1-2. Ebẹnbẹn ego yẹ idibo i Jehova buebun ina sabu dẹrughwaroghwu?

 EKWAKWA ibiobiomu ina sabu wene akpenyerẹn ọwan kpregede. Jerẹ udje, omizu ọhworhare owu ro vwo atamwu re se Luis a nọ mẹrẹnvwrurhe taghene o vwo emiamo ikansa ọgbogbanhon. Idọkitọ ye nọ ta riẹn taghene ibiamo ezẹko ọvo yo no nyerẹn te. Monika ọrhẹ esa ye a dabu fiomarhọ ogame i Jehova kugbe. Ọrẹn ẹdẹ owu, Monika nọ mẹrẹnvwrurhe taghene esa ye ro rhiẹ ọkpako ukoko, o ruẹ ọdandan uvuẹn odjahen uvwre ẹgbukpe buebun ne. Olivia, ro rhiẹ omizu ọmase rọ vwọ ji rọnmọ, nọ kwa nẹ oghwa ye fọkiẹ ogiribo ọgbogbanhon rọ sa. Ọke rọ ghwẹrioma rhe, nọ mẹrẹnvwrurhe taghene ogiribo na ọ ghwọghọ oghwa ye ne. Uvwre ibiọke, akpenyerẹn imizu enana i wenerin ogege. Wu na sabu vwẹruọ erhirhiẹ aye i rhiẹromẹrẹn na? Wu rhiẹromẹrẹn erhirhiẹ obiobiomu ro wene akpenyerẹn ọnọ kpregede dẹ ne?

² Dedevwo ọwan idibo i Jehova, e ji rhiẹromẹrẹn ebẹnbẹn ọrhẹ emiamo sansan ra hobọte ituakpọ ephian. Habaye, ana sabu diẹn osehiẹn yanghene ẹkparehaso nẹ abọ ihworho ri vwo utuoma kpahen ọwan. Dedevwo Jehova o vwo simi ọwan nẹ aruẹ ebẹnbẹn erana-a, ọrẹn o veri taghene ọnọ ha userhumu rẹn ọwan. (Isa. 41:10) Nyoma userhumu ọnẹyen, ana sabu sẹrorẹ aghọghọ ọwan, brorhiẹn ri serhọ, ji vwo atamwu kpahiẹn uvwre erhirhiẹ ri mai gbanhon dede. Uvuẹn urhomu-ẹmro ọnana, ene yono kpahen izede ẹne ri Jehova o ru ha userhumu rẹn ọwan uvwrọke egbogbanhon. Ene ji  yono kpahen oborẹ ene ruo na sabu mẹrẹn erere nẹ userhumu ro tiobọnẹ.

JEHOVA ỌNỌ SẸRORUỌ

3. Me yọ nọ sabu bẹn rẹn ọwan re ne ruo erhe rhiẹromẹrẹn erhirhiẹ ọgbogbanhon?

³ Obẹnbẹn na. Erhe rhiẹromẹrẹn erhirhiẹ ọgbogbanhon, ọnọ sabu bẹn re ne roro ekwakwa fiotọre, ji brorhiẹn ri gbare. Mesoriẹ? Ana sabu ha erhirhiẹ omiamiamo. Ọfiamu ọnọ sabu lẹrhẹ ẹhẹn ọwan seriotọre. Ọnọ sabu họhọ taghene a nya vruẹ, e rhe oborẹ ene ruo-o. Djokarhọ oborẹ oma o ruẹ imizu emẹse awanva ra hunute vrẹn ne na. Olivia nọ tare: “Ọke ogiribo ọgbogbanhon na ọ ghwọghọ oghwa mẹ hin, mie rhe oborẹ mi ne ruo-o, ẹhẹn mẹ no seriotọre.” Monika nọ ta kpahen oborẹ esa ye o rurie: “Ẹhẹn mẹ ọ ghwai seriotọre ọvo-o. Nọ họhọre taghene a ha aphia bru mẹ. Nọ bẹn mi na wian ewian mia wian kẹdẹkẹdẹ bi. Oborẹ mi vwe roro rhọ yọ phia mẹ na.” Izede ọgo yi Jehova ono ru ha userhumu phia ọke ẹhẹn ọwan orho seriotọre?

