1. Me ye ne ruo na lẹrhẹ oma merhen i Jehova?

 GBE rorie taghene ne wu yẹ ohworho wu vwo ẹguọlọ kpahen ẹghẹlẹ rọ dabu vwo erhumu, rọ nọ ji sabu ha ruiruo. Ọravwọ ọrhọ ha ukẹro sakamu ni ẹghẹlẹ na, oma ọ merhuọ-ọn! Ọrẹn, oma ọnọ merhuọn, ọravwọ ọrhọ ha ẹghẹlẹ na ruiruo, ji dje ọdaremẹro phia. Me ya haye ta? Jehova o tiobọnu Ọmọyen no hwu fọkiẹ ọwan. Itiọrurhomẹmro, oma ọnọ merhẹn i Jehova omamọ, erhe dje ọdaremẹro kpahen ẹghẹlẹ na ọrhẹ ẹguọlọ ro vwo kpahen ọwan, ro mwurien tiobọnu izobo otan na rẹn ọwan!—John 3:16; Rom. 5:​7, 8.

 2. Me ye ne yono kpahen uvuẹn urhomu-ẹmro ọnana?

² Ọrẹn orho ru, ana sabu rha ha ukẹro sakamu ni izobo otan na. Nọ nọ họhọ taghene a ha ukẹro sakamu ni ẹghẹlẹ Osolobrugwẹ o tiobọnu rẹn ọwan. Oma ọ merhenren ọwan taghene e vwo ẹghẹlẹ ọnana, ọrẹn o fo ne nie sakamu-u. Nẹ ọrana ọ jọ rhọ phia, no fori ne rhe dje ọdaremẹro kpahen oborẹ Jehova ọrhẹ i Jesu i ru rẹn ọwan ne. Urhomu-ẹmro ọnana ọnọ ha userhumu rẹn ọwan ruẹ omaran. Ene yono kpahen oborẹ e ru mẹrẹn erere nẹ izobo otan na vwana, ọrhẹ obaro na. Ene ji yono kpahen oborẹ ene ru dje ọdaremẹro kpahen ẹguọlọ i Jehova, maido uvwrọke re ne ruẹ Ẹkarorhọ Uhwu i Jesu.

EBRURHỌ RA MẸRẸN VWANA

 3. Izede ọgo ye ru mẹrẹn erere nẹ izobo otan na vwana?

³ Vwana, ọwan a mẹrẹn erere nẹ izobo otan i Jesu. Jerẹ  udje, Jehova ọ harhomu edandan ọwan fọkiẹ izobo otan na. Ọwan e mwuovwan ẹharhomu ọnẹye-en. Ọrẹn, ọ guọlọ harhomu ọwan. Ọbo ijoro na nọ tare: “O Jehova, wẹwẹ omamọ ohworho, wu ji mwuegbe wu na harhomu.”—Ps. 86:5; 103:​3, 10-13.

 4. Fọkiẹ ihworho ego yi Jehova o ruẹ ẹkwaphiẹrhotọre izobo otan na? (Luke 5:32; 1 Timothy 1:15)

⁴ Ihworho ezẹko ina sabu rhe roro taghene aye e mwuovwan ẹharhomu i Jehova-a. Itiọrurhomẹmro, e ghini mwuovwan ye-en. Ọnyikọ Paul o vwẹruọ ọnana, nọ tare, “mie ji mwuovwan re ne se mẹ ọnyikọ-ọ.” Nọ habaye: “Fọkiẹ ẹghẹlẹ ọphẹ Osolobrugwẹ yi me rhiẹ ohworho mi havwọ na.” (1 Cor. 15:​9, 10) Jehova ọnọ harhomu edandan ọwan arha ghwẹriẹ. Mesoriẹ? Fọkime o vwo ẹguọlọ kpahen ọwan. Omarana, we rhe roro taghene we mwuovwan ẹharhomu i Jehova-a, karorhọ taghene o ruẹ ẹkwaphiẹrhotọre izobo otan na fọkiẹ iruedandan ri ghwẹriẹre, orhiẹ eri vwa ghwẹriẹ-ẹ.—Se Luke 5:32; 1 Timothy 1:15.

 5. O fori ne roro taghene e mwuovwan arodọmẹ i Jehova? Djeyi fiotọre.

⁵ O fo ne roro taghene e mwuovwan arodọmẹ i Jehova, fọkime a ha uvuẹn ukoko na ẹgbukpe buebun ne-e. Itiọrurhomẹmro, Jehova ọ karorhọ ewian ra wian riẹn ne. (Heb. 6:10) Izobo otan Ọmọyen orhiẹ osẹkwa fọkiẹ ewian ra wian ne-e. Erhe roro taghene e mwuovwan arodọmẹ i Jehova o dje rẹn ọwan, nọyẹ a haye ta taghene Jesu o hwu fughwẹ.—Haye vwanvwọn Galatians 2:21.

