRHỌ RẸN ỌWAN
18. Me yẹ idje sansan uvuẹn i Baibol na i yonirin ọwan ne kpahen ẹharhomu i Jehova? (Ji se ekpeti na “Oborẹ i Jehova ọ Harhomu Ọwan Lele.”)
18 Me yẹ idje sansan ri ha uvuẹn i Baibol na i yonirin ọwan kpahen ẹharhomu i Jehova ne? Jehova ọrhọ harhomu, o nẹ ẹhẹn yen sa, ọ vwọ ji karorhọ aye ghwomara-an. Ọnana nọ lẹrhẹ ọwan vwo obọdẹn onyerẹnkugbe rhẹ Ọsẹ ọwan ọbe odjuwu. Habaye, ọwan i ji rhe taghene ẹharhomu i Jehova ẹghẹlẹ ro tiobọnu rẹn ọwan. O tiobọnie rẹn ituakpọ ri vwa gba, fọkiẹ ẹguọlọ ọrhẹ ẹghẹlẹ esiri rode ro vwo kpahen aye. Ọnana ẹghẹlẹ rẹ ituakpọ i vwe mwuovwan yen.—Rom. 3:24.
19. (a) Me yo fori ne vwo ọdaremẹro kpahen? (Romans 4:8) (b) Me ye ne yono kpahen uvuẹn urhomu-ẹmro rọ ha kpahen ọnana?
19 Se Romans 4:8. O fori nẹ oma ọ merhen ọwan taghene Jehova yẹ Osolobrugwẹ rọ “harhomẹ nẹ ẹhẹn sa”! (Ps. 130:4) Ọrẹn, arha guọlọ ni Jehova ọ harhomu ọwan, ene vi ruẹ emru owu rọ ghanranren omamọ. Jesu nọ tare: “Are arha ha edandan awọrọ rhomu aye-e, Ọsẹ are obẹ odjuwu ọ ji ha edandan are rhomu are-e.” (Matt. 6:14, 15) Omarana, o fori na hẹrokele i Jehova harhomu awọrọ. Marhẹ ene ruie lele? Urhomu-ẹmro rọ ha kpahen ọnana ọnọ kpahenrhọ onọ ọrana.
IJORO 46 Wẹwẹ Nobiruo Jehova
a Erhianrhian ọrukaro ra ha Hebrew ya, ọ ha ẹmro na “ẹharhomu” ruiruo, ọnana o mevirhọ taghene ẹharhomu na ọ vẹnẹ erọrọ, fọkime e ruie nẹ ẹhẹn sa. Erhianrhian i Baibol buebun e rhe ovẹnẹ ọnana-a, ọrẹn erhianrhian ọrẹ New World Translation of the Holy Scriptures o vworie, jerẹ oborẹ a hariẹ ruiruo lele uvuẹn Psalm 130:4.
