1. Me yọ ha userhumu rẹn ihworho i Jehova ga ye udabọ ebẹnbẹn aye a dẹrughwaroghwẹ?

 BAIBOL na o se ọke ọwan na—“ọke egbogbanhon ra bẹn enyerẹn.” (2 Tim. 3:1) Haba ebẹnbẹn rẹ ihworho ephian a dẹrughwaroghwẹ uvuẹn enyerakpọ ọnana, ihworho i Jehova a ji dẹrughwaroghwẹ ẹkparehaso sansan. Me yọ ha userhumu rẹn ọwan ga i Jehova nyarhẹn udabọ ebẹnbẹn enana? Ọwan e ruẹ te omaran fọkime ọwan i me rhe i Jehova ne taghene, ọye yẹ “Osolobrugwẹ ro nyerẹn na.”—Jer. 10:10; 2 Tim. 1:12.

2. Izede ọgo yi Jehova o rhiẹ Osolobrugwẹ ro nyerẹn na?

² Jehova yẹ Ohworho rọ sẹrorẹ ọwan uvuẹn ọke ebẹnbẹn, rọ ji guọlọ uphẹn rọ nọ hobọtua ọwan. (2 Chron. 16:9; Ps. 23:4) Arha karorhọ taghene Jehova o vwo ọdamẹ kpahen ọwan, ọnọ ha userhumu rẹn ọwan nyerẹn ghele ebẹnbẹn ephian ra dẹrughwaroghwu. Roro kpahen oborẹ Orodje David o ruẹ ọnana lele.

3. Me yi David o mevirhọ ọke rọ ta taghene “Jehova o nyerẹn”?

³ David o rhe i Jehova, ọ ji hẹrosuiẹ. Ọke evwreghrẹn yen tobọ te Orodje Saul a damoma aye ine kpe yi, David nọ nẹrhomo vwe i Jehova nọ ha userhumu riẹn. (Ps. 18:6) Ọke Osolobrugwẹ ọ kpahenrhọ ẹrhomo i David ji simie hin, nọ tare: “Jehova o nyerẹn!” (Ps. 18:46) Me yẹ ẹmro i David erana i mevirhọ? Ekete owu ra rionbọrhọ ọ tare taghene David o dje imwẹro ro vwori phia taghene Jehova “yẹ osolobrugwẹ ro nyerẹn na, rọ chochọn ihworho yi ọke ephian.” Oborẹ i David o rhiẹromẹrẹn ne ọ yẹriẹ imwẹro taghene Osolobrugwẹ o nyerẹn, ọnana nọ yẹriẹ oruru rhọ rọ nọ ga i Jehova jeghwai jirie.—Ps. 18:​28, 29, 49.

4. Marhẹ e ru mẹrẹn erere erhe ni Jehova taghene ọye yẹ Osolobrugwẹ ro nyerẹn na?

 ⁴ Erhe vwo imwẹro taghene Jehova yẹ Osolobrugwẹ ro nyerẹn na, ọnọ ha userhumu rẹn ọwan ga ye rhẹ oruru. Ene vwo omẹgbanhon re ne din ebẹnbẹn ọrhẹ oruru re ne fiomarhọ ogame i Jehova rhọ. Ene ji brorhiẹn taghene ene tikẹrẹ i Jehova ọke ephian.

OSOLOBRUGWẸ RO NYERẸN NA ONO RUO GBANHON

5. Me yọ nọ sabu yẹ ọwan omẹgbanhon arha dẹrughwaroghwẹ ebẹnbẹn? (Philippians 4:13)

⁵ Ana sabu din ebẹnbẹn ephian, orhianẹ a karorhọ taghene Jehova o nyerẹn, ọnọ ji sẹrorẹ ọwan. Itiọrurhomẹmro, o vwo obẹnbẹn owuorowu rọ gbanhon phan rẹn Osolobrugwẹ-ẹ. Ọye yẹ Ọrọmaigbanhon na, ọnọ sabu yẹ ọwan omẹgbanhon re ne vwo edirin. (Se Philippians 4:13.) Omarana, o fori ne vwo imwẹro kpahiẹn uvuẹn ọke ebẹnbẹn. Arha mẹrẹn obẹhatua i Jehova uvuẹn ọke ra dẹrughwaroghwẹ ebẹnbẹn ekokamu, ọnọ ji lẹrhẹ ọwan vwo imwẹro taghene ọnọ hobọtua ọwan arha dẹrughwaroghwu ebẹnbẹn egbogbanhon.

