E vwiẹre mẹ uvuẹn St. Paul, Minnesota, U.S.A., uvuẹn ẹgbukpe 1954, eri vwiẹre mẹ e riẹ ishọshi Catholic, aye e vwo igho bu-un. Mẹmẹ yẹ ọmọ ọreva usuẹn emọ awan isionrin. Ọke mia kamu mi riẹ isukuru Catholic, mẹmẹ ya ha userhumu rẹn orherẹn na. Ọrẹn, ibiẹ irherhe i Baibol ọvo yi mi vwori. Dedevwo mi vwo imwẹro taghene o vwo Osolobrugwẹ rọ ma ekwakwa ephian, ọrẹn mie vwo imwẹro kpahen ishọshi na-a.

Uvwre ẹgbukpe ọrukaro uvuẹn isukuru re se William Mitchell College of Law, Iseri Jehova ni rhiẹ oghwa mẹ. Ọke ọrana, mia fọnrhọn ewun mẹ, esa ọrhẹ ane na ni tare taghene aye ina rharhumu bru mẹ rhe. Ọke aye a rhe, ni mi nọren aye enọ eva: “Mesoriẹ evwọkon e fiẹkparobọ uvuẹn akpọ na ghwẹ emamọ ihworho?” ọrhẹ “Marhẹ ihworho ine ru sabu vwo obọdẹn omamerhomẹ?” Aye ni yẹre mẹ ọbe na The Truth That Leads to Eternal Life ọrhẹ New World Translation of the Holy Scriptures, ro vwo ugbuko rọ dabu rhoma omamọ. Ni mi ji kwe nẹ aye i ha uyono i Baibol mwu mẹ. Ọnana ọ ghini lẹrhe mẹ rhe ekwakwa buebun. Oma ọ merhenren  mẹ ọke aye a ta mẹ taghene Uvie Osolobrugwẹ yẹ usun ra mai guọlọ rọ nọ hẹrote edamẹ ituakpọ uvuẹn otọrakpọ na. Mi mẹrẹnvwrurhe ne taghene usun ufiuvwele ituakpọ o sefughwẹ ne, habaye ọ ji lẹrhẹ omiamiamo, ojẹriọ, osehiẹn ọrhẹ omemwurhọ vuọn akpọ na.

Mi homakpahontọre rẹn Jehova uvuẹn ọtonrhọ ẹgbukpe 1982, ji bromarhame uvuẹn ẹgbukpe ọrana uvuẹn Omẹvwa ro vwo urhomu-ẹmro na “Kingdom Truth,” re ruru uvuẹn aghwẹlẹ ọduado rọ ha St. Paul. Ọkprughwre rọ ha kpahiẹn, ni mi rharhumu riẹ aghwẹlẹ ọduado na ne mi sabu ya ọdamuni rọ nọ lẹrhe mẹ rhiẹ ilọya. Uvuẹn ubiamo October, na ta mẹ taghene mi vrẹn ọdamuni na, rọ lẹrhere mẹ mwuovwan mi ne rhiẹ ilọya.

Uvuẹn Omẹvwa ọrẹ “Kingdom Truth” na, ni mi mẹrẹn Mike Richardson, rọ wian uvuẹn Oghọn Ukoko rọ ha Brooklyn, Mike nọ ta mẹ taghene a ha Awuiruo rọ Hẹrote Ẹmro Urhi mwu obẹ esiri ukoko ne. Ni mi karorhọ ẹmro onyẹ Ethiopia rọ wian uvuẹn oghwa orodje na, ra ye rhẹ Acts 8:36, ni mi ji nọ oma mẹ, ‘Me yọ nọ lẹrhe mẹ ja homakpahontọre mi na wian uvuẹn Awuiruo ọnana?’ Omarana, ni mi fiobọrhọ ifọmu ra ga uvuẹn Oghọn Ukoko.

