URHOMU-ẸMRO UYONO 4
Oborẹ Ọsoriẹ e Riẹ Ẹkarorhọ Uhwu i Jesu
“Are i rhe ru ọnana ha karorhọ mẹ.”—LUKE 22:19.
IJORO 20 Wu Ha i Jesu Tan Ame
ẸZẸKOKO *
1-2. (a) Ọkiọgo ya mai karorhọ ihworho re vwo ẹguọlọ kpahen ri hwuru? (b) Ẹkwaphiẹrhotọre ọgo yi Jesu ọ ha mwu ason na bọmọke o ki hwu?
O TORO oborẹ o jiri te rẹ ihworho re vwo ẹguọlọ kpahen i hwu ne-e, a ji karorhọ aye. Ọwan a karorhọ aye maido uvuẹn ẹdẹ aye e hwu.
2 Kẹgbukpe kẹgbukpe, ọwan i ha usuẹn iduduru ihworho uvuẹn akpọ na re koko ruẹ ẹkarorhọ uhwu ohworho rọ ghanren rẹn ọwan omamọ, nọyẹ Jesu Kristi. (1 Pet. 1:8) Ọwan a karorhọ ohworho rọ ha arhọ ye ruẹ otan, nọ sabu simi ọwan nẹ ọdandan ọrhẹ uhwu. (Matt. 20:28) Itiọrurhomẹmro, Jesu ọ guọlọre nẹ idibo yi i karorhọ uhwuie. Ason na bọmọke o ki hwu, nọ ha ẹkwaphiẹrhotọre emaren owuọwọn oghẹnrensan mwu, ji ta: “Are i rhe ru ọnana ha karorhọ mẹ.” *—Luke 22:19.
3. Me ye ne yono kpahen uvuẹn urhomu-ẹmro ọnana?
3 Otu krẹn usuẹn ere riẹ Ẹkarorhọ Uhwu Kristi na, yi ne riẹ odjuwu. Ọrẹn, iduduru buebun ri vwo ifiẹrorhọ aye ine rhirhiẹ otọrakpọ na, e ji riẹ Ẹkarorhọ na. Uvuẹn urhomu-ẹmro ọnana, ene yono kpahen oborẹ ọsoriẹ ẹko eva na e vwo omwemẹ aye ine riẹ Ẹkarorhọ na kẹgbukpe kẹgbukpe. Ene ji yono kpahen oborẹ ene ru mẹrẹn erere ọke arha nya. Jenẹ a tonrhọ nyoma re ne yono kpahen iroro ezẹko rọ lẹrhẹ era djẹha na riẹ Ẹkarorhọ na.
OBORẸ ỌSORIẸ ERA DJẸHA E RIẸ ẸKARORHỌ NA
4. Mesoriẹ era djẹha na a riẹ ibrẹdi na ji da enyo na ọke re ruẹ Ẹkarorhọ Uhwu i Jesu?
4 Kẹgbukpe kẹgbukpe, era djẹha na e fiẹrorhọ ọke aye ine riẹ Ẹkarorhọ na, nẹ aye i riẹ ibrẹdi na ji da enyo na. Mesoriẹ aye a riẹ ibrẹdi na ji da enyo na? Na kpahenrhọ onọ ọrana, roro kpahen oborẹ ọ phiare uvuẹn ason rọ kẹta ọke ri Jesu o rhiẹ onyakpọ. Ọke aye a riẹ orẹ Ọnyavrẹn na hin, Jesu nọ ha ẹkwaphiẹrhotọre Emaren Owuọwọn na mwu. Nọ kpare ibrẹdi ọrhẹ enyo na rẹn inyikọ awan 11 ri fuevwan, ji ta rẹn aye nẹ aye i re ji da. Jesu nọ ta rẹn aye kpahen ọphọ eva—ọphọ ọkpokpọ na ọrhẹ ọphọ Uvie na. * (Luke 22:19, 20, 28-30) Ọphọ erana ni ha uphẹn ren inyikọ na ọrhẹ ibiẹ ihworho krẹn rhiẹ irodje ọrhẹ irherẹn obẹ odjuwu. (Rev. 5:10; 14:1) Era djẹha ri hẹrhẹre ọvo, * ri ha usuẹn ọphọ eva erana, yi na sabu riẹ ibiẹdi na ji da enyo na.
