ỌWAN ephian i vwo imwẹro taghene Jehova yo suẹn ji hẹrote ihworho yi, na sabu ga ye uvwre “ẹdẹ ri koba” enana. (2 Tim. 3:1) Ọrẹn, o fori nẹ ọwan owuowu i huvwele i Jehova. Ana sabu ha erhirhiẹ ọwan dje erẹ emọ Israel ri ha uvuẹn ato na. O fori nẹ aye i kpahenrhọ use ukpori na.

Jehova ọ ta rẹn i Moses no ruẹ ukpori eva ra ha idọlọ efuanfon ru, rọ nọ ha “koko ihworho na kugbe jeghwai ha aye kwa nẹ ọko owuowu.” (Num. 10:2) Irherẹn na ine kporo ukpori na izede sansan no dje oborẹ a guọlọ mie ihworho na. (Num. 10:3-8) Inyenana, ihworho Osolobrugwẹ a mẹrẹn ọkpọvi nyoma izede sansan. Roro kpahen izede esa enana ra karorhọ ọwan kpahen ukpori re kporo ọke ahwanren. Inyenana, a ha use rẹn ihworho i Jehova riẹ emẹvwa eduado, a ha uyono rẹn iniruo ra ha mwu, ji haba yanghene wene ọkpọvi ra yẹ ikoko ephian.

Jehova ọrhọ guọlọ nẹ “ọsoso ihworho na” i koko uvuẹn anurẹsẹ rọ ha obọrẹ ọren ọ va nẹ sa ọrẹ tabernacle na, irherẹn na ne kporo ukpori eva na. (Num. 10:3) Ọsoso uvwioghwa na ri jedọn rhẹ ẹko ẹne kinhariẹ tabernacle na, ne rhon use na. Eri jedọn kẹrẹ anurẹsẹ na, ina sabu kpahenrhọ use na emrẹ iminiti ezẹko. Awọrọ ri ha ekete ri sereri, ina sabu kpọke ji wian gbanhon nẹ aye i ki sabu te avwaye. Oborẹ erhirhiẹ na ọ havwọ ephian, Jehova ọ guọlọre nẹ ọsoso ihworho na i koko ji mẹrẹn erere.

Inyenana, ọwan i vwe koko uvuẹn i tabernacle-e, ọrẹn a ha use rẹn ọwan riẹ emẹvwa ihworho i Jehova. Enana yẹ emẹvwa ẹkwotọre ọrhẹ emẹvwa oghẹnrensan erọrọ, avwaye ye rhon iyẹnrẹn eghoghanren ọrhẹ ọkpọvi ra na ha ruiruo. Uvuẹn ọsoso akpọ na, ihworho i Jehova a riamerhen ẹkwaphiẹrhotọre owu. Omarana, ihworho ri kpahenrhọ use na i ha usuẹn ẹko ihworho ri kwomakugbe rẹ oma ọ merhan. Ezẹko e nẹ ugbo oseseri sa. Ọrẹn, eri kpahenrhọ use na i rheri taghene o mwu omẹdamu na.

Ihworho ri ha ekete kologho ro seri abọ nẹ ekete re ruẹ omẹvwa ọduado, ina ji sabu mẹrẹn erere? Fọkiẹ ekwakwa itẹknọlọji, buebun ihworho enana na sabu riamerhen ẹkwaphiẹrhotọre owu. Jerẹ udje, uvwre ọke ọro mevi rẹn esiri ukoko o riẹ ẹkwotọre i Benin, oghọn ukoko aye no ruẹ ẹkwaphiẹrhotọre nẹ imizu ri ha Arlit, Niger, ro rhiẹ amwa rọ ha Sahara Desert, i sabu riamerhen ẹkwaphiẹrhotọre  na. Imizu emẹse ọrhẹ ehworhare kugbe eri vwo omamerhomẹ kpahen urhomẹmro na ri te uzegbowu yi kokori. Dedevwo aye i ha ekete oseseri, ọrẹn aye i sabu lele awọrọ ri bun te 44,131 ruẹ ẹkwaphiẹrhotọre na. Omizu ọhworhare owu nọ yare: “Are nobiruo omamọ, rẹ are e mwuegbe ẹkwaphiẹrhotọre ọnana rẹn ame. O djephia taghene are i vwo ẹguọlọ kpahen ame.”

Orherẹn onyẹ Israel orho kporo ukpori na ọgbọ owu, “ekakuro na ọvo ọrhẹ eri rhiẹ urhomu rẹn uriusionrin” na yi ne riẹ ekete re koko na. (Num. 10:4) Moses ọnọ sabu yẹ aye uyono ọrhẹ ọkpọvi uvuẹn avwaye. Uyono ọnana ọnọ ha userhumu rẹn aye wian owian ro teri aye uvuẹn uvwioghwa aye. Orhianẹ wẹwẹ owuọwan usuẹn ekakuro enana, wu ne ruẹ ekete omẹgbanhuọn o teri ne wu nya ji mẹrẹn erere nẹ uvuien rhe?