Evwan ọ merhen eri vwiẹre mẹ taghene mẹmẹ Oseri Jehova-a. Ọsẹ mẹ nọ nọren mẹ sẹ owian mẹ uvuẹn oghọn ukoko, ọnọ lẹrhẹ mẹ sabu ha owian ilọya mẹ ruiruo. Ni mi ta riẹn taghene mi na rha homakpahontọre wian. Mi ta riẹn taghene $75 ọvo ya na rha yẹ mẹ kibiamo kibiamo mi na hẹrote oma mẹ.

Ọke mie ruẹ kemru kemru ra guọlọ mie mẹ uvuẹn oghwa ẹghware na hin, ni mi tuẹn ogame rhọ obẹ Brooklyn, New York, uvuẹn ẹgbukpe 1984. Na ta mẹ taghene mi wian uvuẹn Awuiruo rọ Hẹrote Ẹmro Urhi. Ọnana ọ ghini lẹrhe mẹ mwuegbe hẹrhẹ oborẹ ọ sa obaro na.

Na dẹ ekete ra ha nughe re se Stanley rọ ha uvuẹn amwa re se Jersey City, New Jersey, uvuẹn November 1983. Imizu ukoko na ni ta rẹn igọmẹti nẹ aye i kwenu rẹn aye, neneyo aye i sabu rharhumu ruẹ ikpẹ ọrhẹ ekwakwa ra kpare ame uvuẹn ekete na. Ọke imizu na a mẹrẹn era kobaro uvuẹn igọmẹti na, aye ni ta rẹn aye taghene aye i guọlọ ha oghwa na ruẹ aghwẹlẹ omẹvwa. Ọrẹn, ọrana ọ lọhọ-ọ. Fọkime urhi ro suẹn amwa ọrana, o vwo kwe na ha eghwa re rhirhiẹ ruẹ ekete ogame-e. A bọn ekete ra ha nughe re se Stanley rhẹ ekete ra ha sueyi, omarana era kobaro uvuẹn igọmẹti e kwe tiobọnu uphẹn rẹn imizu na nẹ aye i ha ekete na ruiruo-o. Imizu na ni kpare ẹmro na riẹ ẹghware ọrọrọ, ọrẹn a kpahenrhọ ye-e.

 Uvwre ọkprughwre owu mia ha uvuẹn Oghọn Ukoko, ukoko na nọ kpare ẹzọn na riẹ ẹghware ọduado rọ ha ẹkwotọre ọrana. Ra mẹriẹn taghene ẹgbukpe eva ọvo yi mi ruotọre nẹ isukuru ilọya uvuẹn St. Paul, Minnesota, ni mi dabu rhe kpahen aruẹ ẹzọn ọrana. Owu usuẹn ilọya na nọ tare taghene ekwakwa jerẹ ughe eno, ijoro ẹsuọ ọrhẹ irueruo afiede erọrọ ya ha ekete ra ha nughe re se Stanley ruẹ bi. Mesoriẹ a ta taghene ọ kparehasuẹ urhi, na ha ekete na ruẹ irueruo ogame? Oghwa ẹghware na nọ dabu ni ẹmro na so, ji brorhiẹn taghene Jersey City ọ yẹ ame ugbomọphẹ ẹga ro fori nẹ ame i vwo-o. Aye ni ta rẹn amwa na nẹ aye i tiobọnẹ ọbe ekwerhọ rẹn ame, ni mi mẹrẹn oborẹ i Jehova o ru ha izede ro serhọ ha ebrurhọ vwe ukoko, ji lẹrhẹ owian yen riarorhọ. Oma ọ merhenren mẹ omamọ taghene mi sabu vwobọrhọ ọnana.