5. Me yẹ era djẹha na i rhe kpahen ifiẹrorhọ aye?
5 Iroro ọrọrọ rọ soriẹ era djẹha na e ji riẹ Ẹkarorhọ na yẹ: Ẹkwaphiẹrhotọre na ọ ha uphẹn rẹn aye dabu roro kpahen ifiẹrorhọ aye. Jehova ọ yẹre aye ifiẹrorhọ oghẹnrensan—ọrẹ aye ine vwo arhọ ijehwuo bẹmẹdẹ obẹ odjuwu, leli Jesu Kristi ro vwo odidi ọrhẹ ezẹko usuẹn awan 144,000 ri ha odjuwu ne ga kugbe, ọrọ maido, ọrẹ aye ine leli Jehova Osolobrugwẹ rhirhiẹ kugbe! (1 Cor. 15:51-53; 1 John 3:2) Era djẹha na i rheri taghene a ha use rẹn aye riẹ odjuwu nẹ aye i riamerhen uphẹn erana. Ọrẹn, nẹ aye i sabu riẹ odjuwu, aye ina vi fuevwan te ẹdẹ uhwu. (2 Tim. 4:7, 8) Oma ọ merhen era djẹha na ọke aye e roro kpahen ifiẹrorhọ aye. (Titus 2:13) Nẹ “igegede ereva” na vwo? (John 10:16) Me yẹ iroro ezẹko rọ lẹrhẹ aye riẹ Ẹkarorhọ na?
OBORẸ ỌSORIẸ IGEGEDE EREVA NA E RIẸ ẸKARORHỌ NA
6. Mesoriẹ igegede ereva na e riẹ Ẹkarorhọ na kẹgbukpe kẹgbukpe?
6 Igegede ereva na e ji riẹ Ẹkarorhọ Uhwu i Jesu, ọrẹn aye i vwa riẹ ibrẹdi ji da enyo na-a. Uvuẹn ẹgbukpe 1938, yẹ ọke ukaro ra ha use rẹn otu ri ne rhirhiẹ otọrakpọ na nẹ aye i rhiẹ Ẹkarorhọ na. Oghwa Odẹrẹ ọrẹ March 1, 1938, ọrhọ ta: “Ono rhiẹ oborẹ oserhọ omamọ rẹ [igegede ereva na] ina rhiẹ ẹkwaphiẹrhotọre na ji mẹrẹn oborẹ e ruẹ. . . . O ji fo no rhiẹ ọke aghọghọ rẹn aye.” Jerẹ ihworho ra ha use riẹn rẹ oma ọ merhan aye ine ni oborẹ e ruẹ irueruo orọnmo lele, omaran oma ọ merhen igegede ereva na aye ine riẹ Ẹkarorhọ na, ji mẹrẹn oborẹ e ruẹ.
