1. Marhẹ ẹguọlọ Osolobrugwẹ ọ hobọte owẹwẹ lele?

ỌNYIKỌ JOHN ọrhọ ya, “Osolobrugwẹ yẹ ẹguọlọ.” (1 John 4:8) Ẹmro ọrana ọ karorhọ ọwan urhomẹmro ọghoghanghren owu: Osolobrugwẹ, ro rhiẹ Esiri arhọ ọwan, yẹ jeghwai Esiri ẹguọlọ. Jehova o vwo ẹguọlọ kpahen ọwan! Ẹguọlọ ye ọ yẹ ọwan omefuon, omamerhomẹ, ọrhẹ evwẹnvuọn.

2. Lele oborẹ ọ ha Matthew 22:37-40, me yẹ ekama eva ri maido kparobọ, mesoriẹ ọnọ bẹn ọkezẹko ra na nyalele ọreva ye na?

² Harẹn Ilele Kristi, ẹguọlọ oborẹ ene vi djephia. Ọnana akama. (Se Matthew 22:37-40.) Arha dabu rhe i Jehova, nọ phẹrẹ ra na nyalele akama ọrukaro na. Fọkime Jehova ohworho rọ gbare; o roro rẹn ọwan jeghwai hẹrote ọwan izede dẹndẹn. Ọrẹn, ọnọ sabu bẹn ra na nyalele akama ọreva na. Mesoriẹ? Fọkime imizu ukoko na ri ha usuẹn ihworho ri mai kẹrẹ ọwan, a gba-a. Ọkezẹko, aye ina sabu ta, jeghwai ruẹ ekwakwa ri vwe dje ẹguọlọ yanghene uruemru esiri phia. Jehova o rheri taghene ana dẹrughwaroghwu obẹnbẹn ọnana, omarana nọ ha ihworho ezẹko usuẹn eri ya i Baibol na, yono ọwan oborẹ ọsoriẹ o fo ne dje ẹguọlọ phia rẹn ereva ọwan ọrhẹ oborẹ ene ruie lele. Owuọwan usuẹn aye yi John.—1 John 3:11, 12.

3. Me yi John ọ kanrunumwu kpahen ẹguọlọ?

³ Uvuẹn eyaya i John, ọ karunumwuie taghene Ilele Kristi ine vi dje ẹguọlọ phia. Itiọrurhomẹmro, uvuẹn iyẹnrẹn yen kpahen akpenyerẹn i Jesu, John ọ ha ẹmro na “ẹguọlọ” ọrhẹ “re vwo ẹguọlọ” ruiruo ọgbọ buebun ghwẹ oborẹ i Matthew, Mark, ọrhẹ Luke i hariẹ ruiruo erhe ku  aye kugbe. John ọ ha emrẹ ẹgbukpe uzusionrin ọke rọ ya ọbe i Baibol rọ kpare odẹ ye ọrhẹ ileta ye esa. Ẹbe i Baibol enana, i djephia taghene ẹguọlọ ono vi sun kemru kemru Olele Kristi o ruẹ. (1 John 4:10, 11) Ọrẹn, ọ ha ọke i John o ki yono uyono ọrana.

4. Ọke ephian yi John o dje ẹguọlọ rẹn awọrọ bi?

⁴ Ọke i John ọ ha idama, orhiẹ ọke ephian yo dje ẹguọlọ phia-a. Jerẹ udje, uvuẹn erhirhiẹ owu, Jesu ọrhẹ idibo yi a nya i Samaria riẹ Jerusalem. Ihworho re rhirhiẹ ọko okokamu owu uvuẹn Samaria, e kwe dede aye-e. Me yi John o ruru? Ọye nọ nọ i Jesu sẹ o se erhanren nẹ odjuwu rhe nọ ghwọghọ ọsoso ihworho amwa na! (Luke 9:52-56) Uvuẹn erhirhiẹ ọrọrọ, John o dje ẹguọlọ phia rẹn inyikọ ereva na-a. Ọye ọrhẹ omizie re se James ni ya rẹ izu aye, nọ ta rẹn Jesu nọ yẹ aye ekete rọ mai ghanren uvuẹn Uvie ọnẹyen. Ọke inyikọ ereva na e rhe kpahen oborẹ James ọrhẹ John i ruru, evwan ni biomirẹn aye! (Matt. 20:20, 21, 24) Ọrẹn, udabọ orusọ enana ri John o ruru, Jesu o vwo ẹguọlọ kpahiẹn.—John 21:7.

