1-2. Ebẹnbẹn ego yẹ Iseri Jehova buebun a dẹrughwaroghwẹ?

ỌNYIKỌ PAUL o jiririe rẹn Timothy ọrhẹ Ilele Kristi ephian, nẹ aye i wian owian aghwoghwo na vuọnvuọn. (2 Tim. 4:5) O fori nẹ ọwan ephian i ha urhebro i Paul ruiruo. Ọrẹn, ọ bẹn ọkezẹko. Harẹn imizu ukoko na ezẹko, a guọlọ obọdẹn uduefigbere nẹ aye i ki vwobọrhọ owian aghwoghwo na. (2 Tim. 4:2) Jerẹ udje, imizu ukoko na ezẹko e rhirhiẹ ẹkwotọre re fiẹ ughwru rhẹ owian na yanghene da ye ji. Aye e ghwoghwo dedevwo aye i rheri taghene ene fi aye rhẹ ekanron!

² Ihworho i Jehova ina vi dẹrughwaroghwu ebẹnbẹn sansan ri na sabu lẹrhẹ ẹhẹn aye seriotọre. Jerẹ udje, ihworho buebun a wian inọke buebun nẹ aye i sabu hẹrote edamẹ ekrun aye. Aye i guọlọ wian bunrhọ uvuẹn aghwoghwo na, ọrẹn aye e vwo omẹgbanhon aye ina wian uvuẹn ehion ọkprughwre na-a. Awọrọ i vwa sabu wian buẹn uvuẹn ogame i Jehova fọkiẹ emiamo yanghene erhirhiẹ ọho-o; ọkezẹko aye i vwa sabu nẹ oghwa-a. Habaye, awọrọ e roro taghene aye e fiemru uvuẹn obaro i Jehova-a. Mary, * ro rhiẹ omizu ọmase ro rhirhiẹ Middle East, ọrhọ ta: “Ọ guọlọ omẹdamu ọgbogbanhon mie mẹ ne mi sabu sun iroro esọsọ ra lẹrhẹ ẹhẹn mẹ seriotọre. Orho ru, ẹhẹn mẹ no kpokpi mẹ fọkime ọ vwọ lẹrhẹ mẹ vwo ọke ọrhẹ omẹgbanhon mi ne riẹ aghwoghwo-o.”

3. Me ye ne yono kpahen uvuẹn urhomu-ẹmro ọnana?

³ O toro oborẹ erhirhiẹ ọwan ọ havwọ-ọ, Jehova ọnọ sabu yẹ ọwan omẹgbanhon re ne din ebẹnbẹn omobọ re vwori, ji rha ga ye te ekete omẹgbanhon ọwan o teri. Bọmọke ene ki yono kpahen oborẹ i Jehova ono ru ha userhumu rẹn ọwan, jene yono kpahen oborẹ o ru ruẹ i Paul ọrhẹ  Timothy gbanhon nẹ aye i sabu wian owian aghwoghwo na udabọ ebẹnbẹn.

4. Ebẹnbẹn ego yi Paul o rhiẹromẹrẹn?

⁴ Paul o rhiẹromẹrẹn ebẹnbẹn buebun. Ọ ghini guọlọ userhumu i Jehova maido ọke re kpe yi, ha atita fie ọrhẹ ọke re fie rhẹ ekanron. (2 Cor. 11:23-25) Paul ọ tare taghene ọke ezẹko ọ wian gbanhon nọ sabu suẹn iroro esọsọ ro vwori. (Rom. 7:18, 19, 24) O ji diẹn emiamo rọ họhọ ‘uvwẹn rọ ha ugboma yen,’ rọ guọlọre taghene Jehova o ti nie oma ogege.—2 Cor. 12:7, 8.

