1. Mesoriẹ i Jesu ọ nẹrhomo vwe i Jehova nọ hẹrote idibo yi?

UVUẸN ason rọ kẹta ro rhiẹ onyakpọ, Jesu no roro kpahen ebẹnbẹn idibo yi ine rhiẹromẹrẹn. Fọkiẹ ẹguọlọ ro vwo kpahen igbehian yen, Jesu nọ nẹrhomo vwẹ Ọsẹ ye nọ rhọ “dẹrẹ aye fọkiẹ ọvwọkon na.” (John 17:14, 15) Jesu o rheri taghene ọrhọ ghwẹrioma riẹ odjuwu ne, Echu ọnọ rhọ wọnrọn haso ihworho ri guọlọ ga i Jehova. Omarana, ihworho i Jehova i guọlọ ẹruete.

2. Marhẹ ono ru mwu ọwan ẹro taghene Jehova ọnọ kpahenrhọ ẹrhomo ọwan?

² Jehova ọ kpahenrhọ ẹrhomo i Jesu fọkime o vwo ẹguọlọ kpahen Ọmọyen. Arha damoma ruẹ oborẹ ọ merhen i Jehova oma, ono vwo ẹguọlọ kpahen ọwan, ji kpahenrhọ ẹrhomo ọwan ọke ra guọlọ userhumu ọrhẹ ẹruete ọnẹyen. Jerẹ Urhomu ekrun ro vwo ọdamẹ kpahen ekruien, Jehova ọnọ rhọ hẹrote emọyen. Ọnana o sekpahen odẹ ye ọrhẹ aruẹ ohworho rọ havwọ!

3. Mesoriẹ a guọlọ ẹruete i Jehova inyenana?

³ A guọlọ ẹruete i Jehova vrẹn ọke bi. E donron Echu nẹ odjuwu rhiẹ otọrakpọ na ne, omarana nọ “tuekwẹre ọgbogbanhon.” (Rev. 12:12) Ọ lẹrhẹ ihworho ezẹko ra kparahaso ọwan roro taghene aye a ha “ogame ro fiotọre vwe Osolobrugwẹ.” (John 16:2) Awọrọ ri vwe vwo imwẹro kpahen Osolobrugwẹ, a kparehaso ọwan fọkime a vẹnẹ ihworho akpọ na. Oborẹ erhirhiẹ na ọ havwọ ephian, ana sabu vwo uduefigbere. Mesoriẹ? Fọkime i Baibol na ọ tare: “Ọrovwori na o vwo atamwu, ono ruẹ are gbanhon jeghwai sẹrorẹ are nẹ abọ ọvwọkon na.” (2 Thess. 3:3) Marhẹ i Jehova o ru sẹrorẹ ọwan? Jenẹ a ta kpahen izede eva.

4. Lele oborẹ ọ ha Ephesians 6:13-17, me yi Jehova ọ yẹre ọwan rọ nọ sẹrorẹ ọwan?

⁴ Jehova o tiobọnu ọsoso ekwakwa uvweri rọ nọ sabu sẹrorẹ ọwan nẹ ẹkparehaso Echu. (Se Ephesians 6:13-17.) Ekwakwa uvweri ọnana ro nẹ obẹ i Jehova rhe na, ọ gbanhonron omamọ ọ ji dabu wian! Ọrẹn, ana ha ọsoso aye ruiruo orhianẹ a guọlọre nọ sẹrorẹ ọwan. Me yẹ ekwakwa uvweri owuowu o mevirhọ? Jene yono kpahen owuowu.

