1. Orhetio ọgo yi Paul ọ yẹ Ilele Kristi ra djẹha?

ỌNYIKỌ Paul ọ ha orhetio owu phia. Ọnana orhetio ọgo? Nọ tare: “Are i vwe jenẹ enyerakpọ ọnana ọ ma are-e.” (Rom. 12:2) Paul ọ ya ẹmro erana vwe Ilele Kristi ri havwiẹ ọke inyikọ na. Mesoriẹ ọ ha orhetio ọgbogbanhon ọnana rẹn ehworhare ọrhẹ emẹse ri homakpahontọre rẹn Osolobrugwẹ ne, ra ji ha ẹhẹn ọfuanfon na djẹha?—Rom. 1:7.

2-3. Marhẹ Echu o ru damoma riẹriẹ ọwan na nyaji Jehova vwo, marhẹ ọwan ine ru sabu ti “ekwakwa ri vi kanroma rhotọre” nẹ ọmudu ọwan?

² Ọnana o kpokpi Paul ẹhẹn, fọkime iroro esọsọ ọrhẹ iyono rẹ akpọ Echu o jirẹ ọ hobọte Ilele Kristi ezẹko ri havwiẹ ọke ọrana. (Eph. 4:17-19) Ọrana ọnọ ji sabu phia rẹn ọwan inyenana. Echu ro rhiẹ osolobrugwẹ enyerakpọ ọnana, ọ damoma rọ nọ riẹriẹ ọwan nẹ obọrẹ i Jehova nyoma ena sansan. Jerẹ udje, ọwan i rhe vwo ojemẹ re ne titi, nọ ha ojemẹ ọrana riẹriẹ owan na sabu nyaji Jehova vwo. Ọnọ sabu ha iruemru ezẹko re yonorin uvuẹn oghwa, uvuẹn isukuru ọrhẹ ekete re nurhe ruie ne rhe roro jerẹ ọye.

³ Ana sabu ti “ekwakwa ri vi kanroma rhotọre” nẹ ọmudu ọwan? (2 Cor. 10:4) Djokarhọ oborẹ Paul ọ kpahenrhọ ye lele: “Ọwan a ghwọghọ ẹfro ọrhẹ kemru  kemru ra kparoma re kparehaso irherhe Osolobrugwẹ, ọwan a jeghwai suẹn iroro ephian riẹ evrẹn nọ sabu huvwele i Kristi na.” (2 Cor. 10:5) Itiọrurhomẹmro, nyoma userhumu i Jehova ana sabu sun iroro ibiobiomu. Jerẹ oborẹ umwu o kpe ọdedju ọgbogbanhon, Baibol na ọnọ sabu ha userhumu rẹn ọwan kẹnoma rẹn iroro esọsọ ri ha uvuẹn akpọ Echu.

4. Ewene ego yẹ ọwan buebun i ruru ọke e tu rhiabọ dede urhomẹmro na?

⁴ Rharhumu roro kpahen ewene wu ruru ọke we rhiabọ dede urhomẹmro i Baibol na, jeghwai brorhiẹn wu na ga i Jehova. Harẹn ọwan buebun, ọnana o mevirhọ taghene ene tiobọnu irueruo esọsọ re ruẹ bi. (1 Cor. 6:9-11) Oma ọ merhenren ọwan taghene Jehova ọ ha userhumu rẹn ọwan sabu fi irueruo esọsọ enana kparobọ ne!

5. Idjaghwẹ eva ego ye dje rhẹ Romans 12:2?

⁵ Ọrẹn, o fo ne roro taghene erhe ruẹ ewene erọrọ-ọ. Dedevwo e vwe rhe ruẹ edandan eghwaghwa re ruẹ bọmọke e ki bromarhame-e, o fori na kẹnoma rẹn kemru kemru rọ nọ lẹrhẹ ọwan rharhumu ye ruẹ ọdandan re tiobọnu na. Marhẹ ene ru sabu ruie? Paul nọ tare: “Are i vwe jenẹ enyerakpọ ọnana ọ ma are-e, ọrẹn are i gbe ruẹ ewene nyoma are ine wene iroro are.” (Rom. 12:2) Ene vi ru ekwakwa eva. Ọrukaro, e “vwe jenẹ enyerakpọ ọnana ọ ma” ọwa-an. Ọreva, o fori ne “ruẹ ewene” nyoma re ne wene iroro ọwan.