5. Me yi Paul ọ sabu ru udabọ ebẹnbẹn rọ dẹrughwaroghwu?

⁵ Jehova ọ yi Paul omẹgbanhon nọ sabu wian owian aghwoghwo na udabọ ebẹnbẹn rọ dẹrughwaroghwu. Roro kpahen oborẹ i Paul ọ sabu ru phia. Jerẹ udje, ọke ra ta riẹn taghene o vwo nẹ oghwa rọ havwọ uvuẹn i Rome-e, no ghwoghwo iyẹnrẹn esiri na rhẹ oruru rẹn ihworho buebun, tobọ te ọke ro mevi obaro itu Jew re suẹn. (Acts 28:17; Phil. 4:21,22) O ji ghwoghwo rẹn isodja buebun ra hẹrote yi ọrhẹ awọrọ ri kọn bruie rhe. (Acts 28:30, 31; Phil. 1:13) Uvwre ọke owu na, Paul ọ nyoma ẹhẹn ọfuanfon na ya ileta ri ha userhumu rẹn Ilele Kristi buebun ọke ahwanren ọrhẹ ọke ọwan na. Habaye, udje i Paul ọ bọn ukoko rọ ha Rome gbanhon, rọ lẹrhẹ imizu na “dje uduefigbere phia jeghwai ghwoghwo ẹmro Osolobrugwẹ vabọ ofẹn.” (Phil. 1:14) Dedevwo Paul ọ sabu wian te ekete rọ guọlọ wian te ọkezẹko-o, ọrẹn o ruẹ ekete omẹgbanhon ọnẹyen o teri, nọ ji “lẹrhẹ iyẹnrẹn esiri na riobaro rhọ.”—Phil. 1:12.

6. Lele oborẹ ọ ha 2 Corinthians 12:9, 10, me yọ ha userhumu rẹn Paul wian owian aghwoghwo na?

⁶ Paul ọ mẹrẹnvwrurhe taghene ọ sabu ruẹ oborẹ o ruru uvuẹn ogame i Jehova, fọkiẹ omẹgbanhon i Jehova ọ yẹriẹ. Nọ tare taghene Osolobrugwẹ o ruẹ omẹgbanhon ọnẹyen “gba uvuẹn erhirhiẹ ovwiẹlẹme.” (Se 2 Corinthians 12:9, 10.) Nyoma ẹhẹn ọfuanfon ọnẹyen, Jehova nọ yi Paul omẹgbanhon rọ nọ wian owian aghwoghwo na vuọnvuọn—udabọ ẹkparehaso, erhirhiẹ ekanron, ọrhẹ ebẹnbẹn erọrọ ro rhiẹromẹrẹn.

7. Ebẹnbẹn ego yi Timothy o fikparobọ nọ sabu wian owian aghwoghwo na vuọnvuọn?

⁷ Timothy, ro rhiẹ idama ro lele i Paul  wian owian aghwoghwo na, ọ ji hẹroso omẹgbanhon Osolobrugwẹ nọ sabu wian owian aghwoghwo na. Timothy o lele i Paul ọke rọ nya onya iseseri. Habaye, Paul no djerie riẹ enya erọrọ nọ kon bru imizu na ji ha urhebro rẹn ikoko sansan. (1 Cor. 4:17) Timothy ọnọ sabu roro taghene ọye o mwuovwa-an. Ọkezẹko ọrana yọ soriẹ i Paul ọ ha urhebro riẹn: “Wu vwe jenẹ ohworho owuorowu o nuo sakamu fọkime wẹwẹ uphuphẹ-ẹn.” (1 Tim. 4:12) Habaye, uvwre ọke ọrana, Timothy o ji vwo obẹnbẹn omobọ, nọyẹ “emiamo ra homaphia ọgbọ buebun.” (1 Tim. 5:23) Ọrẹn, Timothy o rheri taghene ẹhẹn ọfuanfon i Jehova ọnọ yẹ ye omẹgbanhon rọ guọlọre, nọ sabu ghwoghwo iyẹnrẹn esiri na ji ha userhumu rẹn imizu ukoko na.—2 Tim. 1:7.

8. Marhẹ i Jehova o ru ha omẹgbanhon rẹn ihworho yi inyenana?

⁸ Inyenana, Jehova ọ yẹ ihworho yi “omẹgbanhon rọ vrẹn ovwan,” neneyo aye i sabu rha fuevwan ga ye. (2 Cor. 4:7) Jene yono kpahen ekwakwa ẹne ri Jehova ọ yẹre ọwan, ri ne ru ọwan gbanhon ji ha userhumu rẹn ọwan sẹrorẹ atamwu kpahiẹn: ẹrhomo, Baibol na, okugbe rhẹ imizu ukoko, ọrhẹ owian aghwoghwo na.

