1-2. Me yọ phia ọke ihworho e bromarhame, me yo fori wu roro kpahen?

 WU MẸRẸN otu ihworho ra guọlọ bromarhame dẹ ne? Wa mẹrẹn imwẹro aye i vwori ọke aye a kpahenrhọ enọ eva ra nọ aye ki bru aye rhẹ ame. Wa mẹrẹn oma rọ merhen ekrun ọrhẹ igbehian aye. Ọke ere bromarhame erhe nẹ ame na sa, wa dabu rhon ọke ihworho a ghwiẹ abọ ji mẹrẹn omamerhomẹ aye i vwori. Uriusionrin ihworho buebun a homakpahontọre ji bromarhame rhiẹ Iseri Jehova kọkprughwre kọkprughwre.

² Wẹwẹ vwo? Orhianẹ we roro kpahen omebrurhame, wẹwẹ omamọ ohworho uvuẹn akpọ ọkon ọnana fọkime wa “guọlọ i Jehova.” (Ps. 14:1, 2) E ruẹ urhomu-ẹmro ọnana fọkiẹ owẹwẹ, sẹ wẹwẹ uphuphẹn yanghene wu kpako ne. Ọrẹn, o ji fo nẹ ọwan ri bromarhame ne i bọn omwemẹ ra na ga i Jehova bẹmẹdẹ gbanhonrhọ. Omarana, jene yono kpahen iroro esa ọvo ri soriẹ o fo na ga i Jehova.

3. Mesoriẹ idibo i Jehova e vwo ẹguọlọ urhomẹmro ọrhẹ irueruo ọsoso? (Psalm 119:128, 163)

³ Jehova o jurhi rẹn ihworho yi nẹ aye i vwo “ẹguọlọ urhomẹmro.” (Zech. 8:19) Jesu ọ ha urhebro rẹn idibo yi nẹ aye i hatua irueruo ọsoso. (Matt. 5:6) Ọnana o mevirhọ taghene ohworho ono vwo omwemẹ kpahen oborẹ ọgbare, ro rhomurun, rọ ji fon uvuẹn ukẹro Osolobrugwẹ. Wu vwo ẹguọlọ kpahen urhomẹmro ọrhẹ oborẹ ọgbare? O mwurun ame ẹro taghene wu vworie. Wu vwo utuoma kpahen efian ọrhẹ ọsoso oborẹ obiomurun ro rhiẹ ọkon. (Se Psalm 119:128, 163.) Efian ẹmọrọn usuẹn uruemru Echu ro rhiẹ ọro suẹn akpọ na. (John 8:44; 12:31) Ẹkẹ owu rẹ Echu ọ hatua yẹ ọrẹ ono biomu odẹ ọfuanfon i Jehova  Osolobrugwẹ. Nẹ uvuẹn Eden rhe, yẹ Echu o kerabọ efian ro mwu banren Jehova. O dje i Jehova rhiẹ Osuinsuensun ro vwo ufiuvwele, rọ vwọ ta urhomẹmro, ro ji tiẹ omamọ emru nuẹ rẹn ituakpọ. (Gen. 3:1, 4, 5) Efian Echu ọ mọren banren Jehova, o biomu ọmudu ọrhẹ ẹhẹn ihworho ne. Ọke ihworho i rha djẹ odjẹ aye ine je vwo “ẹguọlọ urhomẹmro,” Echu nọ sabu sun aye ruẹ aruẹ irueruo ọsọsọ ọrhẹ uruemru ọkon ephian.​—Rom. 1:25-31.

4. Marhẹ i Jehova o ru djephia taghene ọye “Osolobrugwẹ urhomẹmro na”? (Ni ifoto na.)

⁴ Jehova yẹ “Osolobrugwẹ urhomẹmro na,” o ji yono ihworho ri vwo ẹguọlọ kpahiẹn, urhomẹmro na. (Ps. 31:5) Nyoma ọnana, nọ sabu ti aye nẹ efian rẹ Echu o kerabọ ye. Jehova o ji yono idibo yi nẹ aye i rhiẹ ihworho urhomẹmro ọrhẹ ere ruẹ oborẹ ọgbare. Omarana, aye na sabu vwo ọghọ ọrhẹ ẹhẹn ro te otọre. (Prov. 13:5, 6) Ọye o ruẹ ọrana wẹn uvwre ọke we yono i Baibol na? Wu yono ne taghene izede i Jehova yọ mai rhomu rẹn ituakpọ ọrhẹ owẹwẹ. (Ps. 77:13) Omarana, wu guọlọ ru oborẹ i Jehova ọ tare taghene ọgbare. (Matt. 6:33) Wu guọlọ chochọn urhomẹmro na neneyo wu sabu dje Echu rhiẹ ọmọrenfian. Marhẹ wu ne ru ruie?

