1. Me yi Jehova o ru wẹn ne?

MARHẸ wu ru rhiẹ Oseri Jehova? Ọrukaro, wu rhon “iyẹnrẹn esiri na”—ọkezẹko mie eri vwiẹruọ, ihworho we lele wian yanghene eri we lele riẹ isukuru kugbe, yanghene nyoma aghwoghwo i nẹ oghwa riẹ oghwa. (Mark 13:10) Ọke oru, ohworho no leliruo ghwọghọ ọke kugbe yonuo i Baibol na. Uvwre ọke are e yono, ne wu vwo ẹguọlọ kpahen Jehova jeghwai yono taghene ọye o ji vwo ẹguọlọ kpahuọn. Jehova nọ lẹrheruọ rhe urhomẹmro na, vwana we rhiẹ odibo i Jesu Kristi ne na, wu vwo uphẹn wu ne nyerien bẹmẹdẹ. (John 6:44) Itiọrurhomẹmro, wu vwo ọdaremẹro okokodo kpahen Jehova taghene Ọye ọ ha ohworho yonuo kpahen urhomẹmro na, ji deduo ha ne wu rhiẹ owuọwan usuẹn idibo Enẹyen.

2. Me ye ne yono kpahen uvuẹn urhomu-ẹmro ọnana?

² Vwana re rhe urhomẹmro na, e vwo uphẹn ra na ha userhumu rẹn awọrọ homaba ọwan uvuẹn izede ro suẹn riẹ arhọ na. Ọnọ sabu phẹrẹ rẹn ọwan re ne ghwoghwo nẹ oghwa riẹ oghwa, ọrẹn ọnọ sabu bẹn ra na ha uyono i Baibol phia. Ọrana ọ ji phia wẹn? Orhiomaran, ọkezẹko wu na sabu mẹrẹn irorẹdjẹ ezẹko uvuẹn urhomu-ẹmro ọnana ri na ha userhumu wẹn. Ene yono kpahen oborẹ o mwu ọwan ruẹ idibo. Ene yono kpahen oborẹ ene ru fiẹ ebẹnbẹn ri na sabu lẹrhẹ ọwan ja ha uyono i Baibol phia kparobọ. Ọrukaro, jene yono kpahen oborẹ ene ru rhiẹ ihworho re ghwoghwo jeghwai yono awọrọ kpahen iyẹnrẹn esiri na.

3. Mesoriẹ ọwan e ghwoghwo?

³ Ọke i Jesu ọ ha otọrakpọ na, ọ yẹ idibo yi owian eva. Ọrukaro, ọ ta rẹn aye nẹ aye i ghwoghwo iyẹnrẹn esiri Uvie na, no ji dje rẹn aye oborẹ aye ine ruie lele. (Matt. 10:7; Luke 8:1) Haba ekwakwa erọrọ, Jesu o mwuegbe idibo yi kpahen oborẹ aye ina kpahenrhọ ye lele ọke ihworho i vwe kwe kerhọ, ọrhẹ ọke aye i rha kerhọ iyẹnrẹn esiri Uvie na. (Luke 9:2-5) Jesu ọ ji ta kpahen oborẹ owian aghwoghwo na ono kerabọ te, ji ta taghene idibo yi ine se “oseri harẹn egbamwa na ephian.” (Matt. 24:14; Acts 1:8) O toro oborẹ ihworho i kpahenrhọ owian aghwoghwo na lele-e, idibo na ina ta rẹn ihworho kpahen Uvie Osolobrugwẹ ọrhẹ oborẹ ono ruo.

4. Lele oborẹ ọ ha Matthew 28:18-20, me ya na vi haba ọrẹ ene ghwoghwo kpahen Uvie na?

⁴ Me yẹ owian ọreva ri Jesu ọ yẹ idibo yi? Jesu ọ ta rẹn idibo yi nẹ aye i yono ihworho nẹ aye i ru lele ọsoso ekwakwa rọ tare. Ọrẹn, Ilele Kristi erukaro na ọvo yi ne ghwoghwo, ji yono ihworho jerẹ oborẹ ihworho ezẹko a ta? Ẹjo, Jesu o djerie phia taghene ana wian owian ọghoghanren ọnana ye te ọke ọwan na, “bọmọke enyerakpọ na ono toba.” (Se Matthew 28:18-20.) Ọkezẹko, Jesu ọ yẹ idibo yi owian ọnana ọke rọ homaphia rẹn otu ri vrẹn 500. (1 Cor. 15:6) Habaye, usuẹn ekwakwa ri Jesu o dje rẹn John, Jesu nọ dabu dje fiotọre taghene o fori nẹ idibo yi ephian i ha userhumu rẹn awọrọ yono kpahen Jehova.—Rev. 22:17.