9. Marhẹ ẹrhomo ono ru ha userhumu rẹn ọwan?

⁹ Vwo omẹgbanhon nyoma ẹrhomo. Jerẹ oborẹ a ya rhẹ Ephesians 6:18, Paul o jiririe rẹn ọwan na nẹrhomo vwe i Jehova “ọke ephian.” Ọrẹ ẹkpahenrhọ, Jehova ọnọ yẹ ọwan omẹgbanhon. Jonnie, ro rhirhiẹ i Bolivia, o rhiẹromẹrẹn aruẹ obẹhatua ọrana ọke rọ dẹrughwaroghwu ebẹnbẹn sansan. Aniẹ ọrhẹ eri vwiẹ i Jonnie ni kpomurun omamọ uvwre ọke owu. Jonnie nọ wian gbanhon nọ sabu hẹrote aye awansa. Izu i Jonnie no hwuru, habaye ọ ji ha ọke jijiri ane i Jonnie ọrhẹ ọsẹ ye i ki vwo omọkpokpọ. Ọke rọ karorhọ oborẹ phiare, Jonnie ọrhọ ta, “Ọke mie brudu, oborẹ ọ ha userhumu mẹ yẹ ọrẹ mia ta rẹn Jehova kemru kemru rọ ha ẹhẹn mẹ uvuẹn ẹrhomo.” Jehova ọ yẹ i Jonnie omẹgbanhon rọ guọlọre nọ sabu din. Ronald, ro rhiẹ ọkpako ukoko obẹ i Bolivia, no rhonrin taghene izie o vwo ikansa. No hwuru emrẹ ibiamo owu. Me yọ ha userhumu riẹn din? Ọrhọ ta: “Ọke mia nẹrhomo vwe i Jehova ni mia ta riẹn kemru kemru rọ ha ẹhẹn mẹ. Mi rheri taghene o vwẹruọ erhirhiẹ mẹ ghwẹ awọrọ, tobọ ghwẹ oborẹ mi rherie te dede.” Ọkezẹko, ana sabu vwo ọfiamu, e ji rhe oborẹ ana nẹrhomo kpahe-en. Ọrẹn, Jehova ọ ha use rẹn ọwan na nẹrhomo vwe yi, orhianẹ a sabu dje kpahen oborẹ ọ ha ẹhẹn ọwa-an.—Rom. 8:26, 27.

10. Jerẹ oborẹ ọ ha Hebrews 4:12, mesoriẹ isese i Baibol ọrhẹ eroro kodo ọ ghanren?

¹⁰ Vwo omẹgbanhon nyoma i Baibol na. Jerẹ oborẹ i Paul ọ hẹroso Eyaya Ọfuanfon na nọ yẹ ye omẹgbanhon ọrhẹ urhebro, o ji fo nẹ ruẹ omaran. (Rom. 15:4) Ọke re se i Baibol na ji roro kodo kpahiẹn, Jehova ọnọ sabu ha ẹhẹn ọfuanfon na ha userhumu rẹn ọwan vwẹruọ oborẹ ene ru haye ruiruo uvuẹn erhirhiẹ ra havwọ. (Se Hebrews 4:12.) Ronald, a hunute vrẹn ne, ọrhọ ta: “Oma ọ merhenren mẹ taghene mi vwo uruemru mie se i Baibol na kason kason. Mie roro kodo kpahen iruemru i Jehova ọrhẹ oborẹ ọ hẹrote idibo yi. Ọnana no ru mẹ gbanhan.”

11. Marhẹ i Baibol na o ru yẹ omizu ọmase owu ro mwuomarhọ omẹgbanhon?

¹¹ Ana sabu vwo uruemru ro serhọ kpahen erhirhiẹ ọwan ọke erhe roro kodo  kpahen i Baibol na. Roro kpahen oborẹ ọmase owu rẹ esa ye o hwuru o ru mẹrẹn erere nẹ i Baibol na. Ọkpako ukoko owu nọ ha irorẹdjẹ phia taghene ọnọ sabu mẹrẹn iyono eghoghanren nẹ isese ọbe i Job. Ọke ro se yi, ọke ukaro no brokpakpa brorhiẹn kpe i Job fọkiẹ iroro ọsọsọ ro vwori. Uvuẹn iroro omizu ọmase na nọ ha orhetio riẹn: “Job! Wu vwe vwo iroro esọsọ-ọ!” Ọrẹn, nọ mẹrẹnvwrurhe taghene ọye o ji vwo aruẹ uruemru i Job na. Ọnana nọ ha userhumu riẹn wene iroro yi, jeghwai lẹrhiẹ vwo omẹgbanhon rọ sabu din omiamiamo esa ye ro hwuru na.