Imizu ukoko na ni tuẹn erukpokpọ ọduado rhọ, habaye ne ruẹ Isukuru i Gilead, iklasi ọrẹ 79 uvuẹn Aghwẹlẹ Omẹvwa ọrẹ Jersey City uvuẹn September 8, 1985, e ruẹ ọnana emrẹ ẹgbukpe owu nẹ ọke ra rharhumu ruẹ oghwa na kpokpọ hin. Oma ọ merhenren mẹ omamọ taghene mi sabu homaba Awuiruo rọ Hẹrote Ẹmro Urhi ha userhumu kpare owian Uvie na riarorhọ, evwẹnvuọn mi mẹrẹnren ọ vrẹn ọrẹ mi mẹrẹnren ọke mia wian owian ilọya bọmọke mi ki rhiẹ Oghọn Ukoko. Ọrẹn, mie rhe taghene Jehova o vwo aruẹ ewian enana mẹ mi na wian obaro na-a.

Uvwre ẹgbukpe 1980, idọkitọ ọrhẹ ihọsipita i vwa họghọ rẹn orhienbro ohworho ro te omirẹghwa ne taghene e simie vabọ ọbara e se rhoma-a. Emẹse ri mẹrenvwan a dẹrughwaroghwẹ ọdamuni ọnana fọkime iguẹnzọn buebun e roro taghene emẹse e vwo ugbomọphẹ aye ina tiẹn ọbara re se rhoma-a. Iguẹnzọn na ne roro taghene erhe se ọbara rhẹ izu na oma-a, ọnọ sabu hwu jẹ ọmọ na vwo.

Uvuẹn December 29, 1988, ọbara buebun no nẹ oma Omizu ọmase owu re se Denise Nicoleau ọke ro vwiẹ ọmọyen ọhworhare hin. Ọbara omizu na no seriotọre omamọ, idọkitọ ro simie nọ nọriẹn sẹ ana sabu se ọbara rhẹ omayen. Omizu Nicoleau nọ tenren. Urhiọke ẹdẹ ọreva ye, ihọsipita na ni riẹ oghwa ẹghware ya ha ọbe rọ nọ yẹ aye omẹgbanhon rẹ aye ine se ọbara rhẹ omizu na oma. Oguẹnzọn na no tiobọnẹ ọbe na rẹn ihọsipita na taghene aye ina sabu se ọbara rhẹ omizu na oma, ọrẹn aye e vwo ekwerhọ Omizu Nicoleau yanghene esa ye vwẹre-e.

Dedevwo esa Omizu Nicoleau ọrhẹ ihworho ekrun ọnẹyen i tiẹn ọbara re ne se rhọye oma, uvuẹn Friday, December 30, idọkitọ na no se ọbara rhẹ oma Omizu Nicoleau. Owuọwọn ọrana, ne mwu ihworho ekrun i Nicoleau ọrhẹ  ekpako ukoko ezẹko fọkime aye i damoma dobọ idọkitọ na ji, nẹ aye i je rhe se ọbara rhẹ Omizu Nicoleau oma. Uvuẹn urhiọke i Saturday, December 31, oghwa iyẹnrẹn ọrhẹ ọbe iyẹnrẹn sansan ri ha uvuẹn ẹkwotọre i New York City ni kpare iyẹnrẹn na.

Urhiọke i Monday, ni mi lele oguẹnzọn ọrọrọ re se Milton Mollen tẹmro. Ni mi ta riẹn kpahen oborẹ ọ phiare, ra mẹriẹn taghene oguẹnzọn ọreva ye o fiobọrhọ ọbe na, ọrẹn o vwo ekwerhọ Omizu Nicoleau vwẹre-e. Oguẹnzọn Mollen nọ ta mẹ taghene mi bruie rhe kọgbọrọ neneyo ame i sabu ta kpahiẹn rhọ, ji ni urhi ri surhobọmwu oghwẹmro ọnana. Ọkpako ukoko ro rhiẹ oniruo Awuiruo ame re se Philip Brumley, no leliri mẹ bru Oguẹnzọn Mollen owuọwọn ọrana. Oguẹnzọn na nọ ji ta rẹn ilọya ihọsipita na nọ homaba esiyẹ na. Ẹmro na ọ lọhọ-ọ. Uvuẹn erhirhiẹ owu, Omizu Brumley no dje oborẹ ọ ya rhotọre mẹ rọ tare taghene “mi ha uvwele mẹ riotọre.” Urhebro ọrana o ghini serhọ mẹ fọkime evwan e biomi mẹ ne, ra mẹriẹn taghene mi guọlọ djephia taghene oborẹ ilọya ihọsipita na o ruru ọ sọre.