5. Marhẹ wu ne ru chochọn urhomẹmro ọrhẹ irueruo ọsoso?

⁵ Wu na sabu djẹ aruẹ akpọ ro djephia taghene wa tiẹn efian Echu, ji chochọn urhomẹmro na. Wu na sabu djephia taghene wu guọlọre ni Jehova no rhiẹ Ọro suon, ji ruẹ oborẹ ọ guọlọre. Marhẹ wu ne ru brorhiẹn ọrana? Nyoma wu na nẹrhomo vwe i Jehova ji homakpahontọre riẹn, ji djeyi phia ọrẹ afiede nyoma wu ne bromarhame. Ẹguọlọ wu vwo kpahen urhomẹmro ọrhẹ oborẹ ọgbare, yo no mwuo djẹ odjẹ wu ne bromarhame.

6. Iroro ego yẹ Psalm 45:4 ọ ha wẹn kpahen ọrẹ ene vwo ẹguọlọ kpahen Jesu Kristi?

⁶ Mesoriẹ we vwo ẹguọlọ kpahen Jesu Kristi? Djokarhọ iroro ezẹko ri ha Psalm 45:4. (Seyi.) Jesu o vwo ẹguọlọ kpahen urhomẹmro na, o vwo omeriotọre ọrhẹ irueruo ọsoso. Wu rhe vwo ẹguọlọ urhomẹmro ọrhẹ irueruo ọsoso, o mevirhọ taghene wu ji vwo ẹguọlọ kpahen Jesu. Roro kpahen oborẹ i Jesu ọ dabu  fiudugbere chochọn urhomẹmro na ọrhẹ irueruo ọsoso. (John 18:37) Ọrẹn, marhẹ i Jesu o ru dje omeriotọre phia?

7. Me yọ merhuọn oma kpahen omeriotọre i Jesu?

⁷ Jesu o dje omeriotọre phia nyoma udje yi. Jerẹ udje, ọ ha ujiri ephian vwe Ọsẹ ye, ukperẹ ono rhiẹ omayen. (Mark 10:17, 18; John 5:19) Marhẹ oma o ruo kpahen aruẹ omeriotọre ọrana? O vwo mwuo vwo ẹguọlọ kpahen Jesu ji guọlọ nyalelie? Itiọrurhomẹmro, wu guọlọ ru te omaran. Mesoriẹ i Jesu o vwo omeriotọre? Fọkime o vwo ẹguọlọ kpahen Jehova ro ji vwo omeriotọre, jeghwai hẹrokelie. (Ps. 18:35; Heb. 1:3) Wu vwo omwemẹ wu ne tikẹrẹ i Jesu rọ dabu dje iruemru Ọsẹ ye phia?

8. Mesoriẹ e vwo ẹguọlọ kpahen Jesu ro rhiẹ Orodje ọwan?

⁸ Ọwan i vwo ẹguọlọ kpahen Jesu ro rhiẹ Orodje ọwan fọkime ọye obọdẹn Osun. Jehova yo vi yono Ọmọyen, ji haye mwu no sun. (Isa. 50:4, 5) Ji roro kpahen obọdẹn ẹguọlọ ri Jesu o djephia ne. (John 13:1) Ro rhiẹ Orodje ọnọ na, o fori wu dabu dje ẹguọlọ phia riẹn. O djerie fiotọre taghene ihworho ri ghini vwo ẹguọlọ kpahiẹn, ri rhiẹ ihworho ro seri igbehian, e dje ẹguọlọ phia nyoma aye a huvwele urhi enẹyen. (John 14:15; 15:14, 15) Emru omamerhomẹ dẹn re rhiẹ ugbehian Jesu!

