“ORHỌ na ọ doro, ọrẹn, ihworho ra wian yen e bu-un. Omarana, are i gba rẹ Onini ọrẹ orhọ na no dje ihworho ya wian uvuẹn orhọ ye.” (Luke 10:2) Ẹmro ọnana ri Jesu ọ tare emrẹ ẹgbukpe 2,000 ri vrẹnren na, ọ dabu dje erhirhiẹ ri Myanmar ọ havwọ inyenana. Mesoriẹ? Uvuẹn i Myanmar, emrẹ ighwoghwẹmro 4,200 ọvo ye ghwoghwo iyẹnrẹn esiri na rẹn ihworho ri bun te iduduru 55.

Ọrẹn, Jehova ro rhiẹ “Onini ọrẹ orhọ na” ọ hobọte imizu buebun ri nẹ ẹkwotọre sansan rhe, nẹ aye i riẹ i Myanmar ya ha userhumu phia. Me yọ lẹrherẹ aye kwa nẹ ẹkwotọre aye? Me yọ ha userhumu rẹn aye kwa riẹ i Myanmar? Ebrurhọ ego yẹ aye a mẹrẹn? Jenẹ a tẹmro kpahiẹn.

Ẹgbukpe ezẹko ri vrẹnren na, Kazuhiro ro rhiẹ ọkobaro uvuẹn i Japan, no kpomu emiamo re hwuẹ so rhẹ amwa, no dophie na ji kpariẹ riẹ ihọsipita. Idọkitọ nọ ta riẹn taghene ọ vwọ ghwa imoto uvwre ẹgbukpe eva-a. Ọnana no gbe i Kazuhiro unu. No roro, ‘Marhẹ mi ne ru sabu wian owian ọkobaro mi vwo ẹguọlọ kpahen na?’ Nọ nẹrhomo vwe i Jehova, nọ rẹ riẹ taghene ọ ha userhumu riẹn sabu rha ga ẹrhẹ ọkobaro.

Kazuhiro nọ tare: “Ọke ubiamo owu ọ vrẹn, ugbehian mẹ rọ ga uvuẹn i Myanmar no rhon oborẹ ọ phia mẹ na. No seri mẹ uvuẹn ifonu, nọ ta mẹ: ‘Ibọsu ya mai ha ruiruo uvuẹn i Myanmar. Wu rha rhiẹ obonẹ, wu na sabu rhe riẹ aghwoghwo, gbobọhiẹn imoto ọnọ!’ Ni mi nọ idọkitọ na sẹ mi na sabu riẹ i Myanmar udabọ erhirhiẹ mi havwọ na. No gberi mẹ unu ọke idọkitọ na ọ ta mẹ: ‘Idọkitọ owu ro rhirhiẹ i Myanmar rọ tẹn ona aphẹrhiẹn esimo, ọ ha i Japan vwana. Mi ne djeyi wẹn. Emiamuọ na ọrhọ rharhumu tonrhọ, ọnọ hẹroto.’ Ni mi nirien taghene Jehova ọ nyoma idọkitọ na kpahenrhọ ẹrhomo mẹ ne.”

Ogege, Kazuhiro no dje urhomu vwe oghọn ukoko i Myanmar taghene ọye ọrhẹ aniẹ i guọlọ ya ga ẹrhẹ ekobaro avwaye. Emrẹ ẹdọke isionrin ọvo, oghọn ukoko na nọ kpahenrhọ urhomu aye, na ta riẹn, “Mọ, ame i tobọ guọlọ ekobaro buebun!” Kazuhiro ọrhẹ aniẹ re se i Mari, ni rhẹ imoto aye, aye ni dẹ ẹbe ọrhẹ itikẹti rẹ aye ina ha ruẹ ẹropleni. Vwana, aye i kwomakugbe ukoko idienrhọ rọ ha uvuẹn i  Mandalay, oma ọ ji merhen aye. Kazuhiro nọ tare: “Emru ọnana ọ lẹrhẹ esegburhomẹmro ame kpahen ive Osolobrugwẹ uvuẹn i Psalm 37:5 gbanhonrhọ ne, rọ tare: ‘Ghorien edamẹ enọ vwe i Jehova, ne wu hẹrosuiẹ, ọye nẹ ọnọ kpahenrhọ ha wẹn.’”

