ỌKE i Jesu o yono idibo yi oborẹ aye ine ghwoghwo lele, nọ ta rẹn aye taghene orhiẹ ihworho ephian yi ne rhiabọ dede iyẹnrẹn esiri Uvie na-a. (Luke 10:3, 5, 6) Uvuẹn owian aghwoghwo na, a ji mẹrẹn ihworho ra kparehasuẹ ọwan jeghwai ta erharhere ẹmro kpahen ọwan. Omarana, aruẹ iruemru enana nọ lẹrhiẹ bẹn ra na sẹrorẹ arodọmẹ re vwo kpahen ihworho re ghwoghwo riẹn.

Ohworho arodọmẹ ọ mẹrẹn ọdamẹ ọrhẹ ebẹnbẹn awọrọ vwrurhe, aro aye nọ dọn yen, omarana no vwo omwemẹ rọ nọ ha userhumu rẹn aye. Ọrẹn, orhianẹ arodọmẹ re vwo kpahen ihworho re ghwoghwo riẹn o seriotọre, ọnọ sabu lẹrhẹ oruru ọrhẹ ona re vwori uvuẹn owian aghwoghwo na ji seriotọre. Obọreva ye, erhe vwo arodọmẹ kpahen ihworho, oruru ọwan kpahen owian aghwoghwo na nọ nọ gbanhonrhọ, nọ nọ họhọ ọke re rhie ikrasin rhẹ erhanren!—1 Thess. 5:19.

Marhẹ ene ru sabu dje arodọmẹ phia ọrhọ tobọ bẹn re ne ru omaran? Jenẹ a tẹmro kpahen ihworho awansa ra na sabu hẹrokele—Jehova, Jesu ọrhẹ ọnyikọ Paul.

Jehova o vwo edirin kpahen erharhere ẹmro ra ta kpahen odẹ ye uvwre ẹgbukpe buebun ne. Udabọ ọrana, ọye o dje “uruemru esiri phia rẹn ihworho re vwe dje ekpẹmẹ phia ọrhẹ evwọkon na.” (Luke 6:35) A mẹrẹn uruemru esiri ọnẹyen uvuẹn erhionrin ro djephia. Jehova ọ guọlọre nẹ “aruẹ ihworho ephian” i vwo usimi. (1 Tim. 2:3, 4) Dedevwo Osolobrugwẹ o vwo utuoma kpahen ọkon, o nẹ ituakpọ ghanghanren, omarana, ọ guọlọ nẹ aye i ghwọghọ fughwẹ-ẹ.—2 Pet. 3:9.

Jehova o rheri taghene Echu ọ phiẹ ihworho buebun rhọ inyenana. (2 Cor. 4:3, 4) Nime e yono ihworho buebun iyono efian ọrhẹ erharhere iruemru nẹ ọke emọvwerhe, nọ bẹn rẹ aye ina sabu rhiabọ dede urhomẹmro na. Jehova o vwo omwemẹ rọ nọ ha userhumu rẹn ihworho enana. Marhẹ e ru rhe ọnana?

Roro kpahen ukẹro ri Jehova ọ ha ni itu i Nineveh. Udabọ orharhere uruemru aye, Jehova nọ ta rẹn i Jonah: “O fo ne mi dje arodọmẹ phia rẹn amwa ọduado na Nineveh, ro vwo eranmo buebun ọrhẹ ihworho ri bun ghwẹ 120,000, ri vwe rhe ovẹnẹ rọ ha uvwre oborẹ ọgbare ọrhẹ oborẹ ọsọre?” (Jonah 4:11) Jehova o rheri taghene itu i Nineveh na e rhe kpahiẹ-ẹn, omarana, fọkiẹ arodọmẹ ro vwori, no dje i Jonah ya ha orhetio rẹn aye.

Jerẹ i Jehova, ọwan a ji ha ukẹro ọghoghanren ni ihworho. Ana sabu hẹrokelie nyoma re ne vwo omwemẹ ra na ha userhumu rẹn aruẹ ihworho ephian ọrhọ tobọ rhianẹ aye a guọlọ kerhọ-ọ.

 Ihworho arha kpahenrhọ owian aghwoghwo na-a, o fori ne rhe oborẹ ọsoriẹ aye a tiẹn jeghwai nọ oma ọwan oborẹ ọ lẹrherẹ aye kpahenrhọ ye omaran. Ezẹko ina sabu ha ikẹro ri sọre ni Baibol na yanghene Iseri Jehova fọkiẹ orharhere uruemru rẹ ihworho ra gemai ruẹ taghene aye Ilele Kristi e djephia. Ọkezẹko, a mọrenfian rẹn awọrọ ne kpahen oborẹ ọwan i vwo esegburhomẹmro kpahen. Awọrọ e roro taghene aye i rhe rhiabọ dede ọwan, ana sabu ha aye djechẹẹ.

Ezẹko rẹ oma aye ọ vwọ sasa te, i vwa kpahanrhọ ye fọkiẹ erhirhiẹ aye-e. Imishọnari owu re se i Kim, nọ tare: “Uvuẹn ekete ezẹko uvuẹn okegbe ame, ihworho buebun i rhiẹromẹrẹn uvweri ne, enyerẹn aye ọ ji va aye obọ ne. Aye e vwo aruefirhọ owuorowu kpahen obaro na-a. Ẹhẹn aye o seriotọre omamọ, omarana, nọ bẹn rẹ aye ina hẹrosuẹ awọrọ. Uvuẹn aruẹ ekete erana, ihworho a kparahasuẹ ame omamọ. Uvuẹn erhirhiẹ owu, ne gidiri mẹ uvuẹn owian aghwoghwo na.”