 6. Mesoriẹ i Paul o fiomarhọ ogame i Jehova?

⁶ Paul o rheri taghene ọ sabu vwo arodọmẹ Osolobrugwẹ-ẹ. Orhiomaran, mesoriẹ o fiomarhọ ogame i Jehova? O ruẹ omaran nọ sabu dje ọdaremẹro phia rẹn i Jehova fọkiẹ ẹghẹlẹ esiri rode ọnẹyen. (Eph. 3:7) Jerẹ i Paul, ọwan a ga i Jehova rhẹ oruru na sabu djephia taghene e vwo ọdaremẹro kpahen arodọmẹ yen, ukperẹ ene djephia taghene e mwuovwan yen.

 7. Izede ọrọrọ ọgo ye ru mẹrẹn erere nẹ izobo otan na vwana? (Romans 5:1; James 2:23)

⁷ Izede ọrọrọ e ru mẹrẹn erere nẹ izobo otan na vwana, yẹ obọdẹn onyerẹnkugbe re vwori rhẹ i Jehova. a Jerẹ oborẹ e yonorin uvuẹn urhomu-ẹmro rọ vrẹnren, e vwe vwiẹ ohworho rhẹ obọdẹn onyerẹnkugbe rhẹ Osolobrugwẹ-ẹ. Ọrẹn fọkiẹ izobo otan na, ana sabu riamerhen “ufuoma rhẹ Osolobrugwẹ” ji tikẹriẹ.—Se Romans 5:1; James 2:23.

 8. Mesoriẹ o fo na kpẹmẹ i Jehova fọkiẹ uphẹn ẹrhomo ẹnẹ?

⁸ Ẹrhomo ẹnẹ ọghoghanren omamọ—fọkime o djephia taghene e vwo obọdẹn onyerẹnkugbe rhẹ i Jehova. Jehova o rhon ẹrhomo idibo yi ephian, sẹ ọrẹ aye i koko kugbe nẹ uvuẹn afiede yanghene ọrẹ omobọ. Erhe vwo ọfiamu, ẹrhomo ọnọ sabu yẹ ọwan ẹhẹn ro totọre, ọrẹn o ji vwo erere ọrọrọ ra na mẹrẹn. Ọnọ lẹrhẹ onyerẹnkugbe ọwan rhẹ i Jehova gbanhonrhọ. (Ps. 65:2; Jas. 4:8; 1 John 5:14) Ọke i Jesu ọ ha otọrakpọ, ọ nẹrhomo ọgbọ buebun fọkime o rheri taghene Jehova ọ kerhọ ye, o ji rhe taghene ẹrhomo ọnọ lẹrhẹ onyerẹnkugbe yi rhẹ Ọsẹ ye gbanhonrhọ. (Luke 5:16) Ọ merhoma omamọ taghene fọkiẹ izobo otan  i Jesu, ana sabu rhiẹ igbehian i Jehova ji nẹrhomo vwe yi!

EBRURHỌ RA NA MẸRẸN OBARO NA

 9. Marhẹ idibo i Jehova ri fuevwan ga ye ine ru mẹrẹn erere nẹ izobo otan na obaro?

⁹ Marhẹ idibo i Jehova ri fuevwan ga ye, ine ru mẹrẹn erere nẹ izobo otan na obaro? Jehova ọnọ yẹ aye arhọ i bẹmẹdẹ. Ihworho buebun e roro taghene a sabu nyerẹn bẹmẹdẹ-ẹ, fọkime o jiri ne rẹ ihworho e hwuẹ. Ọrẹn, ọhọre i Jehova yẹ ọrẹ ituakpọ ine nyerẹn bẹmẹdẹ. O vwo rhiẹ ọdandan Adam bi, manẹ ituakpọ i vwe roro omara-an. Jerẹ oborẹ ọ bẹnren re ne kwerhọ ye taghene ituakpọ ine nyerẹn bẹmẹdẹ—omaran ọ ji bẹn rẹn i Jehova ọke ro tiobọnu Ọmọyen ọghoghanren, no hwu harẹn ọwan.—Rom. 8:32.