5. Sekpahen oborẹ ọ ha 1 Corinthians 3:6-9, me yi Paul ọ ha dje owian aghwoghwo na ọrhẹ ọre yono ihworho?

⁵ Ọnyikọ Paul ọ ha owian re ruẹ idibo, e dje kpahen ọrẹ a wọ ewawọ, ji ta taghene ene ru vrẹn ọrẹ ana wọ ikeri. Nọ karorhọ itu i Corinth: “Mia wọ, Apollos ọ kpọtọ . . . Are yẹ okegbe Osolobrugwẹ ra wọ na.” (Se 1 Corinthians 3:6-9.) Re rhiẹ ihworho ra wian uvuẹn “okegbe Osolobrugwẹ” na, e vwo owian ra na wọ ikeri na, kpọtọ aye jeghwai rhe ni aye sua ọke ephian sẹ aye a dua. (John 4:35) Uvwre ọke owu na, e rheri taghene Jehova yọ lẹrhẹ ukeri na dua.

6. Ọke re yono ihworho, me ya na ha userhumu rẹn aye ru?

⁶ Ọwan a guọlọ ihworho ri “vwo omamọ ẹhẹn ri ne vwo arhọ i bẹmẹdẹ.” (Acts 13:48) Na sabu ha userhumu rẹn ihworho rhiẹ idibo, o fori na ha userhumu rẹn aye (1) vwẹruọ, (2) vwo imwẹro, jeghwai (3) ha oborẹ aye i yono nẹ i Baibol na ruiruo. (John 17:3; Col. 2:6, 7; 1 Thess. 2:13) Imizu ephian uvuẹn ukoko na ina sabu ha userhumu rẹn ihworho re yono nyoma re ne dje ẹguọlọ rẹn aye, ji lẹrhẹ ẹhẹn aye te otọre ọke aye i rha rhiẹ uyono ukoko. (John 13:35) Ọkezẹko, omizu rọ ha uyono na phia ọnọ ghwọghọ ọke buebun ha userhumu rẹn ọrẹ ọye o yono wene imwẹro “ri vi kanroma rhotọre,” yanghene irueruo erọrọ. (2 Cor. 10:4, 5) Ọnọ sabu ha ibiamo buebun ra na ha userhumu rẹn ohworho ruẹ ewene enana, neneyo ọ sabu mwuovwan omebrurhame. Ọrẹn, ọnọ mẹrẹn erere nẹ ewene erana.

7. Me yo mwu ọwan vwobọrhọ owian aghwoghwo na ọrhẹ ọre ruẹ idibo?

⁷ Mesoriẹ ọwan e vwobọrhọ owian aghwoghwo na ọrhẹ ọrẹ e ruẹ idibo? Ọrukaro, fọkime e vwo ẹguọlọ kpahen Jehova. Ọke we ruẹ ekete omẹgbanhon ọnọ o teri, ne wu nyalele akama re ne ghwoghwo, ji ruẹ idibo, we dje ẹguọlọ wu vwo kpahen Jehova phia. (1 John 5:3) Roro kpahen ọnana: Ẹguọlọ wu vwo kpahen Jehova o mwuruon ghwoghwo nẹ oghwa riẹ oghwa ne. Ọ phẹrẹre wu na  nyalele akama ọrana? Ọkezẹko, ọ phẹrẹ-ẹ. Ọke ukaro we ye ghwoghwo, ighweghwe ọ roruọ oma? Ee! Ọrẹn wu rheri taghene ọnana owian ri Jesu ọ guọlọre ne wu wian, ne wu ji huvwele akama na. Ọke oru, nọ phẹrẹre wu ne vwobọrhọ owian aghwoghwo na. Nẹ ọrẹ ana ha uyono i Baibol phia vwo? Ighweghwe ọ ruọ oma ọke we roro kpahiẹn? Ọkezẹko. Ọrẹn, wu rha nekpẹn userhumu mie Jehova ne wu sabu fiẹ ighweghwe na kparobọ, ji fiudugbere ha uyono i Baibol phia, Jehova ọnọ sabu ha userhumu wẹn ruẹ omwemẹ wu ne ruẹ idibo gbanhonrhọ.

