1. Me yọ ruẹ ẹhọn ọke we roro kpahen Jehova?

 WU HA ẹhẹn roro kpahen aruẹ ohworho ri Jehova ọ havwọ dẹ ne? Ọke wa tẹmro riẹn uvuẹn ẹrhomo, me we roro kpahan? Dedevwo ọwan i vwa mẹrẹn i Jehova-a, ọrẹn i Baibol na o djerie izede buebun. O se i Jehova “ọren ọrhẹ ikpọfia” kugbe “erhanren rọ bara gidigidi.” (Ps. 84:11; Heb. 12:29) Ọmẹraro Ezekiel o djerie taghene ọ họhọ atita i sapphire, emru ro lo jerẹ oro ọrhẹ idọlọ efuanfon, ọrhẹ aphoro oso. (Ezek. 1:​26-28) Aruẹ idjedje enana kpahen Jehova, ọnọ sabu gbe ọwan unu, yanghene lẹrhẹ ọwan roro taghene e mwuovwa-an.

2. Me yọ nọ sabu lẹrhẹ ihworho ezẹko je tikẹrẹ i Jehova?

² Fọkime ọwan i vwa mẹrẹn i Jehova-a, ọnọ sabu bẹn re ne vwo imwẹro taghene o vwo ẹguọlọ kpahen ọwan. Ihworho ezẹko e roro taghene Jehova ọ sabu vwo ẹguọlọ kpahen aye-e, fọkiẹ ekwakwa ri phia rẹn aye vrẹn ne. Ọkezẹko, aye vwo ọsẹ ro vwo ẹguọlọ kpahen aye-e. Jehova o vwẹruọ aruẹ iroro erana, ọrhẹ oborẹ ọ hobọte akpenyerẹn ọwan lele. Nọ sabu ha userhumu rẹn ọwan, no dje iruemru irhorhomu Enẹyen rhẹ Baibol na.

3. Mesoriẹ o fo ne yono kpahen ẹguọlọ i Jehova?

³ Ẹmro rọ mai dje i Jehova gba yẹ ẹguọlọ. (1 John 4:8) Jehova yẹ ẹguọlọ. Ọ hobọte kemru kemru ro ruẹ. Ẹguọlọ i Jehova ọ gbanhonron omamọ, o ji djeyi phia ghwologhwolo rẹn ihworho ri vwe vwo ẹguọlọ kpahiẹn. (Matt. 5:​44, 45) Uvuẹn urhomu-ẹmro ọnana, ene yono kpahen Jehova ọrhẹ ẹguọlọ ro djephia. Ọke erhe yono kpahen Jehova rhọ, ne vwo ẹguọlọ kpahiẹn rhọ.

 JEHOVA O VWO ẸGUỌLỌ KPAHEN ỌWAN OMAMỌ

4. Marhẹ oma o ruo kpahen ẹguọlọ okokodo i Jehova? (Ni ifoto na.)

⁴ ‘Jehova o dje ẹguọlọ okokodo phia.’ (Jas. 5:11) Uvuẹn i Baibol na, Jehova ọ ha omayen dje izu ro vwo ẹguọlọ. (Isa. 66:​12, 13) Ha ẹhẹn roro izu rọ dabu hẹrote ọmọyen ọmọvwerhe. Ọ dabu kpariẹ rhẹ agbadoghwẹ ye, ji tẹmro bọrọbọrọ rhẹ uvwele iruẹn riẹn. Ọke rọ viẹ yanghene ekete ọ miamiẹ, izu na nọ dabu hẹrote edamẹ yen. Ọke erhe vwo omiamiamo, ana sabu hẹroso ẹguọlọ i Jehova. Ọbo ijoro na ọrhọ ya: “Ọke ọfiamu ọ vuọn ẹhẹn mẹ, wu ha urhebro mẹ jeghwai ru mẹ gbanhon.”—Ps. 94:19.

