1. Me yẹ ọhọre i Jehova inyenana?

 ỌHỌRE i Jehova inyenana, yẹ ọrẹ ene ghwoghwo iyẹnrẹn esiri Uvie na uvuẹn ọsoso otọrakpọ na. (Mark 13:10; 1 Tim. 2:3, 4) Ọnana owian i Jehova, omarana orhiẹ oborẹ ọghanranren taghene ọ djẹ i Jesu nọ hẹrote owian ọrana. Ana sabu vwo imwẹro taghene fọkime Jesu ọ hẹrote owian aghwoghwo na, ana wian yen gba jerẹ oborẹ i Jehova ọ guọleriẹ bọmọke oba na ọnọ rhe.​—Matt. 24:14.

2. Me ye ne yono kpahen uvuẹn urhomu-ẹmro ọnana?

² Uvuẹn urhomu-ẹmro ọnana, ene yono kpahen oborẹ i Jesu ọ ha “ọvrẹn ra hẹrosua ro ji vwo ẹghwanren na,” yẹ ọwan ọkpọvi ro nẹ obẹ i Jehova rhe, ji ruẹ ẹkwaphiẹrhotọre sansan nẹ idibo yi sabu wian owian aghwoghwo rọ mai kerabọ uvuẹn ikuegbe ituakpọ. (Matt. 24:45) Ana ji mẹrẹn oborẹ owuowọnwan ono ruo, nọ sabu hobọtua i Jesu ọrhẹ ọvrẹn ra hẹrosua na.

3. Omẹgbanhon usun ọgo ya yẹ i Jesu ne?

³ Jesu yọ hẹrote owian aghwoghwo na. Marhẹ e ru vwo imwẹro ọrana? Bọmọke o ki riẹ odjuwu, Jesu nọ vwoma rhẹ idibo yi ezẹko uvuẹn ugbenu rọ ha Galilee. Nọ ta rẹn aye: “A yẹre mẹ omẹgbanhon ephian obẹ odjuwu ọrhẹ uvuẹn otọrakpọ na ne.” Gba djokarhọ oborẹ ọ ta kpahiẹn: “Omarana, are i nyarhẹn, nẹ are i ye ruẹ idibo ihworho uvuẹn egbamwa na ephian.” (Matt. 28:18, 19) Omarana, haba ekwakwa erọrọ, a yẹ i Jesu omẹgbanhon usun rọ nọ hẹrote owian aghwoghwo na.

4. Mesoriẹ ene ji vwo imwẹro taghene Jesu yọ hẹrote owian aghwoghwo na?

⁴ Jesu ọ tare taghene ana wian owian aghwoghwo ọrhẹ  ọre ruẹ idibo uvuẹn “egbamwa na ephian,” ọye ono ji lele idibo yi rhirhiẹ ye “ẹdẹ na ephian bọmọke enyerakpọ na ono toba.” (Matt. 28:20) Ẹmro erana i dabu dje phia taghene ana rha wian owian aghwoghwo na uvuẹn otọre ẹruete i Jesu me te ọke ọwan na.

5. Marhẹ ọwan e ru ha ẹmro ri ha Psalm 110:3 te orugba?

⁵ Jesu o vwo brudu taghene o vwo ihworho rọ nọ ha wian owian aghwoghwo na uvwre ehion enyerẹn akpọ ọnana-a. O rheri taghene ẹmro aruẹmẹrẹn ọrẹ ọbo ijoro na ono rugba: “Ihworho enọ ina homakpahontọre nẹ ẹhẹn rhe uvuẹn ẹdẹ wu ne koko egba uvweri enọ.” (Ps. 110:3) Orhianẹ we vwobọrhọ owian aghwoghwo na, nọyẹ wa hobọtua i Jesu ọrhẹ ọvrẹn ra hẹrosua na, ha aruẹmẹrẹn ọrana te orugba. Owian na o riobarorhọ, ọrẹn o vwo ebẹnbẹn.