4. Lele oborẹ ọ ha Philippians 4:​6, 7, me yi Jehova o ve rẹn ọwan?

⁴ Oborẹ i Jehova o ruẹ. Ọye o veri taghene ọnọ yẹ ọwan oborẹ i Baibol na o seri “ufuoma ọrẹ Osolobrugwẹ.” (Se Philippians 4:​6, 7.) Ufuoma ọnana o mevirhọ ẹhẹn ro totọre ọrhẹ omefuon ra riamerhiẹn fọkiẹ obọdẹn onyerẹnkugbe re vwori rhẹ Jehova. Ufuoma ọnana ọ “ghwẹ ọmẹrẹnvwrurhe ephian”; o rhomu ghwẹ oborẹ ana sabu rorie rhọ. Jerẹ udje, ẹhọn o totọre dẹ ne ọke wa ghwai nẹrhomo gbangbanhon vwe i Jehova hin? Ẹhẹn ro totọre ọrana yẹ “ufuoma ọrẹ Osolobrugwẹ.”

5. Marhẹ ufuoma Osolobrugwẹ o ru sun ọmudu ọrhẹ iroro ọwan?

⁵ Philippians 4:7 ọ ji ta taghene ufuoma Osolobrugwẹ ọnọ “sẹrorẹ ọmudu ọrhẹ oghwa iroro” ọnọ, yanghene simi aye. Ẹmro ra ha ruiruo sekpahen ọrẹ ana “sẹrorẹ” emru, yẹ ẹmro ra ha dje isodja ra sẹrorẹ amwa, ji simie nẹ abọ oghwọghọ. Ihworho re rhirhiẹ amwa ra sẹroriẹ na, a merhẹn ọrẹ omefuon fọkime aye i rheri taghene isodja i ha anurẹsẹ amwa na. Omaran ọ ji havwọ, ọke ufuoma Osolobrugwẹ ọrhọ sẹrorẹ ọmudu ọrhẹ iroro ọwan, ne vwo ẹhẹn ro totọre, fọkime e vwo obọdẹn omefuon. (Ps. 4:8) Jerẹ udje i Hannah, ọrhọ tobọ rhianẹ erhirhiẹ ọwan o wene ogege-e, ana ji sabu vwo ufuoma. (1 Sam. 1:​16-18) Ọgbọ buebun, erhe vwo ẹhẹn ro totọre, nọ phẹrẹ re ne roro ekwakwa fiotọre, ji brorhiẹn ri serhọ.

6. Me ya na sabu ru na mẹrẹn erere nẹ ufuoma Osolobrugwẹ? (Ni ifoto na.)

⁶ Oborẹ ofori ne ru. Wu rhe vwo obẹnbẹn, nekpẹn userhumu mie i Jehova. Izede  ọgo? Nẹrhomo bọmọke wu ne ki vwo ufuoma Osolobrugwẹ. (Luke 11:9; 1 Thess. 5:17) Luis, ra hunute vrẹn ne, o dje oborẹ ọ ha userhumu riẹn ọrhẹ aniẹ re se Ana, nyerẹn ghele erhirhiẹ na, ọke aye rhon taghene ibiamo ezẹko ọvo yo vwori no ki hwu. Luis nọ tare: “Uvuẹn aruẹ erhirhiẹ ọrana, ọ bẹn omamọ wu ne brorhiẹn sekpahen omesimo ọrhẹ ekwakwa erọrọ. Ọrẹn, ẹrhomo ọ ha userhumu rẹn ame omamọ uvwrọke ọgbogbanhon ọnana.” Luis ọrhẹ aniẹ i tare taghene aye i nẹrhomo omamọ ọgbọ buebun, ji rẹ i Jehova nọ yẹ aye ufuoma, ẹhẹn ro totọre, ọrhẹ ẹghwanren aye ine brorhiẹn ri gbare. Aye ni ghini mẹrẹn userhumu i Jehova. Orhianẹ wa dẹrughwaroghwẹ obẹnbẹn, fiomarhọ ẹrhomo ẹnẹ, ne wu na mẹrẹn oborẹ ufuoma i Jehova ọnọ sẹrorẹ ọmudu ọrhẹ iroro ọnọ lele.—Rom. 12:12.