Uvwre unọke owu, Oguẹnzọn Mollen nọ tare taghene ẹmro ọnana ye ne kiki ta kpahen urhiọke ẹdẹ ọreva ye. Ọke ame e nẹ ọfisi Oguẹnzọn Mollen, nọ tare taghene ilọya ihọsipita na o vwo “ẹmro ọgbogbanhon odẹrọsa na.” Ọnana o mevirhọ taghene ọnọ bẹn omamọ harẹn ilọya ihọsipita na nọ sabu chochọn oborẹ o ruru. Mi mẹrẹnvwrurhe taghene Jehova ọ yẹ mẹ imwẹro taghene ame ine fikparobọ. Oma ọ merhenren mẹ omamọ taghene Jehova ọ ha ame ruẹ ọhọriẹ.

Ame ni mwuegbe ẹmro na te erhẹrhẹ ason ẹdẹ ọrana. Ekete re guẹnzọn na o seri nẹ Oghọn Ukoko ọrẹ Brooklyn na-a, omarana imizu buebun ra wian uvuẹn Awuiruo rọ Hẹrote Ẹmro Urhi ni ha oghwẹ nya riẹ avwaye. Ọke iguẹnzọn ẹne na e rhon oborẹ ame a ta, aye ni tare taghene o fo na gba ohworho se ọbara rhẹ oma-a. Iguẹnzọn na ni tare taghene Omizu Nicoleau ọ riase, ji ta taghene ọ kparehasuẹ urhi ne se ọbara rhẹ ohworho oma ọrẹn a ta riẹn, yanghene vwo ekwerhọ ọravwọ vwẹre-e.

Oghwa ẹghware rọ mai rierun uvuẹn ẹkwotọre i New York ni tare taghene Omizu Nicoleau o vwo ugbomọphẹ rọ nọ ta taghene e simie, ọrẹn e vwe se ọbara rhọye oma-a. Ọnana yẹ orhienbro ọrukaro usuẹn ẹne ro sekpahen ọbara mi vwobọrhọ ne, rẹ aghwẹlẹ ẹzenguon  ọrẹ ẹkwotọre ọrana o bruru. (Se ekpeti na “ Efikparobọ Sansan Uvuẹn Aghwẹlẹ Ẹzenguon ri mai Rierun.”) Mi ji homaba ilọya erọrọ uvuẹn Oghọn Ukoko guẹnzọn ri sekpahen ọrọ nọ hẹrote ọmọvwerhe rẹ eri vwiẹriẹ i hẹriẹre, orọnmo ẹfan, kugbe urhi ro suẹn etọre ọrhẹ eghwa ẹha ruiruo.

Ọke mie tu mẹrẹn ane mẹ re se Dawn, esa ye ọ fonrọnmo aye ne, ọye ọvo yọ hẹrote emọ esa. O vwo ibiẹ owian rọ wian, ọye jẹ ọkobaro. Akpenyerẹn ọ lọhọ riẹ-ẹn, omwemẹ ro vwori rọ nọ ga i Jehova o teri mẹ ẹhẹn omamọ. Uvuẹn ẹgbukpe 1992, ame ni riẹ Omẹvwa Ẹkwotọre ro vwo urhomu-ẹmro na “Light Bearers” uvuẹn ẹkwotọre i New York City, ame na kọn rhẹ omoma ame. Ọke ẹgbukpe owu ọ vrẹn, ame ni rọnmọren. Mi ghini kpẹmẹ i Jehova taghene mi vwo ane rọ sasare omamọ, ro ji vwo ẹguọlọ kpahen ogame ọnẹyen. Dawn ọ lẹrhere mẹ mẹrẹn erere uvuẹn uvwre ọke ame e nyerẹn kugbe.—Prov. 31:12.