6. Me yi David o rhiẹromẹrẹn ọke rọ ha uphuphẹn, rọ lẹrhẹ imwẹro ro vwo kpahen i Jehova gbanhonrhọ?

⁶ Roro kpahen erhirhiẹ eva ri lẹrhẹ imwẹro ri David o vwo kpahen i Jehova gbanhonrhọ. Ọke i David ọ ha uphuphẹn, ọya ọrhẹ okporokpo ni kpare ogegede ọsẹ ye uvuẹn erhirhiẹ eva. Uvuẹn erhirhiẹ eva na, David o fiudugbere hatua eranmo na ji simi ogegede na. Udabọ ọrana, ọ ha ujiri rẹn omaye-en. O rheri taghene Jehova yọ ha userhumu riẹn. (1 Sam. 17:​34-37) Oborẹ i David o rhiẹromẹrẹn na ọ sẹriẹ ẹro-o. Ekwakwa enana ro roro kpahen, yọ yẹriẹ imwẹro taghene Osolobrugwẹ ro nyerẹn na ono ruie gbanhon obaro na.

7. Me yi David ọ tẹnrovi, marhẹ ọnana o ru ha userhumu riẹn wọnrọn hasuẹ Goliath?

⁷ Ọke oru, ọke i David ọ ji ha uphuphẹn, no riẹ ekete rẹ isodja Israel i jedọn rhọ. Nọ mẹrẹnvwrurhe taghene ofẹn o mwu isodja emọ Israel ephian, fọkiẹ aduaran i Philistine owu re se i Goliath ro “hinmi isodja Israel.” (1 Sam. 17:​10, 11) Isodja na a zofẹn fọkime aye i tẹnrovi oborẹ aduaran na ọ do te, ọrhẹ ẹmro ekan rọ ta hasuẹ emọ Israel. (1 Sam. 17:​24, 25) Ọrẹn, David ọ ha ukẹro rọ vẹnẹren ni erhirhiẹ na. O nirien taghene Goliath ọ “ha Osolobrugwẹ ro nyerẹn na djechẹẹ,” ukperẹ ono rhiẹ isodja Israel ọvo. (1 Sam. 17:26) David ọ tẹnrovi Jehova. David o rheri taghene Osolobrugwẹ rọ ha userhumu riẹn ọke ro rhiẹ osuingegede, ọnọ ji ha userhumu riẹn uvuẹn erhirhiẹ ọnana. Fọkiẹ imwẹro ọnana ri David o vwo kpahen i Jehova, nọ wọnrọn hasuẹ i Goliath ji fiekparobọ!—1 Sam. 17:​45-51.

8. Marhẹ ene ru karorhọ i Jehova arha dẹrughwaroghwu ebẹnbẹn? (Ni ifoto na.)

⁸ Ana ji sabu fiẹ ebẹnbẹn ephian kparobọ, arha karorhọ taghene Osolobrugwẹ ro nyerẹn na, o mwuegbe rọ nọ ha userhumu rẹn ọwan. (Ps. 118:6) Ana sabu ruẹ imwẹro ọwan gbanhon nyoma re ne roro kpahen oborẹ o ru vrẹn ne. Se iyẹnrẹn i Baibol ri na lẹrhuọ karorhọ oborẹ i Jehova o ru simi idibo yi ọke ahwanren. (Isa. 37:​17, 33-37) Habaye, se iyẹnrẹn ri ha uvuẹn iwẹbsaiti jw.org, ri dje kpahen oborẹ i Jehova o ru hobọtua imizu ọwan ọke ọnana. Damoma karorhọ erhirhiẹ sansan ri Jehova ọ hobọtua ne. Orhianẹ emru kirighwo ọ ji phia uvuẹn akpenyerẹn ọnọ rọ họhọ ọke re kpe ọya yanghene okporokpo-o, wu vwe jẹ ẹhọn seriotọre-e. Mesoriẹ?  Fọkime Jehova o ruẹ ekwakwa irhorhomu buebun wẹn ne! Ọ tobọ ha use wẹn ne wu vwo onyerẹnkugbe rhẹ ọye. (John 6:44) Itiọrurhomẹmro, nyoma userhumu i Jehova yi wa ji ha uvuẹn urhomẹmro na. Wu na sabu rẹ ye nọ ha userhumu wẹn karorhọ ọke rọ kpahenrhọ ẹrhomo ọnọ, hobọtua uvuẹn ọke ro serhọ, yanghene ọke rọ sẹroruọ uvuẹn ọke ebẹnbẹn. We rhe roro kpahen ekwakwa enana, wu ne vwo imwẹro rhọ taghene Jehova ọnọ rhọ ha userhumu wẹn ọke ephian.