JEHOVA ONO RUO GBANHON

7. Iroro ọgo ya na sabu vwo ọke erhe rhiẹromẹrẹn ọdamuni ọgbogbanhon?

⁷ Obẹnbẹn na. Arha dẹrughwaroghwẹ ọdamuni ọgbogbanhon, iroro ọrhẹ irueruo ọwan ọnọ sabu je serhọ jerẹ oborẹ ọ havwọ bi. Jerẹ oborẹ aphẹrẹ ọ kpare ọkuna nẹ ekete owu riẹ ọrọrọ, ọnọ sabu họhọ taghene aphẹrẹ ọ kpare ọwan nya sa nya rie. Ana, ra hunute vrẹn ne, nọ tare taghene o vwo aruẹ iroro sansan ọke esa ye Luis o hwu hin. Nọ tare: “Ọke mie roro taghene mie fiemru-u, ẹhẹn mẹ no seriotọre. Evwan no ji biomi mẹ taghene o hwuru.” Habaye, Ana no roro taghene ọye ọvo yọ havwiẹ, ẹhẹn yen nọ ji tagha fọkime ọye ọvo yo no brorhiẹn esa ye o bruẹ bi. Ọkezẹko, ọye o roro taghene ọ ha uvwre ogiribo uvuẹn urhie ọduado. Marhẹ i Jehova o ru ha userhumu rẹn ọwan ọke aruẹ iroro erana i rha vuọn ẹhẹn ọwan?

8. Jerẹ oborẹ ọ ha Isaiah 33:​6, imwẹro ọgo yi Jehova ọ yẹre ọwan?

⁸ Oborẹ i Jehova o ruẹ. Ọ yẹre ọwan imwẹro taghene ono ru ọwan gbanhon. (Se Isaiah 33:6.) Orhianẹ ọkuna ọ dẹrughwaroghwu ogiribo, no kpogho sa kpogho rie. Nọ sabu wọnrọn haso erhirhiẹ na, ikuna buebun i vwo oborẹ ọ sabu lẹrhẹ aye meviẹ gbanhan, rọ ha obohwẹre ọrhẹ obọrhe ọkuna na uvuẹn ame. Ekwakwa ra lẹrhiẹ meviẹ gbanhan, i vwa lẹrhẹ ọkuna na kpogho sa kpogho rie-e, nọ lẹrhẹ ẹhẹn ihworho ri ha ọkuna na dabu totọre, ji vwo omefuon. Ọrẹn, ekwakwa ra lẹrhẹ ọkuna meviẹ gbanhan na, a dabu rhe wian orhianẹ ọkuna na ọ ghwa riaro. Ọrẹ ohọhọme, Jehova ono ru ọwan gbanhon orhianẹ a fuevwan ruẹ riaro uvuẹn ọke ọdamuni.