12. Marhẹ i Jehova o ru ruẹ ọwan gbanhan nyoma imizu ukoko na?

¹² Vwo omẹgbanhon nyoma okugbe rhẹ imizu ukoko na. Izede ọrọrọ ri Jehova o ru yẹ ọwan omẹgbanhon yẹ nyoma imizu ukoko na. Paul ọrhọ ya taghene o vwo oruru ọye ọrhẹ imizu ukoko na, ina ‘bọn omoma aye gbanhon.’ (Rom. 1:11, 12) Mary, ra hunute vrẹn ne, o vwo omamerhomẹ ro no kwomakugbe imizu ukoko na. Ọrhọ ta: “Jehova ọ ha imizu ukoko na ri vwa tobọ rhe kpahen ebẹnbẹn mẹ ruiruo. Aye a tẹmro urhebro yanghene dje ikadi vwe mẹ, rọ ghwai rhiẹ oborẹ mi guọlọre. Mia ji mẹrẹn userhumu ọke mi rhe lele imizu emẹse ri vwo aruẹ ebẹnbẹn mẹ tẹmro, ni mie yono nẹ oborẹ aye i ruru. Habaye, ekpako na e ji djephia taghene aye i vwo ẹguọlọ kpahen mẹ.”

13. Marhẹ ene ru ruẹ owuowọnwan gbanhon uvuẹn uyono ukoko?

¹³ Usuẹn ekete rọ mai serhọ ra na ha urhebro rẹn owuowọnwan yẹ uvuẹn uyono ukoko. Ọke wu rhe riẹ uyono ukoko, wu na sabu damoma ruẹ awọrọ gbanhon nyoma wu na ta rẹn aye taghene wu vwo ẹguọlọ kpahen aye, ji vwo ọdaremẹro kpahen ewian aye. Jerẹ udje, bọmọke a ki tuẹn uyono rhọ, ọkpako owu re se Peter nọ ta rẹn omizu ọmase owu rẹ esa ye o vwo rhiẹ Oseri Jehova: “Oma ọ merhenren mẹ taghene wu sabu rhe. We mwuegbe emọ awan erhan ji mwuegbe ẹkpahenrhọ.” Oma ọ merhen omizu ọmase na omamọ, nọ tare: “Ọrana ghwai oborẹ mi ghini guọlọ rhon inyenana.”

14. Marhẹ owian aghwoghwo na o ru ha userhumu rẹn ọwan?

¹⁴ Vwo omẹgbanhon nyoma owian aghwoghwo na. Ọke erhe yono awọrọ kpahen irhomẹmro i Baibol na, ọwan a mẹrẹn omẹrhuọnrhuọn sẹ ihworho i kerhọ yanghene aye a kerhọ-ọ. (Prov. 11:25) Omizu ọmase re se Stacy o rhiẹromẹrẹn oborẹ owian aghwoghwo na o ru yẹ ọwan omẹgbanhon. Ọke re le owuọwan usuẹn ihworho ekrun ọnẹyen nẹ ukoko na, ẹhẹn yen no seriotọre, no roro, ‘O vwo ekwakwa mia sabu ru ne mi ha userhumu riẹn bi?’ Obẹnbẹn na ọvo nọ yi Stacy o roro kpahan. Me yọ ha userhumu riẹn nyerẹn ghele erhirhiẹ ọgbogbanhon ọnana? Owian aghwoghwo na! Ọke ro vwobọrhọ ghwoghwo na, nọ tẹnrovi ihworho ri ha okogho ro ghwoghwo ri guọlọ userhumu ọnẹyen. Nọ tare: “Uvwre ọke ọrana, Jehova nọ yẹre mẹ ohworho mie yono ro ruẹ riaro omamọ. Ọrana no ruru mẹ gbanhon omamọ. Oborẹ ọ mai ha userhumu mẹ yẹ owian aghwoghwo na.”