8. Lele oborẹ ọ ha Mark 6:34, me yẹ emru ọrọrọ ro no mwu ọwan yono ihworho?

⁸ Ọreva, ẹguọlọ re vwo kpahen ereva ọwan o mwu ọwan yono aye urhomẹmro na. Uvuẹn erhirhiẹ owu, oma ọ ghwọghọ i Jesu ọrhẹ idibo yi fọkime aye i ghwoghwori omamọ ne. Aye i guọlọ ekete aye ine ronmoma, ọrẹn otu buebun ni mẹrenrẹn aye. Fọkiẹ arodọmẹ ro vwo kpahen aye, Jesu no yono ihworho na “ekwakwa buebun.” (Se Mark 6:34.) Ọ wian gbanhon uvuẹn erhirhiẹ ọrana. Mesoriẹ? Jesu o fioma yen rhẹ erhirhiẹ ihworho na. Ọ mẹrẹn oborẹ aye a rioja te—oborẹ aye i guọlọ ifiẹrorhọ te—omarana, nọ guọlọ ha userhumu rẹn aye. Ihworho i ji ha aruẹ erhirhiẹ ọrana inyenana. Wu vwe jenẹ omẹhaphia aye phiọrhọ-ọ. Aye i họhọ igegede re beghe, ri vwe vwo osuingegede ro no sun aye. Ọnyikọ Paul o dje aruẹ ihworho erana rhiẹ eri vwe vwo Osolobrugwẹ ọrhẹ ifiẹrorhọ. (Eph. 2:12) Aye i ha uvuẹn “izede ro . . . suẹn riẹ oghwọghọ”! (Matt. 7:13) Ọke erhe roro kpahen oborẹ ihworho ri ha okogho re ghwoghwo ine ru yono kpahen Jehova, ẹguọlọ ọrhẹ aruẹdọn no mwu ọwan ha userhumu rẹn aye. Habaye, izede rọ mai rhomu ene ru ha userhumu phia yẹ ọrẹ ana ha i Baibol yono aye.

9. Lele oborẹ ọ ha Philippians 2:13, marhẹ i Jehova ono ru ha userhumu wẹn?

⁹ Ọkezẹko, we ruẹ sikẹnsikẹn wu na ha uyono i Baibol mwu, fọkime wu rheri taghene ọ guọlọ ọke buebun ọrhẹ omẹdamu ọgbogbanhon mie owẹwẹ. Orhiomaran we roro, ta rẹn Jehova kpahiẹn. Nẹrhomo vwe yi nọ ha userhumu wẹn vwo omwemẹ wu na guọlọ ohworho rọ guọlọ yono i Baibol na. (Se Philippians 2:13.) Ọnyikọ John ọ yẹre ọwan imwẹro taghene Jehova ọnọ kpahenrhọ ẹrhomo ri serhọ rhẹ Ọhọriẹ. (1 John 5:14, 15) Omarana, wu na sabu fiudugbere taghene Jehova ọnọ ha userhumu wẹn vwo oruru wu ne vwobọrhọ owian re ruẹ idibo.

10-11. Me yọ nọ sabu lẹrhẹ ọwan ja ha i Baibol yono ohworho?

¹⁰ Ọwan i rheri taghene ọghanranren re ne yono ihworho, dedevwo ana sabu dẹrughwaroghwu ebẹnbẹn ri na lẹrhẹ ọwan je vwobọrhọ owian ru ruẹ idibo, te ekete ra guọlọ wian te. Jene yono kpahen ebẹnbẹn na ezẹko ọrhẹ oborẹ ene ru fiẹ aye kparobọ.