7. Mesoriẹ igegede ereva na a kpomaviẹ rẹn ẹmro ra haphia ọke Ẹkarorhọ na?
7 Igegede ereva na e ji roro kpahen ifiẹrorhọ aye. Aye a kpomaviẹ rẹn ẹmro ra haphia ọke Ẹkarorhọ na, fọkime oborẹ a mai ta kpahan yẹ, oborẹ Kristi ọrhẹ awan 144,000 ri ne lelie sun ine ru rẹn ituakpọ ri fuevwan uvwre ọke Usuon ọrẹ Ẹgbukpe Uriusionrin na. Uvuẹn otọre usuon Orodje aye Jesu Kristi, era djẹha na ina ha userhumu phia kwaphiẹ otọrakpọ na rhiẹ paradais, ji ruẹ ituakpọ rhiẹ ihworho ri gbare. Oma ọ merhen iduduru ihworho re ye ni irueruo na, ọke aye e roro kpahen orugba aruẹmẹrẹn i Baibol sansan, jerẹ eri ha Isaiah 35:5, 6; 65:21-23; ọrhẹ Revelation 21:3, 4. Ọke aye a mẹrẹn oma aye ọrhẹ erẹ aye i vwo ẹguọlọ kpahen uvuẹn akpọ ọkpokpọ na, ifiẹrorhọ aye kpahen obaro na ọrhẹ omwemẹ aye ina ga i Jehova ọke ephian nọ gbanhanrhọ.—Matt. 24:13; Gal. 6:9.
8. Me yẹ iroro ọrọrọ rọ lẹrhẹ igegede ereva na riẹ Ẹkarorhọ na?
8 Roro kpahen iroro ọrọrọ rọ lẹrhẹ igegede ereva na riẹ Ẹkarorhọ na. Aye i guọlọ dje ẹguọlọ ọrhẹ obẹhatua aye phia rẹn era djẹha na. Baibol na ọ tare taghene onyerẹnkugbe rọ kpẹnkpẹnren ono rhirhiẹ uvwre era djẹha na ọrhẹ eri ne rhirhiẹ otọrakpọ na. Izede ọgo? Jene yono kpahen idje ezẹko.
9. Me yẹ aruẹmẹrẹn rọ ha Zechariah 8:23 o dje kpahen ukẹro orhorhomu rẹ igegede ereva na a ha ni era djẹha na?
9 Se Zechariah 8:23. Aruẹmẹrẹn ọnana ọ dabu dje kpahen ukẹro orhorhomu rẹ igegede ereva na a ha ni era djẹha na. Ẹmro na “onyẹ i Jew” ọrhẹ “are,” o mevirhọ ẹko ihworho owu, nọyẹ era djẹha ri hẹrhẹre. (Rom. 2:28, 29) “Ehworhare ikpe ri nẹ edjadjẹ sansan rhe uvuẹn egbamwa na,” i mevirhọ igegede ereva na. Aye i “dabu mọrọn”—vwo atamwu kpahen—era djẹha na, nyoma aye a homaba aye ga ogame rọ fonron. Omarana, owuọwọn re ruẹ Ẹkarorhọ Uhwu i Jesu na, igegede ereva na ne dje atamwu aye phia nyoma aye e riẹ ẹkwaphiẹrhotọre na.
10. Me yi Jehova o ru ne sekpahen orugba aruẹmẹrẹn rọ ha Ezekiel 37:15-19, 24, 25?
10 Se Ezekiel 37:15-19, 24, 25. Ọrẹ orugba aruẹmẹrẹn ọnana, Jehova o koko ere djẹha na ọrhẹ igegede ereva na kugbe ne ọrẹ onyerẹnkugbe ọgbogbanhon. Aruẹmẹrẹn na ọ hunute erhan eva. Era djẹha na i họhọ orhan “ọrẹ i Judah” (ro rhiẹ uvwioghwa ra djẹ irodje ri suẹn Israel i nurhe), igegede ereva na i họhọ orhan “ọrẹ Ephraim.” * Jehova ono koko erhan eva enana kugbe nẹ aye i rhiẹ “orhan owu.” Ọnana no mevirhọ taghene aye ina ga kugbe uvuẹn otọre usuon Orodje aye, Kristi Jesu. Kẹgbukpe kẹgbukpe, era djẹha na ọrhẹ igegede ereva na, e riẹ Ẹkarorhọ na jerẹ “ẹko igegede owu” uvuẹn otọre usun “osuingegede owu,” orhiẹ ẹko eva ri vẹnẹre-en—John 10:16.
