Na sabu lẹrhẹ oma merhen i Jehova, ene vi vwo esegburhomẹmro. Ọrẹn, Baibol na ọ tare taghene “orhiẹ ihworho ephian yi vwo esegburhomẹmro-o.” (2 Thess. 3:2) Ọnyikọ Paul ọ tare taghene ihworho ri kparehasuiẹ “evwọkon ri ji mwuofẹn,” ro fori na sẹroriẹ nẹ abọ aye. Ọrẹn, oborẹ ọ ta kpahen esegburhomẹmro na, o kerabọ vrẹn omaran. Ihworho ezẹko a ha arudo tiẹn eka ri djephia taghene Osolobrugwẹ yẹ Ọmemama. (Rom. 1:20) Awọrọ ina sabu ta taghene omẹgbanhon ọrọrọ rọ ghwẹ ọrẹ Osolobrugwẹ, yẹ aye i vwo esegburhomẹmro kpahen. Ọrẹn, aruẹ imwẹro ọrana ọ sabu lẹrhẹ ohworho ruẹ oborẹ ọnọ merhen i Jehova oma-a.

Ene vi vwo imwẹro taghene Jehova o nyerẹn, ọye yọ jeghwai “kwosa” rẹn ihworho ri vwo esegburhomẹmro ọgbogbanhon kpahiẹn. (Heb. 11:6) Esegburhomẹmro ọ ha usuẹn omamọ ẹhẹn ọfuanfon Osolobrugwẹ. Na sabu vwo ẹhẹn ọfuanfon na, ana vi rẹ i Jehova nyoma ẹrhomo no tiobọnie rẹn ọwan. (Luke 11:​9, 10, 13) Izede owu kirighwo ene ru vwo ẹhẹn ọfuanfon na, yẹ nyoma isese i Baibol. Habaye, o fori ne roro kpahen oborẹ e seri ji damoma haye ruiruo. Ọke ọrana, ẹhẹn ọfuanfon na nọ nọ lẹrhẹ ọwan vwo esegburhomẹmro, ji ha userhumu rẹn ọwan ruẹ oborẹ ọnọ lẹrhẹ oma merhen i Jehova.