Uvuẹn ẹgbukpe 2014, Iseri Jehova ni ruẹ omẹvwa oghẹnrensan owu uvuẹn i Myanmar. Ihworho buebun i nẹ ẹkwotọre erọrọ rhe. Owuọwan usuẹn aye re se Monique, ro rhiẹ omizu ọmase rọ ha ẹgbukpe 34 ro rhirhiẹ United States, nọ tare: “Ọke mie nẹ omẹvwa na rhe, ni mi nẹrhomo vwe i Jehova kpahen idjaghwẹ ro fori mi kpare uvuẹn akpenyerẹn mẹ. Ni mi ji lele eri vwiẹre mẹ ta kpahiẹn. Aye ni nirien taghene o fori ni mi riẹ i Myanmar, ọrẹn, ọ ha ibiọke ọrhẹ ẹrhomo buebun mi ki sabu brorhiẹn ọrana.” Mesoriẹ? Monique nọ ta riaro rhọ.

“Jesu ọ ha urhebro rẹn idibo yi nẹ aye i ‘siyẹ roro kpahen uchunu igho ro no mwuẹ emru nẹ aye i ki ruie.’ Omarana, ni mi nọ omamẹ: ‘Mi vwo igho ro no te mẹ kwa riẹ i Myanmar? Mi na sabu hẹrote omamẹ oboran rhẹ ibiẹ igho?’ Ni mi mẹrẹnvwrurhe taghene mie vwo igho ro no te mẹ kwa riẹ i Myanma-ar.” Ọrẹn, marhẹ i Monique o ru sabu kwa?—Luke 14:28.

Monique nọ tare: “Ẹdukwẹdẹ, ohworho mia wian riẹn nọ ta mẹ taghene mi ma mẹriẹn. Ofẹn o kiki mwu mẹ nime mie roro taghene ene le mẹ nẹ iruo. Ukpomaran, nọ kpẹmeren mẹ fọkiẹ omamọ owian mẹ. Ọ ta mẹ taghene ono fi ba igho mẹ, igho na nọ ghwai te ha mẹ kwa riẹ Myanmar!”

Monique ọ ga uvuẹn i Myanmar avwẹ i December 2014. Marhẹ oma o ruie kpahen owian aghwoghwo na oboran? Nọ tare: “Oma ọ merhen mẹ taghene mi ha aran. Mia ha i Baibol na yono ihworho awansa. Owu usuẹn aye ọ ha ẹgbukpe 67. Ọke ephian yọ dabu ha ughwaro sasasa mroma mẹ jeghwai gbale mẹ. Ọke o yono taghene odẹ Osolobrugwẹ i Jehova, nọ viẹ. Ọmase na nọ tare: ‘Ọnana yẹ ọke ọrukaro mie tu rhon taghene odẹ Osolobrugwẹ i Jehova. Mi djerhiruo seri omamọ, ọrẹn wu yonirin mẹ oborẹ ọ mai ghanren kparobọ.’ Emru ọnana nọ ji lẹrhe mẹ viẹ. Erhe rhiẹromẹrẹn aruẹ ekwakwa enana uvuẹn ekete ra ha userhumu phia, ọ lẹrhẹ oma merhen ọwan.” Ro vwo ji jiri na, Monique no vwo uphẹn ro riẹ Isukuru Ighwoghwẹmro Uvie na.

Emru ọrọrọ rọ lẹrhẹ ihworho ezẹko rhiẹ i Myanmar, yẹ iyẹnrẹn rọ ha i 2013 Yearbook of Jehovah’s Witnesses ro sekpahen i Myanmar. Omizu ọmase owu rọ ghwẹ ẹgbukpe 30 ne re se Li o rhirhiẹ Asia. Dedevwo o vwo iruo, ọrẹn iyẹnrẹn rọ ha i Yearbook na nọ lẹrheriẹ ya ga uvuẹn i Myanmar. Li nọ tare: “Ọke mie riẹ omẹvwa oghẹnrensan obẹ i Yangon uvuẹn ẹgbukpe 2014, ni mi mẹrẹn esa ọrhẹ ane owu ra ha userhumu phia uvuẹn obọrẹ a djẹ edjadjẹ i Chinese uvuẹn i Myanmar. Nime mi rhe oborẹ a djẹ edjadjẹ i Chinese, ni mi kwa riẹ i Myanmar ya ha userhumu phia. Ni mi kwomakugbe i Monique, ame awanva ni kwa riẹ i Mandalay. Jehova ọ ha ebrurhọ rẹn ame nyoma o ruie nẹ ame i sabu mẹrẹn iruo ibiọke uvuẹn isukuru owu, ame ni ji mẹrẹn oghwa kẹrẹ avwaye. Udabọ aruọke ọdjedjẹrẹ ọrhẹ erhirhiẹ erọrọ, oma ọ ji merhen mẹ. Ihworho ri ha uvuẹn i Myanmar e nyerẹn akpọ ọlolọhọ, ọrẹn aye ihworho dẹndẹn ra dabu kerhọ iyẹnrẹn esiri na. O rhiẹ emru omamerhomẹ taghene i Jehova ọ lẹrhẹ owian na riaro rhọ. Mi vwo imwẹro taghene ọhọre i Jehova yẹ ọrẹ mi na kwa riẹ i Mandalay.”

