UVUẸN ẹgbukpe 1970, ihworho ra guọlọ iyẹnrẹn ri sekpahen akpenyerẹn ihworho ọrhẹ ekwakwa erọrọ, ni mẹrẹn ukpitọbe owu rọ torhẹre omamọ uvuẹn Gedi, rọ ha Israel, rọ kẹrẹ obọrẹ ọren o se gbe ọrẹ urhie re se Dead Sea. Aye i mẹrẹn ukpitọbe na ọke aye a tọn i synagogue owu, ra torhẹre ọke ra ghwọghọ amwa na, ọkezẹko uvuẹn ẹgbukpe 600 ọke i Kristi. Fọkime erhanren ọ torhẹ ukpitọbe na ne, a vwa rha mẹrẹn oborẹ ọ ha uvuien fiotọre-e; a sabu tobọ kpitien nọ jọ rhọ ghwọghọ-ọ. Ọrẹn, fọkiẹ imashini owu ro vwo ona re se 3-D ra ha mwu oborẹ a ya rhẹ ọbe phia, na sabu “mẹrẹn” oborẹ ọ ha uvuẹn ukpitọbe na. Habaye, nyoma imashini ọkpokpọ ọrọrọ, na sabu se oborẹ ọ ha uvuien.

Me yẹ iskani na o djephia? Oborẹ ọ ha ukpitọbe na o nẹ i Baibol rhe. Obọrẹ ọ hẹrhẹre uvuẹn ukpitọbe na o vwo eghwẹmro ezẹko ri ha uvuẹn ọtonrhọ ọbe i Leviticus. Usuẹn eghwẹmro enana yẹ oborẹ ene ru ha ikerẹmro ẹne se odẹ Osolobrugwẹ uvuẹn edjadjẹ i Hebrew. Ukpitọbe na ọ havwiẹ uvwre ẹgbukpe 50 ye te 400 ọke i Kristi, rọ lẹrheriẹ rhiẹ ukpitọbe rọ mai ho usuẹn ikpitọbe ra ha edjadjẹ i Hebrew ya ra mẹrẹn ne, avwọke a mẹrẹn imanuskripti Qumran hin. Gil Zohar rọ ya ọbe re se The Jerusalem Post, nọ tare taghene “bọmọke a ki sabu se ekete ezẹko uvuẹn ọbe i Leviticus ra mẹrẹnren uvuẹn Ein Gedi, imanuskripti erẹ ahwanren nọyẹ imanuskripti erẹ Dead Sea, i ha emrẹ ẹgbukpe 1,000 (rọ tonrhọ nẹ emrẹ 100 B.C.E.) djerhe imanuskripti erẹ Aleppo Codex (rọ tonrhọ nẹ emrẹ 930 C.E.).” Sekpahen oborẹ ewena i djephia, ẹmro ri ha uvuẹn eyaya enana i djephia taghene ẹmro i Masoret ọrẹ Torah, “a dabu sẹrorẹ aye emrẹ ẹgbukpe buebun rhe ne, habaye orusọ owuorowu ọ ji ruiẹ-ẹ.”