9. Marhẹ omebrurhame Ilele Kristi o ru họhọ ọrẹ Jesu?

⁹ Owu usuẹn ekama i Jesu yẹ ọrẹ idibo yi ine bromarhame. (Matt. 28:19, 20) O dje udje na rẹn ọwan. Uvuẹn izede ezẹko, omebrurhame ọnẹyen ọ vẹnẹ ọrẹ idibo yi. (Se ekpeti na “Oborẹ Omebrurhame i Jesu o ru Vẹnẹ Ọrẹ Idibo yi.”) Ọrẹn, ọ họhọre uvuẹn izede erọrọ. Ọke i Jesu o bromarhame, ọ homakpahontọre ruẹ ọhọre i Jehova. (Heb. 10:7) Ọrẹ ohọhọme, idibo i Kristi e bromarhame ọrẹ afiede neneyo ihworho i rhe taghene aye i homakpahontọre rẹn Jehova Osolobrugwẹ ne. Vwana, aye na tẹnrovi ọhọre i Jehova aye ine ruo, ukperẹ ono rhiẹ ọrẹ aye. Nyoma ọrana, aye na nyalele udje Onini aye.

10. Mesoriẹ ẹguọlọ wu vwo kpahen Jesu ono mwuo bromarhame?

¹⁰ Wu kwerhọ ye taghene Jesu yẹ Ọmọ owu ọvo ri Jehova o vwori, jeghwai Orodje ri Jehova ọ ha mwu no sun ọwan. Wu rheri taghene Jesu ohworho rọ gbare rọ dabu hẹrokele omeriotọre Ọsẹ ye. Wu yono kpahen oborẹ o ru ghẹrẹ ihworho orhọmo o kpe, ha urhebro rẹn erẹ ẹhẹn aye o seriotọre, ọrhẹ ọro simi ihworho re kpomẹ. (Matt. 14:14-21) Wa mẹrẹn oborẹ ọ hẹrote ukoko na lele inyenana. (Matt. 23:10) Wu ji rhe taghene fọkime ọye Orodje, ono ruẹ eri vrẹn enana uvuẹn Uvie Osolobrugwẹ. Marhẹ wu ne ru djephia taghene wu vwo ẹguọlọ kpahiẹn? Nyoma wu na hẹrokele udje yi. (John 14:21) Wu na sabu ruẹ ọrana nyoma wu na homakpahontọre rẹn Jehova, ji bromarhame.

11. Me yẹ iroro rọmaido kparobọ rọ nọ lẹrhuọ bromarhame, mesoriẹ?

¹¹ Me yẹ iroro rọ mai ghanren rọ lẹrhẹ ọwan bromarhame? Jesu o dje urhi Osolobrugwẹ rọmaido kparobọ phia ọke rọ ta: “Wu ne vi vwo ẹguọlọ kpahen Jehova Osolobrugwẹ ọnọ, rhẹ ọsoso ọmudu ọnọ, rhẹ ọsoso ugboma ọnọ, kugbe ọsoso ẹhẹn ọnọ, ọrhẹ ọsoso omẹgbanhon ọnọ.” (Mark 12:30) Ẹmro erana i dje aruẹ ẹguọlọ wu vwo kpahen Jehova phia?

12. Mesoriẹ we vwo ẹguọlọ kpahen Jehova? (Ni ifoto na.)

¹² O vwo iroro buebun ri na lẹrhẹ ọwan  vwo ẹguọlọ kpahen Jehova. Jerẹ udje, wu vwẹruọ ye ne taghene Jehova yẹ “esiri arhọ,” wu ji rhe taghene Ọye o tiobọnẹ “ẹghẹlẹ irhorhomu ọrhẹ obọdẹn ẹghẹlẹ ephian.” (Ps. 36:9; Jas. 1:17) Ekwakwa irhorhomu ephian wa riamerhiẹn, i nẹ obọ Osolobrugwẹ ro vwo ẹguọlọ kpahen ọwan rhe.