5. Me ye ne yono kpahen uvuẹn urhomu-ẹmro ọnana?

⁵ Uvuẹn urhomu-ẹmro ọnana, ene yono kpahen udje i John ọrhẹ ekwakwa ezẹko rọ ya kpahen ẹguọlọ. Ene yono kpahen oborẹ ene ru dje ẹguọlọ rẹn imizu ukoko na. Ene ji yono kpahen izede ọghoghanren owu rẹ urhomu ekrun ono ru djephia taghene o vwo ẹguọlọ kpahen ekrun ọnẹyen.

6. Marhẹ i Jehova o ru dje ẹguọlọ ye phia rẹn ọwan?

⁶ Ọwan e roro taghene ne dje ẹguọlọ phia, ọrẹ ene vwo iroro bọrọbọrọ kpahen awọrọ yanghene tẹmro irhorhomu rẹn aye. Ọrẹn, na sabu dje obọdẹn ẹguọlọ phia, ene vi ruẹ ekwakwa irhorhomu phia. (Haye vwanvwọn James 2:17, 26.) Jerẹ udje, Jehova o vwo ẹguọlọ kpahen ọwan. (1 John 4:19) O dje ẹguọlọ ye phia nyoma ẹmro irhorhomu ri ha uvuẹn i Baibol na. (Ps. 25:10; Rom. 8:38, 39) Ọrẹn, e vwo imwẹro taghene Jehova o vwo ẹguọlọ kpahen ọwan fọkiẹ oborẹ ọ ta ọrhẹ oborẹ o ruẹ. John ọrhọ ya: “Nyoma ọnana ye dje ẹguọlọ Osolobrugwẹ phia harẹn ọwan, taghene Osolobrugwẹ o dje Ọmọyen owu ọvo ro vwori rhiẹ otọrakpọ na, neneyo ọwan i sabu vwo arhọ nyoma yen.” (1 John 4:9) Jehova ọ ha uphẹn rẹn Ọmọyen ro vwo ẹguọlọ kpahen omamọ no rioja jeghwai hwu fọkiẹ ọwan. (John 3: 16) Omarana, e vwo imwẹro taghene Jehova o ghini vwo ẹguọlọ kpahen ọwan.

7. Me yi Jesu o ruru no dje ẹguọlọ ye phia rẹn ọwan?

⁷ Jesu ọ yẹ idibo yi imwẹro taghene o vwo ẹguọlọ kpahen aye. (John 13:1; 15:15) O dje ẹguọlọ ye phia rẹn aye ọrhẹ ọwan nyoma oborẹ ọ tare jeghwai ru. Jesu ọrhọ ta, “O vwo ohworho ro vwo ẹguọlọ ro kodo ghwẹ ọnana-a, ọrẹ ohworho ọnọ ha arhọ ye kpahontọre fọkiẹ igbehian yen.” (John 15:13) Ọke re roro kpahen oborẹ i Jehova ọrhẹ Jesu i ru rẹn ọwan ne, me yo fori ne ru?

8. Me yi 1 John 3:18 ọ tare ne ru?

⁸ Ọwan e djephia taghene e vwo ẹguọlọ kpahen Jehova ọrhẹ Jesu nyoma ra huvwele aye. (John 14:15; 1 John 5:3) Jesu o jurhi taghene e vwo ẹguọlọ kpahen owuowọnwan. (John 13:34, 35) O fori na ta rẹn imizu ukoko na taghene e vwo ẹguọlọ kpahen aye jeghwai dje yi phia nyoma irueruo ọwan. (Se 1 John 3:18.) Me yẹ ekwakwa ezẹko ra na sabu ru, ro no djephia taghene e vwo ẹguọlọ kpahen aye?

