Imwẹro o djerie phia taghene Jesu o rhiẹ Orherẹn ọduado ọke ro bromarhame uvuẹn ẹgbukpe 29 C.E. Marhẹ e ru rhe ọnana? Ọke i Jesu o bromarhame, no djephia taghene o vwo omwemẹ rọ nọ ha arhọ ye ze izobo uvuẹn agbarha izobo ra ha dje “ọhọre” Osolobrugwẹ. (Gal. 1:4; Heb. 10:5-10) Ra mẹriẹn taghene agbarha ọnana ọ havwiẹ avwọke i Jesu o bromarhame rhe na, ọkezẹko oghwa ẹga rode ọrẹ Osolobrugwẹ ro mevirhọ ẹkwaphiẹrhotọre ogame rọ fonron ra harẹn i Jehova, ra bọn kpahen izobo otan i Jesu, ọ ji homaphia ọke ọrana. Agbarha na o mevirhọ emru kirighwo uvuẹn oghwa ẹga Osolobrugwẹ ọrana.—Matt. 3:16, 17; Heb. 5:4-6.

Ra mẹriẹn taghene oghwa ẹga rode ọrẹ Osolobrugwẹ ọ havwiẹ ne na, a guọlọ orherẹn ọduado rọ nọ wian uvuien. Na djẹ i Jesu no rhiẹ orherẹn ọduado na nyoma “ẹhẹn ọfuanfon ọrhẹ omẹgbanhon.” (Acts 10:37, 38; Mark 1:9-11) Ọrẹn, marhẹ ono ru mwu ọwan ẹro taghene a ghini ha i Jesu mwu no rhiẹ Orherẹn Ọduado bọmọke ọke uhwu ọrhẹ ẹrhọmọnuhwu ọnẹyen? Udje Aaron ọrhẹ irherẹn erọrọ ra ha mwu ni rhiẹ irherẹn eduado uvuẹn otọre Urhi Moses, ina ha userhumu rẹn ọwan kpahenrhọ onọ ọrana.

Jerẹ oborẹ Urhi na o djephia, orherẹn ọduado na ọvo yọ nọ sabu ruẹ Ekete rọ Mai Fon uvuẹn i tabernacle na, ọrhẹ Ekete rọ Mai Fon uvuẹn oghwa ẹga na. Ikọtini yo fie ovẹnẹ rhẹ uvwre ekete eva enana. Uvuẹn Ẹdẹ Omephorho na ọvo yẹ Orherẹn ọduado na ọ sabu nyavrẹn ikọtini ọrana. (Heb. 9:1-3, 6, 7) Jerẹ oborẹ a ha Aaron ọrhẹ irherẹn erọrọ mwu ẹrhẹ irherẹn vwẹre, bọmọke aye a ki nyavrẹn “ikọtini” rọ kẹta uvuẹn tabernacle na, a ji ha i Jesu mwu no rhiẹ Orherẹn Ọduado ọrẹ oghwa ẹga Osolobrugwẹ rode na vwẹre bọmọke o ki hwu, ọke oru nọ nyavrẹn “ikọtini na, nọyẹ ugboma yen,” no riẹ odjuwu. (Heb. 10:20) Fọkiẹ ọnana, ọnyikọ Paul nọ tare taghene Jesu ọ sa jerẹ “orherẹn ọduado,” nọ nọ nyavrẹn “oghwọgbọ ọduado ra vwa ha abọ ru na, rọ ji gba omamọ” nọyẹ “odjuwu.”—Heb. 9:11, 24.

O vwo ovẹnẹ uvwre ọke ra ha ọphọ ọkpokpọ na mwu ọrhẹ ọke ra tuẹn ẹha ye ruiruo rhọ-ọ. Mesoriẹ? Ọke i Jesu o riẹ odjuwu ji ha arhọ ọgbagba ye kpahontọre rẹn ọwan, nọ kpare udjoghwẹ ọrukaro rọ nọ lẹrhiẹ ha ọphọ ọkpokpọ na mwu. Omaran yo ji ru na ki sabu tuẹn ọphọ ọkpokpọ na ẹha ruiruo rhọ. Idjaghwẹ ego ya na kpare na ki sabu ruẹ ọnana?

Ọrukaro, Jesu ọ kiki homaphia obaro i Jehova; ọke oru, Jesu nọ ha ọghanronmẹ izobo otan ye kpahontọre rẹn i Jehova; obẹtaye, Jehova no rhiabọ dede izobo otan ọgbagba i Jesu. E ruẹ ekwakwa enana vwẹre bọmọke a ki tuẹn ọphọ ọkpokpọ na ẹha ruiruo rhọ.

Baibol na ọ ta rẹn ọwan ọke ri Jehova o rhiabọ dede izobo otan i Jesu-u. Omarana, a sabu rionbọrhọ ọke owu ra ha ọphọ ọkpokpọ na mwu, ji tuẹn ẹha ye ruiruo rhọ-ọ. Ọrẹn, e rheri taghene Jesu o riẹ odjuwu ẹdẹ ikpe bọmọke ẹdẹ i Pentecost o ki te. (Acts 1:3) Uvwre ọke ọrana, Jesu nọ ha ọghanronmẹ izobo otan ye kpahontọre rẹn Jehova, Jehova no ji rhiabọ dedie. (Heb. 9:12) A mẹrẹn oka ọnana vwrurhe uvuẹn ẹdẹ i Pentecost. (Acts 2:1-4, 32, 33) Nẹ ọke ọrana rhe, na tuẹn ọphọ ọkpokpọ na ẹha ruiruo rhọ.

Ọrẹ ẹzẹkoko, a ha ọphọ ọkpokpọ na mwu ji tuẹn ẹha ye ruiruo rhọ, ọke i Jehova o rhiabọ dede ọghanronmẹ izobo otan i Jesu. Nẹ ọke ọrana rhe, na tuẹn ọphọ ọkpokpọ na ẹha ruiruo rhọ, Jesu no ji rhiẹ Orherẹn Ọduado na, ọye no ji rhiẹ Ohworho Erhẹrhẹ uvwre ọwan ọrhẹ i Jehova.—Heb. 7:25; 8:1-3, 6; 9:13-15.