13. Me yọ lẹrhẹ otan na rhiẹ obọdẹn ẹghẹlẹ?

¹³ Otan na obọdẹn ẹghẹlẹ ri Jehova o tiobọnu rẹn ọwan. Mesoriẹ a ta omaran? Roro kpahen onyerẹnkugbe kpẹnkpẹnkpẹn rọ ha uvwre i Jehova ọrhẹ Ọmọyen. Jesu ọrhọ ta: “Ọsẹ na o vwo ẹguọlọ kpahen mẹ,” habaye “mi vwo ẹguọlọ kpahen Ọsẹ na.” (John 10:17; 14:31) Onyerẹnkugbe rọ ha uvwre aye, nọ gbanhonrhọ uvwre iduduru ẹgbukpe buebun rẹ aye nyerẹn kugbe. (Prov. 8:22, 23, 30) Gbe roro kpahen oborẹ ọnọ miamo i Jehova te, ọke ro kwe taghene Ọmọyen ọ rioja ji hwu. Jehova o vwo ẹguọlọ kpahen ituakpọ kugbe owẹwẹ omamọ, te erhirhiẹ ro tiobọnu Ọmọ owu ọvo ro vwori, nọ ha arhọ ye ze izobo neneyo owẹwẹ ọrhẹ awọrọ i sabu nyerẹn bẹmẹdẹ. (John 3:16; Gal. 2:20) Ọnana yẹ iroro rọmaido rọ nọ lẹrhẹ ọwan vwo ẹguọlọ kpahen Jehova.

14. Ẹkẹ ọgo rọ mai rhomu kparobọ wu na sabu bru te oma?

¹⁴ Ẹguọlọ wu vwo kpahen Jehova o kodorhọ ne, ọke we yono kpahiẹn rhọ. Itiọrurhomẹmro, wu guọlọ tikẹriẹ rhọ vwana ye te i bẹmẹdẹ. Wu na sabu ru te omaran.  Jehova o jiririe wẹn ne wu ruẹ ọmuduie ghọghọ. (Prov. 23:15, 16) Wu na sabu ruẹ ọnana nyoma ẹmro ọrhẹ idjaghwẹ wa kpara. Oborẹ we nyerẹn akpọ lele vwana, ono djephia sẹ wu ghini vwo ẹguọlọ kpahen Jehova. (1 John 5:3) Ọrana yẹ odjẹ rọ mai rhomu kparobọ wu na sabu djẹ.

15. Marhẹ wu ne ru dje ẹguọlọ wu vwori phia rẹn Jehova?

¹⁵ Marhẹ wu ne ru dje ẹguọlọ wu vwori phia rẹn Jehova? Ọrukaro, nẹrhomo oghẹnrensan re wu na homakpahontọre rẹn Jehova. (Ps. 40:8) Orho ru, gbe dje omẹhakpahontọre ọrana wu ruru ọrẹ odjahen na phia ọrẹ afiede, nyoma wu ne bromarhame. Jerẹ oborẹ a hunute uvuẹn ọtonrhọ urhomu-ẹmro ọnana, ọrana ọke omamerhomẹ dẹn, ọke ewene ọduado. Wu na sabu tuẹn akpenyerẹn ọkpokpọ rhọ, nyoma wu ne nyerẹn harẹn Jehova ukperẹ ono rhiẹ oma. (Rom. 14:8; 1 Pet. 4:1, 2) Ọrana ọnọ sabu họhọ orhienbro ọduado ha wẹn, itiọrurhomẹmro omaran ọ havwọ. Ọrẹn, ọrana o suẹn riẹ akpenyerẹn rọmai rhomu kparobọ. Izede ọgo?

16. Jerẹ oborẹ Psalm 41:12 o djephia, marhẹ i Jehova ono ru ha ebrurhọ rẹn ihworho ri homakpahontọre ga ye?

¹⁶ Jehova yẹ Ohworho rọmai tiobọnẹ ghwologhwolo kparobọ. O toro oborẹ wu yẹriẹ-ẹ, ọnọ rharhumu yọ oborẹ ọ ghwẹ ọrana. (Mark 10:29, 30) Ọye ono tiobọnu ebrurhọ ọrhẹ obọdẹn akpenyerẹn rọ merhoma wẹn uvuẹn akpọ ọkon ọnana. Ọrana tobọ ọtonrhọ ye. Ugbo onya wu tonrhọ ọke we bromarhame, o vwoba-a. Wu na sabu rha ga i Jehova bẹmẹdẹ. Ẹguọlọ rọ ha uvwre owẹwẹ ọrhẹ Jehova ono rho kodorhọ, ne wu ne ghini nyerẹn bẹmẹdẹ jerẹ oborẹ i Jehova o nyerẹn bẹmẹdẹ.​—Se Psalm 41:12.