5. Me yẹ umwaya urhomẹmro na, mesoriẹ ana vi haye gba?

⁵ Umwaya urhomẹmro na o mevirhọ irhomẹmro ri ha i Baibol na. Mesoriẹ ana vi haye gba? Fọkime Echu yẹ “ọsẹ efian.” (John 8:44) Ọ ha efian ẹmọrọn ẹgbukpe uriusionrin buebun ne, ọ jeghwai suẹn “ọsoso akpọ na” beghe! (Rev. 12:9) Ọrẹn, irhomẹmro ri ha i Baibol na, a sẹrorẹ ọwan nẹ abọ ọphiẹrhọ. Marhẹ e ru ha umwaya ọnana gba? E ruẹ ọnana nyoma re yono urhomẹmro ro sekpahen Jehova, nyoma ra ga ye “rhẹ ẹhẹn kugbe urhomẹmro,” ọrhẹ ọrẹ ana ta urhomẹmro ọrẹ i kemru kemru.—John 4:24; Eph. 4:25; Heb. 13:18.

6. Me yẹ ọsete udu ọrẹ ọsoso na, mesoriẹ ene vi kuie rhọ?

⁶ Ọsete udu ọrẹ ọsoso na o mevirhọ irhi ọsoso eri Jehova. Mesoriẹ ene vi ku ọsete udu ọrẹ ọsoso na rhọ? Jerẹ oborẹ ọsete udu ọ sẹrorẹ ọmudu isodja ne je dumie, ọsete udu ọrẹ ọsoso na ọ sẹrorẹ ọmudu ọwan neneyo irueruo akpọ ọkon ọnana, no jo biomu aruẹ ohworho ra havwọ. (Prov. 4:23) Jehova o fiẹrorhọ taghene ene vwo ẹguọlọ kpahiẹn, ji ha ẹga ro fiotọre riẹn. (Matt. 22:36, 37) Omarana, Echu nọ damoma rọ nọ ghalẹ ọmudu ọwan, nyoma rọ riẹriẹ ọwan ne vwo ẹguọlọ kpahen ekwakwa akpọ na ri Jehova o vwo utuoma kpahen. (Jas. 4:4; 1 John 2:15, 16) Ọrana ọrhọ wia-an, nọ kparehaso ọwan na sẹrerhumuji irhi Jehova.

7. Marhẹ e ru ku ọsete udu ọrẹ ọsoso na rhọ?

⁷ Ọwan e ku ọsete udu ọrẹ ọsoso na rhọ nyoma ra nyalele irhi Jehova sekpahen oborẹ orhomurun ọrhẹ oborẹ o biomurun. (Ps. 97:10) Awọrọ ina sabu roro taghene irhi Jehova i vwa yẹ ọwan ugbomọphẹ-ẹ. Ọrẹn, arha nyalele iruemru-irhi ri ha i Baibol na-a, ana họhọ isodja ro ku ọsete udu ọnẹyen nu uvuẹn uvweri, fọkime o roro taghene ọ ghwa phan. Ọrana emru akpa! Ihworho ri vwo ẹguọlọ kpahen Jehova, i vwe nie taghene irhi enẹyen i “ghwa pha-an,” ọrẹn oborẹ o simi arhọ.—1 John 5:3.

8. Me yo mevirhọ re ne mwuegbe aghwẹ ọwan re ne ghwoghwo iyẹnrẹn esiri na?

⁸ Paul o ji jirie rẹn ọwan ne mwuegbe aghwẹ ọwan re ne ghwoghwo iyẹnrẹn esiri ọrẹ ufuoma. Nọyẹ, o fori ne mwuegbe ọke ephian re ne ghwoghwo iyẹnrẹn esiri Uvie na. Ọke erhe ghwoghwo iyẹnrẹn i Baibol na rẹn awọrọ, esegburhomẹmro ọwan nọ gbanhan. Ọ ji merhen oma ọke ra mẹrẹn ihworho i Jehova uvuẹn akpọ na ra guọlọ uphẹn aye ine ghwoghwo iyẹnrẹn esiri na—ekete iruo, uvuẹn isukuru, uvuẹn ekete ra sueyi, ọke re ghwoghwo nẹ oghwa riẹ oghwa, ekete ra dẹ jeghwai rhẹ ekwakwa, ọke ra kọn bru ihworho ekrun ri vwe rhiẹ Iseri Jehova, ọke re lele igbehian gbikun, ọrhẹ ọke ra ta rẹn ọwan nẹ rhirhiẹ oghwa ibiọke. Ofẹn orho mwu ọwan jeghwai dobọ aghwoghwo na ji, ana họhọ isodja ro ku isabatu ọnẹyen nu uvwre ọke ro fiuvweri; fọkime ọnọ kon aghwẹ ye.  Omarana, ọnọ bẹn rọ nọ chochọn omayen, habaye ọ sabu nyalele ọkpọvi olori aye-e.

