Enọ Rẹ Otu Re Se Ẹbe Ọwan I Nọren
O fori nẹ Iseri Jehova i ha iwẹbsaiti rẹ emẹse ọrhẹ ehworhare a kọn rhọ awan ruiruo?
Jehova ọ guọlọre taghene oma ọ merhen ihworho ri rọnmọren, nẹ aye ji riamerhen onyerẹnkugbe rọ kpẹnkpẹnren uvwre omayen ọke jijiri. (Matt. 19:4-6) Orhianẹ wu guọlọ rọnmọ, marhẹ wu ne ru mẹrẹn ohworho ro fo ruo? Ro rhiẹ Ọmemama ọwan na, Jehova o rhe oborẹ ọnọ lẹrhẹ ihworho fikparobọ ọke aye kọn rhọ omoma aye ọrhẹ ọke aye i rọnmọ ne. Omarana, wu rha ha iruemru-urhi rọ yẹre ọwan ruiruo, wu ne mẹrẹn efikparobọ. Jene roro kpahen iruemru-urhi erana ezẹko.
Ọrukaro, o fori ne rhe emru ọnana kpahen oma ọwan: “Ọmudu na ọ vuọnren rhẹ ọphiẹrhọ ọrhẹ iroro ibiobiomu.” (Jer. 17:9) Ọke ihworho awanva ri guọlọ rọnmọ arha kọn rhọ omoma aye, aye ne vwo ojemẹ ọgbogbanhon kpahen omoma aye, rọ lẹrhiẹ bẹn aye ine brorhiẹn ẹghwanren. Ọrẹn, ihworho ri guọlọ rọnmọ i rha bọn orhienbro aye kpahen ojemẹ aye ọvo, aye ne brorhiẹn ri vwe serhọ. (Prov. 28:26) Ọrana yọ soriẹ o vwo fo nẹ ihworho ri guọlọ rọnmọ, i dje ojemẹ ọgbogbanhon aye phia ọtonrhọ onyerẹnkugbe aye, yanghene ve ive rhẹ oma vwẹre, nẹ aye i ki dabu rhe kpahen omoma aye.
Proverbs 22:3 ọrhọ ta: “Ọvwẹghwanren ọrhọ mẹrẹn okpetu no tioma ha, ọrẹn akpa ọ nya ruiẹ, nọ jeghwai rioja oborẹ ono nerhumie rhe.” Me yẹ imwofẹn ri havwiẹ arha ha iwẹbsaiti rẹ ihworho a kọn rhọ awan ruiruo? Ọrẹ omemwurhọ, ihworho ezẹko i kọn rhọ ihworho aye i vwe rhe nyoma iwẹbsaiti erana, ọrẹn ọke oru, aye ni mẹrẹnvwrurhe taghene ọreva ye ọ phiẹrẹ aye rhọ. Habaye, ihworho ri vwo ufiuvwele, i ji ruẹ iwẹbsaiti aye a phiẹ ihworho rhọ, yanghene so igho aye. Ọkezẹko, ere ruẹ ekwakwa enana e dje omayen taghene aye Iseri Jehova.
Roro kpahen imwofẹn ọrọrọ. Iwẹbsaiti ra kọn rhọ awan ezẹko a ha ena re roro emru kugbe re se mathematics ruiruo, nẹ aye i rhe kpahen ihworho ri fo rẹn owuowọnwan. Ọrẹn, o vwo iyẹnrẹn owuorowu ro djephia taghene ena erana a ghini wia-an. Orhiẹ emru ẹghwanren ra na ha ona onyakpọ o ruru e ruiruo, taghene ọnana ọnọ lẹrhẹ onyerẹnkugbe ọghoghanren jerẹ orọnmo vwo efikparobọ? Marhẹ ena re roro emru kugbe ine ru vwanvwọn iruemru-urhi Baibol na?—Prov. 1:7; 3:5-7.
Uruemru urhi owu rọ ha Proverbs 14:15, ọrhọ ta: “Ọvwidjigbo o kwerhọ i kemru kemru ra tare, ọrẹn, ohworho ro vwo ẹghwanren o roro kpahen udjoghwẹ owuowu.” Bọmọke wu ne ki brorhiẹn taghene wu guọlọ rọnmọ ohworho, o fori wu rhe ọravwọ fiotọre vwẹre. Ọrẹn, wu sabu ruẹ ọnana orhianẹ uvuẹn itanẹti ọvo yẹ are a vwoma-a. Orhianẹ are a mẹrẹn iyẹnrẹn ri sekpahen are uvuẹn itanẹti, ji dje urhomu vwe omoma are uvuẹn itanẹti ọke ephian, wu na ghini sabu ta taghene wu rhe ohworho na? Ezẹko ri rorori taghene aye i mẹrẹn ohworho ro vwo ẹguọlọ kpahen aye ne, o gberẹ aye unu ọke aye a mẹrẹn ohworho na uvuẹn otọre.
