Jesu o ghwoghwo urhomu edje ufuoma. Ọrẹn, uvuẹn erhirhiẹ owu, nọ ta rẹn inyikọ ye: “Are i vwe roro taghene mi rhe mọ ha ufuoma rhiẹ akpọ na-a; orhiẹ ufuoma mi ha rhe-e, ọrẹn odan ọlọkọ. Fọkime mi rhe mọ suẹ oghalẹ rhẹ uvwre ọhworhare ọrhẹ ọsẹ ye, ọgbọtọ ọrhẹ izie, ane ọrhẹ izu esa ye.” (Matt. 10:34, 35) Me yi Jesu ọ haye ta?

Jesu ọ guọlọ suẹ oghalẹ uvwre ihworho ekru-un, ọrẹn o rheri taghene iyono yi, ina suẹ oghalẹ uvuẹn ekrun ezẹko. Omarana, o fori nẹ eri guọlọ rhiẹ idibo i Kristi ji bromarhame, i rhe oborẹ ono nerhumie rhe kpahen orhienbro aye. Aye i rha dẹrughwaroghwu ẹkparehaso nẹ abọ ohworho aye i rọnmọren, yanghene ihworho ekrun aye ri vwe rhiẹ Iseri Jehova, ọnọ sabu bẹn aye ina nyalele iyono i Jesu.

Baibol na o jiririe rẹn Ilele Kristi, nẹ aye i “lele ihworho ephian nyerẹn ọrẹ ufuoma.” (Rom. 12:18) Ọrẹn, iyono i Jesu ina ji sabu họhọ “odan ọlọkọ” uvuẹn ekrun ezẹko. Ọnana ọ phia ọke owuọwan uvuẹn ekrun na orho rhiabọ ha iyono i Jesu, ọrẹn awọrọ e vwo ekwerhọ kpahie-ẹn, yanghene aye a tobọ kparehasuiẹ dede. Uvuẹn erhirhiẹ ọrana, ihworho ekrun na ni ne rhiẹ “evwreghrẹn” ohworho ro yono urhomẹmro i Baibol na.​—Matt. 10:36.

Idibo Kristi ri vwo ekrun re riẹ ẹga sansan, ina sabu dẹrughwaroghwu erhirhiẹ ri na damu ẹguọlọ aye i vwo kpahen Jehova ọrhẹ Jesu ni ọkezẹko. Jerẹ udje, ihworho ekrun aye ina sabu ta rẹn aye nẹ aye i vwobọrhọ orẹ rọ sọre. Arha damu aye ni, o fori nẹ aye i djẹ ọrẹ aye ina lẹrhẹ oma merhen. Jesu ọrhọ ta: “Ohworho ro vwo ẹguọlọ kpahen ọsẹ ye yanghene izie ghwẹ omẹmẹ, o mwuovwan ro no leli mẹ-ẹ.” (Matt. 10:37) Itiọrurhomẹmro, Jesu ọ vwọ ta taghene ne mwuovwan re ne lelie, idibo yi i rhe vwo ẹguọlọ kpahen eri vwiẹre aye-e. Ukpomaran, o yono aye kpahen oborẹ aye ine ru ha ekwakwa ri mai ghanren karo. Orhianẹ ohworho ekrun rọ vwọ ga i Jehova ọ kparahaso omẹdamu ọwan ra na ga i Jehova, ene ji vwo ẹguọlọ kpahiẹn, ọrẹn o fori na karorhọ taghene ẹguọlọ re vwo kpahen Jehova yọ mai ghanren.

O vwo ẹfro-o, ana sabu mwuomarhọ ọke ihworho ekrun arha kparahaso ọwan. Ọrẹn, idibo i Jesu a karorhọ ẹmro rọ tare: “Kohworho kohworho rọ vwọ kpare orhan oja ọnẹyen, ji lele mẹ, ọ sabu rhiẹ odibo mẹ-ẹ.” (Matt. 10:38) Nọyẹ, o fori nẹ Ilele Kristi, i ni ẹkparehaso ro nẹ abọ ekrun aye sa, rhiẹ usuẹn ojẹriọ aye ine vwo edirien. Uvwre ọke owu na, aye e fiẹrorhọ taghene omamọ uruemru aye, ono mwu ihworho ekrun aye ri vwa ga i Jehova wene ẹhẹn, ji yono i Baibol na.​—1 Pet. 3:1, 2.