11. Marhẹ “igegede” ra hunute uvuẹn Matthew 25:31-36, 40 e ru dje obẹhatua aye phia rẹn imizu Kristi?
11 Se Matthew 25:31-36, 40. “Igegede na” uvuẹn udje ọnana, i mevirhọ evwata ri havwiẹ uvuẹn ọke oba na ri vwo ifiẹrorhọ aye ine rhirhiẹ otọrakpọ na—nọyẹ, igegede ereva na. Aye a hobọtua era djẹha ri rhiẹ imizu Kristi ri hẹrhẹre, nyoma aye e vwobọrhọ owian ọghoghanren owu—aghwoghwo na ọrhẹ owian re ruẹ idibo.—Matt. 24:14; 28:19, 20.
12-13. Me yẹ izede erọrọ rẹ igegede ereva na e ru hobọtua imizu Kristi?
12 Kẹgbukpke kẹgbukpe, uvwre ikprughwre bọmọke e ki ruẹ Ẹkarorhọ na, igegede ereva na e dje obẹhatua aye phia rẹn imizu Kristi, nyoma aye e vwobọrhọ aghwoghwo akpọ ephian nẹ aye i sabu ha use rẹn awọrọ rhiẹ Ẹkarorhọ na. (Se ekpeti na “ We Mwuegbe Hẹrhẹ Ọke Ẹkarorhọ na?”) Aye a ji ha userhumu phia ruẹ ẹkwaphiẹrhotọre ra guọlọre neneyo ikoko sansan uvuẹn akpọ na, i sabu ruẹ Ẹkarorhọ Uhwu i Jesu na, ọrhọ tobọ rhianẹ o vwo ọrọ riẹ ibrẹdi na ji da enyo na uvuẹn ukoko ọrana-a. Oma ọ merhen igegede ereva na ọke aye a hobọtua imizu Kristi izede omaran. Aye i rheri taghene Jesu o ni oborẹ aye i ru rẹn imizie ra djẹha rhiẹ oborẹ e ru riẹn.—Matt. 25:37-40.
13 Me yẹ iroro erọrọ rọ lẹrhẹ ọwan ephian, otoro ifiẹrorhọ re vwori-i, riẹ Ẹkarorhọ na?
OBORẸ ỌSORIẸ ỌWAN EPHIAN E RIẸ ẸKARORHỌ NA
14. Marhẹ i Jehova ọrhẹ Jesu i ru dje ẹguọlọ rode rẹn ọwan?
14E vwo ọdaremẹro kpahen ẹguọlọ ri Jehova ọrhẹ Jesu i dje rẹn ọwan. Jehova o dje ẹguọlọ ye rẹn ọwan nyoma izede buebun, ọrẹn izede owu yọ mai ghanren kparobọ. Jehova o dje ẹguọlọ ye rọmaido kparobọ phia ọke ro dje i Jesu rhe nọ rioja ji hwu rẹn ọwan. (John 3:16) Habaye, Jesu o ji dje ẹguọlọ rode phia nyoma rọ homakpahontọre hwu rẹn ọwan. (John 15:13) A sabu kwosa ẹguọlọ i Jehova ọrhẹ Jesu i dje rẹn ọwan hiẹn dẹ-ẹ. Ọrẹn, ana sabu dje ekpẹmẹ phia nyoma oborẹ e nyerẹn akpọ ọwan lele kẹdẹkẹdẹ. (Col. 3:15) E ji riẹ Ẹkarorhọ na neneyo a sabu roro kpahen ẹguọlọ aye kpahen ọwan, ne ji dje ẹguọlọ phia rẹn aye.