9. Ukẹro ọgo yo fori na ha ni ebẹnbẹn ọwan? (Proverbs 27:11)

⁹ Erhe ni Jehova taghene ọye Ohworho ro nyerẹn, ọnọ ha userhumu rẹn ọwan ha ukẹro ro serhọ ni ebẹnbẹn ọwan. Izede ọgo? Ọwan ine vwo imwẹro taghene ebẹnbẹn ọwan o surhobọmwu ẹmro ọghoghanren owu rọ homaphia uvwre i Jehova ọrhẹ Echu. Dẹbolo ọ tare taghene arha dẹrughwaroghwu ebẹnbẹn, ana sẹrerhumuji Jehova. (Job 1:​10, 11; se Proverbs 27:11.) Ọrẹn erhe fiẹ ebẹnbẹn ọwan kparobọ, ne dje Echu rhiẹ ọmọronfian, ji djephia taghene e vwo ẹguọlọ kpahen i Jehova. Wa dẹrughwaroghwẹ ẹkparehaso igọmẹti, akpenyerẹn ọgbogbanhon, echẹdjẹ uvuẹn owian aghwoghwo na, yanghene ebẹnbẹn erọrọ? Orhiomaran, karorhọ taghene erhirhiẹ wu havwọ na, ọ yẹruọ uphẹn wu ne ruẹ ọmudu i Jehova ghọghọ. Ji karorhọ taghene ọ vwọ samọ lẹrhuọ dẹrughwaroghwu ọdamuni wu na ja sabu di-in. (1 Cor. 10:13) Ọnọ yọ omẹgbanhon wu ne vwo edirin.

OSOLOBRUGWẸ RO NYERẸN NA ỌNỌ KWOSA WẸN

10. Me yẹ Osolobrugwẹ ro nyerẹn na ono ru rẹn ihworho ra ha ẹga riẹn?

¹⁰ Jehova yẹ Ọrọ kwosa rẹn ihworho ra ha ẹga riẹn. (Heb. 11:6) Ọnọ yẹ ọwan ufuoma ọrhẹ ẹhẹn otemẹ vwana, ji yẹ ọwan arhọ i bẹmẹdẹ obaro na. Ana sabu hẹroso i Jehova, fọkime e rheri taghene o vwo omẹgbanhon ọrhẹ omwemẹ rọ nọ kwosa rẹn ọwan. Imwẹro ọrana yo mwu ọwan fiomarhọ ẹga i Jehova vuọnvuọn,  jerẹ oborẹ idibo i Jehova ọke ahwanren i ruru. Ọrana yẹ oborẹ i Timothy o ruru uvuẹn ọke Ilele Kristi erukaro na.—Heb. 6:​10-12.

11. Me yo mwu i Timothy wian gbanhon uvuẹn ukoko na? (1 Timothy 4:10)

¹¹ Se 1 Timothy 4:10. Timothy ọ hẹrosuẹ Osolobrugwẹ ro nyerẹn na. Fọkiẹ ọnana, nọ dabu homakpahontọre wian gbanhon uvuẹn ukoko na. Izede ego? Ọnyikọ Paul ọ ha urhebro rẹn i Timothy no rho ruẹ ena ẹmro ẹta ye rhomẹrhọ. Habaye, o fori no rhiẹ omamọ udje rẹn imizu ukoko na, te emọvwerhe ọrhẹ imirẹghwa. A ji yẹ ye ewian egbogbanhon ezẹko, ro sekpahen ọrẹ ono tiobọnẹ ọghwọghwu izede ẹguọlọ, harẹn ihworho ri guọleriẹ. (1 Tim. 4:​11-16; 2 Tim. 4:​1-5) Timothy o rheri taghene Jehova ọnọ vi kwosa riẹn, ọrhọ tobọ rhianẹ awọrọ i vwe dje ọdaremẹro phia riẹn yanghene djokarhọ ewian ye-en.—Rom. 2:​6, 7.

