Irodje ri Rhiẹ Evwreghrẹn Uvuẹn Ọke Oba na Aruẹmẹrẹn ezẹko ra hunute uvuẹn ishati ọnana o dje kpahen ekwakwa ri phiare uvwre ọke owu. Aye ephian i djephia nyoma izede buebun taghene e nyerẹn uvuẹn “ọke oba na” ne.—Dan. 12:4.

• Ekete i Baibol Rev. 11:7; 12:13, 17; 13:1-8, 12

  Aruẹmẹrẹn “Aranmo rọ djoma na” ọ havwọ ẹnya uvuẹn akpọ na ẹgbukpe buebun ne. Uvuẹn ọke oba na, na kuẹn urhomu ọrẹ irhiruẹ na. Ọke oru ne simi urhomu na, “ọsoso akpọ na” ne lele aranmo rọ djoma na. Echu ọ ha aranmo rọ djoma ọrana ‘fiuvweri rhẹ ihworho ri hẹrhẹre na.’

  Orugba Ọke Ukude na ọ vrẹn hin, usun ituakpọ ra kparahasuẹ i Jehova ni homaphia. Ẹgbukpe buebun a vrẹn hin, uvwre ọke Uvweri Akpọ Ephian Ọrukaro, omẹgbanhon usun i Britain no riotọre. Nọ rharhumu gbanhon ọke rọ homaba United States. Maido uvuẹn ọke oba na, Echu ọ ha ọsoso igọmẹti akpọ na sehiẹn ihworho Osolobrugwẹ.

• Ekete i Baibol Dan. 11:25-45

  Aruẹmẹrẹn Uvwre ọke oba na orodje obọrẹ o rierun na ọrhẹ orodje obọrẹ o riotọre na, ina wọnrọn haso omoma aye.

  Orugba Germany ọrhẹ Anglo-America ni wọnrọn haso omoma aye. Uvuẹn ẹgbukpe 1945 Soviet Union ọrhẹ era hobọtua ye, ni rhiẹ orodje obọrẹ o rierun na. Uvuẹn ẹgbukpe 1991, Soviet Union no seri, ọke oru, Russia ọrhẹ era hobọtua ye nọ yi rhiẹ orodje obọrẹ o rierun na.

• Ekete i Baibol Isa. 61:1; Mal. 3:1; Luke 4:18

  Aruẹmẹrẹn Jehova o dje “ọnyikọ” ye no “rhie izede firhọ” bọmọke ana ki ha Uvie Messiah na mwu. Ẹko ọnana no yo “ghwoghwo iyẹnrẹn esiri harẹn ihworho dẹndẹn.”

  Orugba Nẹ ẹgbukpe 1870 rhe, C. T. Russell ọrhẹ imizu ri lelirie ni dabu yono i Baibol na nẹ aye sabu dje irhomẹmro ri havwiẹ fiotọre. Uvwre ẹgbukpe 1880 rhe, aye ni karunumwuie taghene o fori nẹ idibo i Jehova i ghwoghwo. Aye ni fomu irhomu-ẹmro enana phia, “Wanted 1,000 Preachers” ọrhẹ “Anointed to Preach.”

• Ekete i Baibol Matt. 13:24-30, 36-43

  Aruẹmẹrẹn Ọvwreghrẹn nọ wọ odin rhẹ okegbe ra wọ irosu rhọ, na ha uphẹn rẹn aye do kugbe ji rhurhu irosu na bọmọke ọke orhọ na ono ki te; ọke oru, na sanọ odin na nẹ irosu na.

  Orugba Nẹ ehion 1800 rhe, ovẹnẹ rọ ha uvwre Ilele Kristi urhomẹmro na ọrhẹ Ilele Kristi efian no fiotọre. Uvwre ọke oba na, ne koko Ilele Kristi rhiẹ ukoko na ji hẹriẹ aye nẹ Ilele Kristi efian.

• Ekete i Baibol Dan. 2:31-33, 41-43

  Aruẹmẹrẹn Oma ra ha ekwakwa sansan ru yo vwo aghwẹ ro vwo uteru ọrhẹ ọphiẹ na.

  Orugba Ọphiẹ na o mevirhọ ihworho ghemeghe rẹ usun Anglo-American o suẹn, ra ji kparahasuẹ usun na. Fọkiẹ ihworho enana, igọmẹti na ọ vwọ rhọ sabu ha omẹgbanhon ọnẹyen ruiruo vuọnvuọ-ọn.

• Ekete i Baibol Matt. 13:30; 24:14, 45; 28:19, 20

  Aruẹmẹrẹn E koko “irosu na” rhẹ “oghwa ra sẹrorẹ ekwakwa rhọ,” na ha “ọvrẹn ra hẹrosua ro ji vwo ẹghwanren” mwu nọ hẹrote “ekwakwa” i Jehova. Owian aghwoghwo ọrẹ “iyẹnrẹn esiri Uvie na” no kerabọ lele “ọsoso ekete re rhirhiẹ uvuẹn akpọ na.”