9. Me yẹ ẹguọlọ o mwu i John ru?

⁹ Manẹ i John ọ sabu daji kẹrẹ ọsẹ ye, ji vwo igho ọke rọ wian owian okpirhenrin, ro rhiẹ owian ekrun na. Ukpomaran, nọ ha akpenyerẹn yen ha userhumu rẹn ihworho yono urhomẹmro na kpahen Jehova ọrhẹ Jesu. Aruẹ akpọ ri John ọ djẹre na, ọ lọhọ-ọ. Ọ rioja ẹkparehaso, a jeghwai kpariẹ riẹ ekete kologho ọke rọ ho ne, uvwre ehion ẹgbukpe uzusionrin ọrukaro na. (Acts 3:1; 4:1-3; 5:18; Rev. 1:9) Dedevwo ọ ha ekanron fọkime o ghwoghwo kpahen Jesu, John o djephia taghene o vwo ẹguọlọ kpahen awọrọ. Jerẹ udje, ọke rọ ha ẹkwotọre Patmos rẹ ame o kinhariẹ, nọ ya ọbe i Revelation jeghwai dje yi vwe ikoko na, nẹ aye i rhe ekwakwa “ri na vi phia phẹrẹkpẹ.” (Rev. 1:1) Ọkezẹko ọke re tiobọnu i John nẹ i Patmos, yọ ya kpahen akpenyerẹn ọrhẹ owian aghwoghwo i Jesu. Ọ ji ya ileta esa neneyo ọ sabu ha urhebro rẹn imizu na, jeghwai ruẹ aye gbanhon. Marhẹ wu ne ru hẹrokele udje i John?

10. Marhẹ wu ne ru djephia taghene wu vwo ẹguọlọ kpahen ihworho?

¹⁰ Wu na sabu djephia taghene wu vwo ẹguọlọ kpahen ihworho nyoma oborẹ wa ha akpenyerẹn ọnọ ruẹ. Akpọ Echu ọ guọlọre taghene wu ghwọghọ ọsoso ọke ọrhẹ omẹgbanhon ọnọ rha guọlọ igho, yanghene ne wu haye titi. Ukpomaran, Ilele Kristi ephian uvuen akpọ na, a dabu vwobọrhọ owian aghwoghwo na jeghwai ha userhumu rẹn ihworho tikẹrẹ i Jehova. Ezẹko a tobọ vwobọrhọ iruo Uvie na ọke vuọnvuọn.

11. Marhẹ imizu buebun ri fuevwan e ru djephia taghene aye i vwo ẹguọlọ kpahen Jehova ọrhẹ imizu ukoko na?

¹¹ Imizu buebun ri fuevwan ina vi wian ọke vuọnvuọn neneyo aye i sabu hobọtua oma aye ọrhẹ ekrun aye. Udabọ ọrana, imizu enana a hobọtua ukoko i Jehova ọrẹ kizede kizede. Jerẹ udje, ezẹko a ha userhumu phia ekete oghwọghọ kpregede ọ phia, awọrọ a wian owian ebanbọn, habaye ọwan ephian i ji vwo uphẹn re ne toro igho rhẹ owian akpọ ephian. Aye e ruẹ ekwakwa enana fọkiẹ ẹguọlọ aye i vwo kpahen Jehova ọrhẹ awọrọ. Kọkprughwre kọkprughwre, ọwan e djephia taghene e vwo ẹguọlọ kpahen imizu ukoko na nyoma re riẹ uyono ukoko  ji vwobọrhọ ye. Dedevwo oma ọnọ sabu bẹn ọwan, e ji riẹ uyono ukoko. Dedevwo udu ọnọ sabu bru ọwan, ọrẹn a ji kpahanrhọ enọ. Dedevwo ọwan ephian i vwo ebẹnbẹn omobọ, a ji ha udu rhẹ awọrọ aghwẹ bọmọke uyono na ọnọ ki tonrhọ ọrhẹ ọke orho fuen ne. (Heb. 10:24, 25) Oma ọ merhen ọwan kpahen owian imizu ọwan a wian!

12. Izede ọrọrọ ọgo yi John o ru dje ẹguọlọ ye phia rẹn imizu na?

¹² John o dje ẹguọlọ ye phia rẹn imizu na nyoma ro jiri aye jeghwai yẹ aye urhebro. Jerẹ udje, uvuẹn ileta ye, John o jiri imizu na fọkiẹ esegburhomẹmro aye ọrhẹ ewian irhorhomu aye, nọ ji yẹ aye urhebro ọgbogbanhon kpahen ọdandan. (1 John 1:8–2:1, 13, 14) Omaran ọ ji havwọ, o fori ne jiri imizu ukoko na fọkiẹ ekwakwa irhorhomu aye e ruẹ. Ọrẹn, orhianẹ omizu o vwo orharhere uruemru, ana sabu dje ẹguọlọ phia nyoma ra na ha ẹghwanren ta riẹn oborẹ o fori no rhon. A guọlọ uduefigbere na sabu ha urhebro rẹn ugbehian ọwan, ọrẹn i Baibol na ọ tare taghene obọdẹn igbehian a ha ọkpọvi rẹn ọreva aye.—Prov. 27:17.