6. Obẹnbẹn owu ọgo yẹ ighwoghwẹmro Uvie na a dẹrughwaroghwẹ inyenana?

⁶ Obẹnbẹn owu rẹ ighwoghwẹmro Uvie na a dẹrughwaroghwẹ yẹ ẹkparehaso. Inyikọ efian, ilori ẹga, ọrhẹ ihworho re suẹn, i mọrenfian kpahen owian ọwan ne. Ihworho ekrun, igbehian ọwan ọrhẹ ihworho re lele wian, i rhe rhon kpahen efian erana, aye ina sabu yẹ ọwan ọhiẹn na dobọ ogame i Jehova ọrhẹ owian aghwoghwo na ji. Uvuẹn ẹkwotọre ezẹko, ẹkparehaso na ọnọ sabu rhiẹ ọrẹ ana djofẹn mwu ọwan, kpe ọwan, mwu ọwan yanghene tobọ fi ọwan rhẹ ekanron. O vwo gbe ọwan unu taghene ihworho e ruẹ ọwan omara-an. Jesu ọrhọ ta: “Egbamwa na ephian ine vwo utuoma kpahen are fọkiẹ odẹ mẹ.” (Matt. 24:9) Fọkime ọwan e rhiẹromẹrẹn ekwakwa enana, o djephia taghene e vwo ekwerhọ i Jehova. (Matt. 5:11, 12) Dẹbolo yọ ha oberhumu ẹkparehaso na. Ọrẹn, o vwo omẹgbanhon te i Jesu-u! Nyoma userhumu i Jesu, e ghwoghwo iyẹnrẹn esiri na rẹn ihworho egbamwa ephian ne. Jene yono kpahen oborẹ o djerie phia.

7. Imwẹro ọgo rọ ha Revelation 14:6, 7 yo ruẹgba ne?

⁷ Re rhiẹ ighwoghwẹmro Uvie na, e ji vwo obẹnbẹn re ne ghwoghwo rẹn ihworho ra djẹ edjadjẹ sansan. Uvuẹn emena arudo ri Jesu ọ yẹ ọnyikọ John, Jesu ọ tare taghene iyẹnrẹn esiri na ono fi obẹnbẹn ọrana kparobọ inyenana. (Se Revelation 14:6, 7.) Izede ọgo? Ọwan a ha uphẹn rẹn ihworho buebun nẹ aye i kpahenrhọ urhomu edje Uvie na. Inyenana, ihworho uvuẹn akpọ na, a sabu se ẹbe sansan ra bọn kpahen i Baibol na uvuẹn iwẹbsaiti jw.org, fọkime o vwo iyẹnrẹn sansan uvuẹn edjadjẹ ri vrẹn 1,000! Ugboma Usuon na, o kwenu rẹn imizu nẹ aye i rhian ọbe na, Riamerhen Akpenyerẹn Bẹmẹdẹ! ro rhiẹ ọbe ra yono ihworho nẹ aye i rhiẹ idibo, rhẹ edjadjẹ rọ vrẹn 700! Ọkpọvi ra bọn kpahen i Baibol na, a homaphia nyoma ikpekporo ividio harẹn idienrhọ, ọrhẹ ẹbe sansan uvuẹn edjadjẹ re se braille harẹn ihworho ri tuẹro. Ọwan a mẹrẹn orugba aruẹmẹrẹn sansan uvuẹn i Baibol na. Ihworho “ri nẹ edjadjẹ sansan rhe uvuẹn egbamwa na,” e yono oborẹ aye ine ru djẹ “edjadjẹ ro fiotọre” ọrẹ urhomẹmro i Baibol na. (Zech. 8:23; Zeph. 3:9) Enana ephian ewian ra wian uvuẹn otọre ẹruete i Jesu Kristi.