5. Me yẹ ẹguọlọ atamwu i Jehova o mevirhọ wẹn?

⁵ Jehova o vwo atamwu. (Ps. 103:8) Ono ji rhe vwo ẹguọlọ kpahen ọwan dedevwo e ruẹ oborẹ ọ sọre. Ọgbọ buebun yẹ agbamwa Israel o ruẹ oborẹ o biomu evwan i Jehova; ọrẹn, o dje ẹguọlọ ye ro vwo sefughwẹ phia rẹn ihworho yi ri ghwẹriẹre rhẹ ẹmro enana: “Wu ghanranren uvuẹn ukẹro mẹ ne, e brọghọ rhọ oma ne, mi ji vwo ẹguọlọ kpahuọn ne.” (Isa. 43:​4, 5) Ẹguọlọ i Jehova o ji wene-e. Ana sabu hẹrosuiẹ ọke ephian. Arha tobọ ruẹ orusọ ọghwaghwa, Jehova ọ vwọ sẹrerhumuji ọwan vwo-o. Arha ghwẹriẹ ji rharhumu bru i Jehova, ana mẹrẹnvwrurhe taghene o ji vwo ẹguọlọ kpahen ọwan. O veri taghene “ọnọ harhomu izede ọduado.” (Isa. 55:7) Baibol na o dje ẹharhomu ọnana rhiẹ oborẹ ‘i Jehova ọ ha rhuọnrhuọn ọwan oma.’—Acts 3:19.

6. Me yẹ Zechariah 2:8 o yonirin ọwan kpahen Jehova?

⁶ Se Zechariah 2:8. Fọkime Jehova o vwo ẹguọlọ kpahen ọwan, nọ kiki djokarhọ iroro ọwan, ji vwo oruru rọ nọ sẹrorẹ ọwan. Oma ọ vwọ merhiẹn ẹhẹn ọwan orho seriotọre-e. Omarana, ana sabu nẹrhomo izede omana: “Sẹrorẹ mẹ jerẹ ọmẹro ọnọ.” (Ps. 17:8) Ukẹro na oghọn owu rọ ghanranren uvuẹn ugboma na. Omarana, ọke i Jehova ọ ha ọwan dje ọmẹro ọnẹyen, nọ họhọre taghene ọ ta, ‘Kohworho kohworho rọ ha ẹkuọn rẹn are, ihworho mẹ, ọ ha ẹkuọn rẹn oborẹ ọghanren mẹ.’

7. Mesoriẹ o fo ne ruẹ imwẹro ọwan kpahen ẹguọlọ i Jehova gbanhonrhọ?

⁷ Jehova ọ guọlọre ne wu vwo imwẹro  taghene o vwo ẹguọlọ kpahuọn. Ọrẹn, o rheri taghene fọkiẹ oborẹ wu rhiẹromẹrẹn vrẹn ne, wu na sabu rhe roro sẹ ọnọ ghini sabu vwo ẹguọlọ kpahuọn. Yanghene ana sabu rhe rhiẹromẹrẹn ebẹnbẹn ezẹko vwana, ra damu ẹruẹhaso re vwo kpahen ẹguọlọ i Jehova nẹ. Me yọ nọ lẹrhẹ ẹruẹhaso ọwan gbanhonrhọ? Jene yono oborẹ i Jehova o ru dje ẹguọlọ ye phia rẹn Jesu, era djẹha na ọrhẹ ọwan ephian.