Ọbo ijoro na ọrhọ ta: “Mi vwe kwomakugbe era phiẹ ihworho rhọ-ọ, mia ji kẹnoma rẹn ihworho re vwe kwe dje oborẹ aye i havwọ phia.” (Ps. 26:4) Ihworho buebun e roro taghene o serhọ wu rha mọrenfian kpahen oborẹ wu havwọ uvuẹn itanẹti, nẹ ihworho i sabu ha omamọ ukẹro nuo. Aye ina sabu tiẹ orharhere uruemru aye i nu, yanghene aye i djeyi phia uvuẹn itanẹti-i. Ezẹko ine djoma phia taghene aye Iseri Jehova, ọrẹn aye i bromarhame ne? Aye i ghini do te edje ne? Aye i vwo omamọ onyerẹnkugbe rhẹ Jehova? A dabu họghọ rẹn aye uvuẹn ukoko aye i havwọ? Yanghene aye ina sabu rhiẹ orharhere udje yanghene tobọ rhiẹ “orharhere okugbe”? (1 Cor. 15:33; 2 Tim. 2:20, 21) Aye i vwo ugbomọphẹ aye ina rọnmọ lele oborẹ i Baibol ọ tare? O fori wu rhe ekwakwa enana, ọrẹn ọnọ bẹn wu ne rhe aye orhianẹ we vwo uphẹn wu ne lele imizu erọrọ ri dabu rhe ohworho na tẹmro-o. (Prov. 15:22) Itiọrurhomẹmro, ọro vwo atamwu kpahen Jehova o vwo “kwomakugbe” aruẹ ohworho ọrana-a.—2 Cor. 6:14; 1 Cor. 7:39.
Fọkiẹ imwofẹn ri ha iwẹbsaiti ra ha kọn rhọ awan, o vwo izede irhorhomu erọrọ ra na guọlọ ohworho ra na rọnmọ, rọ nọ lẹrhuọ vwo omamọ onyerẹnkugbe ro no lele fiẹ orọnmo ro vwo ọghọ. Marhẹ wu ne ru mẹrẹn ohworho wu na rọnmọ? Uvwre ọke re vwe jurhi kpahen oborẹ ihworho ine koko lele, Iseri Jehova a dabu rhe omoma aye ọke aye e ruẹ uyono ukoko, emẹvwa ekokamu, emẹvwa eduado ọrhẹ ekoko erọrọ.
Ọke are arha ghwọghọ ọke kugbe, are ni na sabu mẹrẹnvwrurhe sẹ ẹkẹ ọrhẹ edamẹ are i serhọ
Uvuẹn ọke re jurhi kpahen ekoko erana, jerẹ ọke emiamo COVID-19, ame na ha ifonu yanghene ikọmputa ruẹ uyono ukoko, ekete ra sabu vwo uphẹn ra mẹrẹn Iseri Jehova re vwa ji rọnmọ. Wu na sabu mẹrẹn oborẹ aye e vwobọrhọ uyono na lele, ji rhon kpahen esegburhomẹmro aye ọke aye a kpahanrhọ onọ. (1 Tim. 6:11, 12) Wu na ji sabu tẹmro kugbe erhe ruẹ uyono na hin. Nyoma ividio ra ha ruẹ uyono, wu na sabu mẹrẹn oborẹ ohworho wu vwo ojemẹ kpahen, o lele imizu erọrọ ruẹ kugbe, ọrana ọnọ sabu dje aruẹ uruemru ro vwori phia. (1 Pet. 3:4) Orho ru, are i rha dabu rhẹ owuowọnwan ne, are ni na sabu brorhiẹn sẹ ẹkẹ ọrhẹ edamẹ are i serhọ, sẹ are ina sabu rọnmọ.
Ihworho ri vwa ji rọnmọ i rha guọlọ ọrẹ aye ina rọnmọ izede ro serhọ rhẹ iruemru-urhi Baibol, aye ine kwerhọ ẹmro urhomẹmro rọ ha proverb ọnana rọ tare: “Ohworho rọ rọnmọ omamọ ane [yanghene esa] ọ mẹrẹn omamọ emru ne, ọ ji mẹrẹn ebrurhọ nẹ obẹ i Jehova.”—Prov. 18:22.