¹¹ A vwa sabu wian buẹn fọkiẹ erhirhiẹ ọwa-an. Jerẹ udje, imizu ezẹko i ho ne yanghene oma aye ọ sasa te-e. Aruẹ erhirhiẹ ọrana wu havwọ? Orhiomaran, roro kpahen uyono owu wu na sabu yono nẹ emiamo COVID-19 na. A mẹrẹnvwrurhe taghene ana sabu ha ifonu yanghene ikọmputa ha uyono i Baibol ro mwidjẹn phia! Omarana, wu na sabu yono ohworho nẹ uvuẹn oghwa ọnọ. O ji vwo erere ọrọrọ. Ihworho ezẹko i vwo omamerhomẹ kpahen uyono i Baibol, ọrẹn aye i vwe vwo uphẹn ọke imizu ọwan e ghwoghwo-o. Ọrẹn, aye ina sabu vwo uphẹn uvuẹn igidurhiọke yanghene uvuẹn ason. Wu na sabu yono ihworho i Baibol na uvwre ọke enana?  Jesu o yono Nicodemus uvuẹn ason, ro rhiẹ ọke ro je Nicodemus.—John 3:1, 2.

12. Me yọ yẹre ọwan imwẹro taghene ana sabu rhiẹ iyono ri mwidjẹn?

¹² Ana sabu roro taghene e vwo ona re ne yono ohworho i Baibol na-a. Ọkezẹko, ọwan e roro taghene o fori ne vwo irherhe yanghene ona buebun re ne rhiẹ omamọ oyono, bọmọke ana ki sabu yono ohworho. Orhiomaran we roro, o vwo ekwakwa esa ri na sabu yọ uduefigbere rhọ. Ọrukaro, Jehova o rheri taghene wu mwuovwan wu ne yono awọrọ. (2 Cor. 3:5) Ọreva, Jesu ro vwo “omẹgbanhon ephian obẹ odjuwu ọrhẹ uvuẹn otọrakpọ na,” o jurhi wẹn ne wu ye yono ihworho. (Matt. 28:18) Ọresa, wu na sabu hẹroso awọrọ nẹ aye i ha userhumu wẹn. Jesu ọ hẹroso oborẹ i Jehova o yonirien nọ ta, wu na ji sabu ruẹ omaran. (John 8:28; 12:49) Habaye, wu na sabu nọ oniruo rọ hẹrote ẹko aghwoghwo wu havwọ, ọkobaro ro mwuovwan, yanghene oghwoghwẹmro ro te edje nọ ha userhumu wẹn ha i Baibol yono ohworho. Izede owu wu ne ru vwo uduefigbere rhọ, yẹ ọrẹ wu na homaba imizu enana ọke aye a ha uyono i Baibol phia.

13. Mesoriẹ o fo na ha izede sansan yono ihworho?

¹³ Ọnọ sabu bẹn ra na riẹnrioma rhẹ ena ekpokpọ, ji ha ekwakwa ekpokpọ ruiruo. Oborẹ ọwan a ha i Baibol na yono ihworho lele, o wene ne. Ọbe ra vi ha yono ihworho ro rhiẹ, Riamerhen Akpenyerẹn Bẹmẹdẹ!, ọ guọlọre taghene e mwuegbe rhẹ uyono na, ji haye phia izede rọ vẹnẹ oborẹ e ruie bi. Idjaghwẹ re se i vwe buẹ-ẹn, e ji lele ohworho re yono na tẹmro kugbe omamọ. Ọke re yono, ọwan a ha ividio ọrhẹ ekwakwa erọrọ, jerẹ JW Library^® ruiruo. Orhianẹ wa ji sabu rhe oborẹ a ha ekwakwa enana ruiruo-o, ta rẹn omizu rọ nọ sabu ha userhumu wẹn yono kpahen aye. Ituakpọ emama ra sabu yono kpahen ekwakwa. Ọ vwọ phẹrẹ ra na riẹnrioma lele ona ọkpokpọ re ruẹ ekwakwa-a. Ọrẹn, nyoma userhumu i Jehova ọrhẹ awọrọ, ọnọ sabu lọhọ re ne ruẹ ewene, ji riamerhiẹn ọke ra haye yono ihworho. Jerẹ oborẹ ọkobaro owu ọ tare, ona uyono ọnana ọ “rhuọnrhuọn oyono na ọrhẹ ohworho re yono na oma.”

14. Me yo fori na karorhọ ọke re ghwoghwo uvuẹn okogho ihworho i vwe kwe kerhọ, marhẹ 1 Corinthians 3:6, 7 o ru ha urhebro rẹn ọwan?