  Orugba Uvuẹn ẹgbukpe 1919, na ha ọvrẹn ra hẹrosua na mwu nọ hẹrote ihworho Osolobrugwẹ. Nẹ ọke ọrana rhe, Emọ Uyono i Baibol na ni kerabọ owian aghwoghwo na. Inyenana, Iseri Jehova e ghwoghwo uvuẹn ẹkwotọre ri vrẹn 200, ji fomu ẹbe ra bọn kpahen i Baibol na uvuẹn edjadjẹ ri vrẹn 1,000.

• Ekete i Baibol Dan. 12:11; Rev. 13:11, 14, 15

  Aruẹmẹrẹn Aranmo rọ djoma ro vwo ighoro eva na, yọ ta rẹn ihworho akpọ na nẹ aye i ruẹ “oma aranmo rọ djoma na,” nọ ji yẹ oma na “ẹhẹn.”

  Orugba Usun ọrẹ Anglo-American na yọ tuẹn ukoko re se League of Nations rhọ. Egbamwa erọrọ a hobọtua ukoko ọnana. Ọke oru, orodje obọrẹ o rierun na nọ ji homaba ukoko na, nẹ ẹgbukpe 1926 riẹ 1933. Jerẹ Ukoko Okugbe Egbamwa Akpọ na (UN) ra ha wene League of Nations na, na ha ujiri ro fori ra na harẹn Uvie Osolobrugwẹ riẹn.

• Ekete i Baibol Dan. 8:23, 24

  Aruẹmẹrẹn Orodje ro mwuofẹn ọ suẹ “oghwọghọ ọduado.”

  Orugba Usun ọrẹ Anglo-America ọ suẹ oghwọghọ ọduado. Jerẹ udje, uvwre Uvweri Akpọ Ephian Ọreva, United States ọ suẹ oghwọghọ ọduado ra vwa ji mẹrẹn aruiẹ dẹ, ọke ro donron ibọmbu eva ri vwo omẹgbanhon omamọ rhẹ uvuẹn ẹkwotọre ro rhiẹ ọvwreghrẹn ye.

• Ekete i Baibol Dan. 11:31; Rev. 17:3, 7-11

  Aruẹmẹrẹn Aranmo “ọbobare” rọ djoma ro vwo ighoro ikpe na no nẹ ukpotọ ro vwo vwoba na rhe, ọye yẹ orodje ọrẹ ẹrẹnren na. Ọbe i Daniel ọ rionbọrhọ orodje ọnana taghene ọye yẹ “emru aghwa rọ suẹ oghwọghọ na.”

  Orugba Ne fiobarhọ League of Nations uvwre Uvweri Akpọ Ephian Ọreva. Ọke uvweri na o hin, na ha UN “mwu.” Jerẹ oborẹ League of Nations ọ havwọ bi, na ha ujiri ro fori ra na harẹn Uvie Osolobrugwẹ rẹn UN. UN yọ nọ kparehaso ẹga.

• Ekete i Baibol 1 Thess. 5:3; Rev. 17:16

  Aruẹmẹrẹn Egbamwa na ine kperi “ufuoma ọrhẹ omefuon,” “ighoro ikpe na” ọrhẹ “aranmo rọ djoma na” ina kparehaso “igberadja na” ji ghwọghiẹ. Ọrana ọrhọ vrẹn hin, na na ghwọghọ egbamwa na.

  Orugba Egbamwa na ina sabu ta taghene aye i vwo ufuoma ọrhẹ omefuon ne. Orho ru, egbamwa ra hobọtua UN ni na ghwọghọ ẹga efian. Ọnana yẹ ọtonrhọ ukpokpogho rode na. Ukpokpogho rode na ono toba ọke Armageddon ọnọ ghwọghọ ọsoso akpọ na.

• Ekete i Baibol Ezek. 38:11, 14-17; Matt. 24:31

  Aruẹmẹrẹn Gog ọnọ kparehaso otọre ihworho Osolobrugwẹ. Orho ru, emakashe ni ne koko era “djẹha” na.

  Orugba Orodje obọrẹ o rierun na, ọrhẹ obọrẹ ọ hẹrhẹre uvuẹn isuensuon ọrẹ akpọ na ni na kparehaso ihworho Osolobrugwẹ. Ẹkparehaso na ọrhọ tonrhọ ne, uvwre ọke ọrana, ye ne koko ere hẹrhẹre usuẹn era djẹha na riẹ odjuwu.

• Ekete i Baibol Ezek. 38:18-23; Dan. 2:34, 35, 44, 45; Rev. 6:2; 16:14, 16; 17:14; 19:20

  Aruẹmẹrẹn “Ohworho ro siyẹ” “esi ọfuanfon” na no “fikparobọ phẹlẹphẹlẹ,” nyoma rọ ghwọghọ Gog ọrhẹ egba uvweri enẹyen. Ne ‘donron aranmo rọ djoma na rhẹ ẹtẹrhe erhanren,’ na ji ghwọghọ oma ọduado na.

  Orugba Jesu, ro rhiẹ Orodje Uvie Osolobrugwẹ, ono simi ihworho Osolobrugwẹ. Ọye rhẹ awan 144,000 ri ne lelie sun, kugbe emakashe na, ina ghwọghọ egbamwa ri kwomakugbe ọrhẹ ọsoso akpọ Echu.