10. Me yẹ era djẹha ọrhẹ igegede ereva na i fiẹrorhọ obaro na?

¹⁰ Dedevwo obaro na ye ne vwo arhọ i bẹmẹdẹ, ọrẹn Jehova ọ guọlọre ne roro kpahiẹn vwana. Era djẹha ni riẹ odjuwu e fiẹrorhọ ọke aye ine leli Kristi sun otọrakpọ na. (Rev. 20:6) Igegede ereva na e fiẹrorhọ ọke aye ine rhirhiẹ otọrakpọ rọ dẹrẹrhiẹ i paradais ne, ro vwo vwo omiamiamo ọrhẹ ojẹriọ. (Rev. 21:​3, 4) Wu ha usuẹn igegede ereva na re fiẹrorhọ ọke aye ine nyerẹn bẹmẹdẹ uvuẹn otọrakpọ na? Ebrurhọ ọrana ọ ji ghanren omamọ! Ọnana oborẹ ituakpọ ephian i guọlọre. Akpenyerẹn uvuẹn otọrakpọ na ọnọ lẹrhẹ oma merhen ọwan omamọ.

11-12. Ebrurhọ ego ye fiẹrorhọ taghene ana mẹrẹn uvuẹn i Paradais obaro na? (Ji ni ifoto na.)

¹¹ Roro kpahen oborẹ akpenyerẹn ono rhirhiẹ wẹn uvuẹn i Paradais. Wu rhe brudu taghene wu ne kpomu yanghene hwu-u. (Isa. 25:8; 33:24) Jehova ono ruẹ edamẹ ihworho ephian rẹn aye. Me wu guọlọ yono kpahen ọke ọrana? Efen? Ewawọ? Ijoro? Gbinẹ oborẹ e sin ekwakwa? Karorhọ taghene uvuẹn paradais, ana guọlọ userhumu ihworho re sin  eghwa, era bọn ebanbọn ọrhẹ eghwẹrẹ. Habaye, ana ji guọlọ userhumu ihworho ri na wian owian erufon, emaren esere, eri ne ruẹ ekwakwa ra ha wian, ọrhẹ eri na hẹrote otọre na. (Isa. 35:1; 65:21) Ọke ọrana, wu na sabu yono ena ephian wu guọlọre, fọkime wu ne nyerẹn bẹmẹdẹ.

¹² Ono rhiẹ emru aghọghọ re ne dede ihworho ra rhọmọnuhwu! (Acts 24:15) Ji roro kpahen oborẹ oma ono ruo, ọke wu ne yono kpahen i Jehova rhọ nyoma emama sansan. (Ps. 104:24; Isa. 11:9) Ọrọ mai merhoma, ana sabu ga i Jehova vabọ ẹhẹn iborhin! Wu na fọkiẹ akpẹriọ “ọdandan ibiọke krẹn” kpare ebrurhọ enana fughwẹ? (Heb. 11:25) Ẹjo! O toro izobo re zeri vwana-a, a vioja ye-e, fọkime ene vwo ebrurhọ obaro na. Karorhọ taghene otọrakpọ na ọnọ dẹrẹrhiẹ Paradais phẹrẹkpẹ. Ibiọke ọvo yọ hẹrhẹre bọmọke ọnọ ki phia. O vwo rhiẹ ẹguọlọ i Jehova ọrhẹ izobo otan i Jesu, manẹ e vwe vwo ebrurhọ enana-a!

DJE ỌDAREMẸRO PHIA FỌKIẸ ẸGUỌLỌ I JEHOVA

13. Marhẹ ene ru dje ọdaremẹro phia rẹn i Jehova fọkiẹ ẹguọlọ ye? (2 Corinthians 6:1)

¹³ Marhẹ ene ru dje ọdaremẹro phia rẹn i Jehova fọkiẹ izobo otan i Jesu? Nyoma ra na ha owian yen karo uvuẹn akpenyerẹn ọwan. (Matt. 6:33) Erhe rorie, Jesu o hwuru neneyo “ihworho re nyerẹn, i je rhe nyerẹn rẹn oma aye ghwomaran, ukpomaran aye ne nyerẹn rẹn ohworho ro hwu rẹn aye, ra ji rhọmọnuhwu.” (2 Cor. 5:15) Itiọrurhomẹmro, ọnana o djephia taghene e vwo ọdaremẹro kpahen ẹghẹlẹ esiri rode ọnẹyen ọrhẹ oborẹ o ru rẹ ọwan ne.—Se 2 Corinthians 6:1.

14. Marhẹ ene ru hẹroso i Jehova ji nyalele ọkpọvi ro tiobọnu?

¹⁴ Ana ji sabu dje ọdaremẹro phia rẹn i Jehova nyoma ra na hẹrosuiẹ ji nyalele ọkpọvi ro tiobọnu. Izede ọgo? Arha guọlọ brorhiẹn ro sekpahen oborẹ ene riẹ isukuru kodo te, yanghene aruẹ owian ra na wian, ene vi roro kpahen ukẹro ri Jehova ọ ha ni erhirhiẹ na. (1 Cor. 10:31; 2 Cor. 5:7) Erhe brorhiẹn ri djephia taghene a hẹroso i Jehova—onyerẹnkugbe ọwan rhẹ ọye nọ nọ gbanhonrhọ, omaran ji te esegburhomẹmro ọwan. Ifiẹrorhọ ọwan no no mwẹro.—Rom. 5:​3-5; Jas. 2:​21, 22.