Marhẹ i Kim o ru sẹrorẹ uruemru arodọmẹ ro vwori? Nọ tare: “Erhe gidi me, ni mia damoma karorhọ ẹmro i Proverbs 19:11, rọ tare: ‘Ọmẹrẹnvwrurhe onyakpọ ọ vwọ lẹrhiẹ kiki tuekwẹre-e.’ Nime mi karorhọ oborẹ ọ phia rẹn ihworho erana bi ne, ni mia sabu dje arodọmẹ rẹn aye. Itiọrurhomẹmro, orhiẹ aye ephian ya kparahasuẹ ame-e. Uvuẹn okegbe ọrana, ame i ji vwo emamọ ẹrharhumu bru ezẹko.”

Ana sabu nọ ọma ọwan, ‘Orhianẹ mẹmẹ yi ha erhirhiẹ ihworho mie ghwoghwo riẹn na, marhẹ mi na kpahenrhọ iyẹnrẹn esiri Uvie na?’ Jerẹ udje, me wu ne ruo orhianẹ a mọrenfian kpahen Iseri Jehova wẹn ne? O vwo ẹfro-o, wu na ji kparehasuẹ owian aghwoghwo na jeghwai guọlọ arodọmẹ. Arha karorhọ ẹmro i Jesu taghene kemru kemru ra guọlọre ne ru rẹn ọwan ye ne ji ru rẹn awọrọ, ọnana ono mwu ọwan dje arodọmẹ phia ọrhọ tobọ rhianẹ ọ bẹnren.—Matt. 7:12.

Ọnyikọ Paul o dje arodọmẹ rẹn ihworho ri kparehasuiẹ. Mesoriẹ? Fọkime ọ karorhọ oborẹ ọ phia riẹn vrẹn ne. Paul nọ tare: “Mẹmẹ ohworho rọ raphiẹ ihworho, ọrọ kparehaso ihworho, rọ jeghwai kparoma vẹrhẹ bi. Ọrẹn e dje arodọmẹ mẹ ne, nime, mie rhe te-e, mia jeghwai vwo esegburhomẹmro-o.” (1 Tim. 1:13) Ọ mẹrẹnvwrurhe taghene Jehova ọrhẹ i Jesu i dje arodọmẹ ọduado riẹn. Itiọrurhomẹmro, ọ mẹrẹnvwrurhe taghene oborẹ o ru vrẹn ne, yẹ ihworho erana e ji ruẹ.

Paul ọ ji dẹrughwaroghwẹ iyono efian rẹ ihworho i tigban ne. Me yo ruru uvuẹn erhirhiẹ erana? Acts 17:16 nọ tare taghene ọke i Paul ọ  ha i Athens, “no turien oma omamọ ọke rọ mẹriẹn taghene amwa na ọ vuọnren rhẹ ema.” Ọrẹn, Paul nọ ha ekwakwa enana ri turien oma na tuẹn aghwoghwo ro mwidjẹn rhọ. (Acts 17:22, 23) No ruẹ ena aghwoghwo yi serhọ rhẹ erhirhiẹ ihworho na, neneyo ọ “sabu simi aye ọrẹ kizede kizede.”—1 Cor. 9:20-23

Ana sabu hẹrokele i Paul nyoma ra na mẹrẹn iruemru yanghene iyono esọsọ vwrurhe jeghwai ha ona ghwoghwo “iyẹnrẹn esiri kpahen oborẹ orhomurun.” (Isa. 52:7) Omizu ọmase owu re se i Dorothy, nọ tare: “Uvuẹn okogho ame, e yono ihworho buebun taghene Osolobrugwẹ ọ ha ihworho guẹnzọn jeghwai djoma omamọ. Omarana, mi rha kpẹmẹ aruẹ ihworho enana fọkiẹ esegburhomẹmro aye kpahen Osolobrugwẹ, ni mie dje emamọ iruemru ri Jehova o vwori ri Baibol na ọ ta kpahen ọrhẹ ive Osolobrugwẹ kpahen obaro na rẹn aye.”

O ji fo ne roro kpahen oborẹ ene ru ha urhebro rẹn imizu ukoko na. Jessica nọ tare: “Owuọwan usuẹn ame orho rhiẹromẹrẹn ẹkparehaso, mi vwa ta kpahiẹn pha-an. Ukpomaran, ni mia tẹmro kpahen erere ame a mẹrẹn nẹ owian aghwoghwo na udabọ ẹkparehaso.”

Jehova o rhe ebẹnbẹn ra dẹrughwaroghwẹ uvuẹn owian aghwoghwo na. Oma ọ merhiẹn orhianẹ a hẹrokelie dje arodọmẹ phia! (Luke 6:36) Itiọrurhomẹmro, Jehova ọ vwọ samọ gbe arodọmẹ phia bẹmẹdẹ-ẹ. O mwurun ọwan ẹro taghene o rhe ọke ro serhọ rọ nọ ha enyerakpọ ọnana toba. Ọrẹn, bọmọke ono ruẹ ọrana, owian aghwoghwo na ọrẹ okpakpa. (2 Tim. 4:2) Omarana, jenẹ a rha wian owian aghwoghwo na rhẹ oruru ne ji rhe gbe arodọmẹ rẹn “aruẹ ihworho ephian.”