Inyenana, ekpako ukoko na rhẹ ‘ekakuro-o’; aye i vwe ji rhiẹ ilori rẹn ihworho Osolobrugwẹ ọ yẹrẹ aye mọre-en. (1 Pet. 5:1-3) Ọrẹn, aye a damoma hẹrote igegede Osolobrugwẹ. Omarana, aye na kpahanrhọ ye ogege orhianẹ a ha use rẹn aye nẹ aye i rhiẹ uyono erọrọ, jerẹ Isukuru Ekpako Ukoko ọrhẹ Idibo Owian. Uvuẹn isukuru enana, ekpako ukoko ne yono oborẹ aye ine ru sabu tẹn ona uvuẹn owian ukoko na. Ọnana nọ lẹrhẹ ihworho uvuẹn ukoko na ruẹ riaro uvuẹn ogame i Jehova. Orhianẹ we ji riẹ owu usuẹn isukuru enana-a, wa mẹrẹn erere mie ihworho ri nya ne.

Irherẹn emọ Israel e kporo ukpori na izede ro wene ọkezẹko. Ọnana nọ lẹrhẹ ọsoso emọ Israel na rhe taghene Jehova ọ guọlọre nẹ aye i kwa. (Num. 10:5, 6) Aye arha kwa, aye ne dje okugbe oghẹnrensan phia, ọrẹn ọ ji guọlọ owian ọgbogbanhon. Upheri ọnọ sabu ruẹ ihworho ezẹko oma aye ina kwa. Mesoriẹ?

Ezẹko ina sabu rhe roro taghene use na ọ phẹrẹ phan, ọ ji rhe kpregede. “Ọkezẹko, avwre na ono rhirhiẹ ye nẹ owuọwọn ye te urhiọke ọvo.” Uvuẹn ọke ọrọrọ, avwre na ọ dajẹ emrẹ “ẹdọke eva, ubiamo owu yanghene jiri ghwomaran” aye a ki kwa. (Num. 9:21, 22) Ọgbọ emwa yẹ aye i kware? Numbers urhomu-ẹmro 33 ọ hunute ekete 40 rẹ emọ Israel i rhirhiẹre.

Ọkezẹko, ezẹko i mẹrẹn ekete rọ dabu vwo ophie. Ọnana ọ ghwai serhọ maido uvuẹn “ato eduado ri ji mwuofẹn” na. (Deut. 1:19) Omarana, ọnọ sabu lẹrhẹ ezẹko roro taghene aye i rha kwa, erhirhiẹ aye ono biomu rhọ.

Ivwioghwa na i rha tuẹn ẹkwa rhọ ne, ezẹko i guọlọ erhionrin bọmọke ono ki te ọke aye. Aye ephian ye rhon edon ukpori na, ọrẹn rhẹ aye ephian yi na sabu kwa ukwọgbọ-ọ. Edon ukpori ọrana ọ djephia taghene ivwioghwa ri ha obọrẹ ọren ọ va nẹ sa, nọyẹ Judah, Issachar, ọrhẹ Zebulun, i gba kwa. (Num. 2:3-7; 10:5, 6) Aye i rha kwa hin ne, irherẹn na, na rharhumu kporo ukpori na ọgbọ ọreva ye, neneyo ivwioghwa ra ghalẹ rhẹ ẹko esa ri ha obọrẹ o riotọre na i sabu kwa. Omaran yẹ irherẹn na ine ruo, bọmọke ọsoso emọ Israel ina kwa.

Ọkezẹko wu vwo aruẹ iroro ọnana vrẹn ne kpahen ewene re ruru uvuẹn ukoko na. Wu na sabu rhe roro taghene ewene na i bun phan. Yanghene ewene owu re ruru ọ dabu serhọ wẹn, nu we roro taghene manẹ e vwe wene yanghene kwaphiẹ aye rhọ-ọ. Oborẹ erhirhiẹ na ọ havwọ ephian, ọnọ sabu bẹn wu ne vwo erhionrin, ji rienrioma rhẹ ewene na. Ọrẹn, arha damoma nyalele ewene na, ana mẹrẹn ebrurhọ i Jehova.

Uvuẹn ọke i Moses, Jehova o suẹn iduduru ehworhare, emẹse ọrhẹ emọvwerhe nyavrẹn ato na. O vwo rhiẹ ẹruete ọrhẹ ọkpọvi Jehova, manẹ aye i vwa sabu nyavrẹn ye-e. Inyenana, ọwan e ji fiomarhọ ogame i Jehova nyoma ọkpọvi ọnẹyen. Itiọrurhomẹmro, ọwan a damoma! Omarana, jenẹ ọwan ephian i brorhiẹn ra na kpahenrhọ use ukpori na jerẹ oborẹ emọ Israel ri fuevwan ọke ahwanren i ruru!