OBORẸ I JEHOVA O RU DJE ẸGUỌLỌ YE PHIA

8. Mesoriẹ i Jesu o vwo imwẹro kpahen ẹguọlọ i Jehova?

⁸ Uvwre ẹgbukpe buebun re vwe rhe uchunuie, Jehova ọrhẹ Ọmọyen ro vwo ẹguọlọ kpahen, i vwo onyerẹnkugbe ra bọn kpahen ẹguọlọ okokodo. Onyerẹnkugbe aye yọ mai jiri ne uvuẹn ọsoso akpọ na. Jehova ọ dabu dje ẹguọlọ ye fiotọre rẹn Jesu, jerẹ oborẹ e seri uvuẹn Matthew 17:5. Manẹ i Jehova ọ ghwai sabu ta, ‘Ọnana ohworho mi djẹha.’ Ọrẹn, ọ guọlọre nẹ ọwan i rhe oborẹ o vwo ẹguọlọ kpahen Jesu kodo te, omarana no serie “Ọmọ mẹ mi vwo ẹguọlọ kpahen.” Oma ọ merhen i Jehova kpahen Jesu, maido ro vwo omwemẹ rọ nọ ha arhọ ye ze izobo. (Eph. 1:7) Habaye, Jesu o vwo ẹhẹn eveva kpahen ẹguọlọ ri Jehova o vwo kpahiẹ-ẹn. Jesu ọ dabu vwo imwẹro ọgbogbanhon kpahen ẹguọlọ i Jehova. Ọgbọ buebun, Jesu ọ tariẹ rhẹ imwẹro taghene Jehova o vwo ẹguọlọ kpahiẹn.—John 3:35; 10:17; 17:24.

9. Ẹmro ọgo yo dje ẹguọlọ i Jehova phia rẹn era djẹha na? Djeyi fiotọre. (Romans 5:5)

⁹ Jehova o ji dje ẹguọlọ ye phia rẹn era djẹha na. (Se Romans 5:5.) Djokarhọ ẹmro na ‘fi rhẹ ọmudu ọwan’ ra ha ruiruo. Ọbe owu ra rionbọrhọ, nọ ha ẹguọlọ i Jehova dje usurhẹn ame. Idjedje ọrana o ghini djeyi fiotọre taghene Jehova o vwo ẹguọlọ okokodo kpahen era djẹha na! Era djẹha na i rheri taghene “Osolobrugwẹ o vwo ẹguọlọ kpahen” aye. (Jude 1) Ọnyikọ John o dje kpahen iroro aye ọke rọ ya: “Ni oborẹ Ọsẹ na o vwo ẹguọlọ kpahen ame te, ọrẹ ene se ame emọ Osolobrugwẹ!” (1 John 3:1) Era djẹha na ọvo yi Jehova o vwo ẹguọlọ kpahen? Ẹjo, Jehova o dje ẹguọlọ ye phia rẹn ọwan ephian ne.

10. Izede ọghoghanren ọgo yi Jehova o ru dje ẹguọlọ phia wẹn?

¹⁰ Izede ọghoghanren ọgo yi Jehova o ru dje ẹguọlọ phia? Nyoma otan na—Jehova ọ nyoma yen dje ẹguọlọ okokodo phia! (John 3:16; Rom. 5:8) Jehova o tiobọnu Ọmọyen ọghoghanren, nyoma rọ ha uphẹn riẹn no hwu rẹn ituakpọ ephian, neneyo a sabu harhomu edandan ọwan, nẹ ọwan i ji rhiẹ igbehian Enẹyen. (1 John 4:10) Ọke re roro kodo kpahen oborẹ i Jehova ọrhẹ Jesu i ruru, ne vwẹruọ oborẹ aye i vwo ẹguọlọ kpahen owuowọnwan te. (Gal. 2:20) E tiobọnu otan na fọkime ọrana yẹ oborẹ orhienbro ọsoso i Jehova ọ guọlọre-e. O tiobọnie fọkiẹ ẹguọlọ. Jehova o dje ẹguọlọ ye phia nyoma rọ ha i Jesu ze izobo. Jehova ọ ha uphẹn rẹn Jesu nọ rioja ji hwu fọkiẹ ọwan.

