Ilele Kristi ezẹko a ha ifonu, ikọmputa yanghene ekwakwa erọrọ, lele ihworho ekrun aye ọrhẹ imizu ukoko na tẹmro. Ọrẹn, o fori nẹ Olele Kristi ro te edje ne ọ karorhọ urhebro ọnana: “Ọvwẹghwanren ọrhọ mẹrẹn okpetu, no tiomanuẹ; ọrẹn ọvwẹkpa no dumu urhomu ruiẹ, nọ rioja omiamiamo ro nerhumie sa.”—Prov. 27:12.

Ọwan i rheri taghene Jehova o vwo omwemẹ rọ nọ hẹrote ọwan. Omarana, e vwe kwomakugbe ihworho ra suẹ oghalẹ, ere le nẹ ukoko yanghene ere yono iyono efia-an. (Rom. 16:17; 1 Cor. 5:11; 2 John 10, 11) Ihworho ezẹko re kwomakugbe ọwan riẹ uyono, e vwa nyalele oborẹ i Baibol na ọ tare-e. (2 Tim. 2:20, 21) Arha guọlo mwu igbehian, o fori na karorhọ ẹmro ọnana. Ọnọ sabu bẹn re ne mwu obọdẹn igbehian orhianẹ nyoma ekwakwa itẹknọlọji ya ha lele aye tẹmro.

O fori na djẹ aruẹ ugbehian re ne kwomakugbe, maido orhianẹ a guọlọ kwomakugbe ẹko ihworho buebun ri mwu igbehian ne uvuẹn itanẹti. Ilele Kristi ezẹko ri homaba ẹko igbehian buebun uvuẹn itanẹti, i rhiẹromẹrẹn oborẹ obiomurun ne. Marhẹ omizu uvuẹn ukoko na ono ru rhe omayen sun uvwre ẹko ihworho ri te uzusionrin yanghene uriusionrin buebun? Ọnọ bẹn re ne rhe aruẹ ihworho enana fiotọre ọrhẹ oborẹ esegburhomẹmro aye ọ gbanhon te. Psalm 26:4 ọrhọ ta: “Mi vwe kwomakugbe era phiẹ ihworho rhọ-ọ, mia ji kẹnoma rẹn ihworho re vwe kwe dje oborẹ aye i havwọ phia.” Oghwẹmro i Baibol ọnana o jiririe rẹn ọwan na ha ekwakwa itanẹti mwu igbehian rhẹ ihworho re rheri ọvo.

Orhianẹ ẹko igbehian enọ a tobọ bun uvuẹn itanẹti-i, o fori wu nẹ ọke wa ghwọghọ ọrhẹ aruẹ ẹmro rẹ igbehian na a ta. Orhiẹ urhi taghene wu na vi kpahenrhọ rẹn ọsoso urhomu edje re djeruo ephian, o toro oborẹ aye i tare yanghene ọke aye i ghwọghọ rhọ ye-e. Paul ọ ha orhetio rẹn Timothy kpahen ihworho re “gun iguegun ji fiomarhọ ẹmro awọrọ.” (1 Tim. 5:13) Inyenana, ana sabu vwobọrhọ ekwakwa erana nyoma ekwakwa itẹknọlọji.

O vwo Olele Kristi owuorowu rọ do te edje rọ nọ ta yanghene kerhọ orharhere iyẹnrẹn yanghene ẹmro odjahen omizu ọrọrọ-ọ. (Ps. 15:3; Prov. 20:19) Ọ vwọ ji vwanriẹn yanghene kerhọ iyẹnrẹn re vwe rhe otọre aye fiotọre-e. (Eph. 4:25) Itiọrurhomẹmro, ọwan a mẹrẹn iyẹnrẹn ra na sabu hẹroso nyoma iwẹbsaiti jw.org ọrhẹ ẹkwaphiẹrhotọre i JW Broadcasting^® kibiamo kibiamo, ri sekpahen ẹmro i Baibol ọrhẹ imizu ukoko na.

Imizu ezẹko a ha ekwakwa itanẹti jiri eyi aye, yanghene haye ha ihworho iruo. Enana omẹdamu eyi ẹsuọ, orhiẹ ekwakwa ri sekpahen ogame i Jehova-a. Ilele Kristi ri guọlọ “vabọ ufiuvwele igho,” ina vi tiẹn ọdamuni ra na ha imizu ukoko na ruẹ eyi ẹsuọ.—Heb. 13:5.

O fori na ha ekwakwa itanẹti guọlọ igho ra na ha userhumu rẹn imizu rẹ oghwọghọ kpregede ọ phia riẹn? Ọwan e dje ẹguọlọ phia nyoma ra ha userhumu jeghwai ha urhebro rẹn owuowọnwan. (Jas. 2:15, 16) Ọrẹn, erhe ruẹ ọrana nyoma ẹko igbehian buebun uvuẹn itanẹti, ọnọ sabu suẹ ọyanghan rhẹ omamọ ẹkwaphiẹrhotọre rẹ Oghọn Ukoko yanghene ukoko na i ruru. (1 Tim. 5:3, 4, 9, 10, 16) Itiọrurhomẹmro, o vwo ohworho owuorowu usuẹn ọwan rọ nọ lẹrhẹ awọrọ roro ta taghene a djẹriẹ ha nọ hẹrote edamẹ imizu ukoko na-a.

Ọwan i guọlọ ru oborẹ ọnọ ha odidi vwe odẹ Osolobrugwẹ. (1 Cor. 10:31) Omarana, erhe brorhiẹn sẹ ana ha ekwakwa itanẹti yanghene itẹknọlọji ruiruo, o fori ne roro kpahen imwofẹn ri havwiẹ, na jeghwai jomarhotọre.