Ẹmro na “Wu na sẹrorẹ aye,” rọ ha uvuẹn Psalm 12:7 ọ rionbọrhọ “ihworho ra rioja” (oghwẹmro ọrẹ 5) gbinẹ “ẹmro i Jehova” (oghwẹmro ọrẹ 6)?

Ẹmro ri ha urhomu-ẹmro i Baibol ọrana o djephia taghene oghwẹmro na ọ rionbọrhọ ihworho.

Psalm 12:​1-4 ọ tare taghene “evwata arha ha uvwre ituakpọ-ọ.” Vwana, gbe roro kpahen Psalm 12:​5-7, ro rhiẹ eghwẹmro rẹ onọ na o surhobọmwu.

Oghwẹmriẹn ọrẹ 5, ọ hunute oborẹ Osolobrugwẹ ono ru rẹn ihworho ra “rioja.” Ono simi aye.

Oghwẹmriẹn ọrẹ 6 nọ habaye taghene “ẹmro i Jehova i fonron,” jerẹ ‘idọlọ efuanfon re ru fon ne.’ Ọnana ẹmro rẹ Ilele Kristi urhomẹmro i vwo ekwerhọ kpahen.—Ps. 18:30; 119:140.

Vwana, gbe roro kpahen oghwẹmro rọ ha kpahiẹn, nọyẹ Psalm 12:7: “Wu na sẹrorẹ aye, O Jehova; wu na sẹrorẹ aye owuowu nẹ uvwiẹ ọnana bẹmẹdẹ.” Me yẹ ẹmro na “aye” ọ rionbọrhọ?

Nime oghwẹmriẹn ọrẹ 6 ọ hunute “ẹmro i Jehova,” ihworho ezẹko ina sabu rhe roro taghene ẹmro na “aye,” rọ ha oghwẹmriẹn ọrẹ 7 o mevirhọ ẹmro Osolobrugwẹ. Jerẹ oborẹ e rheri, Osolobrugwẹ ọ sẹrorẹ i Baibol na ne, udabọ omẹdamu rẹ evwreghrẹn ọwan i djephia ne, nẹ aye i sabu ghwọghiẹ ji tie nẹ otọre.—Isa. 40:8; 1 Pet. 1:25.

Ọrẹn, oborẹ oghwẹmriẹn ọrẹ 5 ọ ta kpahen ọ ji gba. Fọkime Jehova ọnọ rhọ ha userhumu ọrhẹ obẹhatua rẹn “ihworho ra rioja” ọrhẹ ihworho re “sehiẹn,” jerẹ oborẹ o ruẹ ọke jijiri rhe na.—Job 36:15; Ps. 6:4; 31:​1, 2; 54:7; 145:20.

Omarana, me yẹ ẹmro na “aye” ọ rionbọrhọ uvuẹn oghwẹmriẹn ọrẹ 7?

Ẹmro ri ha oghwẹmro i Baibol na, o djephia taghene “aye” ra ha ruiruo, ọ rionbọrhọ ihworho.

Uvuẹn Psalm 12:​1, Baibol na ọ ta kpahen “ihworho ri fuevwan” ra mọrenfian rẹn aye ne. Ọke oru, nọ rhọ ta taghene Jehova ọnọ kparehasuẹ ihworho ra ha ẹrẹnmo aye ta erharhere ẹmro. Ọbe i Baibol ọrana ọ yẹrẹ ọwan imwẹro taghene ana sabu hẹroso i Jehova nọ chochọn ihworho yi, fọkime ẹmro enẹyen i fonron.

Omarana, oghwẹmriẹn ọrẹ 7 o mevirhọ taghene Jehova ọnọ sẹrorẹ ihworho rẹ evwọkon e sehiẹn, ji hẹrote “aye.”

Ẹmro na “aye” ra ha ruiruo uvuẹn udjoghwẹ ọnana, ya ji ha ruiruo uvuẹn ekete ezẹko uvuẹn Obọrẹ a ha Edjadjẹ i Hebrew ya uvuẹn Eyaya Ọfuanfon na. Uvuẹn erhianrhian i Baibol ọrukaro re tu rhian nẹ edjadjẹ i Hebrew riẹ Greek, ẹmro na “ame” ọ homaphia ọgbeva uvuẹn oghwẹmriẹn ọrẹ 7, ọnana ọ rionbọrhọ ihworho Osolobrugwẹ re sehiẹn, ra ji rioja. Obẹtaye, oghwẹmriẹn ọrẹ 7 nọ tare taghene ana sẹrorẹ “aye owuowu” rọ fuevwan nẹ “uvwiẹ ọnana,” nọyẹ nẹ abọ evwọkon na. (Ps. 12:​7, 8) Uvuẹn erhianrhian owu ra rhian nẹ edjadjẹ Hebrew riẹ Aramaic, oghwẹmriẹn ọrẹ 7 ọ ji ha ẹmro na “aye” ruiruo, no seri: “Wẹwẹ, O ỌROVWORI, yi ne simi evwata na, wu na sẹrorẹ aye nẹ uvwiẹ ọvwiavwia ọnana bẹmẹdẹ. Evwọkon na a nya sa nya rie jerẹ idiedin, ro se ọbara ituakpọ.” Ọnana ọ lẹrhẹ imwẹro ọwan gbanhonrhọ taghene Psalm 12:​7, ọ vwọ rionbọrhọ ẹmro Osolobrugwẹ-ẹ.

Ukpomaran, o tiobọnẹ ifiẹrorhọ rẹn “ihworho ri fuevwan” taghene—Osolobrugwẹ ọnọ kpare idjaghwẹ.