15. Me wu yono nẹ oborẹ i Mary ọ tare?

¹⁵ Fọkiẹ erhirhiẹ aye i havwọ ezẹko ina sabu roro taghene aye i sabu wian buẹn uvuẹn aghwoghwo na-a. Orhiomaran we roro, karorhọ taghene oma ọ merhen i Jehova kpahen omẹdamu we djephia. Rharhumu roro kpahen udje i Mary. Ọke rọ kwa riẹ ekete ra djẹ edjadjẹ ọkpokpọ, no roro taghene ọ sabu wian buẹ-ẹn. Nọ tare, “Uvwre ọke ezẹko, ọsoso oborẹ mi na  sabu ru yẹ ọrẹ mi na ha ẹkpahenrhọ kpeke phia, yanghene se oghwẹmro i Baibol owu, yanghene fiẹ itrati rhẹ ada.” Ọnana nọ lẹrhiẹ roro taghene o mwuovwan te ihworho ra dabu rhe edjadjẹ na djẹ-ẹ. Ọrẹn, no wene iroro yi. Nọ mẹrẹnvwrurhe taghene Jehova ọnọ sabu haye wian, dedevwo ọ vwọ dabu rhe edjadjẹ na djẹ-ẹ. Nọ tare, “Oborẹ i Baibol na ọ tare i lọhọre, aye a ji sabu wene akpenyerẹn ihworho.”

16. Me yọ nọ sabu ha userhumu rẹn eri vwa sabu nẹ oghwa vwo omẹgbanhon?

¹⁶ Jehova ọ mẹrẹn omẹdamu ọwan, o ji vwo ọdaremẹro kpahen oruru re vwo kpahen owian aghwoghwo na, orhianẹ a vwa sabu nẹ oghwa ọwan dede-e. Ọnọ sabu yẹ ọwan uphẹn re ne ghwoghwo rẹn era hẹrote ihworho re kpomẹ yanghene idọkitọ ọrhẹ inọsu. Arha ha oborẹ a wian vwana vwanvwọn oborẹ a sabu wian vrẹn ne, ẹhẹn ọwan ono seriotọre. Ọrẹn, erhe vwẹruọ oborẹ i Jehova o ru ha userhumu rẹn ọwan vwana, ene vwo omẹgbanhon ra guọlọre ne din ebẹnbẹn ephian rhẹ aghọghọ.

17. Lele oborẹ ọ ha Ecclesiastes 11:6, mesoriẹ o fo ne fiomarhọ owian aghwoghwo na, orhianẹ ihworho i vwa tobọ kerhọ-ọ?

¹⁷ Ọwan e rhe usuẹn ikeri urhomẹmro ra wọre ri na họ jeghwai do-o. (Se Ecclesiastes 11:6.) Jerẹ udje, Barbara, omizu ọmase rọ vrẹn ẹgbukpe 80 ne, o ghwoghwo ọke ephian nyoma ifonu ọrhẹ ileta ẹya. Uvuẹn ileta owu rọ yare, no fiẹ Oghwa Odẹrẹ ọrẹ March 1, 2014, ro vwo urhomu-ẹmro na “What God Has Done for You” rhẹ uvuẹn ileta na. Ọye o rhe taghene ihworho ro dje ileta na vwe, esa ọrhẹ ane ri vwe rhiẹ Iseri Jehova ghwomara-an. Aye ni se ọsoso imagazini na. Esa na nọ tare taghene Jehova yọ vi tẹmro riẹn. Esa ọrhẹ ane na ni rharhumu tuẹn uyono ukoko rhọ, ọke oru aye ni ji rhiẹ Iseri Jehova, ọke ẹgbukpe 27 a vrẹn hin. Oma ọ merhen i Barbara omamọ fọkime ileta owu rọ yare ọ rhua omamọ iyẹnrẹn rhe!

18. Me ya na sabu ru ni Jehova o ru ọwan gbanhon?

¹⁸ Jehova ọ yẹ ọwan uphẹn buebun ra na mẹrẹn userhumu omẹgbanhon ọnẹyen. Arha ha ekwakwa ro tiobọnu—jerẹ ẹrhomo, owian aghwoghwo na, okugbe imizu ukoko, ọrhẹ Baibol na ruiruo—ne djephia taghene a hẹroso omẹgbanhon ọrhẹ oruru i Jehova ọnọ ha userhumu rẹn ọwan. Omarana, jenẹ a hẹroso i Jehova ọke ephian, ro vwo omamerhomẹ ro “no dje omẹgbanhon ọnẹyen harẹn ihworho ra ga ye rhẹ ọsoso ọmudu aye.”—2 Chron. 16:9.