¹⁴ Ana sabu rhe rhirhiẹ okogho rọ bẹn ra na tuẹn uyono i Baibol rhọ. Ihworho ezẹko ina sabu tiẹn iyẹnrẹn esiri na yanghene kparehasuiẹ. Me yọ nọ ha userhumu rẹn ọwan sẹrorẹ uruemru ro serhọ uvuẹn aruẹ okogho ọrana? Karorhọ taghene erhirhiẹ ihworho e wene phẹphẹrẹ uvuẹn akpọ ọkon ọnana, omarana ihworho ri vwe dje omamerhomẹ phia bi, ni na mẹrẹnvwrurhe taghene aye i guọlọ ọkpọvi Osolobrugwẹ. (Matt. 5:3) Ezẹko ri vwe kwe ha ẹbe ọwan bi, ina sabu vwo omamerhomẹ kpahen uyono i Baibol. E ji rhe taghene Jehova yẹ Onini orhọ na. (Matt. 9:38) Ọ guọlọre taghene arha wọ jeghwai rha kpọtọ, ọrẹn Jehova yọ nọ lẹrhiẹ do. (1 Cor. 3:6, 7) Ọ merhoma re rhe taghene orhianẹ a vwa sabu ha uyono i Baibol phia vwana-a, Jehova ọ yẹ ọwan ebrurhọ fọkiẹ omẹdamu ọwan, orhiẹ fọkiẹ uchunu ihworho re ghwoghwo riẹ-ẹn! *

15. Marhẹ oma o ruẹ i Jehova ọke ohworho orho kwe yono i Baibol na, ji ha oborẹ o yono ruiruo?

¹⁵ Oma ọ merhen i Jehova ọke ohworho  orho kwerhọ irhomẹmro i Baibol na, ji yono awọrọ kpahiẹn. (Prov. 23:15, 16) Oma ọ ghini merhen i Jehova ọke rọ mẹrẹn idibo yi re ghwoghwo ji yono awọrọ inyenana! Jerẹ udje, udabọ emiamo akpọ ephian uvwre ẹgbukpe ẹga ọrẹ 2020, a ha i Baibol na yono ihworho ri te 7,705,765, ro lele fiẹ ọrẹ ihworho ri te 241,994 a homakpahontọre rẹn Jehova ji bromarhame. Idibo ekpokpọ enana, ni ne yono awọrọ jeghwai ruẹ idibo buebun. (Luke 6:40) O vwo ẹfro-o, oma ọ merhen i Jehova ọke re yono ihworho nẹ aye i rhiẹ idibo.

16. Me yẹ omamọ ẹkẹ?

¹⁶ Owian re ruẹ idibo, owian ọgbogbanhon, ọrẹn nyoma userhumu i Jehova ana sabu vwobọrhọ owian re yono awọrọ nẹ aye i vwo ẹguọlọ kpahen Jehova. Wu na sabu bru ẹkẹ wu na ha i Baibol na yono ohworho owu dede? Ana sabu mẹrẹn erere ọke arha ha erhirhiẹ ephian nọ ihworho ra vware sẹ aye i guọlọ yono i Baibol na. E vwo imwẹro taghene Jehova ọnọ ha ebrurhọ rhẹ omẹdamu ọwan.

17. Me ye ne vwo ọke arha ha i Baibol na yono ohworho?

¹⁷ Ọnana ghini uphẹn ọduado re ne ghwoghwo ji yono ihworho urhomẹmro na! Owian ọnana ọ yẹ ọwan obọdẹn omamerhomẹ. Ọnyikọ Paul, rọ ha userhumu rẹn ihworho buebun uvuẹn Thessalonica rhiẹ idibo, orho dje kpahen oborẹ oma ọ merhenriẹn te izede omana: “Me yẹ ifiẹrorhọ yanghene aghọghọ yanghene erhu omamerhomẹ ọwan obaro Ọrovwori ọwan Jesu uvuẹn ọke rọ nọ rhe? Itiọrurhomẹmro, o rhiẹ are? Are yẹ odidi ọrhẹ aghọghọ ame.” (1 Thess. 2:19, 20; Acts 17:1-4) Imizu buebun inyenana i ji vwo aruẹ ẹhẹn ọrana. Omizu ọmase owu re se Stéphanie, rẹ ọye ọrhẹ esa ye, i ha userhumu rẹn ihworho buebun bromarhame ne, ọrhọ ta, “Ghini aghọghọ rode ra na ha userhumu rẹn ihworho homakpahontọre rẹn Jehova.”