11. Me ye yono nẹ Jeremiah 31:3?

¹¹ Jerẹ oborẹ e yono ne, Jehova ọ vwọ ghwai vwo ẹguọlọ-ọ, ọrẹn ọ dabu djeyi phia. (Se Jeremiah 31:3.) Jehova o tiri ọwan kẹrẹ omayen ne, fọkime o vwo ẹguọlọ kpahen ọwan. (Haye vwanvwọn Deuteronomy 7:​7, 8.) O vwo emru yanghene ohworho owuorowu rọ nọ sabu hẹriẹ ọwan nẹ ẹguọlọ ọrana-a. (Rom. 8:​38, 39) Marhẹ ẹguọlọ i Jehova ọ hobọto lele? Se Psalm 23, ne wu djokarhọ oborẹ ẹguọlọ i Jehova ọrhẹ ẹruete ọnẹyen ọ hobọte i David lele, ọrhẹ oborẹ ono ru hobọte ọwan ephian.

 MARHẸ ẸGUỌLỌ I JEHOVA Ọ HOBỌTO LELE?

12. Marhẹ wu na zẹ Psalm 23 koko lele?

¹² Se Psalm 23:​1-6. Psalm 23 ijoro ro dje imwẹro kpahen ẹguọlọ ọrhẹ ẹruete i Jehova phia. David, rọ ya i psalm ọnana, o dje kpahen onyerẹnkugbe kpẹnkpẹnkpẹn rọ ha uvwre ọye ọrhẹ Jehova ro Suien. David o vwo omefuon ọke rọ lẹrhẹ i Jehova suien, nọ ji dabu hẹrosuiẹ. David o rheri taghene ẹguọlọ i Jehova ono suien uvuẹn ọsoso akpenyerẹn yen. Me yọ lẹrheriẹ vwo aruẹ imwẹro ọnana?

13. Mesoriẹ i David o vwo imwẹro kpahen ẹruete i Jehova?

¹³ “Emru owuorowu ọ kanren mẹ-ẹ.” David o rheri taghene Jehova ọ hẹrote yi, fọkiẹ ekwakwa ro tiobọnẹ ọke ephian. David ọ ji riamerhen onyerẹnkugbe ọrhẹ ekwerhọ i Jehova. Ọrana yọ soriẹ o vwo imwẹro taghene o toro oborẹ ọ phiare-e, Jehova ọnọ rhọ hẹrote edamẹ yen ephian. David ọ hẹroso ẹguọlọ okokodo i Jehova, ji vwo imwẹro taghene ọ gbanhon ghwẹ ọfiamu ro vwori, ọrana nọ yẹriẹ omamerhomẹ ọrhẹ ẹhẹn otemẹ.—Ps. 16:11.

14. Izede ọgo yi Jehova o ru dabu hẹrote ọwan?

¹⁴ Jehova ọ dabu hẹrote ọwan, maido ọke ekwakwa ibiobiomu i rha phia. Ẹhẹn omizu ọmase owu re se Claire, a rọ gare ẹgbukpe rọ vrẹn 20 uvuẹn Oghọn Ukoko ne, no seriotọre ọke ekruien e rhiẹromẹrẹn ebẹnbẹn buebun. Ọsẹ ye no kpomu emiamo otọre, ne le omizie ọgbọtọ owu nẹ ukoko, eyi ekruien ọrhẹ oghwa aye nọ vare aye obọ. Marhẹ i Jehova o ru hẹrote aye? Claire nọ tare: “Jehova ọ dabu yẹ ekrun mẹ oborẹ aye i guọlọre kẹdẹkẹdẹ. Ọgbọ  buebun, oborẹ i Jehova ọ yẹre aye ọ ghwẹ oborẹ mi fiẹrorhọ! Ọke ephian mie roro kpahen ọke i Jehova o dje obọdẹn ẹguọlọ phia mẹ, ni mie vwo ọdaremẹro kpahiẹn. Ekwakwa enana mia karorhọ, ọ ha userhumu mẹ vwo edirin ọke edamuni.”