13. Me ya na kẹnoma riẹn?

¹³ Ọkezẹko, ọwan e dje ẹguọlọ rẹn imizu ukoko na nyoma oborẹ ene je ruo. Jerẹ udje, ọwan i kiki biomevwan fọkiẹ oborẹ aye i tare-e. Roro kpahen oborẹ ọ phiare uvwre ehion akpenyerẹn i Jesu uvuẹn otọrakpọ na. Ọ ta rẹn idibo yi taghene nẹ aye i sabu vwo arhọ, aye ina riẹ uhwen yin jeghwai da ọbara ye. (John 6:53-57) Ọrana ọ kpẹ ẹmro rọ lẹrhẹ idibo yi buebun sẹrerhumuje vwo—ọrẹn obọdẹn igbehian yen kugbe John, a zẹ je vwo-o. Aye i vwo atamwu kpahiẹn. Aye e vwẹruọ oborẹ i Jesu ọ ta-a, ọkezẹko o ji gbe aye unu. Ọrẹn, aye e roro taghene oborẹ i Jesu ọ tare ọ sọre, rọ lẹrherẹ aye biomevwa-an. Ukpomaran, aye i hẹroso i Jesu, fọkime aye i rheri taghene ọ ta urhomẹmro na. (John 6:60, 66-69) Omarana, ọghanranren taghene e vwe kiki biomevwan fọkiẹ oborẹ igbehian ọwan i tare-e! Ọrẹn, a ha uphẹn rẹn aye ta oborẹ aye i ghini guọlọ ta.—Prov. 18:13; Eccl. 7:9.

14. Mesoriẹ o vwo fo ne vwo utuoma kpahen imizu ukoko na?

¹⁴ John ọ ji ta rẹn ọwan taghene e vwe vwo utuoma kpahen imizu ukoko na-a.  Arha ha urhebro ọrana ruiruo-o, Echu ọnọ ha ọwan ruiruo. (1 John 2:11; 3:15) Ọnana ọ phia rẹn idibo ezẹko uvwre ehion ẹgbukpe uzusionrin ọrukaro na. Echu ọ damoma ruie nẹ idibo i Jehova i vwo utuoma kpahen omoma aye, jeghwai fiẹ oghalẹ rhẹ uvwre aye. Ọke i John ọ ya ileta erana, ihworho re ruẹ jerẹ Echu i ruẹ uvuẹn ukoko na ne. Jerẹ udje, Diotrephes ọ suẹ oghalẹ ọgbogbanhon uvuẹn ukoko owu. (3 John 9, 10) Ọ vwọ họghọ rẹn ekpako ukoko rẹ ugboma usuon na o dje rhe-e. Ọ tobọ damoma le imizu ri dede ihworho ri vwe je yi nẹ ukoko na. Uruemru ọrana ọ sọre! Echu ọ ji damoma rọ nọ ghalẹ jeghwai fiẹ ihworho i Jehova kparobọ inyenana. A vwa ha uphẹn rẹn utuoma nọ ghalẹ ọwa-an.

15. Me yẹ urhomu ekrun ọnọ vi karorhọ?

¹⁵ Izede ọghoghanren owu rẹ urhomu ekrun ono dje ẹguọlọ rẹn ekrun ọnẹyen, yẹ ọrẹ ọnọ hẹrote edamẹ ugboma aye. (1 Tim. 5:8) Ọrẹn, ọnọ vi karorhọ taghene ekwakwa ugboma i sabu wene onyerẹnkugbe aye rhẹ i Jehova-a. (Matt. 5:3) Djokarhọ udje i Jesu o dje rẹn urhomu ekrun. Iyẹnrẹn i John o djephia taghene ọke i Jesu o hwuẹ uvuẹn orhan oja na, o ji roro kpahen ekrun ọnẹyen. John o mevi kẹrẹ izu i Jesu, re se i Mary, uvuẹn ekete re kpe i Jesu na. Dedevwo i Jesu ọ ha omiamiamo ọgbogbanhon, nọ ta rẹn John nọ hẹrote i Mary. (John 19:26, 27) Jesu o vwo imizu ri na sabu hẹrote edamẹ i Mary, ọrẹn ọ họhọre taghene o vwo ọro rhiẹ odibo yi ne-e. Omarana, Jesu o ruẹ ẹkwaphiẹrhotọre ra na hẹrote i Mary ọrẹ ugboma, neneyo ọ ji sabu ga i Jehova.