9. Marhẹ ekwakwa ra ha guọlọ iyẹnrẹn fiotọre ono ru ha userhumu rẹn ọwan mevigbanhon? (Ni ifoto na.)

 ⁹ Oborẹ ofori ne ru. Arha dẹrughwaroghwẹ obẹnbẹn ọgbogbanhon, damoma rhe vwobọrhọ eghọn sansan uvuẹn ogame i Jehova. Itiọrurhomẹmro, wu sabu wian te oborẹ wa wian te bi-i, ọrẹn karorhọ taghene Jehova o roro rẹn ọwan. (Haye vwanvwọn Luke 21:​1-4.) Dabu kwaphiẹ ọke rhọ wu ne yoni Baibol na, ji roro kodo kpahiẹn uvuẹn uyono omobọ ọnọ. Mesoriẹ? Nyoma ukoko yi, Jehova ọ kwaphiẹ uyono eghoghanren rhọ ri na ha userhumu rẹn ọwan mevi gbanhon. Ne wu mẹrẹn oborẹ wu vi guọlọ, wu na sabu ha ekwakwa ra guọlọ iyẹnrẹn fiotọre ruiruo, orhianẹ wu vworie uvuẹn edjadjẹ ọnọ, jerẹ JW Library^® app, Watch Tower Publications Index, ọrhẹ Research Guide for Jehovah’s Witnesses. Monika, ra hunute vrẹn ne, nọ tare taghene ọye nọ yọ guọlọ urhebro nẹ ẹbe enana ọke iroro yi ọ tagha. Jerẹ udje, nọ guọlọ ukorẹmro na “ekwẹre.” Uvwrọke erọrọ, nọ guọlọ ẹmro na “ra rhẹ awan” yanghene “atamwu.” Ọye no seyi bọmọke ẹhẹn yen o ki totọre. Nọ tare: “Udu o bru mẹ ọke mia tonrhọ, ọrẹn ọke mie seyi nyarhẹn, nọ họhọre taghene Jehova ọ gbale mẹ boma. Ni mi mẹrẹnvwrurhe taghene Jehova o vwẹruọ ọsoso iroro mẹ sansan, ọ ji ha userhumu mẹ.” Aruẹ userhumu erana ro nẹ obẹ i Jehova rhe na, ọnọ ji sabu ha userhumu wẹn sẹrorẹ emevigbanhuọn bọmọke ẹhọn ono totọre.—Ps. 119:​143, 144.

JEHOVA ỌNỌ HOBỌTUA

10. Marhẹ oma ọnọ sabu ru ọwan ọke obẹnbẹn ọgbogbanhon ọrhọ phia hin?

¹⁰ Obẹnbẹn na. Ọke obẹnbẹn ọgbogbanhon ọrhọ phia rẹn ọwan, iroro ọrhẹ omẹgbanhon ọwan ọnọ sabu seriotọre. Ana sabu họhọ ohworho rọ zorhẹ omamọ rọ konron ro sele oghwẹ. Ọnọ sabu bẹn ra na wian ewian ra wian phẹphẹrẹ bi, yanghene omwemẹ ra na wian ewian erana ọnọ sabu nẹ ẹhẹn ọwan. Jerẹ Elijah, ana sabu nie taghene ọ bẹnren re ne vẹnrẹn. Ọwan i guọlọ ghwai merhẹn. (1 Ki. 19:​5-7) Me yi Jehova o veri taghene ono ru rẹn ọwan arha vwiẹlẹ?

11. Izede ọrọrọ ọgo yi Jehova o ru ha userhumu rẹn ọwan? (Psalm 94:18)

¹¹ Oborẹ i Jehova o ruẹ. O veri taghene ọnọ hobọtua ọwan. (Se Psalm 94:18.) Jerẹ oborẹ ohworho rọ zorhẹ rọ konron ọ guọlọ userhumu nọ sabu nya, ana ji guọlọ userhumu na sabu ruriaro uvuẹn ogame i  Jehova. Uvuẹn erhirhiẹ erana, Jehova ọ yẹ ọwan imwẹro: “Mẹmẹ ro rhiẹ i Jehova Osolobrugwẹ ọnọ, mia mọrọn obọrhe ọnọ, Mẹmẹ yẹ Ohworho rọ ta wẹn, ‘Wu vwa zofẹ-ẹn. Mi na yọ userhumu.’” (Isa. 41:13) Orodje David o rhiẹromẹrẹn userhumu ọnana. Ọke rọ dẹrughwaroghwu edamuni ọrhẹ evwreghrẹn yen, nọ ta rẹn Jehova: “Obọrhe ọnọ yọ hobọtua mẹ.” (Ps. 18:35) Ọrẹn, marhẹ i Jehova o ru tiobọnu userhumu ọnana?