15. Mesoriẹ i David ọ rharhumu vwo omẹgbanhon? (Ni ifoto na.)

¹⁵ “Ọ lẹrhẹ ẹhẹn mẹ gogoviẹ.”  Ọkezẹko, ẹhẹn i David o seriotọre fọkiẹ ọsoso ebẹnbẹn ọrhẹ edamuni ro rhiẹromẹrẹn. (Ps. 18:​4-6) Ọrẹn, obọdẹn ẹguọlọ ọrhẹ ẹruete i Jehova nọ rhuọnrhuọn omayen. Jehova no sun ugbehian yen oma ọ ghwọghọre riẹ “ekete irhorhomu rẹ ẹbe i vuọnren” ọrhẹ “ekete ame ọ vuọnren.” Fọkiẹ ọrana, David nọ rharhumu vwo omẹgbanhon, rọ lẹrheriẹ rha ga i Jehova rhẹ aghọghọ.—Ps. 18:​28-32.

16. Izede ọgo yẹ ẹguọlọ i Jehova o ru yọ omẹgbanhon ne?

¹⁶ Omaran ọ ji havwọ inyenana, “fọkiẹ ẹguọlọ atamwu i Jehova yọ soriẹ ọwan e ji nyerẹn” ọke arha dẹrughwaroghwu edamuni ọrhẹ ebẹnbẹn akpọ. (Lam. 3:22; Col. 1:11) Roro kpahen udje i Rachel. Ẹhẹn yen o seriotọre ọke esa ye ọ nyajevwo, ji dobọ ogame i Jehova ji uvwrọke emiamo COVID-19 na. Me yi Jehova o ru rẹn Rachel? Nọ tare: “Jehova ọ dabu dje ẹguọlọ mẹ. Nọ yẹre mẹ igbehian ri ghwọghọ ọke kugbe rhẹ omẹmẹ, ri kpare emaren vwe mẹ, dje urhomu yanghene ikadi ri vwo ẹmro esiri vwe mẹ, leli mẹ chẹẹ, ji karorhọ mẹ taghene Jehova yọ hẹrote mẹ. Mia kpẹmẹ i Jehova ọke ephian rọ yẹ mẹ ekrun ọduado ro vwo ẹguọlọ.”

17. Mesoriẹ i David ọ vwọ ‘zofẹn ẹkuọn’?

¹⁷ “Mi zofẹn ẹkuọ-ọn, fọkime wẹwẹ ọrhẹ omẹmẹ i havwiẹ.” Ọgbọ buebun yẹ arhọ i David ọ ha erhirhiẹ imwofẹn, o ji vwo evwreghrẹn buebun ri gbanhonma. Ọrẹn, ẹguọlọ i Jehova ọ lẹrheriẹ vwo omefuon ọrhẹ usimi. David nọ mẹrẹnvwrurhe taghene Jehova rhẹ ọye i havwiẹ uvuẹn erhirhiẹ ephian, ọrana nọ yẹriẹ uduefigbere. Omarana, nọ sabu so: “[Jehova] o simirin mẹ nẹ ofẹn mẹ ephian.” (Ps. 34:4) David o ghini rhiẹromẹrẹn erhirhiẹ ri mwuofẹn; ọrẹn, ẹguọlọ i Jehova ọ gbanhon ghwẹ ofẹn yen.