12. Me yọ nọ ha userhumu rẹn ekpako ukoko gbromarhọ owian aye? (Ni ifoto na.)

¹² Inyenana, ekpako ukoko ina sabu vwo imwẹro taghene Jehova ọ mẹrẹn emamọ ewian aye, o ji vwo ọdaremẹro kpahiẹn. Haba owian ra ha urhebro rẹn imizu na, ọre tiobọnẹ uyono, ji vwobọrhọ owian aghwoghwo na, ekpako ukoko buebun a hobọtua owian ebanbọn ukoko na, ji ha userhumu rẹn imizu rẹ oghwọghọ kpregede ọ phia riẹn. Ezẹko i ha usuẹn Patient Visitation Group yanghene Umẹ rọ Hẹrote Omesimo. Ekpako ukoko ra homakpahontọre wian ewian enana i rheri taghene ukoko na ọrẹ i Jehova, orhiẹ ọrẹ ituakpọ-ọ. Fọkiẹ ọnana, aye na fuevwan wian owian ra yẹrẹ aye fọkime aye i rheri taghene Jehova ọnọ kwosa rẹn aye.—Col. 3:​23, 24.

13. Ukẹro ọgo yi Jehova ọ ha ni omẹdamu ọwan uvuẹn ogame ọnẹyen?

¹³ Ọwan ephian i sabu rhiẹ ekpako ukoko-o. Ọrẹn, o vwo oborẹ ọwan  ephian ina sabu ru rẹn i Jehova. Oma ọ merhen Osolobrugwẹ, erhe ruẹ ekete omẹgbanhon ọwan o teri uvuẹn ogame ọnẹyen. Ọ djokarhọ itetoro ọwan fọkiẹ owian akpọ ephian na, o toro oborẹ ọ kamu te-e. Oma ọ merhiẹn kpahen ọwan, erhe fiẹ ofa kparobọ ji damoma kpahenrhọ enọ uvuẹn uyono, oma ọ ji merhiẹn orhianẹ a kpariroro vrẹn orusọ awọrọ ji harhomu aye. Wu rha tobọ roro taghene oborẹ we ruẹ o vwo rho buẹn te-e, vwo imwẹro taghene Jehova o vwo ọdaremẹro kpahen owian ọnọ. O vwo ẹguọlọ kpahuọn, ọnọ ji kwosa wẹn.—Luke 21:​1-4.

DAJI KẸRẸ OSOLOBRUGWẸ RO NYERẸN NA

14. Arha daji kẹrẹ i Jehova, marhẹ ọnana ono ru ha userhumu rẹn ọwan fuevwan? (Ni ifoto na.)

¹⁴ Erhe vwo obọdẹn onyerẹnkugbe rhẹ i Jehova, nọ nọ lọhọ ra na fuevwan kpahiẹn. Ọrana oborẹ ọ phia rẹn i Joseph. O fiudugbere tiẹn ọdamuni ọfanrhiẹn rọ dẹrughwaroghwu. O vwo obọdẹn onyerẹnkugbe rhẹ Osolobrugwẹ, ọ ji guọlọ nẹ oma ọ merhiẹn. (Gen. 39:9) Na ki sabu vwo obọdẹn onyerẹnkugbe rhẹ i Jehova, ana vi kwaphiẹ ọke rhọ nẹrhomo vwe yi, ji rhe yono i Baibol na. Onyerẹnkugbe ọwan rhẹ ọye nọ nọ gbanhonrhọ. Erhe vwo obọdẹn onyerẹnkugbe rhẹ i Jehova jerẹ i Joseph, na na kẹnoma rẹn kemru kemru rọ nọ lẹrhẹ evwan biomie kpahen ọwan.—Jas. 4:8.