16. Ehwan ego yi John o vwori?

¹⁶ John ọ kpare ehwan eghwaghwa buebun. Ro rhiẹ owuọwan usuẹn inyikọ na, ọye ọ karo uvuẹn owian aghwoghwo na. Ọkezẹko, John ọ rọnmọ ne, omarana ọnọ hẹrote edamẹ ugboma ọrẹ ekrun ọnẹyen jeghwai ha userhumu rẹn aye vwo omamọ onyerẹnkugbe rhẹ Jehova. (1 Cor. 9:5) Me yẹ urhomu ekrun ina sabu yono mie John inyenana?

17. Mesoriẹ ọghanren nẹ urhomu ekrun i ha userhumu rẹn ekrun aye ga i Jehova?

¹⁷ Omizu ọhworhare ro rhiẹ urhomu ekrun, ọnọ sabu vwo ehwan buebun. Jerẹ  udje, ọnọ dabu fiomarhọ owian yin, nẹ uruemruie ọ sabu ha ujiri vwe i Jehova. (Eph. 6:5, 6; Titus 2:9, 10) Ọnọ ji sabu vwo ewian buebun uvuẹn ukoko na, jerẹ ọrẹ ọnọ kọn bru imizu na yanghene ọnọ karo uvuẹn owian aghwoghwo na. Uvwre ọke owu na, orhiẹ oborẹ ọghanranren ro no fiomarhọ uyono i Baibol ọrhẹ aniẹ kugbe emọyen. Aye ine vwo ọdaremẹro kpahen userhumu ro tiobọnẹ rẹn aye ọrẹ ugboma, iroro, nẹ aye i sabu ga i Jehova sasasa.—Eph. 5:28, 29; 6:4.

18. Me yi John o vwo imwẹro kpahen?

¹⁸ John o nyerẹnren ẹgbukpe buebun ne, ọ ji mẹrẹn ekwakwa buebun ne. Ọ dẹrughwaroghwu ebẹnbẹn sansan ri na sabu lẹrhẹ esegburhomẹmro ọnẹyen seriotọre. Ọrẹn, John ọ damoma ruẹ ekete omẹgbanhon ọnẹyen teri nọ sabu huwvele ekama i Jesu, ọnana ọ haba ekama re ne vwo ẹguọlọ imizu ukoko na. Fọkiẹ ọrana, John o vwo imwẹro taghene Jehova ọrhẹ Jesu i vwo ẹguọlọ kpahiẹn, aye ina jeghwai yẹ ye omẹgbanhon ro no fi ebẹnbẹn yen kparobọ. (John 14:15-17; 15:10; 1 John 4:16) Echu ọrhẹ akpọ ro suẹn, a sabu dobọ i John ji, no jo dje ẹguọlọ rẹn imizu na nyoma oborẹ ọ tare ọrhẹ oborẹ o ruru-u.

19. Me yi 1 John 4:7 ọ ha urhebro rẹn ọwan ne ru, mesoriẹ?

¹⁹ Jerẹ i John, ọwan e nyerẹn uvuẹn akpọ rẹ Echu ro rhiẹ osolobrugwẹ akpọ ọnana o suẹn. (1 John 3:1, 10) Dedevwo Echu ọ guọlọ ne dje ẹguọlọ rẹn imizu ukoko na-a, ọrẹn o vwo omẹgbanhon ro no ruie-e, jokpanẹ ọwan i ha uphẹn riẹn. Omarana, jene vwo omwemẹ re ne vwo ẹguọlọ kpahen imizu ukoko na, ne ji dje yi phia nyoma oborẹ a ta ọrhẹ oborẹ e ruẹ. Ọke ọrana, ana mẹrẹn omamerhomẹ re rhiẹ owuọwan usuẹn ekrun i Jehova, ana jeghwai nyerẹn akpọ rọ vuọnren rhẹ omamerhomẹ.—Se 1 John 4:7.