6. Me ye yono nẹ iroro rọ ha ẹmro i Jesu ra ya rhẹ Matthew 12:43-45?

⁶ Ewene ri Paul ọ tẹmro kpahen na ọ vrẹn ewene izede ọrẹ ugboma. Ọnana ọ hobọte eghọn ephian uvuẹn akpenyerẹn ọwan. (Se ekpeti na “ Ewene Gbinẹ Omeru?”) O fori ne vi wene ẹhẹn ọwan nọyẹ irueruo ọwan, iroro ọrhẹ ojemẹ ọwan.  Omarana, o fori nẹ ọwan ephian i nọ oma ọwan, ‘Ewene mie ruẹ ni mi sabu rhiẹ obọdẹn Olele Kristi, ọrẹ omeru gbinẹ o nẹ ẹhẹn mẹ rhe? O fori nẹ ihworho ephian i mẹrẹn ovẹnẹ na. Uvuẹn ẹmro i Jesu ra ya rhẹ Matthew 12:43-45, no dje oborẹ o fori ne ru rẹn ọwan. (Seyi.) Ẹmro erana i yonirin ọwan uyono ọghoghanren ọnana: O fori ne ti iroro esọsọ nẹ ọmudu ọwan; ọ ji ghanren omamọ na ha iroro Osolobrugwẹ vuọn yen.

7. Marhẹ ọwan ine ru wene aruẹ ohworho ra havwọ uvuien?

⁷ Ene ghini sabu wene iroro ọwan yanghene aruẹ ohworho ra havwọ uvuien? Baibol na nọ tare: “Are i gba rha kpokpọ rhọ uvuẹn ẹhẹn ro sun iroro are, nẹ are i ku uruemru ọkpokpọ na rhọ ra maren lele ọhọre Osolobrugwẹ ọrẹ obọdẹn ọvwata ọrhẹ atamwu.” (Eph. 4:23, 24) Dedevwo ana sabu wene aruẹ ohworho ra havwọ uvuien, ọrẹn ọ lọhọ-ọ. Ene vi ru vrẹn ọrẹ ana tiẹn ojemẹ ọrhẹ irueruo esọsọ. O fori ne wene “ẹhẹn ro sun iroro” ọwan. Ọnana o sekpahen ọrẹ ene wene ojemẹ ọwan, oborẹ e vwo ẹguọlọ kpahen ọrhẹ oborẹ o mwu ọwan ruẹ ekwakwa. Ọnana ọ guọlọ omẹdamu ọke ephian.

8-9. Marhẹ udje omizu owu o ru dje oborẹ ọsoriẹ ọ ghanren ne wene aruẹ ohworho ra havwọ uvuien?

⁸ Jene yono kpahen udje omizu owu rọ tuekwẹre gbangbanhon bi. Ọke rọ dobọ enyo ẹda ọrhẹ owọnren ji, no mwuovwan ro no bromarhame, ọnana no rhiẹ omamọ oseri uvuẹn amwa ro rhirhiẹ. Ọrẹn o jiri-i, ọke ro bromarhame hin, nọ dẹrughwaroghwu ọdamuni ro vwo fiẹrorhọ owuọwọn owu. Ọdinyo owu nọ rhiẹ oghwa ye me lelie wọnrọn. Ọke ukaro omizu na o kwe lelie wọnrọ-ọn. Ọrẹn, ọke ọdinyo na ọ ta erharhere ẹmro kpahen odẹ i Jehova, ọnana no biomu omizu na evwan omamọ. Nọ tuekwẹre kpe ọdinyo na omamọ ekpe. Mesoriẹ omizu na o kpe yi? Dedevwo uyono i Baibol na ọ ha userhumu riẹn sabu kẹnoma rẹn ozighi egbe ne, ọrẹn ọye o ji wene ẹhẹn ro sun iroro yi-i. Nọyẹ, o ji wene aruẹ ohworho rọ ghini havwọ uvuie-en.

⁹ Ọrẹ omamerhomẹ, omizu ọnana o fiobọrhotọre-e. (Prov. 24:16) Nyoma userhumu ekpako ukoko na, nọ sabu ru riarorhọ. No mwuovwan ẹrhẹ ọkpako ukoko ọke oru. Ọrẹn owuọwọn owu uvuẹn otafe Aghwẹlẹ Uvie aye, nọ rharhumu dẹrughwaroghwu ọdamuni rọ họhọ aruẹ ọdamuni rọ phia riẹn vrẹn ne. Ọdinyo owu nọ guọlọ kpe owuọwan usuẹn ekpako ukoko aye. Me yẹ omizu na o ruru? No lele ọdinyo na tẹmro izede bọrọbọrọ, ẹhẹn ọdinyo na no zienrin, nọ jeghwai suien riẹ oboghwa ye. Mesoriẹ omizu na ọ sabu sun omayen? Omizu na o wene ẹhẹn ro sun iroro yi ne. Ọnana nọ lẹrheriẹ sabu rhiẹ ohworho ufuoma ro ji vwo omeriotọre, ọnana ọ ghini ha ujiri vwe i Jehova!