18. Marhẹ imwẹro kpahen ẹguọlọ i Jehova ono ru ruo gbanhon ọke wa rha zofẹn?

¹⁸ Marhẹ imwẹro re vwori kpahen ẹguọlọ i Jehova o ru yẹ ọwan omẹgbanhon uvuẹn erhirhiẹ ri mwuofẹn? Ọkobaro owu re se  Susi, o dje oborẹ oma o rurie ọrhẹ esa ye, ọke ọmọ aye ọhworhare o surhe hwu, nọ tare: “Ekwakwa ibiobiomu i rha phia kpregede uvuẹn akpenyerẹn ọnọ, ọ hobọto omamọ te erhirhiẹ wu vwe rhe oborẹ wu ne ruo, nu we ji roro taghene ekwakwa ibiobiomu erọrọ ina phia. Ọrẹn, ẹguọlọ i Jehova ọ lẹrherẹ ame vwo omefuon ne.” Rachel, ra hunute vrẹn ne nọ tare: “Uvuẹn ason owu rẹ ẹhẹn mẹ o seriotọre omamọ, ofẹn o ji mwu mẹ, ni mi viẹ phia bru i Jehova. Uvuẹn ọke ọrana, mi mẹrẹnvwrurhe taghene ọ yẹre mẹ urhebro ọrhẹ omefuon, jerẹ oborẹ izu o ruẹ rẹn ọmọyen, omerhẹn no sunrun mẹ. Ẹdẹ ọrana ọ sẹre mẹ ẹro dẹ-ẹ.” Ọkpako owu re se Tasos, o rhirhiẹ ekanron te ẹgbukpe ẹne fọkime o kwe homaba owian isodja-a. Marhẹ o ru rhiẹromẹrẹn ẹguọlọ ọrhẹ ẹruete i Jehova? Tasos nọ tare: “Jehova ọ hẹrote edamẹ mẹ ephian ghwẹ oborẹ mi fiẹrorhọ. Ọnana no ruẹ imwẹro mẹ gbanhonrhọ taghene mi na sabu hẹrosuiẹ ọke ephian. Habaye, nyoma ẹhẹn ọfuanfon na, Jehova nọ yẹre mẹ aghọghọ udabọ erhirhiẹ ekanron na. Ọnana nọ yẹre mẹ imwẹro taghene mi rha hẹroso i Jehova, mi na mẹrẹn erere nẹ orhorhomu ọnẹyen. Omarana, ni mi tuẹn owian ọkobaro rhọ uvuẹn ekanron na.”

TIKẸRẸ I JEHOVA RO DJE ẸGUỌLỌ OKOKODO PHIA

19. (a) Marhẹ ẹguọlọ i Jehova kpahen ọwan ono ru hobọte oborẹ a nẹrhomo lele? (b) Idjedje ẹguọlọ i Jehova ọgo yọ vi hobọto ne? (Se ekpeti na “ Ẹmro ra Lẹrhẹ Ọwan Mẹrẹn Obọdẹn Ẹguọlọ i Jehova Vwrurhe.”)

¹⁹ Iyẹnrẹn imizu re yono kpahen na, i djephia taghene Jehova ro rhiẹ “Osolobrugwẹ ẹguọlọ,” rhẹ ọwan i havwiẹ! (2 Cor. 13:11) O vwo ọdamẹ kpahen ọwan owuowu. E vwo imwẹro taghene “ẹguọlọ atamwu i Jehova o kinhariẹ” ọwan. (Ps. 32:10) Erhe roro kodo kpahen oborẹ o dje ẹguọlọ ye phia ne, no no mwu ọwan ẹro taghene o nyerẹn, rọ nọ ji lẹrhẹ ọwan tikẹriẹ rhọ. Ana sabu nẹrhomo vwe yi, ji ta riẹn oborẹ ẹguọlọ ye ọ ghanren rẹn ọwan te. Ana sabu ta riẹn kpahen ebẹnbẹn ọwan ephian, rhẹ imwẹro na taghene ono vwẹruọ aye, ji ha userhumu phia.—Ps. 145:​18, 19.

20. Marhẹ ẹguọlọ i Jehova o ru ti ọwan kẹriẹ rhọ?

²⁰ Jerẹ oborẹ ọwan e siyẹ kẹrẹ erhanren ọke erinrin, ẹguọlọ i Jehova o ti ọwan kẹriẹ. Dedevwo ẹguọlọ i Jehova ọ gbanhonron, o ji kodo. Omarana, jenẹ oma ọ merhuọn fọkime i Jehova o vwo ẹguọlọ kpahuọn. Jenẹ ọwan i rhiabọ ha ẹguọlọ i Jehova nyoma ra na ta: “Mi vwo ẹguọlọ kpahen Jehova”!—Ps. 116:1.