8. Me yo nerhumu owian aghwoghwo na rhe ne?

⁸ Inyenana, ihworho ri vrẹn 8,000,000 uvuẹn ẹkwotọre 240, yi homaba ukoko i Jehova ne, habaye kẹgbukpe kẹgbukpe, uriusionrin buebun e bromarhame!  Ọrẹn, ọrọ mai ghanren ghwẹ uchunu ihworho na, yẹ iruemru Olele Kristi, nọyẹ “uruemru ọkpokpọ na,” rẹ idibo ekpokpọ enana e djephia. (Col. 3:8-10) Buebun aye i vwe rhe vwobọrhọ irueruo ọfanrhiẹ-ẹn, gbozighi-i, ni awọrọ ruẹ yanghene titi ẹkwotọre aye-e. Aruẹmẹrẹn rọ ha Isaiah 2:4 o ruẹgba ne; aye i vwe rhe ‘yono kpahen uvweri-i.’ Fọkime ọwan a wian gbanhan ku uruemru ọkpokpọ na rhọ, na ha userhumu rẹn awọrọ homaba ukoko i Jehova, ne ji djephia taghene ọwan a nyalele oniruo ọwan Kristi Jesu. (John 13:35; 1 Pet. 2:12) Mesoriẹ ekwakwa erana a phia? Fọkime Jesu ọ yẹ ọwan userhumu ra guọlọre.

9. Lele oborẹ ọ ha Matthew 24:45-47, me yi Jesu ọ tare kpahen ẹdẹ oba na?

⁹ Se Matthew 24:45-47. Jesu ọ tare taghene uvwre ẹdẹ oba na, ọye ọnọ ha “ọvrẹn ra hẹrosua ro ji vwo ẹghwanren” mwu, nọ yẹ ọwan ọkpọvi ri nẹ i Baibol rhe. Omarana, o fori ne fiẹrorhọ taghene ọvrẹn na ọnọ rhọ wian gbanhan inyenana. Omaran ọ ghini havwọ. Jesu ọ ha ẹko ehworhare ra djẹha mwu nẹ aye i sabu rha yẹ idibo i Jehova ọrhẹ ere yono i Baibol na “emaren aye uvuẹn ọke ro fori.” Ehworhare enana, i vwe ni oma aye taghene aye yẹ inini rẹn esegburhomẹmro awọrọ-ọ. (2 Cor. 1:24) Ukpomaran, aye i mẹrẹnvwrurhe taghene Jesu Kristi yẹ “osun ọrhẹ ojurhi” rẹn ihworho yi.​—Isa. 55:4.

10. Ọgo usuẹn ẹbe ri ha ifoto na yo mwuruon tuẹn ogame i Jehova rhọ?

¹⁰ Nẹ ẹgbukpe 1919 rhe, ọvrẹn ra hẹrosua na, o mwuegbe ẹbe sansan ri ha uphẹn rẹn ihworho ri vwo omamerhomẹ kpahen i Baibol na yono urhomẹmro na. Uvuẹn ẹgbukpe 1921, ọvrẹn na no mwuegbe ọbe na The Harp of God, nọ ha userhumu  rẹn ihworho yono kpahen iyono i Baibol na. Ọke erhirhiẹ e wene, ne fomu ẹbe erọrọ ba ye. Ọgo usuẹn ẹbe enana yi ha userhumu wẹn rhe, ji vwo ẹguọlọ kpahen Jehova? “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, Me yi Baibol na Ọnọ Sabu Yono Ọwan?, gbinẹ Riamerhen Akpenyerẹn Bẹmẹdẹ! ro rhiẹ ọbe ọkpokpọ na? E ruẹ ẹbe enana ephian nẹ aye i ha userhumu rẹn ọwan ruẹ idibo, aye ghwai oborẹ a guọlọre ọke re fomu aye phia.