9. Mesoriẹ o fo na kpare ikpọfia ọduado ọrẹ esegburhomẹmro na?

⁹ Ikpọfia ọduado ọrẹ esegburhomẹmro na o mevirhọ esegburhomẹmro re vwo kpahen Jehova. E vwo imwẹro taghene ọnọ ha ive yi ephian te orugba. Esegburhomẹmro ọrana ọnọ ha userhumu rẹn ọwan “dobọ ọsoso ibigẹn ọvwọkon na ji.” Mesoriẹ o fo na kpare ikpọfia ọduado na? Fọkime ọnọ sẹrorẹ ọwan ne je beghe fọkiẹ iyono inyikọ efian, yanghene ha uphẹn rẹn erharhere ẹmro ihworho nọ hobọte ọwan. Erhe vwo esegburhomẹmro-o, a sabu vwo omẹgbanhon ra na huvwele i Jehova ọke awọrọ arha damoma aye ina riẹriẹ ọwan ne gbe urhi Jehova ghwu-u. Ọrẹn, arha huvwele i Jehova uvuẹn ekete re ruẹ iruo yanghene uvuẹn isukuru, esegburhomẹmro ọwan ọ sẹrorẹ ọwan. (1 Pet. 3:15) Ọke arha tiẹn omamọ iruo rọ nọ kwosa buebun rẹn ọwan, ọrẹn ọnọ jaghwẹ rhẹ ogame i Jehova, esegburhomẹmro ọwan ọ sẹrorẹ ọwan. (Heb. 13:5, 6) Habaye, arha ga i Jehova udabọ ẹkparehaso, esegburhomẹmro ọwan ọ sẹrorẹ ọwan.—1 Thess. 2:2.

10. Me yẹ erhu ọrẹ usimirhọ na, mesoriẹ ene vi kuie rhọ?

 ¹⁰ Erhu ọrẹ usimirhọ na yẹ ifiẹrorhọ ri Jehova ọ yẹre ọwan—ifiẹrorhọ na taghene ono simi ọwan nẹ abọ uhwu jeghwai kwosa rẹn eri ruẹ ọhọriẹ. (1 Thess. 5:8; 1 Tim. 4:10; Titus 1:1, 2) Jerẹ oborẹ erhu ọ sẹrorẹ urhomu isodja, ifiẹrorhọ ọrẹ usimirhọ re vwori ọ sẹrorẹ omẹgbanhon iroro ọwan. Izede ọgo? Ifiẹrorhọ ọrana, ọ lẹrhẹ ọwan tẹnrovi ive Osolobrugwẹ, jeghwai ha userhumu rẹn ọwan ha ukẹro ro serhọ ni ebẹnbẹn ọwan. Marhẹ ye kue erhu ọnana rhọ lele? E ruẹ ọnana nyoma ra dabu sẹrorẹ iroro ọwan no serhọ rhẹ ọrẹ Osolobrugwẹ. Jerẹ udje, ọwan a hẹroso Osolobrugwẹ ukperẹ ono rhiẹ efe.—Ps. 26:2; 104:34; 1 Tim. 6:17.