Ọke ame a rọnmọ, emọ na i ha ẹgbukpe 11, 13, ọrhẹ 16. Mi guọlọ rhiẹ omamọ ọsẹ rẹn aye, omarana ni mi dabu se i kemru kemru ro sekpahen ọsẹ rọ mọrọn emọ awọrọ ri ha uvuẹn ẹbe ukoko na, ji damoma ha oborẹ mi seri ruiruo. Mi vwo ebẹnbẹn uvwre ẹgbukpe ezẹko, ọrẹn oma ọ merhen mẹ taghene emọ na i sabu hẹroso mẹ, ji rhiabọ dedi mẹ jerẹ ọsẹ aye. Ame i kweri nẹ igbehian emọ ame i rhe bru aye sa ọke ephian, oma ọ ji merhen ame ọke aye i rha rhe.

Uvuẹn ẹgbukpe 2013, mẹmẹ ọrhẹ Dawn ni kwa riẹ Wisconsin neneyo ame i sabu hẹrote eri vwiẹre ame ri ho ne. O gberi mẹ unu taghene e fiobarhọ owian mẹ uvuẹn Oghọn Ukoko-o. Na ha use mẹ ne mi homakpahontọre wian ibiọke ha userhumu rẹn ukoko na uvuẹn ẹmro ri sekpahen urhi.

Uvuẹn September 2018, ni mi djokarhọ taghene emiamo ọ guọlọ mwu uvwele mẹ. Idọkitọ ame no nirin mẹ so, ọrẹn ọ sabu mẹrẹn oborẹ ọ suẹ emiamo na-a. Ọke oru, idọkitọ ọrọrọ nọ ta mẹ taghene mi damoma ya mẹrẹn idọkitọ rọ simi emiamo aphẹrhiẹn. Uvuẹn January 2019, idọkitọ na no nirin mẹ so ji mẹrẹnvwrurhe taghene mi vwo emiamo aphẹrhiẹn owu re se supranuclear palsy (PSP).

Ẹdọke esa a vrẹn, ọke mie ruiruẹn uvuẹn ekete rẹ imito e se rhọ, ni mi burhun isuaso ẹrhuonbọ obọrhe mẹ. O jiri ne mie ruiruẹn ọnana; mi ji vwo ẹguọlọ kpahiẹn omamọ. Omarana mi rheri taghene mi rha sabu vwo omẹgbanhon mi ne ruiruẹn ọnana jerẹ ọke bi-i. Emiamo aphẹrhiẹn na nọ gbanhanrhọ, nọ tobọ hobọte oborẹ mia tẹmro lele, oborẹ mia nya lele ọrhẹ omẹgbanhon mi ne simi emru rọ.

Oma ọ merhenren mẹ taghene mi sabu ha owian ilọya mẹ hobọtua owian Uvie na. Mi ji vwo uphẹn mia sabu ya ẹbe sansan, ji ha ẹmro sansan phia ri sekpahen omesimo ọrhẹ urhi uvuẹn ekete sansan uvuẹn akpọ na, mi ji chochọn ugbomọphẹ ihworho i Jehova rẹ aye ina djẹ omesimo ọrhẹ oma ẹbẹrẹ rọ vabọ ọbara re se rhẹ oma. Ọrẹ ẹzẹkoko, jerẹ oborẹ Luke 17:10 ọ tare: ‘Mẹmẹ ọvrẹn ro vwo fiemru owuorowu. Oborẹ mi ruru, yẹ oborẹ o fori taghene mi ru.’