15. Mesoriẹ era djẹha ọrhẹ igegede ereva na, a ha ukẹro ọghoghanren ni ẹghẹlẹ otan na?
15E vwo ọdaremẹro ọghoghanren kpahen ẹghẹlẹ otan na. (Matt. 20:28) Era djẹha na a ha ukẹro ọghohanren ni otan na, fọkime ọyọ lẹrherẹ aye vwo ifiẹrorhọ aye ine riẹ odjuwu. Fọkiẹ esegburhomẹmro aye i vwo kpahen izobo i Jesu, Jehova o serẹ aye evwata ji dẹ aye nẹ aye i rhiẹ emọyen. (Rom. 5:1; 8:15-17, 23) Igegede ereva na i ji vwo ọdaremẹro kpahen otan na. Fọkiẹ esegburhomẹmro aye i vwo kpahen izobo i Kristi, aye i vwo onyerẹnkugbe rọ fonron rhẹ Jehova, ji ha ogame ro fiotọre riẹn, aye i vwo ifiẹrorhọ aye ina “nyavrẹn ukpokpogho rode na.” (Rev. 7:13-15) Izede owu era djẹha ọrhẹ igegede ereva na, e ru dje ekpẹmẹ aye phia yẹ, ọrẹ aye e riẹ Ẹkarorhọ na kẹgbukpe kẹgbukpe.
16. Me yẹ iroro ọrọrọ rọ lẹrhẹ ọwan riẹ Ẹkarorhọ na?
16 Ọwan e riẹ Ẹkarorhọ na fọkime ọwan i guọlọ huvwele i Jesu. O toro ifiẹrorhọ re vwori kpahen obaro na-a, ọwan a nyalele urhi Jesu o jeri uvuẹn ason rọ ha Ẹkarorhọ na mwu: “Are i rhe ru ọnana ha karorhọ mẹ.”—1 Cor. 11:23, 24.
OBORẸ ỌWAN EPHIAN E RU MẸRẸN ERERE NẸ ẸKARORHỌ NA
17. Marhẹ Ẹkarorhọ na o ru lẹrhẹ ọwan tikẹrẹ i Jehova rhọ?
17Ọwan e tikẹrẹ i Jehova rhọ. (Jas. 4:8) Jerẹ oborẹ e yono ne, Ẹkarorhọ uhwu i Jesu ọ yẹ ọwan uphẹn re ne roro kodo kpahen ifiẹrorhọ ri Jehova ọ yẹrẹ ọwan ne, ọrhẹ ẹguọlọ rode ro dje rẹn ọwan. (Jer. 29:11; 1 John 4:8-10) Ọke erhe roro kpahen ifiẹrorhọ ọwan kpahen obaro na, ọrhẹ ẹguọlọ ro vwo sefughwẹ ri Jehova o dje rẹn ọwan, ẹguọlọ re vwo kpahen Jehova ọrhẹ onyerẹnkugbe ọwan rhẹ ọye nọ gbanhanrhọ.—Rom. 8:38, 39.
18. Me yẹ eroro kodo kpahen udje i Jesu ono mwu ọwan ru?
18Ọwan e vwo omwemẹ ra na hẹrokele udje i Jesu. (1 Pet. 2:21) Uvwre ẹdẹ re suẹn riẹ ẹdẹ Ẹkarorhọ na, ọwan a tẹnrovi iyẹnrẹn i Baibol ri ta kpahen ikprughwre ri kẹta uvuẹn akpenyerẹn i Jesu, uhwuie, ọrhẹ ẹrhọmọnuhwuie. Uvuẹn owuọwọn Ẹkarorhọ na, ẹmro ra na haphia nọ karorhọ ọwan ẹguọlọ ri Jesu o vwo kpahen ọwan. (Eph. 5:2; 1 John 3:16) Ọke re se ji roro kodo kpahen udje ẹguọlọ ri Jesu o djephia, ne vwo omwemẹ re ne “ru lele oborẹ ọrana o ji ru.”—1 John 2:6.