11. Me yẹ odan ọlọkọ ọrẹ ẹhẹn na, mesoriẹ o fo na haye ruiruo?

¹¹ Odan ọlọkọ ọrẹ ẹhẹn na yẹ i Baibol na. Odan ọlọkọ ọrana o vwo omẹgbanhon ro ghwolo aruẹ ọphiẹrhọ ephian phia, rọ jeghwai ha userhumu rẹn ihworho vabọ iyono efian ọrhẹ iruemru esọsọ. (2 Cor. 10:4, 5; 2 Tim. 3:16, 17; Heb. 4:12) A ha odan ọlọkọ ọnana ruiruo izede ro serhọ nyoma uyono i Baibol omobọ ọrhẹ iyono rẹ ukoko i Jehova o tiobọnẹ. (2 Tim. 2:15) Haba ekwakwa uvweri na, Jehova ọ ji yẹ ọwan emru ọrọrọ ro vwo omẹgbanhon rọ sẹrọre ọwan. Me yẹ emru ọrana?

12. Me yẹ emru ọrọrọ ra ji guọlọ, mesoriẹ?

¹² Isodja rọ ten ona, o rheri taghene ọye ọvo ọ sabu fiuvweri rhẹ isodja buebun ro no fikparobọ-ọ; ọ guọlọ userhumu isodja erọrọ. Omaran ọ ji havwọ, ọwan ọvo i sabu fiẹ Echu ọrhẹ ihworho yi kparobọ-ọ; a guọlọ userhumu imizu ukoko na. Jehova ọ yẹre ọwan “okugbe imizu ephian” uvuẹn akpọ na, ri na ha userhumu rẹn ọwan.—1 Pet. 2:17.

13. Lele oborẹ ọ ha Hebrews 10:24, 25, erere ọgo ya na mẹrẹn erhe riẹ uyono ukoko?

¹³ Izede owu re ru mẹrẹn userhumu yẹ nyoma uyono ukoko. (Se Hebrews 10:24, 25.) Ẹhẹn ọwan orho seriotọre—jerẹ oborẹ ọ phia rẹn kohworho kohworho—uyono ukoko ọnọ sabu lẹrhẹ ẹhẹn ọwan gbanhon. Ọwan a mẹrẹn urhebro nyoma ẹkpahenrhọ rẹ imizu a haphia uvuẹn uyono na. Ẹmro ra bọn kpahen i Baibol na ọrhẹ idje ra haphia, a yẹ ọwan omwemẹ ra na ga i Jehova rhọ. Ẹmro ra ji ta kugbe bọmọke uyono ọ ki tuanrhọ ọrhẹ ọke o fuen ne, a bọn ọwan gbanhan. (1 Thess. 5:14) Habaye, uyono ukoko ọ yẹ ọwan uphẹn ra na mẹrẹn aghọghọ ọke ra ha userhumu rẹn awọrọ. (Acts 20:35; Rom. 1:11, 12) Uyono ukoko ọ ji ha userhumu rẹn ọwan izede erọrọ. Uyono ukoko ọ ha userhumu rẹn ọwan dabu ten ona uvuẹn owian aghwoghwo na ọrhẹ ọre yono ihworho. Jerẹ udje, ọwan a damoma ha ẹbe ri ha usuẹn Ekwakwa Ra Ha Yono Ihworho ruiruo izede ro mwidjẹn. Omarana, dabu mwuegbe rhẹ uyono ukoko. Ọke re ruẹ uyono na, dabu kerhọ. Erhe ruẹ uyono na hin, ha oborẹ wu yonorin ruiruo. Wu rhe ruẹ enana ephian, wu na sabu rhiẹ “omamọ isodja rẹn Kristi Jesu.”—2 Tim. 2:3.