11. Mesoriẹ ọghanren nẹ ọwan ephian i yono kpahen Jehova ọrhẹ i Baibol na rhọ?

¹¹ Orhiẹ ihworho re yono kpahen Jehova obọ ọvo, yi ne vwo irherhe okokodo kpahen Jehova ọrhẹ Baibol na-a. O fori nẹ ọwan ephian i ru te omaran. Ọnyikọ Paul ọrhọ ya: “Ihworho ri ghwanren ne ya riẹ emaren eghwaghwa.” Paul nọ habaye taghene arha ha oborẹ e yono nẹ i Baibol na ruiruo, ana sabu “fi ovẹnẹ rhẹ oborẹ ọgbare ọrhẹ oborẹ ọsọre.” (Heb. 5:14) Uvuẹn ọke egbogbanhon enana rẹ ihworho buebun e vwobọrhọ irueruo ijẹfuọn, ọnọ sabu bẹn ra na nyalele irhi Jehova. Ọrẹn, Jesu ọ ha userhumu rẹn ọwan yono ekwakwa ri na lẹrhẹ esegburhomẹmro ọwan gbanhon. Esiri ọkpọvi erana yẹ i Baibol na. Ọvrẹn ra hẹrosua na, o mwuegbe ji tiobọnu ọkpọvi enana uvuẹn otọre ẹruete i Jesu.

12. Jerẹ i Jesu, marhẹ e ru họghọ rẹn odẹ Osolobrugwẹ ne?

¹² Jerẹ i Jesu, ọwan i ghwoghwo odẹ Osolobrugwẹ omamọ ne. (John 17:6, 26) Jerẹ udje, uvuẹn ẹgbukpe 1931, ne rheri ọwan rhẹ odẹ ro nẹ i Baibol rhe, Iseri Jehova, nyoma izede ọrana, ọwan ni djephia taghene odẹ i Jehova ọghanren rẹn ọwan omamọ. (Isa. 43:10-12) Nẹ October ẹgbukpe ọrana rhe, odẹ i  Jehova nọ homaphia uvuẹn obaro Oghwa Odẹrẹ na. Habaye, a rharhumu fiẹ odẹ Osolobrugwẹ rhẹ ekete ro fori nọ homaphia uvuẹn Baibol New World Translation of the Holy Scriptures ne. Ọnana ọ ghini vẹnẹ nẹ ishọshi ri tiẹ odẹ i Jehova nẹ erhianrhian i Baibol aye buebun!

13. Me yọ yẹruọ imwẹro taghene Jesu ọ ha “ọvrẹn ra hẹrosua ro ji vwo ẹghwanren na” wian inyenana? (John 6:68)

¹³ Nyoma “ọvrẹn ra hẹrosua ro ji vwo ẹghwanren na,” Jesu o vwo ukoko oghẹnrensan uvuẹn otọrakpọ na ne, ro toroba ogame urhomẹmro. Ukẹro ọgo wa ha ni ukoko ọrana? Ọkezẹko, wu na sabu kpahenrhọ ye jerẹ ọnyikọ Peter, rọ ta rẹn Jesu: “Ọrọmo yẹ ame ine bru nya? Wẹwẹ yi vwo ẹmro rọ yẹ ohworho arhọ i bẹmẹdẹ.” (John 6:68) Marhẹ akpọ ọwan orho rhirhiẹ orhianẹ a homaba ukoko i Jehova-a? Nyoma ukoko na, Kristi ọ dabu hẹrote edamẹ ọwan ephian na sabu fuevwan ga i Jehova. O ji yono ọwan oborẹ ana wian owian Uvie na lele. Habaye, ọ ha userhumu rẹn ọwan ku “uruemru ọkpokpọ na” rhọ, neneyo a sabu ruẹ oborẹ ọnọ merhen i Jehova oma.​—Eph. 4:24.