15. Me ya na sabu yono nẹ oborẹ ọ phia rẹn emọ Israel uvuẹn ato na? (Hebrews 3:12)

¹⁵ Ihworho ri vwa hẹroso i Jehova, i sabu dje atamwu phia kpahiẹ-ẹn. Roro kpahen oborẹ ọ phia rẹn emọ Israel ọke aye a ha uvuẹn ato na. Aye i rheri taghene Jehova o nyerẹn, ọrẹn, aye ni vwo ẹhẹn eveva sẹ i Jehova ọnọ hẹrote edamẹ aye. Aye ni tobọ nọ: “Jehova ọ ha uvwre ọwan gbinẹ ọ havwiẹ-ẹ?” (Ex. 17:​2, 7) Ọke oru, aye ni kparehasuẹ i Jehova. Itiọrurhomẹmro, o fori na kẹnoma  rẹn orharhere uruemru aye, ro rhiẹ udje orhetio harẹn ọwan inyenana.—Se Hebrews 3:12.

16. Me yọ nọ sabu damẹ esegburhomẹmro ọwan ni?

¹⁶ Ebẹnbẹn akpọ na ọ lẹrhiẹ bẹn rẹn ọwan, ra na daji kẹrẹ i Jehova. Ihworho buebun a ta taghene Osolobrugwẹ ọ havwiẹ-ẹ. Ọgbọ buebun, nọ họhọre taghene evwọkon enana ye fiẹkparobọ. Arha mẹrẹn aruẹ emru ọnana, ọnọ sabu damẹ esegburhomẹmro ọwan ni. Dedevwo e vwo imwẹro taghene Osolobrugwẹ ọ havwiẹ, ọrẹn, ana sabu rhe vwo ẹhẹn eveva sẹ ọnọ ha userhumu rẹn ọwan. Ọbo ijoro rọ ya i Psalm 73, ọ mẹrẹn omayen uvuẹn aruẹ erhirhiẹ ọnana. Ọ mẹrẹnvwrurhe taghene akpọ o rhomẹ rẹn ihworho, ra vwa nyalele irhi Osolobrugwẹ. Fọkiẹ ọnana, no vwo ẹhẹn eveva sẹ o fori na tobọ ha ẹga rẹn Osolobrugwẹ.—Ps. 73:​11-13.

17. Me yọ nọ ha userhumu rẹn ọwan daji kẹrẹ i Jehova?

¹⁷ Me yọ ha userhumu rẹn ọbo ijoro na kpọ iroro yi vi? O roro kodo kpahen oborẹ ọnọ phia rẹn ihworho ri sẹrerhumuji Jehova. (Ps. 73:​18, 19, 27) O ji roro kpahen ebrurhọ ra mẹrẹn arha ga i Jehova. (Ps. 73:24) Ana ji sabu roro kpahen ebrurhọ ri Jehova ọ yẹrẹ ọwan ne. Roro kpahen oborẹ akpenyerẹn ọwan o rhirhiẹ bi, orhianẹ a vwa ga i Jehova-a. Erhe ruẹ omaran, ana sabu fuevwan kpahen i Jehova, ji ta jerẹ ọbo ijoro na: “Harẹn omẹmẹ, orhomurun mi ne tikẹrẹ Osolobrugwẹ.”—Ps. 73:28.

18. Mesoriẹ ana dẹrughwaroghwu obaro na rhẹ imwẹro?

¹⁸ Ana sabu dẹrughwaroghwu ebẹnbẹn ephian ra na mẹrẹn uvuẹn ẹdẹ ri koba enana, fọkime ọwan e ‘gbodibo harẹn Osolobrugwẹ urhomẹmro ro nyerẹn na.’ (1 Thess. 1:9) Osolobrugwẹ ọ hẹrote ihworho ra ga ye, ono ji rhe ruẹ te omaran ọke ephian. Ọ ha userhumu rẹn idibo yi ọke ahwanren, ọnọ ji ha userhumu rẹn ọwan inyenana. Phẹrẹkpẹ, ene rhiẹromẹrẹn ukpokpogho rọmaido rọ nọ homaphia uvuẹn otọrakpọ na. Ọrẹn, Jehova rhẹ ọwan i gba havwiẹ. (Isa. 41:10) Jenẹ ọwan ephian i “fiudugbere ta: ‘Jehova yọ sa mẹ erhumu; mi zofẹ-ẹn.’”—Heb. 13:​5, 6.