14. Userhumu ọrọrọ ọgo yẹ ọwan i vwori?

¹⁴ Ọwan i vwo userhumu emakashe ri te iduduru buebun. Roro kpahen oborẹ ọmakashe owu ọnọ sabu ru! (Isa. 37:36) Omarana, gbe roro kpahen oborẹ emakashe buebun ina sabu ru. O vwo onyakpọ yanghene okpodje owuorowu ọnọ sabu wọnrọn haso emakashe i Jehova-a. Jehova yọ mai gbanhon oma, ọ jeghwai hobọtua ọwan, omarana ọwan i gbanhon  ghwẹ ọsoso evwreghrẹn ọwan ephian. (Judg. 6:16) Ọrana ghini urhomẹmro! Karorhọ ẹmro enana orhianẹ ohworho we lele wian, ohworho we lele riẹ isukuru yanghene ohworho ekrun ọnọ, ọ djofẹn mwuo nyoma ẹmro yanghene oborẹ o ruẹ. Karorho taghene Jehova ọ ha userhumu wẹn. Wa ji nyalele ọkpọvi Jehova.

15. Lele oborẹ ọ ha Isaiah 54:15, 17, mesoriẹ o vwo vwo ohworho rọ nọ sabu dobọ owian aghwoghwo na ji?

¹⁵ Akpọ ọnana rẹ Echu o suẹn na, o vwo utuoma kpahen ọwan fọkiẹ ekwakwa buebun. Ọwan i vwe vwobọrhọ usun oseghe jeghwai fiuvweri-i. Ọwan e ghwoghwo odẹ Osolobrugwẹ, jeghwai jiri Uvie yi taghene ọye ọnọ rhua ufuoma rhiẹ akpọ na, ọwan a ji nyalele irhi Jehova. Ọwan e djephia taghene ọro suẹn akpọ na ọvwọkon. (John 8:44) E ji ghwoghwo taghene oghwọghọ akpọ Echu o tikẹrẹ ne. Ọrẹn Echu ọrhẹ ihworho yi, i sabu dobọ owian aghwoghwo na jẹ-ẹ. Omarana, ene rhe jiri Jehova, ji ha kemru kemru re vwori ephian wian riẹn! Dedevwo Echu o vwo omẹgbanhon, ọ ji sabu dobọ owian aghwoghwo na ji, no jo te ihworho uvuẹn akpọ na-a. Itiọrurhomẹmro i Jehova yo ru ruie ra sabu wian yen.—Se Isaiah 54:15, 17.

16. Marhẹ i Jehova ono ru simi ihworho yi uvwre ukpokpogho rode na?

¹⁶ Me yọ nọ phia obaro na? Uvwre ukpokpogho rode na, Jehova ono simi ọwan izede igbevwunu eva. Ọrukaro, ono simi idibo yi ri vwo atamwu uvwre ọke rọ nọ ha irodje akpọ na ghwọghọ i Babylon Rode, ro rhiẹ okugbe ẹga efian. (Rev. 17:16-18; 18:2, 4) Orho ru, no no simi ihworho yi ọke rọ nọ ghwọghọ akpọ Echu rọ hẹrhẹre uvuẹn Armageddon.—Rev. 7:9, 10; 16:14, 16.

17. Marhẹ ene ru mẹrẹn erere ọke arha daji kẹrẹ i Jehova?

¹⁷ Echu ọ sabu suẹ ẹkuọn i bẹmẹdẹ rẹn ọwan ọke arha daji kẹrẹ i Jehova-a. Itiọrurhomẹmro, Echu ya na ghwọghọ bẹmẹdẹ. (Rom. 16:20) Omarana, ku ọsoso ekwakwa uvweri na rhọ—ne wu ji rha haye ruiruo! Wẹwẹ ọvo i vwa damoma wọnrọn haso Echu ọrhẹ ihworho yi-i. Hobọtua imizu ukoko na. Ne wu ji nyalele ọkpọvi Jehova. Wu rhe ruẹ omaran, wu na sabu vwo imwẹro taghene Jehova ono ruo gbanhon jeghwai sẹroruọ.—Isa. 41:10.