10. Me ye ne vi ru na sabu wene aruẹ ohworho ra havwọ uvuien?

¹⁰ Ewene enana i vwa phia kpregede yanghene vabọ omẹdamu-u. Ana vi “damoma” rhe djeyi phia uvwre ẹgbukpe ezẹko. (2 Pet. 1:5) Ewene enana i vwa homaphia fọkime o jiri ne ra ga i Jehova-a. O fori na damoma wene aruẹ ohworho ra havwọ uvuien. O vwo ekwakwa eghoghanren ezẹko ri na ha userhumu rẹn ọwan ruẹ ewene ọnana. Jene yono kpahen ezẹko usuẹn aye.

11. Marhẹ ẹrhomo ẹnẹ ono ru ha userhumu rẹn ọwan wene ẹhẹn ro suẹn iroro ọwan?

¹¹ Ẹrhomo ẹnẹ yẹ udjoghwẹ ọghoghanren ọrukaro ro fori na kpare. O fori na nẹrhomo jerẹ ọbo ijoro na, rọ tare: “Ma ọmudu rọ fonron rhọ mẹ, O Osolobrugwẹ, Ne wu jeghwai yẹ mẹ ẹhẹn ọkpokpọ, ọrọ gbanhonron.” (Ps. 51:10) O fori na mẹrẹnvwrurhe taghene ene vi wene ẹhẹn ro suẹn iroro ọwan, jeghwai nekpẹn userhumu mie i Jehova. Marhẹ ono ru mwu ọwan ẹro taghene Jehova ọnọ ha userhumu rẹn ọwan ruẹ ewene ra guọlọre? Ana sabu mẹrẹn urhebro nẹ ive Osolobrugwẹ ọ harẹn Emọ Israel ri rhiẹ iludu ọke Ezekiel, ọke rọ ta: “Mi na yẹ aye ọmudu owu, mi na ji yẹ aye ẹhẹn ọkpokpọ . . . jeghwai yẹ aye ọmudu rọ lọhọre, [nọyẹ ọmudu rọ nọ nyalele ọkpọvi Osolobrugwẹ].” (Ezek. 11:19) Jehova o mwuegbe rọ nọ ha userhumu rẹn emọ Israel erana wene, ono ji ruẹ omaran rẹn ọwan.

12-13. (a) Jerẹ oborẹ ọ ha Psalm 119:59, me yo fori ne roro kodo kpahen? (b) Enọ ego yo fori ne wu nọ oma?

¹² Udjoghwẹ ọghoghanren ọreva yẹ eroro kodo. Arha jomarhotọre se i Baibol na kẹdẹkẹdẹ, o fori na dabu roro kodo kpahen oborẹ e seri na neneyo a sabu rhe iroro ọwan ra guọlọre no wene. (Se Psalm 119:59; Heb. 4:12; Jas. 1:25) O fori na dabu rhe sẹ e vwo ojemẹ kpahen iroro yanghene irherhe akpọ na. O fori ne rhe oborẹ ebẹnbẹn ọwan i havwọ jeghwai wian gbanhon na sabu ti aye nẹ oma.

¹³ Jerẹ udje, nọ oma: ‘Oka omẹriọ owuorowu ọ ha uvuẹn ẹhẹn mẹ?’ (1 Pet. 2:1) ‘Ekete mi nurhe, isukuru mi nyaren, yanghene igho mi vwori ọ lẹrhe mẹ guọlọ vwo ẹhẹn omẹkpare ọkezẹko?’ (Prov. 16:5) ‘Mia ha ukẹro sakamu ni ihworho ri vwe vwo aruẹ ekwakwa mi vwori yanghene ihworho ri nẹ ẹkwotọre erọrọ rhe?’ (Jas. 2:2-4) Mi vwo ojemẹ kpahen ekwakwa Echu ọ haphia? (1 John 2:15-17) ‘Mi vwo omamerhomẹ kpahen iruẹn ọrhẹ ughe re jiri ọfanrhiẹn ọrhẹ ozighi?’ (Ps. 97:10; 101:3; Amos 5:15) Ẹkpahenrhọ harẹn enọ omobọ enana ina sabu dje wẹn ekete wu na wian kpahen. Arha sabu fi aruẹ iroro esọsọ enana ri “kanroma rhotọre” kparobọ, na na sabu lẹrhẹ oma merhen i Jehova.—Ps. 19:14.