Ihworho buebun ra ga uvuẹn ekete ra mai guọlọ userhumu i rhiẹromẹrẹn omẹgbanhon ẹrhomo ẹnẹ. Jerẹ udje, roro kpahen i Jumpei rọ ha ẹgbukpe 37 ọrhẹ Nao ro rhiẹ aniẹ rọ ha ẹgbukpe 35. Aye a ga bi uvuẹn ukoko idienrhọ owu obẹ i Japan. Mesoriẹ aye  a kwa riẹ i Myanmar? Jumpei nọ tare: “Mẹmẹ ọrhẹ ane mẹ i bru ẹkẹ te oma, rẹ ame ine riẹ ẹkwotọre ọrọrọ ya userhumu phia. Omizu ọhworhare owu rọ ha ukoko ame, nọ kwa riẹ i Myanmar. Dedevwo ibiẹ igho ọvo yẹ ame i sabu koko ne, ọrẹn, ame ni kwa riẹ i Myanmar uvuẹn i May 2010. Imizu ri ha uvuẹn i Myanmar i dabu rhiabọ dede ame!” Me yi Jumpei o rorori kpahen okegbe idienrhọ na uvuẹn i Myanmar? Nọ tare: “Aye i vwo omamerhomẹ omamọ. Ame i rhe dje ividio idienrhọ rẹn aye, oma nọ merhen aye. Oma ọ merhen ame taghene ame i kwa rhiẹ aran!”

Marhẹ yi Jumpei ọrhẹ i Nao i ru fi ebẹnbẹn igho kparobọ? Aye ni tare: “Ọke ẹgbukpe esa a vrẹn, ame erhe vwo igho rẹ ame ina kwosa oghwa ẹgbukpe rọ ha kpahiẹ-ẹn, fọkime igho ame ọ joma hin ne. Mẹmẹ ọrhẹ ane mẹ i nẹrhomo ọgbọ buebun. Damudiri, oghọn ukoko no dje ileta vwe ame, nẹ ame i rhiẹ ekobaro oghẹnrensan ibiọke! Ame i hẹrosuẹ i Jehova, omarana ọ sẹrerhumuji ame-e. Jehova ọ hẹrote ame ọke ephian.” Ro vwo ji jiri na, Jumpei ọrhẹ Nao ni riẹ Isukuru Ighwoghwẹmro Uvie na.

Me yọ lẹrhẹ omizu ọhworhare re se Simone ro rhiẹ onyẹ Italy rọ ha ẹgbukpe 43 ọrhẹ aniẹ re se Anna ro rhiẹ onyẹ i New Zealand, rọ ha ẹgbukpe 37 kwa riẹ i Myanmar? Anna nọ tare: “Iyẹnrẹn rọ ha i 2013 Yearbook ro sekpahen i Myanmar, yọ lẹrherẹ ame brorhiẹn ọrana!” Simone nọ ta riaro rhọ: “Ọkpẹ uphẹn yẹ ame i vwori na. Akpenyerẹn uvuẹn i Myanmar ọ lọhọre, omarana ni mia sabu vwo ọke wian owian i Jehova. O rhiẹ emru omamerhomẹ re ne rhiẹromẹrẹn oborẹ i Jehova ọ hẹrote ihworho ra ga uvuẹn ekete ra mai guọlọ userhumu.” (Ps. 121:5) Anna nọ tare: “Mia ji mẹrẹn aruẹ omamerhomẹ ọnana dẹ-ẹ. Nime ame e nyerẹn akpọ rọ lọhọre. Mie ji lele esa mẹ ghwọghọ ọke rhẹ oma, ọnana nọ lẹrhẹ onyerẹnkugbe ame kpẹnkpẹnrhọ. Ame i ji vwo obọdẹn igbehian. Ihworho na e vwo utuoma kpahen Iseri Jehova-a, habaye, aye i vwo omamerhomẹ kpahen iyẹnrẹn esiri na omamọ!” Izede ego?

Anna nọ tare: “Ẹdukwẹdẹ, mi ghwoghwo rẹn ọgbọtọ owu uvuẹn eyi ro riẹ isukuru ọduado, ni mi ruẹ ẹkwaphiẹrhotọre mi na rharhumu bruie. Ọke mie bruie, nọ ha ugbehian yen owu lele oma. Ọke mia rharhumu bruie ọgbọrọrọ, igbehian yen erọrọ ni kwomakugbe yi. Ọke oru, igbehian yen erọrọ ni ji homaba ye. Vwana, mie lele aye awan isionrin yono i Baibol na.” Simone nọ tare: “Ihworho ri ha uvuẹn ekete ame e ghwoghwo i guọlọ yono rhọ, aye jẹ emamọ ihworho. Buebun aye i vwo omamerhomẹ. Omarana, ọke o vwo rho te rẹn ame sabu yono aye ephia-an.”

