Mary ọrhẹ esa ye John, a e rhirhiẹ ekete rọ vuọnren rhẹ itu i Philippine ri rhiẹ owian avwaye. Uvwrọke emiamo i COVID-19, Mary nọ ha uyono i Baibol mwu rẹn ihworho buebun uvuẹn ẹkwotọre ro rhirhiẹ ọrhẹ ẹkwotọre erọrọ. Marhẹ o rurie lele?

Mary ọ nọ ihworho rọ ha i Baibol yono onọ ọnana, “Wu rhe ohworho ọrọrọ rọ ji guọlọ yono i Baibol na?” Aye i rha ta taghene ee, nọ ta rẹn aye nẹ aye i ta rẹn awọrọ kpahiẹn. Onọ ọlolọhọ ọnana ọ rhua erere buebun rhe ne. Mesoriẹ? Fọkime ihworho ri vwo ọdaremẹro kpahen Ẹmro Osolobrugwẹ, i vwo omwemẹ aye ina ta rẹn ihworho ekrun ọrhẹ igbehian aye kpahen oborẹ aye e yono. Erere ọgo yọ mẹrẹn ne fọkiẹ onọ ọnana?

Jasmin ro rhiẹ ọmọ uyono i Baibol i Mary, ọ ta rẹn awan ẹne erọrọ kpahiẹn. Kristine ro rhiẹ owuọwan usuẹn aye ọ riamerhen uyono na omamọ, te erhirhiẹ rọ ta rẹn Mary no rho yonie ọgbeva ọkprughwre. Ọke i Mary ọ nọ yen sẹ o rhe ọwọrọ rọ ji guọlọ yono i Baibol na, Kristine nọ tare, “Ee, mi na ta rẹn igbehian mẹ kpahuọn.” Uvwre ikprughwre ezẹko ọvo, Kristine nọ ta rẹn igbehian yen awan ẹne kpahen i Mary. Ọke oru, Kristine nọ ji ta rẹn igbehian yen erọrọ kpahen i Mary, igbehian yen erana ni ji ta rẹn awọrọ.

Kristine ọ ji guọlọ nẹ ekruien ri ha obẹ i Philippines i yono kpahen i Baibol na. Omarana, nọ ta rẹn ọmọyen ọgbọtọ Andrea kpahiẹn. Ọke ukaro, Andrea nọ tare, ‘Iseri Jehova ukoko odjahen, aye e vwo imwẹro kpahen i Jesu-u, habaye Obọrẹ a ha Edjadjẹ i Hebrew ya Uvuẹn i Baibol na ọvo yẹ aye a ha ruiruo.’ Ọrẹn ọke re yonie ukwọgbọ ọvo, iroro yi no wenerin. Ọke erhe yonie nọ ta, “Ẹmro na urhomẹmro dẹn, fọkime Baibol yọ tariẹ!”

Ọke oru, Andrea nọ ta rẹn igbehian yen awanva uvuẹn ekete iruo yi kpahen i Mary, aye ni ji tuẹn uyono rhọ. O gbe i Mary unu omamọ ọke ro rhe taghene omizu izu Andrea ọmase re se Angela ro tuẹro, ọ ji kerhọ uyono na. Ẹdẹ owu, Angela nọ ta rẹn Andrea nọ ta rẹn Mary kpahiẹn ji ha uyono i Baibol mwu riẹn. Angela o vwo ẹguọlọ kpahen oborẹ o yono. Uvwre ubiamo owu ọvo, no yono ekete i Baibol buebun rhe urhomu, ji ta taghene ọ guọlọre ne rhe yonie ọgbọ ẹne kọkprughwre kọkprughwre! Rhẹ userhumu Andrea, Angela nọ tuẹn uyono ẹnya rhọ ọke ephian nyoma itanẹti.

Ọke i Mary o rhe taghene esa i Kristine ro rhiẹ Joshua ọ bẹbẹ kerhọ uyono i Kristine, Mary nọ nọriẹn sẹ ọ guọlọ homaba uyono na. Joshua nọ tare, “Mi na kerhọ, ọrẹn wu vwa nọ mẹ onọ owuorowu rẹ; wu rha nọ mẹ enọ, mi ne vẹnrẹn jẹ uyono na vwo.” Uvwre iminiti isionrin ọvo, nọ nọ  enọ buebun ghwẹ Kristine dede, habaye ọ guọlọre nẹ uyono i Baibol na orho riarorhọ.

Onọ ọlolọhọ ri Mary ọ nọren, o lele fiẹ uyono i Baibol buebun. Fọkiẹ oborẹ aye i bun te, nọ ta rẹn imizu ukoko na erọrọ nẹ aye i lelie yono ezẹko usuẹn aye. Ihworho awan 28 yi Mary ọ ha uyono i Baibol mwu riẹn uvuẹn ẹkwotọre sansan.

Jasmin ro rhiẹ ọmọ uyono i Baibol ọrukaro ra hunute uvuẹn ikuegbe ọnana, o bromarhame uvuẹn April 2021. Kristine o bromarhame uvuẹn May 2022, vwana, ọ ghwẹrioma bru ekruien ne ọbe Philippines. Emọ uyono i Baibol awanva erọrọ rẹ Kristine ọ ta rẹn Mary kpahen i ji bromarhame ne. Ibiamo ezẹko a vrẹn Angela no bromarhame, vwana, ọ ga ẹrhẹ ọkobaro ọke ephian. Joshua ro rhiẹ esa i Kristine, ọmọ aye ọgbọtọ Andrea, ọrhẹ awọrọ ra ha uyono i Baibol mwu riẹn e ruẹ riaro uvuẹn ukoko na.

Uvuẹn ọke inyikọ na, ihworho buebun i kerabọ iyẹnrẹn esiri na uvwre ihworho ekrun ọrhẹ igbehian aye. (John 1:​41, 42a; Acts 10:​24, 27, 48; 16:​25-33) Omarana, gba damoma nọ ihworho wa ha i Baibol yono ọrhẹ awọrọ ri vwo omamerhomẹ kpahen urhomẹmro na onọ ọnana, “Wu rhe ohworho ọrọrọ rọ ji guọlọ yono i Baibol na?” Wu rha nọ onọ ọnana, ọkezẹko wu na ji mẹrẹn ihworho wu na ha uyono i Baibol mwu riẹn.