14. Marhẹ wu ru mẹrẹn erere ne fọkime wu ha usuẹn ukoko i Jehova uvwre ọke emiamo i COVID-19 na?

¹⁴ Jesu o tiobọnu ọkpọvi ẹghwanren ọke ebẹnbẹn i rha homaphia. Erere ra mẹrẹn nẹ ọkpọvi erana i homaphia uvwre ọke emiamo i COVID-19 ọ tonrhọ. Ọke ituakpọ i vwe rhe oborẹ aye ine ruo kpahen erhirhiẹ na, Jesu nọ dabu yẹ ọwan ọkpọvi ro fiotọre kpahen oborẹ ene ru sẹrorẹ oma ọwan. A ta rẹn ọwan ne ku emru rhurhu ughwaro, ne ji tephe rẹn  ihworho ọke arha ha ekete ihworho i vuọnren. A karorhọ ekpako na nẹ aye i nekpẹn imizu ukoko na ọke ephian, ji rhe kpahen edamẹ aye ọrhẹ onyerẹnkugbe aye rhẹ Jehova. (Isa. 32:1, 2) E ji tiobọnu ọkpọvi erọrọ rẹn ọwan nyoma iyẹnrẹn ekpokpọ erẹ Ugboma Usuon na.

15. Ọkpọvi ọgo ya haphia kpahen oborẹ ene ruẹ uyono ukoko ọrhẹ owian aghwoghwo na lele uvwre ọke emiamo akpọ ephian na, me yo nerhumie rhe?

¹⁵ Uvwre ọke emiamo akpọ ephian na, na yẹre ọwan ọkpọvi rọ fiotọre kpahen oborẹ ene ruẹ uyono ukoko lele, ji vwobọrhọ owian aghwoghwo na. Ogege, ọwan ne ruẹ uyono ukoko, emẹvwa okinhariẹ ọrhẹ emẹvwa eduado nyoma itanẹti. Ne ji vwobọrhọ owian aghwoghwo na rhọ nyoma ileta ẹya ọrhẹ ifonu. Jehova ọ ha ebrurhọ rẹn omẹdamu ọwan. Eghọn ukoko buebun i nẹ iyẹnrẹn kpahen uchunu ihworho buebun ri rhiẹ ighwoghwẹmro ne. Itiọrurhomẹmro, imizu buebun i rhiẹromẹrẹn omamọ iyẹnrẹn uvwre ọke ọnana.​—Se ekpeti na “ Jehova ọ ha Ebrurhọ Rhẹ Owian Aghwoghwo na.”

16. Imwẹro ọgo ya na sabu vwo?

¹⁶ Imizu ezẹko ina sabu rhe roro taghene ukoko na ọ kẹnoma phan kpahen emiamo akpọ ephian na. Ọrẹn ọgbọ buebun, no fiotọre taghene ẹghwanren ọ ha ọkpọvi ra yẹre ọwan na. (Matt. 11:19) Ọke re ji roro kodo kpahen izede ẹguọlọ ri Jesu ọ ha sun ihworho yi, nọ yẹ ọwan imwẹro taghene o toro oborẹ ọnọ phia obaro na-a, Jehova ọrhẹ Jesu ine lele ọwan rhirhiẹ ye.​—Se Hebrews 13:5, 6.

17. Marhẹ oma o ruo ọke we roro kpahen oborẹ i Jesu ọ hẹrote ọwan lele?

¹⁷ Oma ọ dabu merhen ọwan taghene a ha otọre ẹruete i Jesu! Ọwan i ha usuẹn ukoko ro fiẹ irueruo re ru nẹ otọre rhe yanghene irueruo ẹkwotọre, ọrhẹ edjadjẹ kparobọ. E tiobọnu ọkpọvi ro nẹ i Baibol rhe rẹn ọwan kpahen oborẹ ana wian owian aghwoghwo na lele. A ji ha userhumu rẹn ọwan owuowu kuẹ uruemru ọkpokpọ na rhọ, ọrhẹ oborẹ ene ru vwọ ẹguọlọ kpahen imizu ukoko na rhọ. Omarana, o fori nẹ oma ọ merhen ọwan, fọkime Jesu yẹ oniruo ọwan!