Ọrẹn, idjaghwẹ ego yẹ ohworho ọnọ kpare no ki brorhiẹn rọ nọ yọ ga obẹ i Myanmar? Mizuho ro nẹ i Japan rhe nọ tare: “Mẹmẹ ọrhẹ esa mẹ re se Sachio i djẹ iroro rẹ ame ina ya ga uvuẹn ekete ra mai guọlọ userhumu, ọrẹn, bọgọ yẹ ame ina nya? Ọke ame e se iyẹnrẹn rọ ha i 2013 Yearbook ro sekpahen i  Myanmar hin, ame ne roro sẹ ame i riẹ i Myanmar.” Sachio nọ habaye: “Ame ni brorhiẹn ame ina ye kiẹn i Yangon ro rhiẹ esiri amwa i Myanmar uvwre ọkprughwre owu, neneyo ame i sabu rhe oborẹ ẹkwotọre na ọ havwọ. Onya ọrana nọ lẹrheriẹ mwu ame ẹro taghene o fori nẹ ame i kwa riẹ i Myanmar.”

Rodney ọrhẹ aniẹ re se i Jane ri vrẹn ẹgbukpe 50 ne ri nẹ Australia rhe, kugbe emọ aye ọhworhare ọrhẹ ọgbọtọ re se Jordan ọrhẹ Danica, a ga uvuẹn i Myanmar avwẹ ẹgbukpe 2010. Rodney nọ tare: “Ame i mẹrẹnvwrurhe taghene ihworho na i vwo omwemẹ rẹ aye ine yono kpahen Osolobrugwẹ. Mi jiririẹ harẹn ekrun erọrọ nẹ aye i ya ga uvuẹn ekete jerẹ i Myanmar.” Mesoriẹ? “Fọkime ọ lẹrhẹ ekrun ame ti kẹrẹ i Jehova rhọ ne! Ifonu, imoto, iruo ọrhẹ ekwakwa erọrọ ya ha ọke iphuphẹn buebun. Ọrẹn, emọ ame e yono eghwẹmro ekpokpọ rẹ aye ina sabu ha ruiruo uvuẹn aghwoghwo na. Aye a damoma yono kpahen oborẹ aye ine ru sabu ghwoghwo rẹn ihworho ọrhẹ oborẹ aye ine ru sabu kpahenrhọ enọ uvuẹn iyono ukoko, habaye, aye e ji fiomarhọ ekwakwa erọrọ uvuẹn ogame i Jehova.”

Oliver ro rhiẹ omizu ọhworhare rọ ha ẹgbukpe 37, ro nẹ United States rhe, nọ tare: “Nime mia ga i Jehova uvuẹn amwa ọrọrọ, mi sabu mẹrẹn ebrurhọ buebun ne. Mi sabu ruẹ imwẹro ọrhẹ esegburhomẹmro mẹ kpahen i Jehova gbanhonrhọ uvuẹn erhirhiẹ ephian ne. Nime mie lele imizu mi vwe rhe bi ga kugbe, mi ma mẹrẹnvwrurhe ne taghene o vwo emru owuorowu uvuẹn akpọ na, rọ ghanren te Uvie Osolobrugwẹ-ẹ.” Inyenana, Oliver ọrhẹ aniẹ re se Anna a ga i Jehova vuọnvuọn uvuẹn okegbe ra djẹ edjadjẹ i Chinese.

Trazel ro rhiẹ omizu ọmase rọ ha ẹgbukpe 52 ro nẹ Australia rhe, ọ ga uvuẹn i Myanmar avwẹ ẹgbukpẹ 2004. Nọ tare: “Mi jiririe rẹn ihworho ri vwo uphẹn na, nẹ aye i ya ga uvuẹn ekete ra mai guọlọ userhumu. Mi mẹrẹnvwrurhe ne taghene wu rhe vwo omwemẹ wu na ga i Jehova, ọnọ ha ebrurhọ wẹn. Mia menemena yen bi taghene mi ne nyerẹn aruẹ akpọ ọnana-a. Ọ vuọnren rhẹ evwẹnvuọn, ọnana oborẹ mi vi guọlọ.”

Jenẹ ẹmro ihworho ra ga uvuẹn ekete ra mai guọlọ userhumu uvuẹn i Myanmar, lẹrhuọ vwo omwemẹ wu na ha userhumu rẹn ihworho uvuẹn ekete re vwe kiki ghwoghwo te. Itiọrurhomẹmro, imizu ra ga avwaye a ha use phia, “Biko, are i rhiẹ i Myanmar ma ha userhumu rẹn ame!”