14. Mesoriẹ ọ ghanren na djẹ omamọ igbehian?

¹⁴ Emamọ igbehian ra na djẹ yẹ idjaghwẹ ọghoghanren ọresa. Sẹ ọwan i rheri yanghene e rhe-e, okugbe ọwan ọ hobọte uruemru ọwan. (Prov. 13:20) Uvuẹn ekete ra wian yanghene uvuẹn isukuru, a mẹrẹn ihworho ri na ja ha userhumu rẹn ọwan ruẹ oborẹ i Jehova ọ guọlọre. Ọrẹn, ana sabu vwo emamọ igbehian uvuẹn uyono Ilele Kristi ọwan. Avwaye ya na mẹrẹn userhumu yanghene oruru re ne “dje ẹguọlọ ọrhẹ iruo esiri phia.”—Heb. 10:24, 25.

15-16. Marhẹ Echu o ru damoma no wene iroro ọwan?

¹⁵ Karorhọ taghene Echu o vwo ẹhẹn ro no wene iroro ọwan. Ọ ha aruẹ iyono ephian haso urhomẹmro rọ ha i Baibol na.

¹⁶ Echu ọ ji nọ ọwan aruẹ onọ rọ nọ i Eve uvuẹn ogba Eden: “Osolobrugwẹ ọ ghini ta taghene . . . ?” (Gen. 3:1) Uvuẹn akpọ ọnana rẹ Echu o suẹn, ọwan e rhon  aruẹ enọ enana: ‘Osolobrugwẹ o ghini vwo ekwerhọ kpahen orọnmo ọmase ọrhẹ ọmase yanghene ọhworhare ọrhẹ ọhworhare? Osolobrugwẹ ọ ghini guọlọ na kẹnoma rẹn orẹ i Ikrismasi ọrhẹ ẹdẹ re vwiẹ ohworho? Osolobrugwẹ ọ ghini guọlọ taghene wu vwe se ọbara rhẹ oma-a? Osolobrugwẹ ro vwo ẹguọlọ ọ ghini guọlọ na kẹnoma rẹn ohworho re vwo ẹguọlọ kpahen re le nẹ ukoko?’

17. Me yo fori ne ru orhianẹ ohworho ọ nọren ọwan enọ ri kparehaso oborẹ e vwo imwẹro kpahen, me yi Colossians 2:6, 7 ọ tare taghene ọnọ sabu nerhumie rhe?

¹⁷ O fori ne vwo imwẹro kpahen esegburhomẹmro ọwan. Arha guọlọ ẹkpahenrhọ rẹn enọ re kpokpo ẹhẹn ọwa-an, aye ina sabu lẹrhẹ ọwan vwo iroro eveva kpahen oborẹ e vwo imwẹro kpahen. Ẹhẹn eveva enana ina sabu wene iroro ọwan ji ghwọghọ esegburhomẹmro ọwan. Ọrẹn, me yo fori ne ru? Baibol na ọ ta rẹn ọwan ne wene iroro ọwan, neneyo a sabu djephia harẹn omobọ ọwan “ọhọre Osolobrugwẹ rọ gbare, ro ji rhomu, rọ jeghwai kwerhọ.” (Rom. 12:2) Nyoma re vwobọrhọ uyono omobọ ọke ephian, ọnọ sabu mwu ọwan ẹro taghene oborẹ e yonorin uvuẹn i Baibol na urhomẹmro. Ono ji mwu ọwan ẹro taghene irhi Jehova e gbare. Omarana, jerẹ orhan ro vwo esiri ọgbogbanhon, ọwan ni ne vwo ‘esegburhomẹmro rọ gbanhonron.’—Se Colossians 2:6, 7.

18. Me yọ nọ ha userhumu rẹn ọwan sẹrorẹ oma nẹ ekwakwa ibiobiomu ọrẹ akpọ Echu?

¹⁸ Ọwan ọvo yi na sabu ruẹ esegburhomẹmro ọwan gbanhon, omarana ruẹ iroro ro suon nọ kpokpọ. Nẹrhomo ọke ephian; rẹ i Jehova nọ yọ ẹhẹn ọfuanfon ọnẹyen. Dabu roro kodo; ne wu ji rha dabu ni iroro ọrhẹ irueruo enọ sua. Guọlọ obọdẹn igbehian; ha ihworho ri na ha userhumu wẹn ruẹ oborẹ ọgbare mwu igbehian. Wu rhe ruẹ ọnana, wu na sabu kẹnoma rẹn iroro esọsọ rẹ akpọ Echu o jirẹ, jeghwai “ghwọghọ ẹfro ọrhẹ kemru kemru ra kparoma re kparehaso irherhe Osolobrugwẹ.”—2 Cor. 10:5.