17. Me yi Jehova o vwo ji vwo wu na sabu yẹ ye?

¹⁷ Ọke wa kpare udjoghwẹ wa homakpahontọre ji bromarhame hin, ne wu vwo uphẹn we tiobọnu rẹn Jehova oborẹ ọ ghanranren omamọ. Ọye yo tiobọnu ọsoso ekwakwa irhorhomu wẹn ọrhẹ akpenyerẹn wa riamerhiẹn. Ọrẹ ẹkpahenrhọ, wu na sabu tiobọnu rẹn Jehova rọ ma otọrakpọ ọrhẹ idjuwu na oborẹ o vwo ji  vwo, nọyẹ ọrẹ wu na homakpahontọre ga ye. (Job 1:8; 41:11; Prov. 27:11) Itiọrurhomẹmro, ọnana izede rọmai rhomu wu ne nyerẹn akpọ ọnọ lele! O vwo ẹfro-o, ẹguọlọ wu vwo kpahen Jehova yo no mwuo bromarhame.

18. Enọ ego wu na sabu nọ?

¹⁸ Marhẹ wu na kpahenrhọ onọ ọnana lele, Wu ne bromarhame? Owẹwẹ ọvo yi na sabu kpahenrhọ ye. Ọrẹn, wu rha nọ oma ‘mesoriẹ mie kpọke?’ ọrana ọnọ ha userhumu wẹn. (Acts 8:36) Karorhọ iroro esa re yono kpahen ne. Ọrukaro, wu vwo ẹguọlọ kpahen urhomẹmro na ọrhẹ irueruo ọsoso. Nọ oma, ‘Mi guọlọ mẹrẹn ẹdẹ ri kohworho kohworho ina rha ta urhomẹmro ji ruẹ irueruo ọsoso?’ Ọreva, wu vwo ẹguọlọ kpahen Jesu Kristi. Gba nọ oma, ‘Mi guọlọre nẹ Ọmọ Osolobrugwẹ no rhiẹ Orodje mẹ, mi ji guọlọ hẹrokele udje yi?’ Ọresa rọmaido yẹ, ẹguọlọ wu vwo kpahen Jehova. Nọ oma, ‘mi guọlọ lẹrhẹ oma merhen i Jehova re mi na ga ye jerẹ Osolobrugwẹ mẹ?’ Ẹkpahenrhọ ọnọ harẹn enọ erana orho rhiẹ ee, mesoriẹ we kpọke omebrurhame?​—Acts 16:33.

19. Mesoriẹ wu ne je ru sikẹnsikẹn kpahen omebrurhame? Dje udje yi. (John 4:34)

¹⁹ Orhianẹ we ruẹ sikẹnsikẹn wu ne bromarhame, roro kpahen udje ri Jesu ọ ha ruiruo. (Se John 4:34.) Djokarhọ taghene Jesu ọ ha ọrẹ ene ruẹ ọhọre i Jehova e dje emaren. Mesoriẹ? Emaren ọ rhuọnrhuọn ọwan oma. Jesu o rheri taghene kemru kemru ri Jehova ọ ta rẹn ọwan ne ru, orhomu rẹn ọwan. Jehova ọ guọlọ ne ru oborẹ ọnọ suẹ ẹkuọn rẹn ọwa-an. Ọhọre i Jehova o surhobọmwu ọrẹ wu ne bromarhame? Ee. (Acts 2:38) Omarana, wu na sabu vwo imwẹro taghene wu rhe bromarhame wu na mẹrẹn erere. Orhianẹ wu vwe ruẹ sikẹnsikẹn wu na riẹ emaren rọ dabu merhe-en, mesoriẹ we tiẹrierhumu wu ne bromarhame?

20. Me ye ne yono kpahen uvuẹn urhomu-ẹmro rọ ha kpahen ọnana?

²⁰ Mesoriẹ we kpọke? Ihworho buebun ina kpahenrhọ ye omana, “Mie ji mwuegbe-e.” Itiọrurhomẹmro, orhienbro wu na homakpahontọre rẹn Jehova ji bromarhame, yẹ orhienbro rọ mai ghanren kparobọ wu na sabu bru. Omarana, wu na dabu roro kpahiẹn, ha ọke mwuegbe rhọ ye, ji dabu gbẹro rhotọre ne wu sabu mwuovwan. Ọrẹn, wu rhe vwo omwemẹ wu ne ghini kpare udjoghwẹ ọnana, me wu ne ruo vwana ne wu sabu mwuegbe? Ana kpahenrhọ onọ ọrana uvuẹn urhomu-ẹmro rọ ha kpahen ọnana.