15. Marhẹ ene ru dje ọdaremẹro phia uvwrọke Ẹkarorhọ Uhwu i Jesu?

¹⁵ O ji vwo izede ọrọrọ re ne dje ekpẹmẹ phia rẹn i Jehova fọkiẹ ẹguọlọ ye. Ọrana yẹ ọrẹ ene dje ọdaremẹro phia riẹn fọkiẹ izobo otan na uvwrọke Ẹkarorhọ Uhwu i Jesu. Haba ọrẹ ene mwuegbe hẹrhẹ Ẹkarorhọ Uhwu i Jesu, ana ji sabu ha use rẹn awọrọ nẹ aye i rhe. (1 Tim. 2:4) Dje rẹn aye oborẹ ene ruo  ọke re ruẹ irueruo na. Wu na sabu dje ividio enana rẹn aye uvuẹn jw.org Mesoriẹ i Jesu o Hwu? ọrhẹ Karorhọ Uhwu i Jesu. O fori nẹ ekpako ukoko i damoma ha use rẹn ihworho furhiemu. Roro kpahen aghọghọ ro no rhirhiẹ odjuwu ọrhẹ otọrakpọ na, igegede i Jehova ezẹko ri vruru i rha ghwẹrioma rhe! (Luke 15:​4-7) Ọke re ruẹ Ẹkarorhọ Uhwu i Jesu, jena damoma mroma owuowọnwan maido ihworho ekpokpọ yanghene eri vwa ji rhe uvwrọke jijiri. O fori na dabu dede aye, nẹ ẹhẹn aye ọ sabu totọre!—Rom. 12:13.

16. Mesoriẹ o fo ne fiomarhọ owian aghwoghwo na uvwrọke Ẹkarorhọ Uhwu i Jesu?

¹⁶ Wu na sabu fiomarhọ ogame i Jehova vuọnvuọn uvwrọke Ẹkarorhọ Uhwu i Jesu? Ọnana izede ọghoghanren owu wu ne ru dje ọdaremẹro phia fọkiẹ oborẹ Osolobrugwẹ ọrhẹ Kristi i ru rẹn ọwan ne. Erhe fiomarhọ ogame i Jehova vuọnvuọn, na na mẹrẹn obẹhatua ye, imwẹro re vwo kpahiẹn nọ nọ ji gbanhonrhọ. (1 Cor. 3:9) Habaye, ji damoma se isese i Baibol Ẹkarorhọ Uhwu i Jesu rọ ha uvuẹn ọbe na, Ni Eyaya Ọfuanfon na so Kẹdẹkẹdẹ, yanghene ọrọ ha uvuẹn ọbe-owian uyono. Wu na sabu brorhiẹn wu na ha ekete i Baibol erana ruẹ uyono omobọ.

17. Me yọ lẹrhẹ oma merhen i Jehova? (Ji se ekpeti na “ Oborẹ Ene ru Dje Ọdaremẹro Phia Fọkiẹ Ẹguọlọ i Jehova.”)

¹⁷ Ọkezẹko fọkiẹ erhirhiẹ ọnọ, wu sabu nyalele irorẹdjẹ ephian ri ha uvuẹn urhomu-ẹmro ọnana-a. Ọrẹn, karorhọ taghene Jehova ọ mẹrẹn ọmuduo, o ji vwo ọdamẹ kpahen oborẹ wu na sabu ru; ọ vwọ ha vwanvwọn awọrọ-ọ. Wu rhe dje ọdaremẹro phia fọkiẹ ẹghẹlẹ otan na ro tiobọnu wẹn, ọrana ọ lẹrhẹ oma merhiẹn.—1 Sam. 16:7; Mark 12:​41-44.

18. Mesoriẹ o fo ne dje ọdaremẹro phia rẹn i Jehova ọrhẹ Jesu Kristi?

¹⁸ Fọkiẹ izobo otan na, ana sabu ha edandan ọwan harhomu ọwan, rhiẹ ugbehian i Jehova, ji vwo ifiẹrorhọ re ne nyerẹn bẹmẹdẹ. Jenẹ erhe dje ọdaremẹro phia rẹn i Jehova fọkiẹ ẹguọlọ ye, ro mwurien tiobọnu ebrurhọ enana rẹn ọwan. (1 John 4:19) Habaye, jene ji dje ọdaremẹro phia rẹn i Jesu ro vwo ẹguọlọ kpahen ọwan te erhirhiẹ ro hwu fọkiẹ ọwan!—John 15:13.