19. Marhẹ ene ru daji uvuẹn ẹguọlọ i Jehova?
19Ne vwo omwemẹ ọgbogbanhon ra na daji uvuẹn ẹguọlọ i Jehova. (Jude 20, 21) Ọwan a daji uvuẹn ẹguọlọ Osolobrugwẹ ọke arha damoma huvwele yi, ruẹ odẹ ye fuan, ji ruẹ oma merhiẹn. (Prov. 27:11; Matt. 6:9; 1 John 5:3) Irueruo Ẹkarorhọ na, o mwu ọwan brorhiẹn re ne nyerẹn akpọ ọwan kẹdẹkẹdẹ izede ra ta rẹn Jehova, ‘Mi guọlọ daji uvuẹn ẹguọlọ ọnọ bẹmẹdẹ!’
20. Me yẹ iroro ri soriẹ o fo ne riẹ Ẹkarorhọ na?
20 Sẹ ene rhirhiẹ odjuwu yanghene uvuẹn otọrakpọ na bẹmẹdẹ, e vwo iroro ri soriẹ o fo ne riẹ Ẹkarorhọ na. Kẹgbukpe kẹgbukpe, ọke erhe koko uvuẹn ẹdẹ ọrana, ọwan a karorhọ uhwu ohworho re vwo ẹguọlọ kpahen, Jesu Kristi. Ọrọmai ghanren, ọwan a karorhọ irueruo ẹguọlọ rọmaido, nọyẹ ẹguọlọ ri Jehova o dje rẹn ọwan nyoma rọ ha i Jesu ruẹ otan. Ẹgbukpe ọnana, ene ruẹ Ẹkarorhọ na owuọwọn i Fraide, April 15, 2022. Ọwan i vwo ẹguọlọ kpahen Jehova ọrhẹ Jesu, omarana uvuẹn ẹdẹ re ne ruẹ Ẹkarorhọ na, o rhiẹ oborẹ ọghanranren omamọ ne riẹ ẹkwaphiẹrhotọre na.
IJORO 16 Kpẹmẹ i Jehova, ọ Ha i Jesu Mwu Ne
^ Udjoghwẹmro 5 Sẹ ifiẹrorhọ ọwan ọrẹ ene riẹ odjuwu yanghene rhirhiẹ otọrakpọ i paradais, ọwan e riẹ Ẹkarorhọ Uhwu i Jesu kẹgbukpe kẹgbukpe. Urhomu-ẹmro ọnana ọnọ ta kpahen iroro irhorhomu ri ha i Baibol na rọ soriẹ o fo ne riẹ Ẹkarorhọ na ọrhẹ oborẹ ene ru mẹrẹn erere.
^ Udjoghwẹmro 2 A rhian ẹmro enana rhẹ, “Ruẹ ọnana ọro karorhọ mẹ” (Today’s English Version) ọrhẹ “Ruẹ ọnana ha karorhọ mẹ” (The Jerusalem Bible).
^ Udjoghwẹmro 4 Wu rha guọlọ iyẹnrẹn erọrọ kpahen ọphọ ọkpokpọ na ọrhẹ ọphọ Uvie na, se urhomu-ẹmro na “You Will Become ‘a Kingdom of Priests’” uvuẹn Oghwa Odẹrẹ ọrẹ October 15, 2014, aruọbe 15-17.
^ Udjoghwẹmro 4 ẸMRO RE DJE FIOTỌRE: Ẹmro na era djẹha ri hẹrhẹre, o mevirhọ Ilele Kristi ra djẹha re ji nyerẹn uvuẹn otọrakpọ na.
^ Udjoghwẹmro 10 Wu rha guọlọ iyẹnrẹn erọrọ kpahen aruẹmẹrẹn orhan eva na rọ ha Ezekiel urhomu-ẹmro 37, se “Enọ rẹ Otu re se Ẹbe Ọwan i Nọren” rọ ha Oghwa Odẹrẹ ọrẹ July 2016.