12. Ayọmo yi Jehova ọnọ sabu ha yẹ ọwan userhumu arha vwiẹlẹ?

¹² Ọgbọ buebun, Jehova ọ hobọtua ọwan, nyoma ro mwu awọrọ ha userhumu rẹn ọwan. Jerẹ udje, uvwrọke owu ri David ọ vwiẹlẹ, ugbehian yen re se Jonathan nọ kọn bruie nọ yẹ ye omẹgbanhon ọrhẹ urhebro rọ guọlọre. (1 Sam. 23:​16, 17) Ọrẹ ohọhọme, Jehova ọ ji djẹ Elisha nọ ha userhumu ugboma rẹn Elijah. (1 Ki. 19:​16, 21; 2 Ki. 2:2) Inyenana, Jehova ọnọ sabu ha ekrun, igbehian, yanghene ekpako ukoko hobọtua ọwan. Ọrẹn, orhianẹ erhirhiẹ na ọdare ọwan omamọ, ana sabu vwo ẹhẹn re ne tiomaha. Ọwan ọvo i guọlọ ghwai rhirhiẹ ye kologho. Ọrana yẹ iroro re vwo. Me ya na sabu ru na mẹrẹn userhumu i Jehova?

13. Me yo fori ne ru na sabu mẹrẹn erere nẹ obẹhatua i Jehova? (Ni ifoto na.)

¹³ Oborẹ ofori ne ru. Wọnrọn haso ẹhẹn wu ne rhirhiẹ ye kologho. Arha kẹnoma rẹn awọrọ, a vwa rha dabu ni ekwakwa sua-a, ne roro kpahen oma ọwan ọvo ọrhẹ ebẹnbẹn re rhiẹromẹrẹn. Aruẹ iroro ọnana, ọnọ sabu hobọte orhienbro ọwan. (Prov. 18:1) Itiọrurhomẹmro, o vwo ọke ra guọlọ rhirhiẹ ye kologho, maido arha dẹrughwaroghwu erhirhiẹ re mwuofẹn. Ọrẹn, arha kẹnoma rẹn awọrọ uvwrọke jijiri, ana sabu tiẹn uphẹn ri Jehova ọnọ ha userhumu rẹn ọwan nyoma ihworho yi. Omarana, o vwo oborẹ erhirhiẹ na ọ gbanhon te-e, dede userhumu ekruon, igbehian ọrhẹ ekpako ukoko na. Ha ukẹro ro serhọ ni aye taghene aye ihworho ri Jehova ọ nyoma yen ha userhumu wẹn.—Prov. 17:17; Isa. 32:​1, 2.

JEHOVA ỌNỌ HA URHEBRO WẸN

14. Erhirhiẹ imwofẹn ego ya na sabu rhiẹromẹrẹn?

¹⁴ Obẹnbẹn na. Ana sabu dẹrughwaroghwu erhirhiẹ ri na lẹrhẹ ọwan zofẹn. Uvuẹn i Baibol na, idibo i Jehova ri fuevwan i tẹmro kpahen ọke aye a ha erhirhiẹ omiamiamo ọrhẹ ofẹn fọkiẹ evwreghrẹn aye kugbe ọhiẹn erọrọ. (Ps. 18:4; 55:​1, 5) Ọrẹ ohọhọme, ana sabu dẹrughwaroghwu  ẹkparehaso obẹ isukuru, obẹ iruo, nẹ abọ ekrun ọwan yanghene igọmẹti. Ofẹn ọnọ sabu mwu ọwan taghene emiamo re kpomẹ ọnọ suẹ uhwu rẹn ọwan. Uvwrọke ọrana, ẹhẹn ọwan ọnọ sabu seriotọre. Marhẹ i Jehova o ru ha userhumu rẹn ọwan uvuẹn aruẹ erhirhiẹ erana?

15. Imwẹro ọgo yẹ Psalm 94:19 ọ yẹre ọwan?

¹⁵ Oborẹ i Jehova o ruẹ. Ọ ha urhebro rẹn ọwan, ji ruẹ ọwan gbanhan. (Se Psalm 94:19.) Ọbe i psalm ọnana ọ lẹrhẹ ọwan roro kpahen ibiẹ ọgbọtọ rọ zofẹn fọkiẹ agbranran ọgbogbanhon ro lerie omerhẹn. Ana sabu roro kpahen ọsẹ ye ro brurie rhe, kpariẹ, ji mọriẹn bọmọke omerhẹn o ki suien. Dedevwo agbranran na ọ ji van, abọ ye ọsẹ ye ọ mọrọnren, ọ lẹrhẹ ẹhẹn yen totọre. Arha dẹrughwaroghwu edamuni re mwuofẹn, a ji guọlọ ni Jehova ọ mọrọn abọ ọwan bọmọke ene vwo omefuon. Marhẹ ene ru mẹrẹn aruẹ urhebro ọrana mie i Jehova?

16. Me ya na sabu ru na mẹrẹn erere nẹ urhebro i Jehova? (Ni ifoto na.)

¹⁶ Oborẹ ofori ne ru. Ghwọghọ ọke kugbe rhẹ Jehova kẹdẹkẹdẹ, nyoma wu na nẹrhomo vwe yi, ji se i Baibol na. (Ps. 77:​1, 12-14) Omarana, ọke wu rhe vwo ọfiamu, nu wa kiki zẹ bru i Jehova nọ yọ userhumu. Ta rẹn Jehova kpahen ofẹn ọrhẹ edamẹ enọ. Ha uphẹn riẹn nọ tẹmro wẹn ji yọ urhebro nyoma i Baibol na. (Ps. 119:28) Wu na mẹrẹnvwrurhe taghene wu rhe se eghwẹmro i Baibol na ezẹko, aye ina sabu yọ urhebro ọke ofẹn orho mwuo. Jerẹ udje, wu na sabu mẹrẹn urhebro uvuẹn ọbe i Job, Psalms, ọrhẹ Proverbs, kugbe ẹmro ri Jesu ọ tare uvuẹn Matthew urhomu-ẹmro 6. Ọke wa nẹrhomo vwe i Jehova, ji se i Baibol na, wu na mẹrẹn urhebro ro tiobọnẹ.

17. Imwẹro ọgo ya na sabu vwo?

¹⁷ Ana sabu vwo imwẹro taghene Jehova ọnọ ha userhumu rẹn ọwan uvuẹn ọke edamuni egbogbanhon. Ọ sẹrerhumuji ọwan vwo-o. (Ps. 23:4; 94:14) Jehova o veri taghene ono sun ọwan, ruẹ ọwan gbanhon, hobọtua ọwan jeghwai yẹ ọwan urhebro. Sekpahen Jehova, Isaiah 26:3 ọrhọ ta: “Wu na sẹrorẹ ihworho ri vi hẹrosuọ; wu na yẹ aye ufuoma ọke ephian, fọkime wẹwẹ yẹ aye i hẹroso.” Omarana, hẹroso i Jehova, rhiabọ ha userhumu ephian ro tiobọnẹ wẹn. Wu rhe ru te omaran, wu na rharhumu vwo omẹgbanhon uvwrọke edamuni egbogbanhon.